Lliteratura La Selmana Negra vendió 41.000 llibros, un 25 por cientu más que na edición anterior by asturnet 18 de xunetu, 2004 La XVII Selmana Negra pieslla con mayor consumu de lliteratura que n’años anteriores. Según los organizadores del certame policiacu, qu’ayeri finó en Xixón depués de nueve xornaes de programación continua, nel recintu ‘negru’ despacháronse esti añu un total de 41.070 llibros, lo que supón un 25 por cientu más de ventes que na edición de 2003. Tala cifra val-y a la organización de la Selmana pa calcular que los llibreros aconceyaos nel eventu policiacu vendieron al públicu más de 4.100 llibros diarios y despacharon una media estimada de 455 exemplares cada hora. L’aumentu nes ventes prodúzse nuna edición que’l director de la Selmana Negra, Paco Ignacio Taibo II, presentara como especialmente atenta a la lliteratura frente al gran potencial festivu y gastronómicu’l certame. Nesti sen, 131 autores d’estremaos xéneros asoleyaron la so esperiencia en creación lliteraria nes presentaciones y alderiques qu’acoyó l’eventu ‘negru’, procedentes d’España, Arxentina, Cuba, México, Alemania, Francia, Estaos Xuníos, Italia y Grecia. No que cinca a l’asistencia de públicu, los númberos nun cambien sustancialmente respecto a años anteriores. Los responsables del certame de lliteratura policiaca cifren n’alrodiu d’un millón de persones la cifra total de visitantes que pasaron pol recintu de la Selmana Negra nos nueve díes completos que se prollongó’l certame. 18 de xunetu, 2004 0 FacebookTwitterPinterestEmail
Lliteratura Orsi asegura en Xixón que tola lliteratura ye ‘negra’ n’Arxentina by asturnet 14 de xunetu, 2004 Tola lliteratura ye necesariamente de xéneru ‘negru’ nuna Arxentina retratada pola impunidá de los poderosos y la corrupción política y social. L’autor arxentín Guillermo Orsi, que güei recibe na XVII Selmana Negra el Premiu Umbriel de novela policiaca, describió asina esta mañana la situación de la narrativa nel so país y defendió la escritura como una “ferramienta provocadora” qu’alita la reflexón. Asina desendolca’l conceptu de la lliteratura Orsi na novela ganadora del Umbriel, ‘Sueños de perro’, una trama allugada nel Buenos Aires d’anguaño a mediu camín ente l’agobiu y la sensación collectiva de fracasu. Al traviés d’un taxista con dotes de filósofu que pescuda l’asesinatu d’un collaciu de la mocedá, Guillermo Orsi entemez pasáu y presente nun ambiente puramente policiacu. Tala hestoria, resumida n’esencia pol propiu autor como una “novela del desencantu”, valió-y al escritor sudamericanu pa ganar el Premiu Umbriel de narrativa policiaca 2004 y algamar con ello un doble premiu: La primer publicación d’una de les sos obres -la ganadora- n’España y los 15.000 euros en metálico con que ta dotáu el galardón, que recibirá nel recintu de la Selmana a partir de les 20 hores. La presentación al públicu de ‘Sueños de perro’, que va conducir el tamién escritor y ex presidente’l Principáu Pedro de Silva, antecederá a un alderique tituláu ‘Desinformación y poder’ al rodiu del 11-M, previstu pa les 21,30 hores, y un conciertu de la cantautora Bebe y Carlos Jean, a partir de les 23 hores. 14 de xunetu, 2004 0 FacebookTwitterPinterestEmail
Lliteratura Taibo declárase arguyosu de pertenecer a una xeneración d’escritores “mui críticos col capitalismu” by asturnet 13 de xunetu, 2004 Paco Ignacio Taibo II, escritor y director de la Selmana Negra de Xixón, declárase arguyosu de pertenecer a una xeneración de lliteratos “enforma críticos col capitalismu” y exalta la escritura como “la guerra por otros medios”. L’autor mexicanu presentó güei en Xixón la so última entrega policiaca, continuación de les aventures ‘negres’ del detective de ficción Héctor Belascoarán. Caminante nes caleyes delirantes del Méxicu más rebelde, Taibo desplega humor negru nuna nueva novela qu’escuende, a partes iguales, una dura crítica a la corrupción nel poder mexicanu y una venganza personal polo asocedío na revolución qu’esi país centroamericanu vivió en 1968: “Utilizo la mio lliteratura como arma pa dir a la escontra de la política del mio país”, resumió l’escritor afincáu en Xixón. De la so pluma salió una saga -la que güei presentó nel marcu de la XVII Selmana Negra- capaz de facer a los llectores grapar el capítulu onde muerre’l protagonista y d’arrinca-y al sobriu diariu francés ‘Le Monde’ el festivu titular “¡Viva Paco!”. Amás de coordinar la edición en cursu de la Selmana, que fina’l prósimu domingu, Taibo prepara yá la so prósima obra, una novela hestórica al rodiu de la figura de Pancho Villa. Na otra presentación lliteraria de la mañana, Mateo Sagasta revisó n’alta voz la so obra ‘Los ladrones de tinta’, una narración ambientada nel Madrid de la dómina de Cervantes na que la busca d’un personaxe del Quijote desata un viaxe por una ciudá infestada d’inmigrantes, ‘pícaros’, soldaos y refugayes de basoria. Nel so programa pa güei, la XVII Selmana Negra inclúi la presentación al públicu -la d’esta mañana foi énte los medios de comunicación- de ‘Belascoarán llega a España’, a les 19 hores; la presentación de ‘Cementerio de papel’, a les 21,30; y un conciertu de la Orquesta de Cámara’l Nalón, a partir de les 23 hores. 13 de xunetu, 2004 0 FacebookTwitterPinterestEmail
Lliteratura Robert Wilson reivindica en Xixón el xéneru policiacu porque “toos somos espíes” by asturnet 12 de xunetu, 2004 Toos somos espíes y echamos la vida nuna mentira constante, representando papeles distintos acordies con cada situación. L’escritor británicu Robert Wilson, que presenta na XVII Selmana Negra de Xixón la so última novela, ‘En compañía de extraños’, defendió güei esi argumentu nuna comparecencia pública na qu’aseguró que vivimos a la gueta de que los nuesos actos seyan verosímiles. L’autor británicu, qu’anguaño reside en Portugal depués de percorrer Asia y África y de vivir un tiempu en Grecia, presentó la so obra más reciente como frutu d’un interés personal por afondar nes rellaciones humanes y debuxar un escenariu hestóricu nel que toos son perdedores: La Lisboa y el Berlín de les boquiaes de la Segunda Guerra Mundial. Nesi contestu coinciden una matemática y espía y l’agregáu militar de la Legación alemana, personaxes que teyen una narración a la gueta d’un amor inverosímil nun mundu onde naide nun se pue enfotar en naide. Robert Wilson tien previsto mantener un alcuentru col públicu a partir de les 20,30 hores nel recintu de la Selmana Negra, cuyu programa inclúi pa güei un conciertu de los xixoneses Manta Ray a les 23 hores, un alderique previu sobro la Revolución d’Ochobre de 1934 na carpa de Radio Kras y una amuesa de curtiometraxes premiaos nel Festival de Curtios d’Avilés. 12 de xunetu, 2004 0 FacebookTwitterPinterestEmail
Lliteratura Markaris defende la narrativa ensin implicación emocional del autor y pon a Brecht como exemplu by asturnet 11 de xunetu, 2004 Distancia respecto a lo que s’escribe y una ‘fotografía’ mental previa. El novelista griegu Petros Markaris, que participa na XVII Selmana Negra de Xixón, defendió güei esos dos elementos como fundamentales na narrativa y puso como exemplu al lliteratu alemán Bertolt Brecht, del qu’ensalzó la so capacidá pa contar coses ensin implicase sentimentalmente nelles. Según Markaris, qu’esti mediudía mantuvo un alcuentru en Xixón colos medios de comunicación, lo visual ye clave na so concepción de la novela, yá que declara que “necesita una imaxe pa empezar a escribir”, y esi pensamientu formuláu n’imáxenes permíte-y desendolcar depués una hestoria marcando les distancies ente les emociones del autor y les ringleres que van saliendo del so maxín. Enforma críticu cola izquierda d’anguaño, de la qu’opina que “yá nun esiste y róba-y les sos idees a la drecha”, Petros Markaris aprovechó la so estancia n’Asturies pa llanzar un llamáu contra los vieyos izquierdistes que traicionen los sos principios p’arriquecese y algamar poder, un tipu lliterariu al que l’autor griegu -y dedica la so última novela, ‘Suicidio perfecto’, titulada nel orixinal griegu ‘El Che suicidóse’. Esa ye la obra que Markaris vien a presentar a la Selmana Negra, una “hestoria social contada dende’l Mediterráneu”, según definición del propiu autor, y poro prósima al estilu de la narrativa del fallecíu Manuel Vázquez Montalbán, al que’l certame policiacu xixonés va dedica-y un actu d’homenaxe el prósimu vienres na presentación póstuma de la so novela ‘Milenio’. Petros Markaris, autor tamién de les narraciones negres ‘Noticias de la noche’ y ‘Defensa cerrada’, participará a partir de les 19 hores de güei nun alderique guiáu pol escritor Justo Vasco na denominada carpa l’alcuentru de la Selmana Negra. 11 de xunetu, 2004 0 FacebookTwitterPinterestEmail
Lliteratura La Selmana Negra abre les sos puertes reivindicando’l valor de la pallabra by asturnet 9 de xunetu, 2004 Les ciudaes edifíquense con pallabres, no con lladriyos. El director de la Selmana Negra, l’escritor Paco Ignacio Taibo II, escoyó esa metáfora constructiva pa echar a andar la XVII edición del certame policiacu, qu’a partir de güei vive en Xixón el so primer fin de selmana y que los sos organizadores defenden como un “espaciu de llibertá y fiesta abierta y gratuita”. Na apertura oficial del eventu, que se cellebró a media tarde d’ayeri nel Antiguu Institutu Xovellanos, Taibo fizo un llamáu en favor de la lliteratura como un “equipu que xuega en primer división”, frente a quienes la conciben como un arte menor, y proclamó’l gran valor que, al so xuiciu, tien la escritura “en tiempos escuros de simplismu y vulgarización de la vida al traviés d’una televisión infame”. Yá na presentación pública de la XVII Selmana Negra, a finales de xunu, los responsables del certame anunciaren un refuerzu de la so apuesta pola lliteratura nesta edición del certame, pero eso nun significa renunciar al so potencial festivu: Según aseguró nel actu d’apertura el presidente autonómicu, Vicente Álvarez Areces, la escritura ye “preséu fundamental pal cambiu social”, pero la Selmana supera lo puramente lliterario pa convertise nuna fiesta abierta y gratuita pa que cada quien escueya libremente lo que-y pete. Eso esplica en gran parte la previsión que’l presidente llanzó sobro la marcha, albidrando que la XVII edición del eventu policiacu atrayerá al so recintu, na oriella’l ríu Piles, aprosimadamente a un millón de persones. La llegada’l ‘tren negru’ -tresporte especial nel que viaxaron dende Madrid gran parte de los más de 150 autores que tomen parte nel certame- coincidió, a media tarde d’ayeri, cola apertura al públicu del recintu’l festival, de cuyu relieve dan una idea les cifres: Un espaciu de 87.000 metros cuadraos, 35 puestos de llibreríes, 60 establecimientos hosteleros, 75 alcuentros con escritores y más d’una decena de conciertos. Colos güeyos puestos en reforzar la so vertiente lliteraria, la Selmana Negra 2004 incorpora como novedá respecto a ediciones anteriores un supermercáu de llibros nel que podrán mercase volúmenes al pesu y un concursu de pesca d’una reproducción de Rufu, la mascota l’eventu, que tendrá como premiu el regalu d’un conxuntu d’obres lliteraries. Nel trescursu’l festival policiacu, cuyu programa musical estrenó la pasada medianueche la orquesta cubana NG La Banda, analizaránse la novela política, el cómic, el fotoperiodismu y la poesía, con un homenaxe previstu al escritor fallecíu Manuel Vázquez Montalbán y la presencia del norteamericanu Alan Furst, el británicu Robert Wilson, l’arxentín Guillermo Orsi, el griegu Petros Markaris y los españoles Fernando Martínez Laínez, Jorge Martínez Reverte y José Luis Muñoz, ente otros autores. Amás, publicaráse un númberu diariu del periódicu oficial del festival, ‘A Quemarropa’. Nel so primer fin de selmana, el certame, dirixíu pol escritor mexicanu afincáu en Xixón Paco Ignacio Taibo II, tien programaos alderiques sobro cómic y lliteratura pantástica, un alcuentru con Alan Furst (sábadu, 20 hores), una velada poética na madrugada’l domingu y los conciertos de Long Riders y el gaiteru asturianu Xuacu Amieva. Programa íntegru na web oficial de la Selmana Negra 9 de xunetu, 2004 0 FacebookTwitterPinterestEmail
Lliteratura Un organismu internacional distingue un llibru de García Oliva pola so promoción de valores “humanos” by asturnet 5 de xunetu, 2004 Les lletres asturianes reivindiquen el so altor. La Comisión Católica Española de la Infancia, un organismu internacional con sé na llocalidá suiza de Xinebra integráu por filólogos, periodistes ya educadores, destaca nuna llista de diez llectures encamentaes ‘El barco de los locos’, la primer novela en castellán del xixonés Vicente García Oliva, veteranu autor lliterariu en llingua asturiana. L’organismu, vinculáu a la Comisión Episcopal d’Apostoláu Seglar, premia dende 1962 aquelles obres pa neños y rapazos que, al so xuiciu, destaca por promover valores “humanos, lliterarios y cristianos”. Amás de conceder esi galardón, que na edición de 2004 correspondió-y a ‘El herrero de la luna llena’, de María Isabel Molina, la Comisión asoleya una denominada llista d’honor con otres nueve obres encamentaes, en cuyu puestu númberu 4 figura esti añu la novela de García Oliva. Pesie a que la distinción nun tien dotación económica, ta considerada de gran prestixu na estaya de la lliteratura infantil y xuvenil, xéneru nel que s’enmarca ‘El barco de los locos’. Según la sinopsis ellaborada pol organismu de signu católicu, la novela de Vicente García Oliva ta especialmente recomendada pa rapazos mayores de 14 años y ye “un canciu, mui bien escritu, a la entrega de los que saben dar lo meyor d’ellos mesmos a los que sufren”. La obra qu’agora resulta distinguida internacionalmente ta publicada na colección xuvenil de la Editorial Pearson/Alhambra nel añu 2003, y analiza les dificultaes de la convivencia al traviés de la metáfora d’un barcu nel que s’embarquen families d’estremada procedencia. Vicente García Oliva (Xixón, 1944), participante nel rellatu collectivu que publica Asturnews na so sección Lletres Sociedá Coperativa, foi ún de los miembros orixinarios del grupu de la entidá Conceyu Bable en Xixón y la so aportación pionera a la lliteratura infantil y xuvenil n’asturianu cuayó n’obres como ‘Les aventures de Xicu y Ventolín’, ‘Fontenebrosa: el reinu de los silentes’ y la más reciente ‘El mercaderu de tormentes’. Web de la Comisión Católica pa la Infancia 5 de xunetu, 2004 0 FacebookTwitterPinterestEmail
Lliteratura Naciu Varillas y Pablo Texón ganen el VII Concursu de cuentos pola oficialidá by asturnet 28 de xunu, 2004 Naciu Varillas, Pablo Texón Castañón y Pablo Suárez Fernández. Esi ye’l palmarés, por esi orde, del VII Concursu de cuentos pola oficialidá Bimenes 2004, entamáu pol Ayuntamientu yerbatu y cuya entrega de premios abrirá esti xueves el programa d’actos de la VIII Fiesta de la Oficialidá. Según l’acta del xuráu -emitida na llocalidá de San Xulián el pasáu 25 de xunu-, el rellatu ‘Flacures’, obra’l periodista de Radio Llangréu Naciu Varillas, algamó’l primer premiu, dotáu con 755 euros, mientres que’l tamién mozu escritor Pablo Texón Castañón recibirá los 455 euros correspondientes al segundu premiu pola so narración ‘Estimada Rosa’. Dambos autores participen nel rellatu collectivu qu’Asturnews publica baxo’l títulu ‘Tolo que nun vi al quita-y el capiruchu’, y nel casu de Texón ta acabante recibir tamién los 3.500 euros que lu acrediten como vencedor de la categoría n’asturianu del Concursu de cuentos de la Fundación Fernández Lema, de Valdés, cuya modalidá en castellán ganó l’autor murcianu Miguel Sánchez Robles. En Bimenes, el xuráu alcordó amás conceder el tercer premiu del concursu, dotáu con 305 euros, a Pablo Suárez Fernández, autor del cuentu ‘Fuera xuego’. Los premiaos coincidirán a partir de les 19 hores del prósimu xueves 1 de xunetu na Casa la Cultura de Bimenes, onde se fará la entrega de los galardones. Nesta sétima edición del certame, el xuráu tuvo integráu por José Emilio González Aller, Ignaciu Llope, Xulio Vixil Castañón y Xandru Martino Ruz. 28 de xunu, 2004 0 FacebookTwitterPinterestEmail
Lliteratura La Selmana Negra refuerza’l so llau lliterariu pa ser “partida del difícil viaxe d’un llibru” by asturnet 21 de xunu, 2004 La Selmana Negra reivindica la lliteratura como un “actu de salú mental” imprescindible pa formar ciudadanos. El director del certame xixonés, l’escritor Paco Ignacio Taibo II, avanzó güei nesos términos l’especial procuru con que la XVII edición del eventu festivu y cultural va ocupase del mundu lliterariu, col envís declaráu de que’l certame puea ser el puntu de salida “del difícil viaxe d’un llibru”. Pa facer realidá esa intención, la XVII Selmana Negra tien programaes un total de trece presentaciones absolutes d’otres tantes obres lliteraries, aumenta’l númberu de llibreríes presentes nel recintu, ponse en marcha un ‘supermercáu’ del llibru al pesu y prébase suerte allugando un puntu de venta de llibros enfrente l’escenariu central, nun intentu d’amestar al másimu posible fiesta y lliteratura. La mecigaya nun ye n’absoluto nueva. Según precisó Taibo esti mediudía na presentación oficial de la XXVI Selmana Negra énte l’Atenéu Obreru de La Calzada, “folixa y cultura nun tán reñíes sinón que caminen xuntes”, y por eso el recintu’l certame nun prescindirá nesta edición de los habituales ingredientes festivos: Conciertos, bares musicales y espectáculos varios animarán una Selmana que repite allugamientu na marxe izquierda’l ríu Piles, al rodiu l’estadiu d’El Molinón, y que va cellebrase ente’l 9 y el 18 de xunetu. Neses coordenaes centraránse les actividaes lliteraries poles que los organizadores apuesten de forma especial esti añu, nel convencimientu de que, según Taibo, “poder abrir un llibru y ser otru ye ún de los pocos actos subversivos que nos queden nes sociedaes descafeinaes”. Ayudarán a ello les presencies de los autores policiacos Alan Furst, Robert Wilson, Marcello Fois y Petros Markaris; los arxentinos Guillermo Orsi, Carlos Balmaceda y Raúl Argemí; los estaoxunidenses Barbara Parker, Bob Reiss, Rebecca Pawel y James Hine; y los escritores españoles José Carlos Somoza, Paco González Ledesma, y Andreu Martín, ente otros. Habrá amás sendos homenaxes a los desapaecíos Manuel Vázquez Montalbán y Jean Claude Izzo, y tanto’l cómic como la ciencia ficción en castellán tendrán los sos llugares propios. El director de la Selmana Negra presentó la edición númberu 17 del certame nun actu públicu cellebráu na cai, énte la fachada principal del Atenéu de La Calzada, doble símbolu que reivindica la Selmana al dicise heredera de la “illustración llabrada pola clase obrera”. Y puestos a pisar la sienda de la politización, el conceyal de Festexos del Ayuntamientu de Xixón, Iván Álvarez Raja, vinculó l’aniciu del veranu xixonés col empiezu’l certame, qu’espera que nesta edición “valga pa democratizar a una parte de la ciudá que se foi resistiendo”. Nel actu tomó parte tamién el gaiteru Manolo Quirós, ‘alter ego’ de la mascota de la Selmana Negra, ‘Rufu’, qu’esti añu representa precisamente un gaiteru ataviáu cola tradicional montera picona y dotáu de les habituales gafes de sol. 21 de xunu, 2004 0 FacebookTwitterPinterestEmail
Lliteratura Trevín xestionará en Madrid la inclusión del asturianu nel Premiu Nacional de Lliteratura by asturnet 17 de xunu, 2004 El delegáu del Gobiernu n’Asturies, el socialista Antonio Trevín, mediará énte’l Ministeriu de Cultura pa que les obres en llingua asturiana puean optar a los Premios Nacionales de Lliteratura, que condece l’Estáu con calter añal a los testos orixinales más detacaos en castellán, catalán, gallegu o euskera. La xestión del delegáu gubernativu nel Principáu, que sucedió nel cargu a Mercedes Fernández (PP) depués de la victoria’l PSOE nes elecciones xenerales del pasáu mes de marzu, supondrá, de llegar a bon puertu, la primer reconocencia relevante del asturianu, por parte de les altes instituciones del Estáu español, como llingua lliteraria cooficial ‘de facto’. Según confirmó ayeri a Asturnews un representante de la Fundación ‘Caveda y Nava’, collectivu defensor de la plena reconocencia de la llingua asturiana a tolos efectos, Trevín mantuvo un alcuentru reciente con una delegación de la Fundación énte la cual comprometióse amás a “buscar fórmules de cooperación” col Principáu p’afitar l’usu normal del asturianu n’Axencia Tributaria, la Seguridá Social y l’Alministración de Xusticia, encuadraes na denominada Alministración periférica y xestionaes, poro, pol Gobiernu central. Nesti sen, el secretariu de la Fundación ‘Caveda y Nava’, José Manuel Pérez, profesor del departamentu de Drechu Públicu de la Universidá d’Uviéu, trabaya yá na redacción d’un borrador de conveniu que-y dea plena validez xurídica a les intenciones de Trevín. La llegada d’Antonio Trevín a la Delegación del Gobiernu n’Asturies ruempe con ocho años de delegaos nomaos polos anteriores Executivos centrales del Partíu Popular. Dalgunos d’ellos tuvieron un papel decisivu, a partir de 1997, n’anulación de la cooficialidá del asturianu nos seis conceyos asturianos que decidieren declarala (Bimenes, Casu, Morcín, Llaviana, Llangréu y Castrillón). Per primer vegada dende la crisis interna desatada nel PP asturianu en 1998 al entamar una escisión del partíu l’entós presidente autonómicu, Sergio Marqués -que creó la Unión Renovadora Asturiana-, dase una triple sintonía dafechu ente’l Gobiernu asturianu, rexíu pol PSOE col sofitu d’Izquierda Xunida-Bloque por Asturies; l’Executivu central, asumíu hai dos meses polos socialistes; y el delegáu del Gobiernu, el veteranu socialista, ex presidente del Principáu y ex alcalde de Llanes Antonio Trevín. 17 de xunu, 2004 0 FacebookTwitterPinterestEmail