Lliteratura Xulio Berros asoleya nun llibru pa neños con xuegos adicionales al traviés d’internet by asturnet 20 d'avientu, 2004 Lliteratura tecnolóxica pal públicu más mozu. L’autor Xulio Berros desdobla la edición en papel del so llibru pa neños ‘El Mundu de Toya’, asoleyáu pola casa xixonesa Vtp, con un sitiu web nel que los llectores puen completar pasatiempos p’acreditar la comprensión de la obra y desendolcar la so capacidá pa espresase en llingua asturiana. Defensor de que la so iniciativa supón una esperiencia novedosa nel universu de la lliteratura infantil n’asturianu, Berros habilita nun sitiu personal d’internet dellos formularios y xuegos abiertos a la participación de los llectores, col envís de que la so obra seya una creación dafechu interactiva y de que’l públicu infantil puea entretenese llueu de conocer la obra. Asina, los neños qu’accedan a la páxina de ‘El mundu de Toya’ depués de lleer el llibru tienen la posibilidá de completar un crucigrama colos nomes de los personaxes, puen cumplimentar pallabres ausentes en frases incompletes, tienen a la so disposición un exerciciu de sintaxis p’armar frases correctes y, a la fin, puen xunir delles illustraciones -obra toes elles de María Amor Fernández- col so testu correspondiente. Los xuegos interactivos complétense con varios cuestionarios sobro l’autor y la so obra, que ve la lluz dientro de la colección ‘Lliteratura infantil de/pa/por Asturies’ de la editorial Vtp, una serie empobinada pa llectores de más de 8 años d’edá. Nacíu en Sotrondio en 1963 y especializáu en creación lliteraria n’asturianu pa neños, Xulio Berros exerce como profesor nel colexu ‘Elena Sánchez Tamargo’ de Llaviana y tien editaes, ente otres obres, ‘Lo mío, ¿cómu ye?’ y ‘Toya’, dambes asoleyaes cola editorial uvieína Trabe. Sitiu web con pasatiempos sobro ‘El mundu de Toya’ 20 d'avientu, 2004 0 FacebookTwitterPinterestEmail
Lliteratura Areces asiste en Madrid a la presentación del cuartu centenariu del ‘Quijote’, que secunda Asturies by asturnet 20 d'avientu, 2004 El 400 cumpleaños del ‘Quijote’ calienta motores. El presidente autonómicu, Vicente Álvarez Areces, viaxó esta mañana a Madrid pa tomar parte de la presentación oficial de los actos al rodiu’l cuartu centenariu de la clásica narración de Miguel de Cervantes, considerada’l gran referente de la narrativa en llingua castellana. Asturies secundará la efemérides con varies iniciatives. Ente elles, Areces yá anunció que’l Principáu asoleyará en comuña cola ‘Real Academia de la Lengua Española’ una edición especial de 10.000 exemplares de la obra de Cervantes, a un preciu popular de menos de 6 euros y col envís d’alitar la conocencia’l clásicu de la lliteratura castellana ente los ciudadanos asturianos. El volume auspiciáu pol Gobiernu autonómicu sedrá un llibru de tapa dura, con 1.300 fueyes illustraes con grabaos facsimilares del sieglu XVIII y collaboraciones, ente otros autores, de Mario Vargas Llosa, Francisco Ayala, Martín de Riquer, Guillermo Rojo, José Antonio Pascual y Margit Frenk. De forma paralela, la Conseyería de Cultura habilitará una esposición monográfica sobro la dómina de Miguel de Cervantes, comisariada pol hestoriador Gonzalo Anes, y una segunda amuesa itinerante aportará en tren a Asturies. Amás, Xixón sumaráse a les conmemoraciones con una esposición a partir d’una rica colección particular de grabaos, sellos y monedes na que s’amosarán dos ediciones de la obra de Miguel de Cervantes editaes en 1605 y custodiaes pola Universidá d’Uviéu. 20 d'avientu, 2004 0 FacebookTwitterPinterestEmail
Lliteratura El premiu ‘Acebal’ de poesía queda ermu por segundu añu pesie a haber 15 concursantes y tres finalistes by asturnet 17 d'avientu, 2004 Quince concursantes, tres finalistes y nengún ganador. El premiu ‘Xuan María Acebal’ de poesía, el meyor dotáu de cuantos s’otorguen a poemarios escritos en llingua asturiana, quedó ermu por segundu añu consecutivu, pesie a rexistrar el triple de participación que’l ‘Xosefa Xovellanos’ de novela, qu’ayeri recoyó l’escritor Miguel Solís cola alvertencia de que la lliteratura n’asturianu “cuerre contra’l reló”. Asina, el palmarés de los tres grandes premios de creación en llingua asturiana que concede añalmente el Principáu -los de narrativa y poesía, más el ‘Enriqueta González Rubín’ de periodismu- volvió quedar esti añu incompletu, yá que los integrantes del xuráu del premiu ‘Acebal’ -Taresa Lorences, Lourdes Álvarez y Álvaro Ruiz de la Peña- interpretaron que nenguna de les obres presentaes a concursu axuntaba los méritos pa ser proclamada ganadora. Nun actu cellebráu na tarde d’ayeri nel patriu’l Real Institutu d’Estudios Asturianos, n’Uviéu, Miguel Solís recibió’l premiu ‘Xosefa Xovellanos’ tres d’imponese a les otres cuatro noveles que concurrieron al galardón, y fízolo llamando l’atención sobre la “carrera contra’l reló” que, aseguró, cuerre la lliteratura en llingua asturiana, n’alusión al riesgu inminente de desapaición del propiu idioma. Solís algama por cuarta vegada’l premiu ‘Xosefa Xovellanos’, nesta ocasión pola narración ‘Los falapios del xigante’. Nes dos categoríes de periodismu, el Principáu premió a Ismael María González Arias pol artículu ‘la tonada como música culta asturiana’, asoleyáu en La Nueva España, y al programa ‘El xorrecer d’Asturies’, emitíu na franxa mañaniega de los sábados en Radio Vetusta, depués que’un xuráu constituyíu pol director de Radio Nacional d’España n’Asturies, Francisco Pañeda; el periodista de Radio Llangréu Naciu Varillas; y el director de la Oficina de Política Llingüística, Ramón D’Andrés, emitiera’l so veredictu. Na recepción de los dos galardones, ca ún d’ellos dotáu con 3.000 euros -la mitá que’l premiu de novela- González Arias sentenció que “la tonada nunca nun tuvo meyor”, en tantu que Xandru Osuna, conductor del programa premiáu de Radio Vetusta, recoyó’l galardón xunta’l so compañeru Chema Fernández desvelando un suañu de la viéspora: Dustin Hoffman entregaba-y el premiu nuna solemne ceremonia na que pornunciaba, en correctu asturianu, “Y el ganador ye…”. 17 d'avientu, 2004 0 FacebookTwitterPinterestEmail
Lliteratura ‘Reciella Malory’ edita un nuevu númberu con testos de Texón, Varillas, Lourdes Álvarez y Marín Estrada by asturnet 17 d'avientu, 2004 Pablo Texón, Naciu Varillas, Lourdes Álvarez, Pablo Antón Marín Estrada. La revista de lliteratura ‘Reciella Malory’, editada en L’Entregu pola tertulia homónima, ratifica la so continuidá y saca a la cai el so segundu númberu, qu’incorpora testos de los autores mentaos arriba xunta obres de Xurde Fernández; Inaciu Galán, Armando Vega, Casimiro Palacios y Xurde Álvarez. A la presentación del nuevu númberu de la revista, que va cellebrase a les 12 hores de mañana, sábadu, na Llibrería Alborá de Xixón, contará cola participación de dalgunos d’esos autores, y tarán presentes amás los cordinadores de la publicación, Ana Vanessa Gutiérrez, Chechu García y Henrique Facuriella. Ente los testos espublizaos nesti númberu, alcuéntrensel rellatu col que Naciu Varillas algamó esti añu el VII Concursu Cuentos pola oficialidá del Conceyu de Bimenes y la pieza teatral ‘Con un trozu daliendu’, de Xurde Álvarez, ganadora del concursu de testos dramáticos de l’Academia de la Llingua en 2003. El númberu ceru de Reciella Malory salió a la cai en xunu desti añu y taba formáu por testos de los miembros de la tertulia, que saconceya los vienres nun establecimientu hosteleru de LEntregu. Ente los integrantes del grupu cuéntentese, amás de los coordinadores de la revista, escritores como Xulio Arbesú, Roberto Corte, Juan Carlos Crespos Lanchas, Xurde Álvarez y Antonio y Guillermo Riopedre. 17 d'avientu, 2004 0 FacebookTwitterPinterestEmail
Lliteratura Marta Mori y Xosé Ánxelu Gutiérrez algamen el premiu de poesía ‘Teodoro Cuesta’ by asturnet 16 d'avientu, 2004 Los versos de Marta Mori y Xosé Ánxelu Gutiérrez Morán ganen el XIV ‘Teodoro Cuesta’. Los dos autores repartiránse los 4.000 euros del prestixosu galardón de poesía en llingua asturiana, depués que’l xuráu del certame, entamáu pol Ayuntamientu de Mieres, decidiera ayeri por unanimidá galardonar los sos poemarios, ‘El tiempu de la espera’ y ‘Países’, respectivamente. A la fase final del concursu llegó un tercer poemariu orixinal, pero finalmente el xuráu determinó reconocer por igual la calidá de los trabayos presentaos pol biólogu avilesín Xosé Ánxelu Gutiérrez Morán y la profesora xixonesa Marta Mori, que suceden nel palmarés del certame a Ana Vanessa Gutiérrez, vencedora na edición de 2003. Esta autora formó parte’l xuráu qu’ayeri premió a Mori y Gutiérrez Morán, del qu’amás formaron parte José Luis Argüelles, Antón García, Vicente García Oliva y Ramón D’Andrés, toos ellos baxo la presidencia de la conceyala delegada de Cultura de Mieres, Beatriz González Prieto. Falláu habitualmente na primer quincena del mes d’avientu y dotáu con un premiu en metálicu de 4.000 euros, el premiu ‘Teodoro Cuesta’ ye ún de los más emblemáticos galardones que distinguen a los meyores creadores de poesía en llingua asturiana. Nel so palmarés figuren, ente otros, los escritores Berta Piñán, Xuan Bello y Antón García. 16 d'avientu, 2004 0 FacebookTwitterPinterestEmail
Lliteratura Llangréu premia por segunda vegada a Rodríguez Medina nel so concursu de narrativa by asturnet 14 d'avientu, 2004 Pablo Rodríguez Medina repite. L’autor entreguín algamó’l II Premiu de narrativa del Conceyu de Llangréu, dotáu con 100 euros en metálicu y la publicación de la obra, cola narración ‘El Banciar de la Memoria (Historia de la casa de les vigues roxes’, un añu depués de proclamase vencedor na primer edición del mesmu concursu. Nuna nota asoleyada pol Ayuntamientu de Llangréu, esta entidá tilda d’autor “prolíficu” a Rodríguez Medina, que yá se fizo acreedor d’estremaos premios lliterarios nes llingües asturiana y castellana, y que nesta ocasión foi distinguíu por un xuráu formáu por Severino Antuña, Asunción Sánchez Hevia y Xuan Porta. Pablo Rodríguez Medina (L’Entregu, 1978) ta acabante asoleyar el so poemariu ‘El color de l’ausencia’, ganador del Premiu de poesía ‘Fernán Coronas’ na so edición de 2003 y que’l propiu escritor entiende como un exerciciu de ‘striptease lliterariu’, materializáu nun recorríu intimista peles alcordances de la mocedá. Na pasada -y primer- edición del Premiu de Narrativa’l Conceyu Llangréu, l’autor entreguín algamó’l galardón cola obra ‘Los taraos’, un relatu yá publicáu pol ayuntamientu llangreanu qu’amiesta arumes d’alcordances pasaes y un singular retratu de borrinosos paisaxes de cuenca minera. Archivu. Rodriguez Medina apuesta pol “striptease lliterariu” nel so nuevu poemariu 14 d'avientu, 2004 0 FacebookTwitterPinterestEmail
Lliteratura Los grandes premios de la creación lliteraria n’asturianu rexistren un aumentu de participación by asturnet 10 d'avientu, 2004 Más participación qu’en 2003. Los tres premios que l’Alministración autonómica concede con calter añal a les meyores obres de creación en llingua asturiana -nes modalidaes de narrativa, poesía y periodismu- atraxeron nesta edición a más aspirantes. Los nomes de los ganadores proclamaránse de forma oficial, según les previsiones de los xuraos, la prósima selmana. Asina lo precisaron fontes prósimes a los encargaos de designar a los premiaos en ca una de les tres categoríes a concursu: la novela, al traviés del XXV Premiu ‘Xosefa Xovellanos’; la poesía, cola X edición del galardón ‘Xuan María Acebal’; y el periodismu, nes sos modalidaes de prensa escrita y audiovisual, na segunda convocatoria del premiu ‘Enriqueta González Rubín’. Tolos galardones tienen una dotación económica de 6.000 euros -que nel casu de la categoría periodística repártense en dos premios de 3.000 euros ca ún- y tán consideraos ente los más prestixosos a los qu’opten los creadores qu’empleguen la llingua asturiana como idioma vehicular de les sos obres. Los miembros de los xuraos yá cellebraron les sos xuntances correspondientes, dientro’l plazu de 45 díes que marca la convocatoria dende’l pieslle de la recepción d’orixinales, y prevén asoleyar les sos respectives actes con calter oficial el prósimu xueves, nel trescursu d’una comparecencia pública n’Uviéu. Na pasada edición, la entrega de los premios del Principáu quedó desdibuxada pola decisión de los xuraos de declarar ermos los dos galardones más veteranos, los de novela y poesía. Na categoría de testos periodísticos, la vencedora foi Beatriz Redondo Viado. 10 d'avientu, 2004 0 FacebookTwitterPinterestEmail
Lliteratura El novelista Fulgencio Argüelles asoleya un conxuntu de relatos illustraos, cola soledá como exe central by asturnet 10 d'avientu, 2004 Formatu de luxu pa una incursión navidiega del novelista Fulgencio Argüelles na narración n’asturianu. L’Academia de la Llingua asoleya una edición de mil exemplares en gran formatu y papel satinao a collor de la obra ‘Seronda’, un conxuntu de tres relatos illustraos pol debuxante xixonés Jorge Enrique Maojo qu’ayeri se presentó formalmente en Xixón cola soledá como exe conductor de les narraciones qu’integren el llibru. La obra d’Argüelles, ganador como autor en castellán de los prestixosos premios de novela ‘Azorín’ y ‘Café Gijón’, sal a la cai a un preciu de venta de 24 euros y fuera de colección dala de l’Academia poles sos singulares característiques, yá que trátase d’una edición d’alta calidá que la entidá asoleya a propuesta’l propiu Argüelles pa espardir y dignificar l’usu de la llingua asturiana como idioma de creación y llectura. A lo llargo de tres relatos -‘La seronda de les cases invisibles’, ‘El sele marmullar d’un vigulín’ ya ‘Inxamás nun fai sol’-, Fulgencio Argüelles constrúi un mundu particular pobláu por personaxes siempres vulnerables pola soledá, espuestos a escenarios que bancien ente lo real y lo imaxinario. Afincáu na llocalidá de Cenera depués de pasar dellos años en Madrid, onde cursó estudios de sicoloxía, Fulgencio Argüelles algamó nel añu 2000 el premiu ‘Principado de Asturias’ cola novela ‘Recuerdos de algún vivir’, y recibió estremaes distinciones polos sos relatos en llingua asturiana en certames lliterarios de L.lena, Cabrales y Sograndiu. 10 d'avientu, 2004 0 FacebookTwitterPinterestEmail
Lliteratura Cultura prevé convenios col Estáu pa promocionar la lliteratura asturiana fuera’l Principáu by asturnet 9 d'avientu, 2004 Proyección de la lliteratura asturiana fuera del Principáu. La Conseyería de Cultura plantega la firma d’alcuerdos col Estáu pa promocionar les lletres asturianes nel esterior, depués que los escritores denunciaren falta d’atención hacia la figura del autor nel engranaxe editorial y demandaren, ente otres midíes, la presencia del asturianu nos Premios Nacionales de Lliteratura. Asina respondió esti mediudía n’Uviéu a les reivindicaciones de los autores el director de la Oficina de Política Llingüística, Ramón D’Andrés, quien anunció inminentes midíes concretes pa promocionar la lliteratura en llingua asturiana darréu entre en vigor, nes prósimes selmanes, el Plan de Normalización Sociollingüística. Trátase, según D’Andrés, d’apoyar dende l’Alministración a una lliteratura “con prespectives enormes y una mui bona tarxeta de presentación”. Una representación de los creadores d’esi collectivu asoleyó güei les conclusiones de la Xunta d’Escritores cellebrada a finales de payares en Llanes, ente les que destaquen precisamente un llamáu a la promoción esterior de los llibros publicaos n’asturianu, la demanda de coficialidá pa la llingua asturiana y, de mou singular, la esixencia de mayor procuru pa colos autores. Nesti sen, el cordinador de la Xunta d’Escritores, Xuan Bello, aseguró que la promoción de la lliteratura debe ser “integral” y beneficiar a tolos axentes de la ‘cadena’ lliteraria: autores, editores, distribuyidores y llibreros. Lo contrario, sorrayó, provoca “ocultación” nel mercáu editorial. Asinamesmo, Bello refugó la posibilidá de que s’afite una periodicidá concreta pa cellebrar nueves xuntes d’escritores y argumentó que futures xuntances habrán convocase acordies coles peticiones de los propios autores, en momentos que se consideren afayadizos y continuando con una organización “un tanto anárquica”. Nel so manifiestu final, los 50 escritores aconceyaos en Llanes hai agora once díes felicítense con “meditáu optimismu” de la variedá de voces y d’obres de la lliteratura en llingua asturiana, ufren el so llabor pa edificar en comuña una “casa afayadiza y democrática” y reclamen una mayor presencia de les sos obres na rede de biblioteques y nel sistema educativu. Archivu. La Xunta d’Escritores pieslla reclamando más atención pa la lliteratura n’asturianu nes biblioteques 9 d'avientu, 2004 0 FacebookTwitterPinterestEmail
Lliteratura Más de 400 narraciones concurrieron al concursu de la Fundación ‘Muñiz Zapico’, que premió a Aníbal Morixe by asturnet 7 d'avientu, 2004 Un total de 429 narraciones breves, empobinaes por 345 participantes dende España, América Llatina y Europa occidental. La Fundación ‘Juan Muñiz Zapico’ escoyó ente tales cifres al autor Aníbal Ramón Morixe como ganador absolutu del so I Concursu de microrrelatos mineros, y galardonó amás, na categoría d’asturianu, a los concursantes Ricardo Candás y Elisabet Felgueroso. El xuráu del concursu, qu’asoleyó el so veredictu nel Centru Asturianu de Bruseles, reconoció la obra ‘Cuando la jaula vuelve a subir’, de Morixe, como merecedora del primer premiu, dotáu con mil euros, y galardonó los trabayos ‘El lladrón de llapiceros’ y ‘El chigre de Artosa’, redactaos respectivamente por Candás y Felgueroso. Pol so llau, Miguel Matesanz algamó una mención especial del xuráu n’atención al so relatu ‘La hora mala’, mientres que Natalia Fernández recibió l’accésit previstu p’autores menores de 26 años pola so obra ‘Et in Arcadia ego’. Del xuráu, presidíu por Benigno Delmiro Coto, formaron parte Francisco Prado Alberdi, Elías García, Elvira Fernández, Asunción Naves, Juanjo Barral, José García y Benjamín Gutiérrez. El concursu de microrrelatos de la Fundación ‘Juan Muñiz Zapico’ lleva’l nome del cabezaleru mineru antifranquista Manuel Nevado Madrid, desapaecíu en 1990, y ta concebíu pa premiar narraciones breves inferiores a 60 llinies de llargor, escrites en llingües castellana o asturiana. Web de la Fundación Juan Muñiz Zapico 7 d'avientu, 2004 0 FacebookTwitterPinterestEmail