Música El director Iván del Prado y la solista Svetla Krasteva protagonicen los conciertos de fin d’añu by asturnet 31 d'avientu, 2004 Música pal cambiu de ciclu. Los directores Iván del Campo y Óliver Díaz, y la solista Svetla Krasteva, protagonicen los dos principales conciertos d’añu nuevu que se cellebren n’Asturies, colos teatros Campoamor y Xovellanos como escenarios n’Uviéu y Xixón. El programa de los recitales, que tendrán les sos respectives répliques el domingu, inclúi pieces de Strauss, Offenbach, Dvorak y Sorozábal. Los uvieínos sedrán los primeros. El Campoamor recibe l’añu nuevu con música a la 1 de la madrugada del 1 de xineru, una hora depués de les campanaes que marquen el fin de 2004. Baxo la dirección del cubanu Iván del Prado por segundu añu, la Orquesta Sinfónica Ciudá d’Uviéu interpretará composiciones de Johan Strauss, Franz Von Suppé y Jacques Offenbach. El conciertu’l Campoamor repetiráse a les 20 hores del domingu 2 de xineru, coles llocalidaes a un preciu inferior al del espectáculu d’añu nuevu: Les entraes cuesten ente 13 y 17 euros pal recital d’esta nueche, y véndense a un preciu de 4 a 8 euros pa la repetición del día 2. En Xixón, pol contrariu, los precios son los mesmos pa los dos pases de la Orquesta Sinfónica Millenium, dirixida por Óliver Díaz y con Svetla Krasteva como solista: Acceder al recital cuesta ente 12 y 20 euros tanto pal conciertu d’añu nuevu -sábadu a les 20,30 hores- como pa la repetición del espectáculu al otru día, domingu, nel mesmu horariu. Nel teatru Xovellanos, Xixón recibirá l’añu 2005 con un programa diversu nel que figuren pieces de Dvorak, Puccini, Sorozábal y Strauss, ente otros autores. Pol so llau, Avilés cellebrará una gala lírica na Casa la Cultura a partir de les 20,15 hores del domingu. 31 d'avientu, 2004 0 FacebookTwitterPinterestEmail
Música Los siguidores de REM merquen 2.000 entraes pal conciertu n’Asturies nos tres primeros díes de venta by asturnet 29 d'avientu, 2004 Dos mil en tres díes. Los siguidores del grupu norteamericanu REM retiraron yá dos millares d’entraes pal recital que la banda va ufrir en Xixón el prósimu 29 de mayu, depués que les llocalidaes se pusieren a la venta nes taquilles del teatru Xovellanos el pasáu domingu. El departamentu de Festeyos enfótase n’escosar les entraes, tal como asocedió yá pa les actuaciones que la formación tien comprometíes, tamién dientro de la xira per España, en Barcelona y Madrid. La llocalidá alicantina de Torrevieja completa la llista de ciudaes españoles que los integrantes de REM visitarán na primavera prósima. Según confirmaron güei responsables de la sociedá Teatru Xovellanos, entidá qu’entama y publicita los conciertos de la progamación pública en Xixón, el ritmu de venta de llocalidaes ye enforma superior al que se rexistra davezu y, tomando en cuenta lo lloñe qu’inda queda la fecha’l conciertu -29 de mayu- fai prever que les entraes s’escosen antes del recital. Les entraes tán a disposición del públicu asturianu, a un preciu únicu de 30 euros, na taquilla’l Xovellanos o al traviés de la so páxina web, en caxeros automáticos, nos establecimientos de la multinacional cultural Fnac -que rexenta un espaciu nel centru comercial Parque Principáu- y nes tiendes de discos Tipo. Web oficial del teatru Xovellanos 29 d'avientu, 2004 0 FacebookTwitterPinterestEmail
Música Dos luthiers familiaricen a los neños cola construcción d’instrumentos musicales nel Xardín Botánicu by asturnet 27 d'avientu, 2004 Música de raigón, en sentíu lliteral. Los luthiers Carlos González y Manuel Paz imparten a partir de mañana nel Xardín Botánicu Atlánticu de Xixón un cursu de construcción d’instrumentos musicales con maera, empobináu a amosa-yos a los más mozos la estrencha vinculación ente los oxetos de la música y los árboles como materia prima. Dambos luthiers impartirán les sos llecciones, n’horariu mañaniegu, ente mañana y el prósimu vienres, nuna actividá que cuenta col auspiciu del Ayuntamientu de Xixón y que s’ufierta a neños y neñes de 9 a 14 años d’edá a un preciu únicu de 30 euros, según precisó esta mañana un responsable de comunicación de la Fundación Municipal de Cultura, Educación y Universidá Popular. En cuatro díes, los asistentes al cursu que se desendolcará nel Xardín Botánicu, allugáu nel entornu de la Universidá Llaboral de Xixón, deprenderán a fabricar instrumentos de cuerda, percusión y vientu a partir de la maera y de pieces concretes d’orixe tamién vexetal, con atención preferente al antiguu virgayu ente l’árbol y la música. Darréu acabe’l cursu, los alumnos podrán llevar pa casa los instrumentos manufacturaos por ca ún d’ellos, depués de familiarizase colos preseos qu’empleguen los artesanos de la música pa facer el so llabor. El taller forma parte d’un ampliu programa d’actividaes municipales entamaes pa da-y puxu al Xardín Botánicu Atlánticu faciéndolu sé de cursos, conciertos y conferencies. 27 d'avientu, 2004 0 FacebookTwitterPinterestEmail
Música Dixebra entra nel estudiu pa grabar el so nuevu discu, que s’ellaborará dafechu en Corvera by asturnet 27 d'avientu, 2004 Dixebra vuelve al estudiu. Los integrantes de la banda avilesina, que cumple 18 años la prósima selmana, empiecen a grabar les bases del que sedrá’l so discu númberu ocho, un trabayu qu’esperen asoleyar como mui tarde nel mes de mayu y que s’ellaborará y mezclará dafechu nos Estudios Tutu de Corvera, rexentaos pol técnicu de soníu’l grupu, Sergio Rodríguez. D’esti mou, Dixebra cellebrará’l so decimoctavu cumpleaños rexistrando énte los micrófonos les bases de batería y baxu d’ente seis y ocho temes de los que formarán el nuevu discu’l grupu, frutu d’una primer esbilla de cantares pa los que la banda yá tien perfilaes la lletra y la música. La entrada nel estudiu tendrá poco que ver cola grabación, en 2002, del anterior discu con temes de nueva creación, ‘Sube la marea’: Los músicos asturianos desplazáronse entós a les instalaciones que rexenta nel País Vascu el guitarrista y productor Kaki Arkarazo y completaron la grabación nuna selmana; nesta ocasión, Dixebra quier trabayar con más calma y opta por facelo en casa. De fechu, la banda creada hai agora 18 años renuncia a la idega inicial de recabar la collaboración d’Arkarazo nel procesu final de mezcles por razones d’operatividá, y ‘parirá’ un discu ellaboráu dafechu n’Asturies, como yá ficiera en trabayos anteriores. Poderosos ‘riffs’ de guitarra, guiños al funky, hestories a ritmu de reggae y contundencia ska marquen les llinies poles que caminen los temes del octavu discu de Dixebra, que cumple la so mayoría d’edá n’escena como únicu referente afitáu y durable de la música rock en llingua asturiana. El grupu vien d’escosar les dos primeres tiraes del so últimu trabayu, el recopilatoriu-llibru ‘Cróniques d’un pueblu’, asoleyáu a finales de 2003. Dixebra escosa les dos primeres ediciones del discu-llibru cola so hestoria, ‘Cróniques d’un pueblu’ 27 d'avientu, 2004 0 FacebookTwitterPinterestEmail
Música La Fnac apuesta pola música de raigón y promociona los nuevos discos d’Héctor Braga y Celia González by asturnet 24 d'avientu, 2004 La bandurria d’Héctor Braga y la gaita de rabil de Celia González, na Fnac. L’establecimientu que la firma rexenta en Parque Principáu acoyerá en xineru sendos recitales de los dos intérpretes asturianos, que tán acabante de publicar nuevos trabayos discográficos como solistes. Pol mesmu escenariu pasarán tamién Los Berrones, Juanjo Respuela, The Punishers y El Sueño de Morfeo. Asina, la zanfonista Celia González -conocida poles sos intervenciones en discos d’Hevia, Nuberu, Muyeres o Ramón Prada- presentará’l llunes 3 de xineru na Fnac el so primer discu en solitariu, ‘Coloradina la guinda’, nel qu’ufre 18 temes interpretaos con gaita de rabil, la mayoría d’ellos cantaos en llingua asturiana. Pol so llau, el músicu y compositor Héctor Braga visitará les instalaciones de Parque Principáu el sábadu 15 de xineru p’amosa-y al públicu les pieces del so trabayu ‘Encoplando’, un discu con alma básicamente tradicional a partir del propiu soníu de la bandurria, instrumentu qu’anguaño ta en procesu de recuperación. La programación musical de la Fnac de Parque Principáu inclúi amás una nueva presencia de Los Berrones, que’l xueves 20 de xineru presentarán el cenciellu ‘Fai deporte’, grabáu hai agora una selmana xunta decenes de deportistes asturianos; el guitarrista de rock progresivu Juanjo Respuela (día 14); The Punishers (día 8) y El Sueño de Morfeo, grupu qu’ufrirá un recital acústicu el 29 de xineru. 24 d'avientu, 2004 0 FacebookTwitterPinterestEmail
Música Llangréu promociona a la xeneración más moza d’intérpretes de tonada, discípulos de Diagmina Noval by asturnet 20 d'avientu, 2004 Sangre nuevo pa la tonada. Siete intérpretes de la xeneración más moza de la canción asturiana, la mayoría d’ellos discípulos de Diagmina Noval, salen güei a escena nel Nuevu Teatru de La Felguera pa pone-y voz a un festival entamáu pol Ayuntamientu de Llangréu que contará amás cola intervención del gaiteru Hugo Noval y el monologuista Fernando Fuertes. La llista d’intérpretes de tonada qu’intervendrán nel certame, toos ellos menores de 30 años d’edá, intégrenla Bibiana Sánchez García, Luis Andrés Collado Carballo, Emi Fanjul Olmo, Fernando Valle Roso, Marisa Valle Roso, Jonatan Mallada Álvarez y Aida Suárez Sánchez, según precisó’l Serviciu de Política Llingüística del Ayuntamientu de Llangréu nuna nota pública. Gran parte de la so participación nel festival d’esta nueche débese a que la veterana cantante de tonada Diagmina Noval, qu’en 2002 abandonó los escenarios depués de tres décades de trayectoria musical, vien collaborando cola oficina de normalización de Llangréu dende la so puesta en marcha, hai agora tres años, pa formar a los nuevos intérpretes de canción asturiana. El III Festival de Tonada Mozu del Conceyu de Llangréu empezará a les 20 hores, con entrada llibre y de baldre, y tará conducíu pol cordinador de la Estaya de Cultura y Política Llingüística del Ayuntamientu mineru, Manuel Rosete. El vienres pasáu, l’estudiosu Ismael María González Arias destacó’l puxu actual de la tonada al recoyer el premiu ‘Enriqueta González Rubín’ de periodismu escritu por un artículu sobro la dimensión culta de la canción asturiana. 20 d'avientu, 2004 0 FacebookTwitterPinterestEmail
Música Un discu con temes tradicionales denuncia’l “sufrimientu antiguu” de les muyeres maltrataes by asturnet 20 d'avientu, 2004 Un aldabonazu nes conciencies pa recordar un problema evidente. El productor musical Lisardo Lombardía definió nesos términos el discu ‘Ta nes nueses manes’, una compilación de temes tradicionales que se presentó esta tarde n’Uviéu, n’edición en comuña del Principáu y d’Amnistía Internacional, pa relatar “hestories del sufrimientu antiguu” de les muyeres maltrataes. Eses pallabres emplegó la responsable d’Amnistía n’Asturies Concepción Fernández Pol, ideóloga del proyectu hai agora más d’un añu y que güei se felicitó del asoleyamientu d’un discu que, precisó, enmárcase dientro d’una campaña mundial en contra de la denominada violencia de xéneru exercida sobro les muyeres. En catorce cortes, el discu conderga la vagancia y agresividá de ‘El mio Xuan’, en versión de Felpeyu; la llercia de les muyeres qu’esperen el regresu del home borrachu en ‘Los trabayos d’esti mundu’, en grabación del grupu Muyeres; los pizcaños que-y da a la so moza el protagonista de ‘Verdiciu’, na voz de Chus Pedro Suárez; o la coacción machista del romeru retratáu en ‘La Mariñana’ por ‘El Presi’. Completen la llista de grupos y solistes presentes nel discu el gaiteru Xuacu Amieva, el conxuntu folk Tejedor, l’intérprete castellanu Joaquín Díaz, el cantor Joaquín Pixán, l’agrupación Xana, Fonsu Fernández y Xuan d’Amandi. L’atropamientu de grabaciones de toos ellos tuvo centralizáu na discográfica que xestiona Lisardo Lombardía, Fonoastur. Dende’l llau institucional que representa l’Alministración autonómica, coeditora’l cd, la directora del Institutu Asturianu de la Muyer, Begoña Fernández, sorrayó que’l discu supón “un preséu útil, por emplegar el llinguaxe universal que ye la música”, pa desaniciar la violencia de xéneru “xustificada pola tradición”. Pol so llau, el director de l’Axencia Asturiana de Cooperación al Desarrollu, Rafael Palacios, censuró les agresiones a muyeres como una “gravísima violación de los drechos humanos individuales y collectivos”. 20 d'avientu, 2004 0 FacebookTwitterPinterestEmail
Música Los Berrones axunten a deportistes d’alta competición na grabación d’un tema alusivu by asturnet 17 d'avientu, 2004 ‘Cantaes’ deportives, pero dientro d’un estudiu. Los miembros del grupu Los Berrones dirixeron ayeri la grabación d’un tema alusivu al deporte que la cadena llocal ‘Tele Oviedo’ emitirá en formatu de videoclip y al que-y pusieron voz, ente otros deportistes d’alta competición, l’árbitru Enrique Mejuto González, el piragüista Manuel Busto y los futbolistes Samuel, Pablo Álvarez, Paúl y Borja Sánchez. Nuna sesión cellebrada nos estudios Eclipse, más de dos decenes de deportistes dexáronse guiar polos integrantes de Los Berrones na grabación del tema ‘Por deporte’, que la banda podría incluyir en futuros trabayos discográficos y que, según les previsiones, sonará en directu nuna gala solidaria que se cellebrará la prósima selmana n’Uviéu. Los Berrones superen les 10.000 copies vendíes del so últimu discu asoleyáu, un cd grabáu en directu n’agostu pasáu na xixonesa playa de Poniente y nel que la parte musical ta completada con imáxenes en dvd y un diccionariu ‘berronil’ de términos emplegaos pola banda. Finalistes del concursu de maquetes de Radio Asturias en 1988, Los Berrones saltaron darréu a la fama col premiu d’esi certame: La grabación d’un ‘single’ nel que s’incluyeron los temes ‘Tais de yogur’ y ‘Nun yes tú’ -primer gran ésitu del pop-rock n’asturianu- y qu’escosó dos tiraes acabante ser editáu. En mayu de 1989, la banda de Tolivia asoleyó’l so primer discu de llarga duración, ‘Voi dicítelo’, que popularizó la música en llingua asturiana a niveles hasta entós inéditos al traviés d’un singular amiestu de modernidá sonora y raigañu rural. Nos siguientes cuatro años, Los Berrones editaron tres trabayos más -‘Si rompe, que rompa’, ‘¿Lo tuyo cómo ye?’ y ‘No, home, non’- y somorguiáronse llueu nun silenciu que nun frañeron hasta 1998, cola publicación del so quintu cd, ‘Da-y fuerte’. Los dos últimos trabayos editaos pola banda antes de publicar el so primer directu foron el recopilatoriu ‘Diez años berrando’ (1999) y ‘República Independiente de Tolivia’ (2003). 17 d'avientu, 2004 0 FacebookTwitterPinterestEmail
Música Tarañu, Skanda, Chus Pedro y Vicente Díaz opten al galardón al meyor cantar nos Premios de la Música by asturnet 13 d'avientu, 2004 Tarañu, Skanda, Chus Pedro Suárez, Vicente Díaz, Deua Dubra y La Tarrancha. Esos son los seis candidatos preliminares de los que saldrán los finalistes del galardón al meyor cantar en llingua asturiana nos IX Premios de la Música, qu’entama l’Academia de la Música y que van entregase en Madrid na primavera prósima. La llista definitiva d’aspirantes ellaboraráse a partir del miércoles. Trátase del segundu añu nel que l’asturianu entra a concursu con categoría propia, y nesta ocasión los designaos en primer instancia como candidatos al meyor cantar n’asturianu publicáu a lo llargo de 2004 son seis temes de mui estremaes calterístiques y estilos: Chus Pedro Suárez concurre con ‘Agora sal a bailar’, un tema d’orixe tradicional con igües del propiu Chus Pedro y de Gabino Antuña. El folk ta presente con ‘Lin’, cantar escritu por Lilian Fernández ya interpretáu por Deua Dubra, mientres que los soníos más contundentes tán representaos por tres bandes moces: Tarañu, Skanda y La Tarrancha. Los primeros concursen col tema ‘Nun nos dexen’, de José Luis Díaz; Skanda presenta ‘Sangre d’ochobre’, d’autoría collectiva; y la banda La Tarrancha entra nel llistáu preliminar d’aspirantes al meyor cantar n’asturianu con ‘Presente indicativu del verbu nun trabayar’. Completa la llista el polémicu vencedor del premiu na so edición del añu pasáu, el compositor Pepín Robles, qu’entra a concursu col tema ‘La Pola de Siero’, interpretáu por Vicente Díaz. En 2003, Robles fízose col galardón a la meyor canción en llingua asturiana por ‘Nunca Máis’, un tema cantáu por Manolo Morán y dafechu cuestionáu como representativu de la música fecha n’asturianu a lo llargo del añu pasáu. El propiu Víctor Manuel San José afirmó n’Asturnews, en xunetu pasáu, que barruntaba que quienes votaron esi tema como meyor cantar nin siquiera lu conocíen. Pol so llau, el vocalista’l grupu Dixebra, Xune Elipe, aseguró hai agora diez díes que “nun nos puen volver a meter el gol del añu pasáu”, n’alusión al controvertíu galardón. Archivu. Pepín Robles y Manolo Morán ganen el premiu al meyor cantar n’asturianu por ‘Nunca máis’ 13 d'avientu, 2004 0 FacebookTwitterPinterestEmail
Música Un artículu del anuariu de la música llama a la renovación del folk con intérpretes meyor formaos by asturnet 6 d'avientu, 2004 Escuchar soníos más diversos, fuera’l denomináu celtismu, y estudiar más hores l’instrumentu que se toca. El críticu Miguel Ángel Fernández fai dambos llamaos nun artículu asoleyáu nel Anuariu de la Música Asturiana 2004, pa evitar la pervivencia de “estructures tan zarraes que cansen de tanta repetición” y renovar con calter xeneral el folk que s’ellabora anguaño n’Asturies. Nun testu tituláu ‘Siempre toca revisión’, Fernández afirma gráficamente que la clave pa desaniciar prexuicios nes formes y nos modelos qu’asonsañen los grupos reside “na dieta musical que caún sigue”, y nesti sen sostién que nel Principáu son necesarios más creadores ya intérpretes “omnívoros, que consuman de too”. Na opinión del críticu musical, responsable del programa ‘El desconcierto’ na emisora uvieína Radio Vetusta, les bandes de folk asturianu “importen primero soníos d’Escandinavia que de Guadalajara, y pue que la cosa nun tenga tanta lóxica”, polo que, asegura, bien podríen importase elementos de los estremaos soníos ibéricos n’idéntiques condiciones a los que s’adopten d’otres zones xeográfiques. Asinamesmo, Miguel Ángel Fernández afirma que fai falta un segundu pegollu pa renovar el fondu y les formes de la música asturiana: Mayor formación nos músicos. O enunciao d’otru mou, más hores d’estudiu, yá que l’afondamientu na técnica de cada instrumentu fai “músicos más completos, preparaos pa bregar con fuercia y soltura”. El coordinador del Anuariu de la Música 2004, el músicu Xune Elipe, presentó el pasáu vienres la publicación, que sal a la cai con una tirada de 2.000 exemplares y repasa les 40 producciones musicales que s’asoleyaron n’Asturies nel añu qu’agora termina. El volume inclúi, en cien páxines y ente otros conteníos, un estudiu sobro l’usu de la llingua asturiana nel grupu ‘Los Berrones’, l’alcordanza d’artistes desapaecíos, estudios etnográficos, un testu sobro la influencia de Conceyu Bable na música asturiana y una guía de contactos con músicos y promotores. Archivu. L’anuariu de la música constata que les producciones tienen escasu éxitu de públicu por falta de promoción 6 d'avientu, 2004 0 FacebookTwitterPinterestEmail