Comunicación Un nuevu sitiu web arriquez el panorama dixital d’actualidá en llingua asturiana by asturnet 13 d'avientu, 2004 Más posibilidaes pa los llectores dixitales asturfalantes. El diariu xixonés ‘El Comercio’ pon en funcionamientu un canal monográficu n’internet con conteníos culturales, diseñáu y manteníu dafechu en llingua asturiana, nel qu’ufre información de lliteratura, música, artes escéniques y cuestiones llingüístiques, emplegando’l sistema de copyleft ufiertáu por Asturnews pa espardir noticies asoleyaes nesti diariu. Asina, el denomináu ‘Canal Asturies’, que fai usu del serviciu llibre d’Asturnews pa reproducir conteníos d’esti diariu cultural cola única condición de que se cite al periódicu on-line como fonte de cada noticia, inclúi información organizada por asuntos, incorpora una galería de semeyes d’Asturies y proporciona la posibilidá de participar n’encuestes vía web. Accesible de forma abierta y de baldre al traviés de la web d’El Comercio, el nuevu espaciu web en llingua asturiana atiende con especial procuru pa les noticies del ámbitu llingüísticu, inclúi testos d’opinión y ufre la posibilidá de descargar un viodeoclip pa neños, amás de conteníos en formatu pdf. Con ciertes intermitencies, el diariu xixonés ‘El Comercio’ dio-y na so hestoria más reciente protagonismu a la llingua asturiana n’espacios como’l veteranu suplementu cultural ‘Alitar Asturies’ -creáu en 1978- y, a mediaos de los años noventa, en secciones comunes del periódicu, nuna práctica qu’agora quier recuperar el diariu y qu’hai unos meses emplega’l periódicu ‘La Voz de Asturias’, qu’inclúi informaciones en llingua asturiana na so sección de Cultura y Espectáculos. Al frente de ‘El Comercio’ ta, dende mayu pasáu, Íñigo Noriega, que na so calidá de director vien amosando una especial sensibilidá pola presencia de la llingua y cultura asturianes nes páxines del periódicu y auspicia la voluntá de modernizar y fortalecer la sección ‘Alitar Asturies’. Accesu al canal monográficu n’asturianu 13 d'avientu, 2004 0 FacebookTwitterPinterestEmail
Comunicación La prensa en papel perdió 25.000 llectores diarios nel últimu añu, según l’Estudiu Xeneral de Medios by asturnet 9 d'avientu, 2004 Un total de 25.000 llectores menos cada día. Los periódicos asturianos de gran difusión dexaron d’interesa-yos a esi númberu de ciudadanos nos últimos doce meses, según la última midición publicada pol Estudiu Xeneral de Medios (EXM), que cifra en más de mediu millón la cifra de llectores habituales de diarios en papel n’Asturies. Asina, según la estadística asoleyada pola Asociación pa la Investigación de Medios de Comunicación, responsable de la ellaboración del EXM, el diariu ‘La Nueva España’ sigue siendo el más lleíu nel Principáu, pero pierde 7.000 llectores diarios respecto a hai un añu: Pasa de 376.000 a 369.000. Esi descensu ye mayor, porcentualmente, nel casu’l diariu xixonés ‘El Comercio’, que acordies coles cifres asoleyaes nel Estudiu Xeneral de Medios pierde un total de 18.000 llectores y suscita agora l’interés cotidianu de 175.000 ciudadanos. Pol so llau, el tercer gran periódicu en papel ellaboráu nel ámbitu’l Principáu, ‘La Voz de Asturias’, nun apaez nel llistáu más reciente del EXM -a lo menos na so versión n’internet-, que piesllen los periódicos con más de 90.000 llectores diarios. Les cifres acabante asoleyar pola Asociación pa la Investigación de Medios correspuenden al periodu trescurríu ente febreru y payares de 2004, la denominada tercer oleada del estudiu. Nesi mesmu periodu de 2003, la prensa asturiana en papel tenía 25.000 llectores más, siempre según les conclusiones del Estudiu Xeneral de Medios. Esta investigación ellaboróse, nos sos cálculos más recientes, a partir d’entrevistes personales a más de 40.000 persones de tol Estáu. El marxe d’error posible ente la estimación y los datos reales a los qu’esta se refier ronda, con calter xeneral, el 3 por cientu. Datos íntegros del Estudiu Xeneral de Medios 9 d'avientu, 2004 0 FacebookTwitterPinterestEmail
Comunicación Taibo recibe l’homenaxe de la sociedá mexicana pola so mayestría nel exerciciu del periodismu cultural by asturnet 7 d'avientu, 2004 Reconocencia a una vida consagrada a la escritura, col periodismu cultural como actividá central. El veteranu comunicador xixonés Paclo Ignacio Taibo I, emigráu a América Llatina nos años cincuenta, protagonizó’l pieslle de feria’l llibru de la ciudá mexicana de Guadalajara, que-y tributó un homenaxe pola so trayectoria vital y profesional. Esi reconocimientu, espresáu nel XIII Tributu Nacional de Periodismu Cultural ‘Fernando Benítez’, valió-y d’escenariu a Taibo pa defender l’exerciciu de la profesión periodística como “un compromisu tácitu col otru”, nel trescursu d’un emotivu actu nel que participaron los dos fíos del periodista, los escritores Benito y Paco Ignacio Taibo II, esti segundu director de la Selmana Negra de Xixón. El periodista orixinariu de Xixón, que saltó a América por mor de la so militancia socialista durante’l franquismu cuando trabayaba nel diariu ‘El Comercio’, foi ensalzáu en México como una persona que nun se toma demasiao en serio a sigo mesma pesie a ser autor de decenes de noveles y autor d’una bayurosa llista de testos en prensa escrita. Na viéspora del homenaxe, el so fíu Paco Ignacio Taibo II, tamién invitáu a la feria de Guadalajara en calidá d’autor lliterariu, fizo un llamáu a la mocedá presente nel certame a nun arrenunciar al drechu a la llectura, y alitó a los xóvenes a xunir esi exerciciu tanto col sentimientu de placer como cola necesidá de subversión. 7 d'avientu, 2004 0 FacebookTwitterPinterestEmail
Comunicación El nomamientu de los conseyeros de la tv autonómica abre-y la puerta a la elección del director del ente by asturnet 3 d'avientu, 2004 Hai conseyu, yá pue haber director. El Parlamentu autonómicu aprobó ayeri la composición del conseyu d’alministración de la radiotelevisión pública asturiana, que pasa de proyectu a realidá depués d’un abegosu procesu de creación y qu’antes de fin d’añu, según les pretensiones del Gobiernu, tendrá un director xeneral. El PP quedó finalmente fuera del órganu decisoriu de la tv por voluntá propia y pedirá la comparecencia de los conseyeros. L’Executivu autonómicu mantién nun secretismu estremu el nome del futuru responsable de la radiotelevisión pública, que tará al frente d’un conseyu ‘amenorgáu’ de nueve miembros nomaos por PSOE ya Izquierda Xunida-Bloque por Asturies: los ex alcaldes socialistes Jesús Landeira (Valdés) y Manuel Amieva (Llanes), la ex conseyera d’Alministraciones Públiques Angelina Álvarez, l’abogáu Francisco Díaz, la notaria Montserrat Martínez, la economista María Luzdivina Rodríguez; el caderalgu de comunicación Bernardo Díaz Nosty; el profesor de Drechu Constitucional Benito Aláez y l’escritor n’asturianu y técnicu cultural Adolfo Camilo Díaz. Na sesión d’ayeri na Xunta Xeneral asoleyáronse los argumentos yá vieyos d’un y d’otru bandu políticu. El PP censuró’l coste, al so xuiciu descomanáu, que tendrá l’ente de comunicación y mantién que’l proyectu nun ye prioritariu, argumentos que niega’l PSOE. Pol so llau, Izquierda Xunida-Bloque por Asturies insistió na so propuesta de que’l director de la tv seya nomáu pol Parlamentu, y non pol Gobiernu autonómicu. Depués d’un llargu camín d’engarradielles ente partíos políticos -y tamién nel sen de la propia Federación Socialista Asturiana-, nel que llegaron a intervenir los sucesivos Gobiernos centrales del PP y el PSOE, la radiotelevisión autonómica asturiana empezará emitir en prebes a mediaos de 2005 dende dependencies remocicaes de la Universidá Llaboral de Xixón. 3 d'avientu, 2004 0 FacebookTwitterPinterestEmail
Comunicación Migoya avala énte’l Parlamentu el prestixu de los designaos pal conseyu de la tv autonómica by asturnet 26 de payares, 2004 Son profesionales de prestixu y, poro, nun deben ser cuestionaos. La Conseyera de Cultura y Comunicación Social, Ana Rosa Migoya, defendió güei, nuna comparecencia énte la Xunta Xeneral, la idoneidá de los nueve candidatos qu’integrarán el conseyu d’alministración de la futura radiotelevisión autonómica asturiana. El PP ratifica que nun entrará nel conseyu al entender que l’ente de comunicación supón un marafundiu de perres públiques. Nengún argumentu nuevu. Dende’l Gobiernu sustentáu pol pactu ente PSOE ya Izquierda Xunida-Bloque por Asturies deféndese la cualificación de los nueve profesionales que tendrán capacidá decisoria nel futuru ente públicu, pesie a que la llista yá foi cuestionada pola presencia de persones con fuerte vinculación política y por incluyir a sólo un espertu en Comunicación, el caderalgu Bernardo Díaz Nosty. Dende’l frente contrariu, el Partíu Popular insiste na aporfiadura que paralizó durante meses la puesta en marcha de la tv, y ratificó güei en boca’l so voceru, Fernando Goñi, que nun nomará a los conseyeros que-y correspuende designar porque ve nel futuru ente de comunicación un marafundiu inxustificáu de caudales públicos. A esi yá vieyu argumentu, Migoya replicó afirmando que los créitos pa la puesta en marcha de la radiotelevisión autonómica alpenes superen el 1 por cientu del presupuestu’l Principáu pa 2005, y defendió l’allugamientu de l’ente públicu na Universidá Llaboral de Xixón como una midida qu’economiza costes. Depués d’un llargu camín d’engarradielles ente partíos políticos -y tamién nel sen de la propia Federación Socialista Asturiana-, nel que llegaron a intervenir los sucesivos Gobiernos centrales del PP y el PSOE, la radiotelevisión autonómica asturiana nacerá ‘de facto’ del prósimu 2 d’avientu, fecha señalada pa l’aprobación na Xunta Xeneral del Principáu de la constitución del conseyu de la tv colos nueve candidatos propuestos. Sedrán representantes del PSOE nel conseyu d’alministración los ex alcaldes socialistes Jesús Landeira (Valdés) y Manuel Amieva (Llanes), la ex conseyera d’Alministraciones Públiques Angelina Álvarez, l’abogáu Francisco Díaz, la notaria Montserrat Martínez, la economista María Luzdivina Rodríguez y el caderalgu Díaz Nosty. Por Izquierda Xunida-Bloque, sedrán conseyeros el profesor de Drechu Constitucional Benito Aláez y el escritor n’asturianu y técnicu cultural Adolfo Camilo Díaz. 26 de payares, 2004 0 FacebookTwitterPinterestEmail
Comunicación Una mayoría de políticos y xuristes controlará l’órganu decisoriu de la tv autonómica by asturnet 25 de payares, 2004 Tres xuristes, dos ex alcaldes, una ex conseyera, una economista, un xestor cultural asturianista y sólo un espertu en comunicación. Esa sedrá la composición del conseyu d’alministración de la radiotelevisión autonómica, el grupu de persones que tendrá poder de decisión en cuestiones d’algame nel futuru ente públicu. Asina, la llista de candidatos a formar parte del conseyu, asoleyada ayeri polos dos grupos políticos que nomarán a los sos representantes -PSOE ya Izquierda Xunida-Bloque por Asturies-, inclúi a los ex alcaldes socialistes Jesús Landeira (Valdés) y Manuel Amieva (Llanes), y a la ex conseyera d’Alministraciones Públiques Angelina Álvarez, anguaño trabayadora nos servicios xurídicos del Principáu. Representarán tamién al PSOE nel conseyu de la tv dos profesionales del ámbitu xurídicu, l’abogáu y profesor de Práctica Xurídica Francisco Díaz y la notaria xixonesa Montserrat Martínez, y una profesional de la economía, l’analista d’inversiones de la Sociedá Rexonal de Promoción María Luzdivina Rodríguez. La llista propuesta polos socialistes complétala el caderalgu de Comunicación na Universidá de Málaga Bernardo Díaz Nosty, únicu espertu en comunicación nun conseyu qu’echará a andar la prósima selmana ensin los conseyeros que-y correspuenden al PP depués de l’aprobación de la llista pola Xunta Xeneral del Principáu. Pol so llau, Izquierda Xunida-Bloque por Asturies designó como representantes nel conseyu d’alministración de l’autonómica a un xurista más, el profesor de Drechu Constitucional Benito Aláez, y al escritor n’asturianu y técnicu cultural nel Ayuntamientu de Corvera Adolfo Camilo Díaz. Archivu. El Parlamentu ultima los trámites pa echar a andar la tv autonómica, mientres Galicia prevé un segundu canal 25 de payares, 2004 0 FacebookTwitterPinterestEmail
Comunicación El Parlamentu ultima los trámites pa echar a andar la tv autonómica, mientres Galicia prevé un segundu canal by asturnet 23 de payares, 2004 El llargu partu de la rediotelevisión pública asturiana cumple los últimos trámites. La Xunta Xeneral aprobará la prósima selmana la elección de los miembros del conseyu d’alministración del nuevu ente públicu, primer pasu burocráticu pa echar a andar una tv qu’empezará a emitir nun añu, 2005, nel que la vecina Galicia quier poner en marcha un segundu canal dixital de la so yá veterana televisión autonómica. Depués d’un estensu camín chiscáu de torgues llegales, desalcuentros políticos ya intermitencies nel interés por crear l’ente, la radiotelevisión autonómica asturiana empezará a definir la so personalidá n’alpenes diez díes, cuando’l Parlamentu asturianu abra les puertes pa la elección del conseyu d’alministración de la tv. La incógnita agora ye si el PP accederá ‘in extremis’ a nomar los seis miembros que-y correspuenden en proporción al so númberu d’escaños na Xunta, yá que’l bloquéu d’esi partíu impidió durante años la constitución del ente hasta qu’un cambiu llegal introducíu na Llei d’acompañamientu de los presupuestos pa 2004 permitió que’l conseyu se constituya namás colos siete conseyeros nomaos pol PSOE y los dos que-y correspuenden a Izquierda Xunida-Bloque por Asturies. Inda esta mañana, el voceru’l Partíu Popular na Xunta Xeneral, Fernando Goñi, reiteró que la so formación arrenunciará a tar presente nel conseyu d’una empresa pública que, na so opinión, costará más de los 15 millones d’euros previstos y amás d’ello ta buscando producción de programes en Cataluña encuenta facelo n’Asturies. En tóu casu, si se cumplen les previsiones el conseyu podría ser una realidá en cuestión de díes, trámite qu’abre la puerta definitiva -xunta les actuaciones técniques yá previstes nos Presupuestos pa 2005- a la creación definitiva del ente públicu de comunicación, cuyes primeres emisiones dende la Universidá Llaboral de Xixón estímense pa mediaos del añu prósimu. Mientres tantu, el director xeneral de la tv autonómica de la vecina Galicia, Francisco Campos, anunció la pasada selmana nel Parlamentu gallegu la intención del ente que dirixe de crear en 2005 un segundu canal dixital especializáu en programes infantiles y xuveniles, cine en llingua gallega y espacios culturales. Anguaño, la televisión gallega ye sintonizable en bona parte del occidente asturianu. 23 de payares, 2004 0 FacebookTwitterPinterestEmail
Comunicación El grupu Recoletos desembarca n’Uviéu y Xixón con un nuevu diariu gratuitu by asturnet 22 de payares, 2004 Una tirada diaria de 40.000 exemplares, una estensión d’ente 24 y 48 páxines y una apuesta pola cultura, l’ociu, el consumu y el mediu ambiente. Con eses cartes de presentación saldrá a la cai n’Uviéu y Xixón, a mediaos de xineru, el nuevu diariu gratuitu ‘Qué diario’, editáu pol grupu de comunicación Recoletos -que xestiona, ente otres cabeceres, Marca, Expansión y Diario Médico-, y en cuya fechura trabaya yá un equipu d’once profesionales. El nuevu mediu de comunicación, qu’alterará el mercáu tradicional de la prensa asturiana de papel al ufrir por primer vegada nel Principáu información diaria gratuita de gran difusión, editará les dos cabeceres asturianes dende una redacción única, allugada na cai Campoamor d’Uviéu, na que redactores, fotógrafos y comerciales trabayen dende finales d’ochobre coordinaos por Juan Carlos Villar. La iniciativa de Recoletos ye d’ámbitu estatal y prevé el llanzamientu simultáneu de cabeceres nuna docena de capitales o grandes ciudaes. Los primeros númberos del diariu llegará en xineru a los puntos de repartu -llugares de pasu y gran afluencia de ciudadanos n’Uviéu y Xixón- col propósitu d’oriellar la información densa sobro política o el mundu llaboral y centrar el focu n’asuntos más cercanos a los llectores, como la denuncia vecinal y el consumu familiar. Orixináu en 1977 y presidíu por Jaime Castellanos, el grupu Recoletos emplega a 1.200 trabayadores y edita les publicaciones periódiques Marca, Expansión, Actualidad Económica, Telva, Diario Médico y Gaceta Universitaria. Archivu. El grupu Recoletos, propietariu de Marca y Expansión, prepara la edición d’un diariu gratuitu n’Uviéu 22 de payares, 2004 0 FacebookTwitterPinterestEmail
Comunicación Xuan Bello diversifica la so producción lliteraria con un nuevu diariu personal en prensa escrita by asturnet 15 de payares, 2004 Xuan Bello cuenta la so vida. L’escritor natural de Paniceiros (Tinéu), ún de los autores contemporáneos asturianos más vendíos anguaño nel ámbitu estatal, estrena una nueva serie de diarios personales en llingua castellana na edición dominical del diariu xixonés ‘El Comercio’. Nos testos amiéstense reflesiones y nomes propios qu’axunten lo llocal y lo universal. Definida pol propiu periódicu xixonés como “un retratu selmanal del universu asturianu”, la serie entamada ayeri por Bello pretende definir dende la cotidianidá lo qu’asocede n’Asturies cola prosa posada y fonda que-y valió al autor los sos, hasta agora, dos grandes éxitos lliterarios en castellán, les noveles ‘Historia universal de Paniceiros’ y ‘Los cuarteles de la memoria’. La llegada de Bello a les páxines de ‘El Comercio’ prodúzse depués de qu’un cambiu na dirección del diariu, qu’ocupa dende mayu pasáu Íñigo Noriega, abriera una etapa d’especial sensibilidá cola llingua y la cultura asturianes nel periódicu más veteranu d’Asturies. A esi interés dende l’ámbitu de la dirección obedecen tamién la voluntá de modernizar y fortalecer la sección ‘Alitar Asturies’ y la inclusión de testos regulares en llugar destacáu, el veranu pasáu, d’otru de los autores orixinalmente en llingua asturiana qu’algamó notables cotes de siguimientu en castellán, Pablo Antón Marín Estrada. Archivu. Íñigo Noriega asume la dirección del diariu ‘El Comercio’ 15 de payares, 2004 0 FacebookTwitterPinterestEmail
Comunicación Les radios alternatives discuten en Xixón la so capacidá pa difundir la cultura by asturnet 3 de payares, 2004 La quinta edición de la Selmana de la Radio va cellebrase en Xixón dende güei hasta’l 12 de payares nel Centru Municipal d’El Coto. Estes xornaes, organizaes pola asociación xuvenil Burbús, pretenden difundir la comunicación nes ondes al través de radios llibres, de calter comunitariu y cultural. Un alcuentru d’emisores alternatives, programes en directu y un taller de radio destináu a escolinos igüen el gruesu d’esta V Selmana. A lo llargo de los díes 6 y 7 de payares va celebrase l’aconceyamientu de radios llibres con cinco meses de discutiniu alrodiu d’asuntos como los aspectos llegales de la comunicación alternativa, la difusión cultural nesti tipu de medios, la radio non profesional como plataforma, les posibilidaes d’Internet o la financiación y recursos d’estos colectivos. Al empar más de cuatrocientos alumnos de cuatro centros de primaria y dos de secundaria van pasar pol taller pa escolinos que va impartise peles mañanes y nél que los rapazos van conocer el funcionamientu d’una emisora, asina como entamar exercicios de locución, controles y facer un programa en directu, ayudaos polos monitores de l’asociación xuvenil Burbús. Les tardes del 3 al 5 y del 8 al 12 de payares van tar acoyer dende l’Aula 1 del Centru Municipal del Coto emisiones en directu d’espacios deportivos, culturales y musicales. El día 11 nel mesmu sitiu va desarrollase una xornada de radiu n’asturianu, con programación esclusiva na nuestra llingua. La Selmana ye una iniciativa de Radio Asgaya y del colectivu cultural que lleva a cabu les sos actividaes nella, l’asociación xuvenil Burbús y cuenta col apoyu económicu de la Fundación Municipal de Cultura del Ayuntamientu de Xixón, Caxastur y l’Institutu Asturianu de la Mocedá. 3 de payares, 2004 0 FacebookTwitterPinterestEmail