Música L’eclecticismu de Kevin Johansen llega a Xixón na xira de ‘City Zen’ by asturnet 9 de xunetu, 2006 La música eclectica y billingüe de Kevin Johansen (Fairbanks, Alaska) llega esta nueche al escenariu principal de la Selmana Negra de Xixón a partir de les once la nueche. Fíu de madre arxentina y padre norteamericanu, col so últimu trabayu ‘City Zen’ confirma la so heterodoxia, depues d’algamar el reconocimientu internacional al travies del discu ‘Sur o no Sur’. Dende’l so primer discu d’oro en 1985 col grupu Instrucción Cívica, Kevin Johansen lleva trabayando col mestizaxe estilísticu y llingüísticu, camín d’una personalidá que, a poco y a poco, foi definiendose hasta recibir el reconocimientu de la crítica internacional. En Nueva York, Johansen creare’l grupu The Nada, que tamien lu acompaña na xira del discu ‘City Zen’, y ellí foi habitual nos escenarios de CBGB, Knitting Factory y Mercury Lounge, antes de tornar a Buenos Aires nel añu 2000 p’afincase definitivamente na so ciudá materna. Col títulu de The Nada, graba’l so primer álbum nel añu 2000 y a finales del 2002 saca ‘Sur o no Sur’, nel que confirmaba un estilu eclecticista, onde primen los diferentes elementos de les músiques americanes col soníu pop, nel que xuega col mestizaxe estilísticu y llingüísticu col que se crió. L’añu 2003, Johansen fai xires per l’Arxentina, España, Estaos Uníos y toa America Llatina, enllenando’l míticu Teatru Gran Rex y llogrando tres candidadutres a los Premios Grammy Llatinos de la Música. Esta nueche, a les once, nel escenariu principal de la Selmana Negra de Xixón, Johansen va presentar l’espíritu urbanu del so últimu trabayu, ‘City Zen’. 9 de xunetu, 2006 0 FacebookTwitterPinterestEmail
Música El Memorial Silvino Argüelles reconoz a los más mozos de la canción asturiana by asturnet 9 de xunetu, 2006 El Memorial al históricu cantante Silvino Argüelles, convocáu pola Conceyalía de Cultura del Ayuntamientu de Mieres, axuntó a diferentes periodistes y espertos en canción asturiana pa votar les diez meyores voces del añu, asina como al meyor gaiteru acompañante, que vinieron a reconocer a los más mozos de la tonada. Liliana Castañón, Anabel Santiago, Rosario González, Sergio Argüeros, Jeremías Cuello, Laudelina Hortal, Urbano Prieto, Jose Manuel Robledo, Marisa Valle y el gaiteru Óscar Fernández, recibirán la distinción que se-yos va entregar el prósimu día 7 de setiembre. El xuráu de la XX edición, formáu por periodistes y espertos en canción asturiana, valoró’l fechu de qu’ente los escoyíos ‘la media d’edá sía baxa, lo que denota que tamos nel meyor momentu de la tonada asturiana, nel que coinciden voces d’una brillantez impresionante y d’una mocedá arrolladora’. El xuráu convocáu tuvo formáu polos cantantes históricos de tonada Diamantina Rodríguez y Alfredo Canga. Rellacionaos col mundu de la tonada participaron el presidente de l’Asociación d’Interpretes de la Canción Asturiana, Julio Cesar Baragaño, el presidente de l’Asociación d’Interpretes del Valle del Nalón, Jose Luis Rozada, el director del Departamentu de Musicoloxía de la Universidá d’Uvieu, Jose Antonio Gómez, el Director del Archivo de la Música Asturiana, Fernando Ornosa y, per parte de la familia de Silvino Argüelles, el so nietu, el periodista Alberto Argüelles. Igualmente, como periodistes de los diferentes medios de comunicación intervinieron Miguel Fernández, Saul Fernández, Próspero Morán y Celso Fernández. 9 de xunetu, 2006 0 FacebookTwitterPinterestEmail
Música La Escuela de Música de la Fundación Príncipe d’Asturies atiende pa la música folk by asturnet 5 de xunetu, 2006 Con más de trenta profesores de nueve países europeos diferentes, la Escuela Internacional de Música de la Fundación Príncipe d’Asturies, presentó ayeri’l so programa de cursos de branu que van tener llugar ente los díes 1 y 12 d’agostu nel Conservatoriu Superior de Música Eduardo Martínez Tornet d’Uvieu. Yuri Nasushkin, director artísticu de la escuela, anunció como gran novedá nos cursos les clases maxistrales de curdión, gaita asturiana y conxuntu folk. El claustru de trenta profesores de diferente procedencia van ponen clases qu’abarquen tola partitura orquestal sinfónica, cuartetu de cuerda, música de cámara, conxuntu de vientu y repertoriu de cantu. Amás, el programa de la escuela tamien inclui tres conferencies dictaes Javier Fernández Vallina, Luca Chiantore y Ramón Sobrino. Les inscripciones pa estos cursos maxistrales terminen el prósimu día 24 de xunetu. 5 de xunetu, 2006 0 FacebookTwitterPinterestEmail
Música Pereza trai esti sábadu a Xixón ‘Los amigos de los animales’ by asturnet 5 de xunetu, 2006 El prósimu sábadu 8 de xunetu, a partir de les diez de la nueche, el grupu de pop-rock Pereza llevará al Palaciu los Deportes de Xixón la xira del so últimu discu que lleva por títulu ‘Los amigos de los animales’. Nesti álbum, Leiva y Ruben, componentes de Pereza, axuntaron les collaboraciones especiales de dalgunos amigos como Bunbury, Amaral, Carlos Tarque, Delinqüentes, Alba Molina, Niño Josele, Deluxe, Sidonie, Iván Ferreiro, Ariel Rot, Quique González, Christina Rosenvinge, Burning, Coque Malla, Kevin Johansen y Pastora. Dende la so formación Pereza tien espublizaos cuatro álbumes que los consolidaron como ún de los grupos relevación del panorama musical español. En 2001 aparecía’l so primer trabayu homónimu, al que siguieron ‘Algo para cantar’ nel añu 2003 y ‘Animales’ en 2005. ‘Los amigos de los animales’ foi la so consagración en 2006 como una de les principales bandes de pop-rock d’anguaño. 5 de xunetu, 2006 0 FacebookTwitterPinterestEmail
Música L’Aquasella va traer a Michael Mayer y Alexander Kowalski a la so cita agostiega by asturnet 5 de xunetu, 2006 L’Aquasella ye la cita más importante del añu n’Asturies pa los amantes de la música ellectrónica. Organizada por La Real, el festival va mantener la so doble programación con un escenariu de techno y una carpa pa otres tendencies, ampliando la so xornada a dos díes (4 y 5 d’agostu) nos que van actuar artistes de prestixu internacional como Ritchie Hawtin, Michael Mayer y Alexander Kowalski. Nesti nuevu certame d’Aquasella, que na última edición axuntó a más de quince mil persones na rodiada de Les Arriondes, habrá quince debutantes amás de los veteranos Ben Sims, Óscar Mulero, Pepo, Alberto Palacios, Higinio, Valentino Kanzyani, Rudy y British Murder Boys. De prestixu internacional, The Youngsteers y Scan X tocarán en directu, asina como Terence Fixmer, Dominik Eulberg, Tobias Thomas, Silversurfer o los citados Kowalski y Mayer. Dende España los convidaos a esti macrofestival son Cycle, Glamour y Boris Divider. 5 de xunetu, 2006 0 FacebookTwitterPinterestEmail
Música La Bandina’l Tombu y Tejedor ponen música a les fiestes de Llantero by asturnet 4 de xunetu, 2006 El prósimu sábadu día 8 de xunetu, a partir de les once la nueche, les tradicionales fiestes de Llantero en L’Entregu (Samartín del Rei Aurelio) van celebrar una nueche dedicada a la música folk fecho n’Asturies, que va tener como protagonistes a La Bandina’l Tombu, colos sones más tradicionales, y a los internacionales hermanos Tejedor. La Bandina’l Tombu ye una formación que recupera l’estilu de música popular de les antigües bandines tradicionales qu’amenizaben les fiestes de los pueblos asturianos. Xiringüelos, saltones, fangandos, xotes y muñeires que van abrir la nueche de folk entreguina de la mano de músicos de prestixu como Pepín de Muñalen, Dolfu Fernández y Marga Lorences, ente otros. Pela so parte, los hermanos Tejedor tán anguaño trabayando na preproducción del so tercer discu d’estudiu, tres del conocíu Llunáticos, pal que tienen previsto que vea la lluz a finales d’esti añu. El grupu ta formáu por Jose Manuel Tejedor, encargáu de les flautes y les gaites, Javier Tejedor, al curdión diatónicu, caxa, percusión, gaita y flauta, y Eva Tejedor, que pon la voz y les percusiones a esta banda de reconocimientu internacional. 4 de xunetu, 2006 0 FacebookTwitterPinterestEmail
Música El cantautor Alfredo González presenta les canciones del so prósimu discu ‘Escrito en servilletas’ by asturnet 4 de xunetu, 2006 El cantautor turones Alfredo González va ufiertar esta selmana dos conciertos n’Asturies nos que presentará les canciones del que va ser el so prósimu discu, ‘Escrito en servilletas’ que saldrá a la cai nel 2007. El xueves día 6 nel Teatru Filarmónica y el vienres día 7 nel forum de la Fnac, de Parque Principado, van ser los llugares onde esti mozu compositor va preestrenar el nuevu trabayu. El conciertu del Teatru Filarmónica, que va tener llugar mañana xueves a les ocho y media la tarde, ta dientro de la presentación de l’axenda musical d’Asturies nel que, amás d’Alfredo González, van actuar Manu León (guitarra flamenco) y el cuartetu de cuerda ‘Divertimento’. Tres del discu ‘La vida de alquiler’, Alfredo González va presentar esti vienres día 7, a les siete y media la tarde, nel forum de la Fnac, en Parque Principado, les canciones de lo que va ser el so prósimu discu, ‘Escrito en servilletas’. Pesie a la so mocedá, Alfredo González yá empezó a tocar el pianu con siete y años y componiendo dende hai más de cinco. Tien grabaes tres maquetes, tocao en locales tan míticos como’l Libertad 8 y compunxo temes pa otros cantantes como Tina Gutierrez. Anguaño, ta preparando una serie de conciertos cola cantante Esther Fonseca. 4 de xunetu, 2006 0 FacebookTwitterPinterestEmail
Música Suspéndese en La Pola Siero’l IV Crossroad Festival by asturnet 3 de xunetu, 2006 Tres delles selmanes intentando solucionar los problemes qu’impedíen la cellebración del IV Crossroad Festival, la organización facía esti día l’anuncia de que se vía obligada a cancelar el festival por motivos téunicos y económicos. El certame diba cellebrase esti añu nel Mercáu Nacional de Ganaos de La Pola Siero, el 22 de xunetu, con un únicu día d’actuaciones con cuatro bandes: Bo Diddley, The Fabulous Thunderbirds, Marcia Ball y Los Enemigos. Nes tres ediciones anteriores, cellebraes en Xixón, el Crossroad axuntara a más de 20.000 aficionaos, na so mayoría procedentes de fuera d’Asturies. Agora, del festival va caltenese únicamente’l conciertu especial de reunificación de Los Enemigos na so formación orixinal, que se pasa a la sala Albéniz de Xixón, el 22 de xunetu, coles entraes a 17/20 euros. Per otru llau, la sala gijonesa Louie Louie caltien la so programación de conciertos, que continúa esti miércoles, 5 de xunetu, cola actuación de las bandas de surf y rock and roll Straitjackets y Neandertals, toes les dos llideraes por Eddie Angel. Les localidaes tarán a la venta de forma anticipada a un preciu de 15 euros y costarán 18 en taquilla. El conciertu entaará a les 21 hores. 3 de xunetu, 2006 0 FacebookTwitterPinterestEmail
Música El cantautor Pablo Valdés estrena’l so amanecer musical nel Fórum de la Fnac by asturnet 29 de xunu, 2006 Pablo Valdes (Uvieu, 1985) ye un mozu cantautor que mañana, a les ocho y media la tarde, va estrenar el so amanecer musical con un esclusivu conciertu acúesticu nel Fórum de la Fnac de Parque Principado (Siero). Marcáu pola influencia de Bruce Springsteen, Pablo Valdes recozse heriede mesmo a nivel musical como lliterariu d’autores como Bob Dylan, Joaquín Sabina, Bryam Adams y Quique González. Les canciones de Valdes tan marcaes pola carretera, la nueche, l’agua y el deseu de llibertá. Con “Detrás de cada amanecer”, el conciertu que dará mañana na sala Fórum de la Fnac de Parque Principáu, Valdes amuesa ser un gran talentu que, pesie a la so mocedá, va dar muncho que falar na escena musical asturiana. 29 de xunu, 2006 0 FacebookTwitterPinterestEmail
Música Carlos Rubiera vuelve a los sos oríxenes con Canciones de Xixón by asturnet 27 de xunu, 2006 Diez canciones inédites, La Capitana y Sardinera de Xixón conformen el nuevu discu de Carlos Rubiera, un discu temática llocal pero espirítu universal. El nuevu trabayu discográficu del cantautor xixonés presentóse ayeri martes al meudía nel Antiguu Institutu Xovellanos de Xixón cola presencia de dalgunes autoridaes y númberoses personalidaes del mundiu de la cultura asturiana, ente los que taben Ramón d’Andrés, Carmen Rua, Mercedes Álvarez… Rubiera entamó escusándose pola falta de presentador pal actu, énte lo que Daniel Rodríguez, periodista de la Cadena Cope en Xixón, llevantóse pa dicir una pallabres improvisaes sobre la figura de Carlos Rubiera, nes que desveló que conoció pola so amistá común con Xulio Ramos yá nel añu 1972 y al que dende entós vien escuchando, según dixo. Carlos continuó la presentación falando de la so yá llarga carrera musical y de les circustancies que lu llevaron a grabar esti discu, ‘Dempués de tener preparáu un discu cola versión asturiana de delles pieces llíriques de los grandes clásicos europeos y ver que les bones pallabres de les autoridaes quedaben namás que n’eso, decidíme a grabar un discu coles pieces sobre Xixón qu’escribiere nos últimos años’. Rubiera destacó na presentación, como Xixón fuere y ye una temática mui recurrente pa los artistes y nomó a dalgunos de los autores más conocíos, como Pachín de Melás, Piñole, Marola, Alfonso Camín, El Presi, Xuan Xosé Sánchez Vicente como exemplu d’ello. Canciones de Xixón ye según el propiu autor ‘un trabayu sorprendente’ y ye que Rubiera afirmó que siempres-y presta sorprender a los sos siguidores con coses nueves ‘Agora qu’anunciare un discu llíricu y esperaben daqué más asemeyao a Viaxe al silenciu (el so anterior discu), faigo esti discu de canción llixera, préstame dexalos desorientaos’. El diseñu de la caratula ye de Manuel Asur y ta pensáu ‘pa llegar a los turístes que vengan a Xixón, a los propios xixoneses y sobre too, a los nuevos emigrantes asturianos, a los que dedico una canción qu’espero que se convierta nel so himnu: Buscando’l norte’. Inclúi un llibretu coles lletres y l’interior ta decoráu con semeyes del Xixón d’enantes. Carlos Rubiera tuvo un recuerdu mui especial pa los miembros de Felpeyu que perdieron la vida esta selmana pasada y pa los superviviente: ‘N’Asturies reconozse más la muerte que lo que se faiga en vida, dalgún día pondránme a min una cai, pero mientres que viva tendránme igual d’escaecíu, como diz mio ma: A burru muertu, la cebada al rau’. L’actu terminó cola escucha de dellos temes d’esti trabayu nos que podemos atopar dende una canción de tonada hasta un regee o un tangu. Un discu que cuntó con dalgunos de los meyores músicos d’Asturies pa la so realización y que supón la vuelta de Carlos Rubiera a una música más popular, pero como siempres, cola calidá que-y pon la que munchos consideren la voz más importante del Surdimientu. 27 de xunu, 2006 0 FacebookTwitterPinterestEmail