Música Anabel Santiago presenta’l so discu d’homenaxe a Diamantina Rodríguez by asturnet 9 d'avientu, 2005 La cantadora Anabel Santiago va presentar esti martes 13 en Fnac un nuevu trabayu discográficu nel que canta por Diamantina Rodríguez nun homenaxe a la gran dama de la tonada. Arreglos modernos y fidelidá a la tradición vocal asturiana son les característiques d’esti discu producíu por Michael Lee Wolfe y Ismael González Arias pa un sellu independiente de Mieres.. Nel álbum “Anabel Santiago canta por Diamantina Rodríguez” (Males Pulgues Records) colaboren cola cantante músicos como’l propiu Lee Wolfe a la guitarra, Jacobo de Miguel al pianu, María Álvarez al curdión, Manuel Cordero y Sergio García nes percusiones, Sara Illana a la flauta y pícolo, y Pablo Merino a la tuba. El nuevu discu d’Anabel Santiago contién trece temes del repertoriu tradicional de Diamantina ente ellos “El que llora por amores”, “Arboleda bien plantada”, “Currucucú” y “Eno alto’l Puertu Ventana”. La presentación va ser esti martes 13 a les 20.00 hores nel Forum de Fnac-Asturies. 9 d'avientu, 2005 0 FacebookTwitterPinterestEmail
Música Sabina suspende tolos sos conciertos en Xixón by asturnet 9 d'avientu, 2005 Na tarde d’esti vienres de seronda, depues de que la mañana sirviera pa que dalgún descambiare la so entrada d’ayeri pa un conciertu de sábadu qu’enxamas se va cellebrar, dábase l’anuncia de que Sabina cancelaba tolos sos conciertos n’Asturies. La indignación de xuru que se dexará sentir ente los sos seguidores na fin de selmana. Un comunicáu del Xovellanos pasaes les cincu la tardi dexaba esconsoñaos a los aficionaos que depues d’una cola interminable na nuechi más fría de la seronda o de pagar muncho más del doble o’l triple del preciu quedaben ensin conciertu. La falta de profesionalidá en tol procesu del artista que reconoció’l xueves la so culpa pol mal estáu de la voz xuntase a los problemes na venta entraes que repetíen el despropósitu d’hai un tiempu n’Uvieu cuando la reserva d’entraes asgaya pa protocolu xeneró una situación asemeyada. Otra vuelta,Sabina ye’l centru del gran ciñu que se-y tien n’Asturies y del despropósitu organizativu qu’elli mesmu cola so actitú dexa afitáu. 9 d'avientu, 2005 0 FacebookTwitterPinterestEmail
Música Sabina llega al Xovellanos de Xixón metanes el xaréu pola escasez d’entraes by asturnet 7 d'avientu, 2005 El cantante Joaquín Sabina actúa esti xueves 8 y el viernes 9 nel Teatru Xovellanos de Xixón embaxo’l cartel de ‘Nun hai entraes’. La escasez de localidaes p’asistir a los conciertos del músicu xienense por mor del repartu d’invitaciones de baldre y lo limitao del aforu del coliséu playu ficieron a los responsables municipales del eventu entainar la contratación d’otra actuación de Sabina pal prósimu domingu 11 d’avientu. Alrodiu de mediu centenar d’entraes punxéronse a la vienda nes taquielles del Xovellanos pal nuevu conciertu marcáu después de que s’esgotaren les localidaes pa los díes 8 y 9. En xunto Joaquín Sabina va tocar a lo llargo de tres xornaes nuna de les ciudaes del estáu onde cuenta con más siguidores. 7 d'avientu, 2005 0 FacebookTwitterPinterestEmail
Música Anabel Santiago actúa nel Teatru de L’Entregu cola so nueva banda by asturnet 2 d'avientu, 2005 Anabel Santiago presenta esti viernes 2 nel nuevu Teatru de L’Entregu los temes del repertoriu interpreataos cola so banda actual, ente ellos dalgunos de los conteníos nel so últimu discu: “Torner” y nel nuevu que ta a puntu d’aparecer y nel que rinde tributu a la voz de Diamantina Rodríguez. La cantadora xixonesa va actuar nel Entregu acompañada a la guitarra por Michael Lee Wolfe, María Älvarez al acordión y Sergio García nes percusiones. El conciertu escomienza a les 20.00 hores. Santiago presenta’l prósimu 13 d’avientu nel Forum de Fnac el so discu “Anabel Santiago canta a Diamantina Rodríguez”. 2 d'avientu, 2005 0 FacebookTwitterPinterestEmail
Música Pablo Moro vuelve a Asturies pa dar dos conciertos by asturnet 25 de payares, 2005 El cantautor uvieín Pablo Moro, que ta acabante de sacar el so primer discu “Emepetreses” cola compañía Carlito Records, vuelve esta fin de selmana a Asturies pa dar un conciertu en Mieres y pa participar nel Rastrillu de “Nuevu Futuru”. ‘Emepetreses’ ye un discu producíu por David Ferrero y nel que Moro cuenta cola collaboración de Melendi nún de los temes, ‘María’. El primer single, del que presentó va poco el vidiuclip promocional, ye ‘Álbumes de fotos’. Los conciertos de Moro esta fin de selmana son en dos formatos diferentes. El sábadu dará un conciertu a les ocho y media la tarde en formatu electricu, acompañáu por una banda, nel Colexu Santiago Apóstol de Mieres, dientro del programa del Castañazu 2005. Mentes qu’esa mesma nueche, a les doce, participará conciertu beneficu del Rastrillu de “Nuevu Futuru” con una actuación en formatu acústicu. 25 de payares, 2005 0 FacebookTwitterPinterestEmail
Música La OSPA participa nun conciertu-homenaxe a Severo Ochoa by asturnet 24 de payares, 2005 La Orquesta Sinfónica d’Asturies participa mañana, xunta’l coru de la Comunidá de Madrid y el coru de Radiotelevisión Española, nun conciertu en Madrid dientro de los actos d’homenaxe al premiu nobel asturianu, Severo Ochoa, al que van dir la conseyera de Cultura, Comunicación Social y Turismu, Ana Rosa Migoya, y el director xeneral de Promoción Cultural y Política Llingüística, Carlos Madera. El recital forma parte del XVI Ciclu de Conciertos nel Auditoriu Nacional de Música qu’entama la Universidá Politecnica de Madrid, teniendo esti añu un calter especial, al sirvir pa la conmemoración del centenariu del nacimientu del Nobel asturianu Severo Ochoa. La obra elixida ye la novena sinfonía de Beethoven, que va ser interpretada pola soprano Iwona Sobotka, la mezzosoprano Marisa Martins, el tenor Joan Cabero y el baxu Robert Holzer. La OSPA va tar dirixida pol so titular Maximiano Valdes, y los coros por Jordi Casas y Mariano Alfonso, respectivamente. El conciertu que se fai a beneficio de la Fundación Carmen y Severo Ochoa, va escomenzar a les 22.30 hores na Sala Sinfónica del Auditoriu Nacional de Música. 24 de payares, 2005 0 FacebookTwitterPinterestEmail
Música Salen a la venta 2000 entraes pa los conciertos de Sabina en Xixón by asturnet 23 de payares, 2005 Mañana xueves, 24 de payares, a les doce la mañana, pónense a la venta 2000 entraes pa los conciertos que va dar Joaquín Sabina nel Teatru Xovellanos de Xixón, los díes 8 y 9 d’avientu, a les ocho y media la tarde. Joaquín Sabina, en xira promocional del so últimu discu ‘Alivio de luto’, llega a Xixón pa dar dos conciertos, los díes 8 y 9 d’avientu, nel Teatru Xovellanos. Pa ello, mañana, a les doce la mañana, salen a la venta unes 2000 localidaes. Les taquilles va tar abiertes de siguío hasta les ocho la tarde. P’acelerar el procesu solo se va aceptar el pagu n’efectivu en taquilla. A partir de les dos van poder mercase les entraes tamien al travies de rede de caxeros Cajastur y del telefenu 902106601. Sabina va tar acompañáu polos músicos de siempre, Olga Román, García de Diego, Pancho Varona, nuna xira que depues de pasar per Xixón, marcha pa Granada, pa terminar con tres conciertos en Madrid, los díes 20, 21 y 22 d’avientu. 23 de payares, 2005 0 FacebookTwitterPinterestEmail
Música El Cuartetu de Moscú toca esta tarde nAvilés acompañáu de la pianista Ana Polonsky by asturnet 23 de payares, 2005 La Sociedá Filarmónica Avilesina ofrez, a partir de les ocho la tarde , nel auditoriu municipal de la Casa Cultura un conciertu del Cuartetu de Moscú, acompañáu especialmente pa esta ocasión de la reconocida pianista rusa Ana Polonsky. El Cuartetu de Moscú, fundáu en 1990, ye habitual de los principales festivales internacionales como los de Rumanía, Italia, Inglaterra o España. Mentes que la pianista Ana Polonsky ye una artista reconocida que l’añu pasáu llevó a cabu un existosu conciertu basáu nes obres de Mozart, nel que compartió escenariu con “Los Virtuosos de Moscú”. El programa del conciertu d’esta tarde n’Aviles inclúi temes como’l «Cuarteto número 1» de Sostakovich, el «Cuarteto número 1» de Tchaikovski y «Cuarteto para violín, viola, violonchelo y piano, en La mayor» de Johannes Brahms. 23 de payares, 2005 0 FacebookTwitterPinterestEmail
Música La Pola toca les castañueles by asturnet 22 de payares, 2005 La Casa Cultura de La Pola Siero acueye hasta esti sábadu, día 26, una exposición de castañueles entamada pol colectivu “Fausto Vigil”, que recopila 135 exemplares de diferentes modelos, maderes y tayes propiedá del folclorista Fernando de la Puente. El presidente de l’asociación “Fausto Vigil”, qu’estos díes cellebra la so Selmana Cultural, presentó la muestra, que cuenta con pieces de primeros del sieglu XX, na Casa Cultura de La Pola, onde va poder visitase hasta’l sábadu día 26 de payares. La exposición completase con dos talleres que se van facer mañana miercoles y el xueves, nos que se va enseñar l’usu, el conocimientu y perfeccionamientu del toque de les castañueles; un instrumentu de percusión de vital importancia na tradición asturiana, que diba heredándose ente xeneraciones como prenda de compromisu. 22 de payares, 2005 0 FacebookTwitterPinterestEmail
Música Chus Pedro y Toli Morilla falen de la música asturiana nes xornaes culturales de la JSO by asturnet 21 de payares, 2005 Los cantantes Chus Pedro y Toli Morilla van falar esti llunes 21 de la situación na que s’afaya la creaciòn musical en llingua asturiana como primer actu d’unes xornaes culturales entamaes poles Xuventudes Socialistes d’Uviéu. Les actividaes van siguir a lo llargo de tola selmana. La Casa’l Pueblu d’Uviéu va ser el sitiu onde se celebre a les 20.00 hores l’alcuentru con Chus Pedro y Toli Morilla embaxo’l títulu: “Música y lletres”. El martes 22 nel Aula Magna de la Universidá Leopoldo Tolivar Alas y Santos Coronas van falar de “El Grupu d’Uviéu y Uviéu, ciudá de les lluces” a les 13.30 hores del meudía. La Santa Sebe va acoyer los díes 23 y 24 a les 20.00 hores la proyección de les películes “Cielu enriba Berlín” de Win Wenders y “El Séptimu Sellu” d’Ingman Bergman, respectivamente. Les actividaes d’esta selmana cultural van rematar el sábadu 26 con un conciertu nel Bar La Calleja de la Ciega de Esmussein + Bad to worst + Ulan Bator. 21 de payares, 2005 0 FacebookTwitterPinterestEmail