ConvocatoriesFiestes La Comarca de la Sidra convoca una nueva edición de los concursos del programa Creación by asturnet 14 d'agostu, 2006 El programa Creación, de la Comarca de la Sidra, que dende les sos distintes modalidaes trata de promocionar y favorecer les nueves formes d’espresión y creatividá, ta acabante de convocar la Tecer Bienal d’Arte Emerxente Comarca de la Sidra, asina como’l Sestu Concursu de Cortometraxes d’Animación y el so Concursu de Microrrelatos. El plazu pa participar nes tres convocatories va tar abiertu hasta’l 15 d’ochobre. El Concursu de Microrrelatos ta abiertu a mozos menores de 35 años, de cualasquier nacionalidá y residencia, que participen con un másimu de dos microrrelatos escritos en castellanu o n’asturianu y que nun tomen más de 200 palabres o 1.500 caracteres (ensin espacios). El premiu pa esti modalidá ye de 600 euros. Pela so parte, la Tercer Bienal d’Arte Emerxente Comarca de la Sidra ye una ayuda a la producción artística destinada a mozos menores de 35 años residentes o naturales de cualasquier de los conceyos que formen la Mancomunidá. L’ayuda consiste nuna compensación económica de 3000 euros y, pa consiguila, cada artista ha de mandar una Memoria del Proyectu Artísticu. Finalmente, el Sestu Concursu de Cortometraxes d’animación establez dos premios: Premiu al meyor cortu animáu, por un valor de 1000 euros, y un Accesit mención especial del xuráu por 300 euros. Más información de los concursos 14 d'agostu, 2006 0 FacebookTwitterPinterestEmail
ConvocatoriesFiestes Les llárimes de San Llorienzu vuelven a la so cita añal nel Monte Deva by asturnet 11 d'agostu, 2006 El Centru d’Interpretación de la Naturaleza del Monte Deva, xestionáu pola Asociación Astronómica Omega, va abrir les sos puertes güei y mañana, a partir de les diez y media la nueche, con motivu del fenómenu denomináu ‘lluvia d’estrelles Perseidas’, tamien conocíu como ‘llárimes de San Llorienzu’, cuyu nivel másimu d’observación va ser na nueche del sábadu pal domingu. La lluvia de Perseidas ye un eventu añal seguíu por cientos d’observadores d’estrelles que vuelve al cielu esta selmana. Los que quieran esfrutar d’esta lluvia d’estrelles pueden dir a les instalaciones del observatoriu astronómicu municipal xixones nel Monte Deva, que va abrir les sos puertes esta nueche y la de mañana, a partir de les diez y media, con tala fin. Los miembros del colectivu Aula d’Astronomía tán amás faciendo observaciones astronómiques toles fines de selmana del branu dende’l Náuticu, nes que pueden llegar a vese, en condiciones favorables, hasta unos 80 meteoros por hora. 11 d'agostu, 2006 0 FacebookTwitterPinterestEmail
Lliteratura ‘Na boca de todos’ amuesa la poesía que s’escribe nel Occidente d’Asturies by asturnet 9 d'agostu, 2006 La conceyalía de Cultura del Ayuntamientu de Vegadeo, representada pol so titular Juan Santiago, cola collaboración de la Conseyería de Cultura del Principáu, ta acabante d’espublizar ‘Na boca de todos’, una antoloxía poetica que quier amosar la poesía que s’escribe nel Occidente d’Asturies, asina como toles variantes de llingüístiques emplegaes polos autores. Peñerada pola escritora Aurora García Rivas ya introducida con una nota pol filólogu Luis Casteleiro, la obra axunta testos de poetes como Nene Losada Rico, Fredo de Cabexe, Xuan Bello y Victoria Veiguela, ente otros. ‘Na boca de todos’ va ser presentada mañana, a les ocho la tarde, na Casa Cultura da Veiga. ‘Esta mostra de parte da poesía que s’escribe no Occidente d’Asturias (namáis en lengua e variantes vernáculas), ta feita dende os criterios esclusivos do qu’eu entendo por calidá poetica e coa estetica d’agora mesmo. Toda a antoloxía e de poetas vivos vinculados d’algunha maneira co Occidente. A responsabilidá dos poetas escollidos, así como dos poemas, e miña. A da ortografía ou da grafía qu’aparece, e de cada ún dos autores’. Con estes palabres, Aurora García Rivas, responsable de la selección de los testos, introduz los poemes de los ventidós escritores antologaos. Los autores escoyíos ‘Na boca de todos’ son: Álvarez de Ponticella, Alfredo C. (Villayón, 1948), Álvarez Fernández, Arturo (Castropol, 1973), Bello, Xuan (Tineu, 1965), Fernández, L.luis (Xixón, 1962), Fernández, Sabela (Tineu, 1962), Frías Conde, Xavier (Salamanca, 1965), García, Anton (Tineu, 1960), García López, Mª Esther (Valdes), García Rivas, Aurora (San Tiso d’Abres, 1948), González Fernández, Alfredo (Fredo de Carbexe) (El Franco, 1967) , González-Quevedo González, Roberto (Palacios del Sil, Lleón, 1953) , Losada Rico, Nene (Luarca, 1921), Lorences, Taresa (Salas, 1955), Martínez Castro, Jose Ramón (Castropol, 1979) , Riguilón, Naciu’i (Cangas del Narcea), Rojo, Miguel (Tineu, 1957), Suárez Fernández, Xose Miguel (Tapia, 1965), Veiga, Elías (Allande, 1972), Veiguela, Victoria (León,1979), Veiguela Martins, Crisanto (A Veiga, 1959), Velázquez, Alfonso (Tineu, 1956) y Vilareyo, Xaviel (Mieres, 1967). ‘Na boca de todos’ va presentase mañana, a les ocho la tarde, na Casa Cultura da Veiga. Tres del actu, el tenor asturianu Cristobal Blanco y la pianista Laura Martin darán un conciertu pa los asistentes. 9 d'agostu, 2006 0 FacebookTwitterPinterestEmail
Lliteratura ‘Nordés’ de Carmen Guardado Parga gana’l Fernán Coronas de Poesía by asturnet 9 d'agostu, 2006 El XIII Premiu de Poesía Fernán Coronas que cada añu convoca la Sociedá Popular ‘La Regalina’ de Cadaveu foi esti añu pal poemariu que llevaba por títulu ‘Nordes’ de la escritora Carmen Guardado Parga. Guardado, que trabaya como maestra de Primaria y que ye miembru de l’Asociación de Poetes Valdesanos ‘Alfonso X El Sabio’, nun tenía hasta agora denguna obra espublizada. El xuráu del que ye miembru la escritora Nene Losada Rico estimó l’usu de la fala de la escritora de L.luarca, que va recibir el galardón l’últimu domingu d’agostu, coincidiendo coles tradicionales fiestes de La Regalina en Cadaveu. 9 d'agostu, 2006 0 FacebookTwitterPinterestEmail
Lliteratura Héctor Pérez Iglesias presenta en Candás el poemariu ‘Prisión de náufragu’ by asturnet 9 d'agostu, 2006 ‘Nesti so primer llibru, Hector Perez Iglesias escueye alloñase del estrofismu pa proponer un llargu viaxe iniciáticu a traves d’una poesía fecha d’imáxenes sueltes, cercanes a la escritura automática, nes que la ruptura sintáctica, l’acumulación conceptual o la diriva semántica son a crear imáxenes de gran fuerza. El resultáu ye un llibru sorprendente, novedosu, ensin concesiones lexiques, que dexa en quien llee’l posu amargu de la desolación’. Con esti comentariu editorial, Hector Perez Iglesias (Arlós, 1978) presenta güei a les siete y media la tarde na Casa la Cultura de Candás el so primer poemariu n’asturianu. Llicenciáu n’Historia y ganador del premiu Asturias Joven de Poesía na convocatoria del 2003 col poemariu ‘Las tardes baldías’, Hector Perez Iglesias tien ganao n’asturianu dalgunos concursos lliterarios de cuentos como ye’l casu del Art Nalón Lletres o El Tragaluz. Con ‘Prisión de náufragu’, Perez Iglesias entra a formar parte de les files más moces de la poesía asturiana, con una propuesta novedosa y una voz diferente. Enriedador cola palabra y directu nel versu, llevanta poemes a base d’imáxenes precises y llamatives que-y treslladen al llector la sensación del náufragu que s’agarra al so imaxinariu fabulador y señaldosu con tal de sobrevivir. El poemariu va ser presentáu per primer vez esta tarde, na Casa la Cultura de Candás, de mano de la tamien escritora Vanessa Gutierrez. Editáu por Trabe na colección Albera, Perez Iglesias súmase a la xeneración d’autores más mozos que nos últimos tiempos vienen asoleyando les sos primeres obres, llamando bien l’atención de públicu y crítica. Exemplu d’ello son los poemarios recien espublizaos por Pablo Texón, Elías Veiga, Xuan Carlos Crespos, Berto García o Pablo Rodríguez Alonso, que presentó esti martes tamién nel mesmu marcu candasín, acompañáu pol escritor Naciu Varillas, ‘La lluz del nordés’. 9 d'agostu, 2006 0 FacebookTwitterPinterestEmail
ConvocatoriesFiestes Uviéu convoca la IX edición del so concursu de rock by asturnet 7 d'agostu, 2006 L’Ayuntamientu d’Uvieu como patrocinador y la Sociedá Uviedina de Festeyos como organizadora, tán acabantes de convocar el IX Concursu de Rock ‘Ciudad de Oviedo’, que tien como principal intención la promoción de los grupos de música rock locales. El concursu, que se va celebrar na Plaza de Feijoo nos díes 15 al 24 de setiembre y que va tener abiertu el so plazu d’inscripción ente los díes 14 d’agostu y 10 de setiembre, tien como primer premiu l’actuación nes fiestes de San Mateu’07, por un importe de 3.000 euros. Col únicu requisitu de qu’a lo menos ún de los componenetes del grupu sía vecín del conceyu, el IX Concursu de Rock ‘Ciudad de Oviedo’ cunta con otros cuatro premios en metálico de 2.400, 1.800, 1.200 y 600 euros. Les inscripciones pa participar nel certame fáinse na Oficinal Municipal de Turismu ‘L’Escorialín’, na cai Marques de Santa Cruz n’horariu de 10:30h a 14 h y de 16:30h a 19:30h. 7 d'agostu, 2006 0 FacebookTwitterPinterestEmail
Lliteratura Presentación de ‘La lluz del nordés’ del poeta Pablo Rodríguez Alonso by asturnet 6 d'agostu, 2006 ‘La lluz del nordes’ ye’l primer poemariu de Pablo Rodríguez Alonso, un llibru col qu’esti poeta mozu se daba a conocer el pasáu mes d’avientu al facese col prestixosu premiu Teodoro Cuesta de Mieres. L’escritor xixones, autor tamien de dellos estudios d’investigación, va presentar esta obra en Candás mañana martes 8 d’agostu, a les siete y media la tarde, dientro del ciclu ‘Fecho n’Asturies’. El ciclu candasín ‘Fecho n’Asturies’, que naz cola intención d’amosar la producción más nuevo fechu na tierra, tamien va acoyer esti xueves, a la mesma hora, la presentación d’otra primer obra d’un autor mozu, Hector Perez Iglesias. Con ‘Prisión de náufragu’ esti escritor que yá ganare’l premiu Asturias Joven de Poesía en castellanu, estrenase na llingua asturiana completando asina un añu nel que, la poesía asturiana, destacó pola aparición de voces dafechu nueves. Esti xueves, Perez Iglesias va tar acompañáu en Candás pola poeta Vanessa Gutierrez. 6 d'agostu, 2006 0 FacebookTwitterPinterestEmail
ConvocatoriesFiestes L’Ayuntamientu de Mieres convoca la XVI edición del premiu Teodoro Cuesta de poesía by asturnet 2 d'agostu, 2006 L’Ayuntamientu de Mieres ta acabante d’abrir el plazu pa la XVI edición del premiu ‘Teodoro Cuesta’, conocíu como’l galardón más prestixosu na poesía asturiana que cuenta ente los sos premiaos a dalgunos de los poetes más emblemáticos d’anguaño, como Berta Piñán, Xuan Bello, Antón García, Pablo Antón Marín Estrada o Chechu García, ente otros. El ganador, que recibirá un premiu de 4.000 euros, daráse a conocer, como yá ye tradición, a finales del prósimu mes d’avientu. El día 9 de payares, día nel que se cumplen 177 años de la muerte del poeta mierense Teodoro Cuesta, terminará’l plazu de presentación d’exemplares pa la XVI edición d’esti premiu de poesía. Los poemarios, qu’han de ser orixinales y tar escritos n’asturianu, han de presentase n’actual Casa la Cultura de Mieres, na cai la Vega. 2 d'agostu, 2006 0 FacebookTwitterPinterestEmail
Lliteratura El primer festival ‘Fecho n’Asturies’ lleva a Candás lo más nuevo na creacción asturiana by asturnet 1 d'agostu, 2006 El I Festival ‘Fecho n’Asturies’ va llevar a les cais de Candás (Carreño) ente los prósimos díes 5 y 12 d’agostu una amuesa multicultural, pensada col envís de que tolos artistes y creadores qu’anguaño trabayen n’Asturies tengan un espaciu onde amosar les sos obres, bien sían audiovisuales, musicales, teatrales o lliteraries. Asina, lo más nuevo na creacción asturiana va poder esfrutase a lo llargo de la prósima selmana cultural, que va echar el pieslle’l sábadu día 12 con un conciertu de música folk nel que van participar Lliberdón, Chus Pedro, Xera y Skama la Rede. La Tarrancha va ser el grupu encargáu d’estrenar los conciertos del I Festival ‘Fecho n’Asturies’ con una actuación que tendrá llugar esti sábadu a partir de les once la nueche. Xunto cola nueche folk que va pesllar la selmana cultural, el grupu Verde Cannaia completa la ufierta musical del certame candasín, onde’l teatru n’asturianu tien una bona representación de la so producción. Asina, el monologuista Carlos Alba ‘Cellero’, Nun Tris cola obra ‘La vixigona nun tien remediu’ y La Diosa del Sarcasmo con ‘Pachu y Roxina baxen a la villa’ van poner n’escena lo más recien de los sos trabayos. Na sección poetica, Candás acueye la presentación de dos nuevos poemarios de dos autores tamien nuevos na lliteratura asturiana. ‘La lluz del nordes’ de Pablo Rodríguez Alonso, poemariu ganador del Premiu Teodoro Cuesta na so última edición, y ‘Prisión de náufragu’ d’Hector Perez Iglesias, entrambos editaos por Trabe, van cubrir una estaya lliteraria na que tamien se va presentar la revista ‘Remanecer’. 1 d'agostu, 2006 0 FacebookTwitterPinterestEmail
ConvocatoriesFiestes L.lena convoca una nueva edición del so concursu de cuentos by asturnet 1 d'agostu, 2006 L’área de Cultura del Ayuntamientu de La Pola L.lena convoca una nueva edición del so famosu concursu internacional de cuentos, que cuenta col apoyu de la Consería de Cultura del Gobiernu del Principáu d’Asturies. El certame, nel que suelen participar autores d’abondos países europeos y americanos, tien una dotación económica de 3005 euros pal cuentu ganador. Les bases del concursu desixen que la obra presentada tea mecanografiada a doble espaciu y que nun pase de los ocho folios d’estensión. De tema llibre, los cuentos han de ser ineditos, nun pueden tar premiaos por otros concursos y nun han de tener compromisu anterior d’espublización. Les obres han d’unviase a la Casa Cultura de La Pola, faciendo constar los datos personales del autor, la dirección postal y el so númberu de telefonu. 1 d'agostu, 2006 0 FacebookTwitterPinterestEmail