Lliteratura Empiecen los actos de la Selmana de les Lletres Asturianes by asturnet 27 d'abril, 2006 Esti vienres a les ocho la tarde, la Capiella de los Dolores de Grau acoyó un espectáculu poeticu-teatral, programáu dientro de los actos de la Selmana de les Lletres Asturianes, que lleva por nome ‘Voces paraleles’ y qu’axuntó nel escenariu a cuatro poetes catalanes, Ponç Pons, Núria Martínez Vernis, Àngels Gregori y Jordi Cornudella, y a cuatro poetes asturianos, Berta Piñán, Xuan Bello, Vanessa Gutierrez y Xandru Fernández. Empieza asina la Selmana de les Lletres Asturianes, que s’abría cola presentación a les doce la mañana, na Biblioteca Pérez d’Ayala d’Uviéu del llibru ‘En tables. Un teatru pal sieglu XXI’ d’Adolfo Camilo Díaz. ‘Veus paral.leles’ (Voces paraleles) ye un proyectu fechu a inciativa d’Albert Mestres y Sofia Fonseca y acoyíu pola Institució de les Lletres Catalanes que consiste nun espectáculu nel que s’alternen les voces de cuatro poetes en llingua catalana y cuatro poetes d’otra cultura, que reciten conxuntamente los sos poemes a partir d’una selección fecha polos propios poetes. L’oxetivu d’esti espectáculu, según los organizadores, ye descubrir mundos poeticos y cultures que nun-yos llegaríen d’otra forma y poner en contactu la poesía catalana cola de los poetes de cultures invitaes, nesti casu los asturianos. Los testos del espectáculu, que va ser representáu más alantre per diferentes llugares de Cataluña, son recoyíos pola Institució nuna edición impresa. 27 d'abril, 2006 0 FacebookTwitterPinterestEmail
Lliteratura Berto García presenta en Corvera ‘Ensin otra sida’ by asturnet 27 d'abril, 2006 L’escritor corveranu Berto García (Les Vegues-1975) presenta mañana sábadu día 29 a les doce la mañana, el so primer poemariu tituláu ‘Ensin otra sida’. La presentación que cuerre a cargu de los escritores Bertu Ordiales, Saúl Fernández y Carlos Suari, va tener llugar nel Centru Sociocultural de Cancienes (Corvera). Los poemes conteníos en “Ensin otra sida”(Trabe, 2006) asítiense davezu cerca de lo popular, lo rural, y alcuando, na xera de fotografiar el tiempu, la tierra y les circunstancies, a les que s’avera aplicando formes prósimes al realismu social. Berto García nació en Les Vegues (Corvera) en 1975. Ye mayestru d’Educación Infantil y Primaria y espertu en Llingua Asturiana. Anguaño pon clas per escueles de Castiella. Esti ye’l so primer llibru, anque tien yá bien d’obra espardío per delles de les revistes lliteraries del país, como Lletres Asturianes, El Canciu’l Cuelebre, Entellunu y Reciella Malory. 27 d'abril, 2006 0 FacebookTwitterPinterestEmail
Lliteratura La Regalina convoca’l XIII Premiu de Poesía Fernán Coronas by asturnet 25 d'abril, 2006 La Sociedá Popular “La Regalina” de Cadaveu-Valdes ta acabante de convocar el XIII Premiu de Poesía n’asturianu “Fernán Coronas” (Padre Galo). Los poemarios que tienen de tener un mínimo de 275 versos, han d’unviase per correu antes del 23 de xunetu, concediendose ún únicu premiu de 1300 euros, contemplándose al mesmu tiempu nes bases la posibilidá de la so espublización. Les bases completes del premiu son les siguientes: 1 – Podrán presentase toles persones que quieran con poemariu compuestu por poemes ineditos, orixinales, escritos en Llingua Asturiana y con un mínimo de 275 versos. 2 – Los trabayos entregaránse por quintuplicáu nos locales sociales de la Sociedá Popular “La Regalina”, asitiaos nel Casino (C/ Curión, s/n – Cadaveu – Valdes), o mandaránse per correu enantes del 23 de xunetu. Dirán ensin firma, con un lema o nomatu. Nun sobre zarráu dirán les señes del/la autor/a col mesmu lema o nomatu que’l del poemariu. 3 – Concederáse un únicu premiu de 1300 euros (mil trescientos euros), contemplándose al mesmu tiempu la so publicación. 4 – El xuráu nun podrá declarar desiertu’l Premiu y el so fallu nun se pue retrucar y daráse a conocer nun actu públicu en Cadaveu, el día 7 d’agostu, aniversariu del nacimientu del Padre Galo. 5 – Los trabayos non premiaos podrán recoyese nos locales de la Sociedá Popular “La Regalina” dientru de los 30 díes posteriores al fallu. 25 d'abril, 2006 0 FacebookTwitterPinterestEmail
Lliteratura Xandru Fernández pon la banda sonora del paraísu by asturnet 24 d'abril, 2006 Güei, a les siete la tarde, l’escritor turones Xandru Fernández (1970) va presentar na Llibrería Asturiana de Trabe, la obra “La banda sonora del paraísu”, novela cola que ganó’l Premiu Trabe de Narraciones del añu 2005. Esti premiu, que va tener caracter bienal, va tar acompañáu pola presentación d’otru concursu de la mesma editorial de calter infantil del que se van conocer les bases a lo llargo del añu. Xandru Fernández foi’l ganador del Premiu de la Crítica que concede l’Asociación d’Escritores Asturianos (AEA) nel añu 2004 pola novela “Les ruines”, espublizada por esta mesma editorial, publicó tamien nel añu 2005 el relatu “El nuesu mar de los sargazos”, editáu por Ámbitu. “La banda sonora del paraísu” cunta la historia de Fidel, un fíu de mineru y una hippie, que percuerre a lo llargo de la so vida un camín irregular pero coherente: d’adolescente aficionáu al rock y los alucinóxenos a guerrilleru na revuelta de Chiapas, de cazador y ermitañu pelos bosques d’Asturies a cabezaleru d’una microrrevuelta escontra l’esfarrapamientu d’un pobláu indíxena, del dark punk al grunge pasando pel heavy metal. “La banda sonora del paraísu” ye una obra construida sobre la biografía d’un personaxe que yá de mano comparte col autor l’añu de nacencia, y que pretende esplicar esa vida, y les otres que la habiten, dende dientro d’una identidá colectiva que pue ser l’Asturies postindustrial. 24 d'abril, 2006 0 FacebookTwitterPinterestEmail
Lliteratura El poeta David González espubliza ‘Reza lo que sepas’ by asturnet 24 d'abril, 2006 El poeta xixones David González ta acabante d’espublizar ‘Reza lo que sepas’, el so últimu llibru qu’axunta poemes y relatos y que llega a la cai de la mano de la editorial zaragozana Eclipsados, cola que yá collaborara xunta’l so editor, Nacho Escuín, pa la impresión de l’antoloxía de muyeres ‘La verdadera historia de los hombres’ (2005). El llibru cunta cola collaboración de los dibuxantes Miguel Ángel Martín y Mik Baró, cuyes ilustraciones, al travies d’una tecnica denominada Woodspeak, sustitúin a la palabra nos poemes y el relatu nos que s’usa. Mesmo’l diseñu de la cubierta y les páxines interiores, son obra del diseñador Germán Ucar, mentes que na contraportada apaez una semeya del autor fecha pol narrador y tamien fotógrafu Mark Ostrowski. Nacho Escuín, editor del llibru, va tar presente nos encuentros de Punta Umbría que se van cellebrar el prósimu 27 d’abril, presentando esti llibru xunto con otres novedaes d’esta editorial independiente. 24 d'abril, 2006 0 FacebookTwitterPinterestEmail
Lliteratura Trabe entrega’l so premiu de Narraciones 2005 n’Uviéu a Xandru Fernández by asturnet 24 d'abril, 2006 Esti martes 25 dabril, a les 19,00 hores, na Llibrería Asturiana dEdiciones Trabe nUviéu (Padre Buenaventura de Paredes, 4, barriu de Pumarín)presentarase la novela ganadora y entregarase’l premiu “NARRACIONES TRABE 2005” que foi a parar a “La banda sonora del paraísu” de Xandru Fernández. La banda sonora del paraisu ye una novela construida sobre la biografía d’un personaxe llamáu Fidel, nacíu en 1970, a través de la narración en primera persona que fai un amigu quintenta reconstruir y entender la so trayectoria vital. Fidel ye fíu d’un mineru y una hippie, y, como si esi nacimientu determinara la so personalidá, la so vida hastal presente recorre un camín irregular pero coherente: delincuente xuvenil aficionáu al rock y al sadomasoquismu, ermitañu cultivador de plantes alucinóxenes, guerrilleru na revuelta de Chiapas, cazador y ermitañu pelos bosques d’Asturies, inspirador d’una comuna anarquista… La editorial considera que “Xandru fai un mui guapu retratu de la sociedá asturiana de los últimos años nesta novela moderna, que tien muncho de novela negra, y na que nun falten nin les referencies a la sicodelia o la crítica xeneracional al primer asturianismu, nin los retratos de les sociedaes indíxenes mexicanes o de Bosnia na posguerra”. La narración trata non sólo de la personalidá de Fidel o dotros protagonistes como Beatriz y Mori, sinón tamién de les dificultaes de reconstruir eses vides dientro duna identidá colectiva. Xandru Fernández Xandru Fernández naz en Turón en 1970. Profesor de Filosofía nel institutu de Lluanco, vien desarrollandol so llabor creativu nasturianu dende 1990 que lu convierte nun de los escritores más interesantes y versátiles desta lliteratura, igual como narrador que como poeta o como autor de les lletres de les canciones de Dixebra, amás de columnista en dellos medios de comunicación. Tien nel so haber los principales premios asturianos: dos veces ganador del «Xosefa de Xovellanos» de novela, premiu de narrativa de lAcademia, premiu «Xuan María Acebal» de poesía, nel 2005 recibiól premiu de la crítica que concede lAsociación de Escritores Asturianos (AEA) pola so novela Les ruines. Xandru Fernández publicaba en 1990 el so primer llibru de poemes, Primer bestiariu, al que siguen Breviariu de la diáspora (1993), Lletra muerto (1998, premiu «Elvira Castañón» de poesía) y Servidume (premiu de poesía «Xuan María Acebal» del año 2000). Nestos años Xandru Fernández foi publicando una amplia obra narrativa: les noveles El silenciu en fuga (1990, premiu de «Novela Curtia» de lAcademia), Tráficu de cuerpos (1990), El club de los inocentes (1994, premiu «Xosefa de Xovellanos» de novela), El suañu de los páxaros de sable (premiu «Xosefa de Xovellanos» de novela, 1999) y Los homes de bronce (2001) y los llibros de cuentos Del llaberintu al trenta (1995) y Les cuentes de lalma (2000). Nel 2005 publicó la novela yá citada Les ruines y El nuesu mar de los sargazos. Tien publicaes varies traducciones, del gallegu y del alemán principalmente: Land Rover de Suso de Toro, Memories dun nenu llabriegu de Xosé Neira Vilas, La tresformación de Franz Kafka, Mario y el magu de Thomas Mann, y lensayu Nietzsche contra Wagner de Friedriche Nietzsche. En 2002 publicól llibru País cerrado, nel que recueye y traduz al castellanu los sos cuentos. Sigún una nota asoleyada esti día pola editorial “el xuráu destacó lalta participación llograda nesta convocatoria, la bona calidá de la mayor parte de les obres presentaes y la so variedá formal y temática, que pon de manifiestu lescelente momentu qualtraviesa la narrativa asturiana”. El xuráu del Premiu de Narraciones Trabe formáronlu esti añu, como vocales, Esther Prieto (escritora, ganadora del «Xosefa de Xovellanos» de novela), José Luis Fernández (escritor y periodista), Luis Casteleiro (filólogu de la Conseyería de Cultura) y Consuelo Vega (narradora, ganadora del «María Josefa Canellada» de narrativa), actuando como presidente Xulio Viejo (narrador y profesor dasturianu na Universidá dUviéu) y como secretariu del xuráu, con voz pero ensin votu, Antón García. El premiu consiste na publicación de la obra ganadora dientro de la colección «Incla interior» dEdiciones Trabe, 3.000 euros en conceptu de derechos d’autor y una escultura orixinal de María Jesús Rodríguez fecha pal premiu. Narchivu adxuntu mándase una fotografía de la escultura, un prisma cuadrangular (11 x 16 x 3 cm, naluminiu, grabáu, pintáu nazul y barnizáu) que se titula So la panera-8. Fueron 11 (once) los orixinales quopten al Premiu de Narraciones Trabe 2005. Presentáronse cinco noveles y seis llibros de cuentos. Los orixinales llegaron de sitios bien dispares: ocho d’Asturies, dos del restu d’España y unu del continente americanu. Destaca lalta participación y el nivel de calidá de les obres presentaes, que fairá riñíul fallu del xuráu. Ediciones Trabe convocó nuna primer etapa, dende 1992 a 1995, cuatro ediciones desti premiu con éxitu de participación, de crítica y de públicu. Esti premiu yel segundu concursu de narrativa asturiana meyor dotáu (depués del de novela «Xosefa de Xovellanos» que convoca la Conseyería de Cultura, Comunicación Social y Turismu) y el primeru que convoca una empresa editorial privada. Ediciones Trabe quier convocar esti premiu con carácter bienal (cada dos años), alternándolu cola convocatoria dotru premiu pa lliteratura infantil y xuvenil, del que se dará cuenta a lo llargo desti añu 2006. 24 d'abril, 2006 0 FacebookTwitterPinterestEmail
Lliteratura Les Filanderes convoquen el V Certame Internacional de Relatos Curtios “Filando Cuentos de Muyer” by asturnet 19 d'abril, 2006 El colectivu sociocultural llangreanu “Les Filanderes” convoca’l V Certame Internacional de Relatos Curtios “Filando Cuentos de Muyer”. La temática de los relatos presentaos a concursu puede tocar cualisquier aspectu que tenga que ver cola realidá femenina, como pueden ser les sos aportaciones nel campu social, cultural, familiar, deportivu o económicu. Les obres, que mesmo pueden escribise n’asturiano o castellán, han de presentase antes del 17 de setiembre. Los ineditos, d’una estensión másima de 6 planes y mínima de 3, deberán presentase por triplicao y baxo plica, na dirección cai Cipriano Pedrosa s/n , Edificiu Renfe 22940 Sama – Llangreu. El xuráu va escoyer dos premios, un ganador de 1200 euros y un accesit de 300, pudiendo editar el colectivu los relatos finalistes. Colectivu Les Filanderes 19 d'abril, 2006 0 FacebookTwitterPinterestEmail
Lliteratura Lourdes Álvarez y Fernando Beltrán escriben nuevos versos en ‘Mala letra’ by asturnet 19 d'abril, 2006 La escritora de La Güeria d’Urbies, Lourdes Álvarez (1961), estrena una nueva colección de poesía de la editorial KRK, nomada ‘Mala letra’, con una antoloxía titulada “Mediando les distancies”, onde recueye tola so obra poetica anterior. La colección, dirixida polos profesores de la Universidá ‘Uvieu Leopoldo Sánchez Torre y Álvaro Ruiz de la Peña, continúa’l so llabor dando a imprenta tamien a ‘La amada invencible (80 poemas incurables)’, del uvieín Fernando Beltrán (1956). Entrambos llibros van presentase esta tarde nel Club de Prensa de La Nueva España. ‘Mediando les distancies’ ye una antoloxía de Lourdes Álvarez na que se recueyen los tres poemarios que la poeta de Mieres tenía espublizaos hasta agora: ‘Aldabes del olvidu’, ‘Mares d’añil’ y ‘Comu aquella que yeres’. Pela so parte, Fernando Beltrán recueye en ‘La amada invencible (80 poemas incurables)’ tola poetica de calter amorosu que tien escrito hasta la fecha. 19 d'abril, 2006 0 FacebookTwitterPinterestEmail
Lliteratura Les Filanderes de Llangréu escriben sobre la mina by asturnet 18 d'abril, 2006 El prósimu día 21 d’abril, viespora del Día del Llibru, el Colectivu Sociocultural Les Filanderes va presentar a les ocho la tarde nel Nuevu Teatru de La Felguera el llibru “Cuentos de muyeres sobre la mina”, coordináu pol catedráticu de lliteratura y profesor de talleres lliterarios, Benigno Delmiro Coto. Nel actu de presentación van tar presentes l’editor de la obra, Miguel Ángel Areces, la conseyera de la Presidencia del Principáu d’Asturies, María Jose Ramos, l’alcaldesa de Llangreu, Esther Díaz, asina como Asunción Naves, presidenta del colectivu. Tres de la presentación del llibru van actuar los grupos de baille de la AAVV de Riaño y Los Asturianos. El grupu de llectures dramatizaes de Les Filanderes va representar escenes de la obra “Teresa” de Leopoldo Alas Clarín, y la cantante de tonada, Anabel Santiago será la encargada d’echar el pieslle a la xornada entonando dalgunes canciones de la mina. 18 d'abril, 2006 0 FacebookTwitterPinterestEmail
Lliteratura Fernando Beltrán recita nel Aula les Metáfores de Grau by asturnet 18 d'abril, 2006 L’escritor uvieín Fernando Beltrán (1956) va recitar el prósimu vienres día 21 d’abril a les ocho la tarde na Sala Polivalente de la Casa Cultura de Grau que lleva’l so nome. Autor d’obres como “Aquelarre en Madrid”, “Ojos de agua” y “Bar adentro”, proyectó la creacción d’esti centru, al que donó gran parte de la so bibliteca personal, y qu’anguaño ta dirixida pol críticu lliterariu y profesor de la Universidá d’Uvieu Leopoldo Sánchez Torre. Fernando Beltrán ye profesor del Institutu Europeu de Diseñu y de la Escuela Superior d’Arquitectura de Madrid. Amás de ser creador del estudiu “El nombre de las cosas” ye tamien autor de los manifiestos “Perdimos la palabra” y “Hacia una poesía entrometida”. 18 d'abril, 2006 0 FacebookTwitterPinterestEmail