Música Entamal IX Festival Intercélticu del Occidente by asturnet 15 d'agostu, 2005 El Festival Intercelticu del Occidente, entama mañana en Tapia con un programa repletu d’actos. El director xeneral de Promoción Cultural y Política Llingüística, Carlos Madera, va tar presente mañana miercoles, 17 d’agostu, na presentación d’esti festival, que se va durar hasta’l 22 d’agostu. L’eventu empieza coles actuaciones de «Bagad Landerneau», de Gran Bretaña; los asturianos «Camín de Fierru»; «Williamwood Pipe Band», d’Escocia; «Corisco», de Galicia, y el grupu alemán «Volkstanzgruppe». Amás, mañana va proyectase un vídeu sobre hórrios y paneres y ta prevista una conferencia sobre «bandurries» asturianes, que va presentar el profesor de la Escuela de Música del Ayuntamientu de Tapia Jose Ángel Llanera. De nueche va cellebrase la primera verbena tradicional asturiana, na que dos bandes van interpretar música ambientada nel sieglu XIX. El xueves va poder disfrutase de diversos talleres, como’l de dances bretonas, el taller d’harpa y la esposición «Rabeles en España». Amás de la conferencia sobre «Folclore Galicia siglo XXI». La nueche tará llena de folk, coles actuaciones de «Save The Dragons», d’Escocia, y «Folixa», de l’Arxentina. El fin de selmana entama’l viernes con una conferencia sobre la gaita n’Alemania y otra sobre la flauta dientro del mundu del folk, con Xurto Santote, amás d’un cursu de percusión de Manuel Durán. De nueche la música cuerre a cargu de los asturianos «Rum» y los gallegos «Xistra de Coruxo». Mentes qu’l sábadu habrá un taller de danza gallega, un taller de gaita escocesa y un pasacais de les bandes del festival. Esti día tendrá llugar la «nueche máxica», con cuatrocientos artistes y la representación del grupu de teatru «Margen». El domingu toca un gran conciertu de música folck nel que van participar «Les Batinses» de Canadá, los asturianos «Llangres» y los escoceses «Breizh Le Cam». El programa termina’l llunes con un cursu d’averamientu a la gaita asturiana. Nel actu de presentación de mañana van tar presentes tamien l’alcalde de Tapia, Gervasio Acevedo; el director del FID´O, Martín Fernández; el director del centru territorial de TVE n’Asturies, Pedro Alberto Marcos, y un representante de Cajastur, Sociedá Xeneral d’Autores y el diariu La Nueva España. Esti festival, organizáu pola Banda Gaites Marino Tapiega, vien cellebrándose dende hai nueve años con gran esitu, convirtiendose asina nun referente de la música celta. 15 d'agostu, 2005 0 FacebookTwitterPinterestEmail
Música VI Festival Internacional de piano Millennium by asturnet 11 d'agostu, 2005 Xixón va cellebrar ente los díes 16 y 28 d’agostu la sesta edición del Festival Internacional de Piano Millennium. Esti festival ta organizáu en torno a una combinación de conciertos, clases individuales y clases maxistrales d’altu nivel. Esti eventu va volver a traer a destacaos pianistes internacionales, pertenecientes a istituciones tan conocíes como la Juilliard School of Music de Nueva York o’l Conservatoriu Peabody de Baltimore, que compartirán los sos conocimientos con músicos rexonales, nacionales y internacionales. El públicu tamien va tener la posibilidá de formar parte d’esta esperiencia musical, gracies a los diferentes recitales de pianu, música de cámara y conciertos con orquesta que se van facer en diferentes escenarios de la ciudá nos trece díes que va durar. La concepción del festival, que naz nel añu 2000, surde del prestixosu profesor norteamericanu Julian Martin, que ve en Xixón el sitiu perfectu pa xuntar a profesores, interpretes y pianistes mozos de gran nivel y cellebrar unes xornaes alredor del pianu. Los profesores que parcipiten nesti proyectu son Dominique Weber, Blanca Uribe, Boris Slutsky, Marc Durand, Yoheved Kaplinsky, Robert McDonald, Stephen Prutsman o Meejung Yoo. A ellos añedense nel apartáu concertísticu xóvenes virtuosos del pianu como Jenny Lin (Taiwan), Eric Zúber (Suiza), Christopher Falzone (EEUU), Pallavi Mahidhara (EEUU), Su-Yen Jeon (Corea), Maria McGarry (Irlanda), Sarah Rhee (Canadá) o Hector J. Sánchez (España. Nesti tiempu que dure’l festival van facese diferentes conciertos: Dominique Weber (17 d’agostu, Colexata de San Xuan Bautista), Sungeun Kim (21 d’agostu, Teatru Xovellanos), Heidi Hau (23 d’agostu, Colexata de San Xuan Bautista), Darrett Zusko (25 d’agostu, Colexata de San Xuan Bautista), Ciclu Xóvenes Solistes Internacionales (20 y 27 d’agostu, Centru de Cultura Antiguu Istitutu) y la clausura del festival (28 d’agostu, Teatru Xovellanos). 11 d'agostu, 2005 0 FacebookTwitterPinterestEmail
Música Ruxidoiru Allandés by asturnet 10 d'agostu, 2005 La Banda de gaites ‘El Rapigueiro’ prepara pal vienres 2 de setiembre, en La Puela, una folixa na que va participar La Bandina, Los Llanzones, La Bandina’l Tombo, DRD, Ambás, el Rapigueiro y Aires del Palo, grupu allandes al que se-y va facer un homenaxe. El vienres día 2 de setiembre, nel Salón d’Actos del Ayuntamiento d’Allande, Xose Antón ‘Ambás’ va dar una conferencia sobre ‘La tradición musical no conceyu d’Allande’, a les seis de la tarde. Nel actu participará Diego Pangua (flauta y gaita) y Dolfu Fernández (vigulín y cánticos). A les siete la tarde la banda de gaites El Rapigueiro, acompañada por distintes bandines tradicionales, fadrán un pasacais. A les diez y media, nel Cafe Centro, entamarase un conciertu homenaxe al grupu allandes ‘Aires de Palo’, nel que participarán, amás de los homenaxeaos, la Bandina, Los Llanzones, La Bandina’l Tombo, el trío de Folk DRD, el Rapigueiro, Ambás y otros músicos invitaos. 10 d'agostu, 2005 0 FacebookTwitterPinterestEmail
Música Sones de Danza na Plaza Mayor de Xixón by asturnet 10 d'agostu, 2005 L’espectáculu artísticu-musical d’Alberto Varillas y Xaime Arias, Sones de Danza, axunta n’escena a más de 50 interpretes nun espectáculu únicu que va poder vese esti sábadu, 13 d’agostu, na Plaza Mayor de Xixón, a partir de les 9 la nueche. L’espectáculu, organizáu pol Departamentu de Festeyos del Teatru Xovellanos, fai un percorríu pola música y la danza asturiana na que participarán músicos, cantantes y baillarines d’agrupaciones que tienen collaborao nel despegue de la música tradicional asturiana na ciudá, como la Banda de Gaites ‘Noega’ o los grupos de baille ‘Jovellanos’, ‘Aires de Asturias’ y ‘Xareu’. Nel escenariu van acompañalos otres formaciones asturianes, como’l grupu de folk ‘Ástura’, interpretes de tonada, profesores de diferentes Conservatorios de Música y músicos de diferentes bandes y orquestes sinfóniques d’Asturies. El llibretu del espectáculu ye del escritor Ismael González Arias, quien fai tamien de narrador. Cola so voz, el conciertu xira alredor del Xixón en fiesta a lo llargo de los últimos tres sieglos, partiendo de testos de escritores como Xosefa Xovellanos (s.XVIII), Teodoro Cuesta (s.XIX) y María González (s.XX). Amás, cuenta con dalgunos de los nomes más destacaos del panorama musical asturianu d’anguaño: Anabel Santiago (voz), los hermanos Valle Roso (voces), María Álvarez (acordeón), Manuel Cordero (percusiones), Michael Lee Wolfe (mandolina), Ton Prendes (bajo), Eduardo López (violín), Sara Illana (flauta travesera), Eladio Díaz (saxo tenor) o Pablo Merino (tuba), asina como los citaos Alberto Varillas, a la voz y a la gaita, y Xaime Arias, al pianu. 10 d'agostu, 2005 0 FacebookTwitterPinterestEmail
Música Mus viaxa a Saint Maló pa participar nel festival La Route du Rock by asturnet 10 d'agostu, 2005 El grupu Mus actúa esti domingu 14 d’agostu en Saint Malo (Bretaña) dientro de la programación del festival La Route du Rock. Ye la primera vez qu’unos músicos que s’espresen n’asturiano participen na que ta considerada la más prestixosa atopada de música independiente de Francia y una de les cites irrefugables del calendariu européu de macrofestivales. La Route du Rock vien celebrándose na ciudá bretona de Sain Malo dende va quince años y pelos sos escenarios pasaron artistes como Yann Tiersen,The Kills, Air, Death in Vegas, Portishead, Suede, Mogway, Muse o Blur. Nesta ocasión xunto a Mus van actuar bandes tan importantes como Sonic Youth, Polyphonic Spree, The Cure , Animal Collective o Mercury Rev. El duo xixonés, formáu por Mónica Vacas y Fran Gayo, viaxen a Saint Maló colos sos músicos habituales: Pedro Vigil, Iker González y Manu Molina. Tres les sos actuaciones na Costa Oeste de los USA, Taiwan y Rusia (en Marzu d’esti mesmu añu) ésta va suponer la cuarta ocasión na que Mus salga más alló de les nuestres fronteres pa ufiertar la so música. El duu xixonés editó en 2004 el so tercer LP, “Divina Lluz” col sellu Acuarela. Anguaño trabayen nos cantares d’un discu que nuevu que va empezar a grabare nunos meses. Mus protagoniza xunto a los supervivientes asturianos de los Neños de Rusia el documental en procesu de rodaxe “L’Escaezu” de Juan Luis Ruíz y Lucía Herrera. La Route du Rock 10 d'agostu, 2005 0 FacebookTwitterPinterestEmail
Música Avilés fai La mar de ruido by asturnet 9 d'agostu, 2005 El Parque del Muelle d’Aviles va ser el sitiu onde se cellebre’l ciclu de música “La mar de ruido”. Nesti festival, qu’entama’l vienres día 12, diferentes formaciones asturianes van amosar soníos que van dende’l reagge al trash-metal, pasando pol hip-hop. El ciclu entama esti vienres a les diez de la nueche col soul de ‘Los Redentores’. Tres d’ellos, actuarán los uvieínos ‘Die 13’, a los que seguirá el rock & roll avilesín de ‘Taxi 666’. La primer nueche zarraránla los ‘Groovie Doobie Groove’, con soníos qu’entemecen el acid-jazz, el rock instrumental y el funk. La nueche del sábadu van ser los cangueses ‘Ermitaños del Río’ los que, a les once la nueche, abran la fiesta cola so fusión del reagge y del rock. ‘Babylon Chat’ presentará’l so últimu disco ‘Baile de disfraces’, pa siguir col harcore de ‘Posesión’, formación de Salinas, y el trash-metal de ‘Omenomejodas’. L’últimu día del festival cuerre a cargu del hip-hop de ‘Stoned Atmosphere’, el grupu revelación de Blimea, qu’abrirán l’espectáculu a les ocho la tarde. Pa terminar colos grupos locales ‘Redemptor’ y ‘Bad to Worse’. 9 d'agostu, 2005 0 FacebookTwitterPinterestEmail
Música Judith Howarth cantará nel conciertu de la OSCO by asturnet 9 d'agostu, 2005 La soprano uvieína Ana Nebot tenía previsto participar nel conciertu que la OSCO va dar mañana, a les ocho la tarde, na Basílica de la Catedral d’Uvieu, pero tuvo que cancelar la so participación por problemes de salú. Nel so llugar, va cantar la soprano Judith Howarth. El programa que se va interpretar nesti conciertu, incluyíu nel II Festival de Música, será la Serenata Partita de Mozart y el Stabat Mater de Pergolesi. La Orquesta Sinfónica d’Uvieu va tar dirixida por Jean-Marc Burfin y, xunta Judith Howarth, va cantar el contratenor xapones Yoshikazu Mela. Per otra parte, l’ayuntamientu d’Uvieu anuncia’l treslláu del ‘Teatru nel Fontán’, qu’esta nueche representa la obra ‘Dinero’ d’Aristófanes, al Teatru Filarmónica debíu al mal tiempu. La función entamará a les once la nueche, como taba previsto, y la entrada va ser llibra hasta completar l’aforu. 9 d'agostu, 2005 0 FacebookTwitterPinterestEmail
Música Orishas y Martirio con Chano Domínguez traen los sos ritmos calecíos a la nueche xixonesa by asturnet 9 d'agostu, 2005 Los cubano-parisinos Orishas actúen esta nueche nel escenariu de la Playa Poniento dientro del programa de conciertos de baldre de la Selmana Grande xixonesa. Martirio y Chano Domínguez son la otra ufierta d’esti miércoles 11 nel escenariu de Plaza Mayor. El tríu de hip-hop formáu por Roldán, Ruzzo y Yotuel lleguen esta nueche al escenariu de Poniente cola so mestura inequívoca de ritmos urbanos y sones con raigañu de la tradición cubana. La cita ye a les 23,00 hores. A les 21,00 na Plaza Mayor la cantante sevillana Martirio y el pianista Chano Domínguez desplegarán una propuesta non menos fronteriza de temes musicales. Zuco103 y la so propuesta de mestizaxe ente la samba brasileira, el funk y el dub actúen manaña xueves nel escenariu de la Plaza Mayor y en Poniente la cantante Marta Sánchez. 9 d'agostu, 2005 0 FacebookTwitterPinterestEmail
Música Helder Moutinho lleva a la Plaza Mayor de Xixón el so fadu con tastu atlánticu by asturnet 8 d'agostu, 2005 Helder Moutinho, una de les voces más representatives del nuevu fadu portugués, va actuar esta nueche na Plaza Mayor de Xixón dientro los conciertos de baldre de la Selmana Grande. La cita ye a les 21,00. Orishas y Martirio con Chano Domínguez van tar mañana nos dos escenarios de les fiestes playes. El fadista Helder Moutinho vien a presentar los cantares del so últimu discu “Luz de Lisboa”,inspiráu na ciudá onde descubrioó los sones señaldosos de los cantantes tradicionales d’Alfama. Nacíu en Oeiras en 1949, Moutinho representa l’anovación del fadu portugueés ensin renunciar a les sos esencies más pures. 8 d'agostu, 2005 0 FacebookTwitterPinterestEmail
Música Flamenco y Heavy abren la Selmana Grande by asturnet 7 d'agostu, 2005 La Selmana Grande de Xixón escomienza esta nueche coles actuaciones de Falete na Plaza Mayor y del grupu Saratoga nel escenariu de Poniente. Ye l’escomienzu d’unos festeyos nos que la música pa tolos públicos combínase con guiños a los sones menos comerciales. Los siguientes en pasar pelos escenarios de la Plaza Mayor y Poniente van ser mañana martes el fadista portugués Helder Moutinho y Andy & Lucas. Orishas, Martirio + Chano Domínguez, The Herbaliser y Ernesto Tito Puente’s Big Band van ser otres de les actuaciones presentes na Selmanona playa. Los conciertos de baldre van escomenzar a les 21,00 hores na Plaza Mayor y a les 23,00 na Playa de Poniente. 7 d'agostu, 2005 0 FacebookTwitterPinterestEmail