Educación L’alumnáu universitariu manifiéstase esti Xueves n’Uviéu by asturnet 2 d'abril, 2014 Les Asamblees d’Estudiantes y el Conseyu d’Estudiantes de la Universidá d’Uviéu entamen esti xueves de magar les 12:00 una manifestación con entamu na Plaza América d’Uviéu, con un llema qu’amuesa nidiamente la situación na que s’alcuentra la reivindicación estudiantil nesti momentu: “La gota qu’apinó’l vasu”. L’envís de la mesma ye refugar los numberosos retayos que vien sufriendo la institución académica, y la correspondiente perda de servicios no cualitativo y cuantitativo. Les beques o’l zarru de servicios como les biblioteques, la perda de puestos de trabayu en cuantes a personal alministrativu y de servicios, o nel tarren docente l’avieyamientu de la plantiya, l’aumentu de carga docente, perda de poder alquisitivu, o esaniciu de places son delles de les causes de la convocatoria. L’alumnáu desixe una Universidá d’Uviéu abierta, accesible a tol pueblu asturianu y de calidá, “na que tanto trabayadores como estudiantes tengamos voz y votu a la hora de tomar decisiones”. Poro, llamen a siguir lluchando escontra l’esmantelamientu d’UniOvi, y por un modelu educativu de y pal pueblu. 2 d'abril, 2014 0 FacebookTwitterPinterestEmail
Educación Nuevu cursu de llingua de la XPDLLA by asturnet 2 d'abril, 2014 La Xunta Pola Defensa de la Llingua Asturiana sigue apostando pola organización de cursos empobinaos al deprendizaxe de la llingua asturiana y tres del cursu entamáu selmanes atrás nel CS Sestaferia de Xixón, dirixíu al deprendizaxe de la llingua asturiana dende un nivel básicu, acaba empobinase a la convocatoria d’otru pa la enseñanza dende una perspeutiva avanzada. L’entamu del nuevu cursu ta previstu pal martes 8 d’abril., con una duración de 40 hores, desenvolviéndose los martes y xueves de 19 a 21 hores. El llugar escoyíu ye’l Conceyu Abiertu, asitiáu na Cai La Gascona 12, baxu. Uviéu. El preciu matrícula+materiales ye de 20 pa socios y 30 non socios. La Xunta pola Defensa de la Llingua Asturiana ye una entidá acreitada pola Conseyería d’Educación pa la formación permanente del profesoráu. 2 d'abril, 2014 0 FacebookTwitterPinterestEmail
Plástiques El Muséu del Pueblu d’Asturies adquier 4 retratos de llabradores pintaos por Prado Norniella nel 1917 by asturnet 27 de marzu, 2014 El Muséu del Pueblu dAsturies acaba d’incorporar a la so colección cuatro retrato de llabradores asturianos realizaos en 1917 pol pintor José Prado Norniella (Cualloto, Uviéu, 1875 Madrid, 1937). Los retrataos son la madre, el padre, l’hermanu y la cuñada del pintor, toos vecinos del pueblu de Cualloto (conceyu d’Uviéu). Son olios sobre llenzu y miden 40 x 40 cm. La semeya de la madre foi pintada del natural el 25 d’abril de 1817 y lleva la inscripción siguiente: “Semeya de la mio madre al cumplir 92 años. Nació’l 24 d’abril de 1825. La semeya del padre ye la única que ta pintada a partir d’una fotografía fecha en febreru de 1904, el mesmu añu en que finó; na semeya apaez la siguiente inscripción: “Semeya del mio padre al cumplir 79 años. Nació’l 12 de febreru 1825 – 8 marzu de 1904. Les semeyes de llabradores son perrraros na hestoria del arte asturiano. Hai representaciones de llabradores na pintura costumbrista de fines del sieglu XIX y nel sieglu XX, pero siempres representaos como tipos o escenificando trabayos rurales; sicasí, son bien escasos les semeyes d’individuos concretos pertenecientes a esti grupu social. El campesináu solo va aportar al xéneru de la semeya a partir de la xeneralización de la fotografía y, inclusive, esti accesu va ser tardíu, a partir de los últimos años del sieglu XIX y sobremanera nel sieglu XX, cuando la fotografía abarátase y empieza a estendese por tol territoriu. Les cuatro semeyes pueden vese a partir de güei nel Muséu del Pueblu dAsturies nel espaciu dedicáu a Últimes alquisiciones, onde van tar espuestos hasta’l mes de xunetu. El Muséu del Pueblu dAsturies continua cumpliendo d’esta manera coles funciones básiques d’un muséu, que son l’alquisición, caltenimientu, estudiu y espardimientu del patrimoniu cultural. 27 de marzu, 2014 0 FacebookTwitterPinterestEmail
Educación Fina’l primer cursu sobro Usu Especializáu del Asturianu organizáu pol Institutu Asturianu d’Alministración Pública by asturnet 27 de marzu, 2014 Los díes 24, 25, 26 y 27 de marzu d’anguaño vieno impartiéndose un cursu tituláu «Usu Especializáu del Asturianu: Testos Científicos, Técnicos, Divulgativos y Informativos», organizáu pol Institutu Asturianu d’Alministración Pública «Adolfo Posada» y coordináu por Ramón d’Andrés que ye la primer esperiencia d’esti tipu desenvuelta nel contestu de la formación que se ufre a los funcionarios asturianos sobre l’usu especializaú de la llingua asturiana nel so desendolcu llaboral cotidianu. La esperiencia finaba esti día con una participación bultable que fai albidrar la posibilidá de que se repita nel futuru, Les materies impartíes y el profesoráu que les impartió foron les que vienen darréu: «Introducción a los estilos formales na llingua asturiana», por Ramón d’Andrés Díaz, profesor titular de Filoloxía Española y Asturiana de la Universidá d’Uviéu y coordinador del Seminariu de Filoloxía Asturiana. «Llinguaxe científico-técnicu n’asturianu», por Ramón d’Andrés Díaz. «Llinguaxe divulgativu y informativu n’asturianu», por Xosé Miguel Suárez Fernández, llicenciáu en Filoloxía Española y Espertu en Filoloxía Asturiana pola Universidá d’Uviéu; espertu en lexicografía y corrección llingüística. «Ferramientes y recursos llingüísticos pal asturianu», por Héctor García Xil, llicenciáu en Filoloxía Española pola Universidá de Lleón y Especialista en Filoloxía Asturiana pola Universidá d’Uviéu; espertu en llingüística asturiana. 27 de marzu, 2014 0 FacebookTwitterPinterestEmail
Educación El SIndicatu d’Estudiantes convoca manifestaciones n’Asturies by asturnet 27 de marzu, 2014 Esti miércoles 26 de marzu entamó la primera de les dos xornaes de fuelga educativa que’entamara’l Sindicatu d’Estudiantes a nivel estatal y como ye vezu nes convocatories d’esa organización, la incidencia ta dándose nos Institutos d’Educación Secundaria. Pa dá-y continuidá, esti xueves amás de la segunda xornada de fuelga, dende’l SE entamen manifestaciones en cuatro puntos d’Asturies: Uviéu (entamu na Plaza la catedral), Xixón (salida na Plaza’l Parchís), Avilés (Plaza España) y Llangréu (Parque Vieyu de La Felguera), col envís de protestar escontra la LOMCE, nueva llei educativa promovía pol gobiernu central. Sigún el Sindicatu d’Estudiantes, hai niveles importantes de sofitu estudiantil a una convocatoria de fuelga qu’esta vegada nun cunta col sofitu del restu la comunidá educativa. 27 de marzu, 2014 0 FacebookTwitterPinterestEmail
Educación Vicente Gotor reclama protagonismu pala Universidá nel PCTI by asturnet 18 de marzu, 2014 El rector de la Universidá d’Uviéu, Vicente Gotor, reclamó esti llunes na Xunta Xeneral del Principáu que la Universidá d’Uviéu tendría de tener más protagonismu nel Plan de Ciencia, Tecnoloxía ya Innovación (PCTI) 2013-2017, porque “cuando se fala d’un plan de Ciencia y tecnoloxía, la investigación básica y tamién l’aplicada ye fundamental”. La reclamación de Gotor produxose nes comparecencies nel Parlamentu sobre’l nuevu Plan de Ciencia nes que tamién participaron represenantes empresariales y de la sociedá civil. Xunta Gotor faló tamién pela Universidá la Vicerrectora d’Investigación, Paz Suárez Rendueles, que dexó bien a les clares que dende la Universidá consideren que se debería incorporar al Plan más ciencia y tecnoloxía y que la so denuncia diba pola escasa presencia de protagonismu de la institución nun Plan “qu’ignoró dafechu’l plan de conversión de campus d’excelencia que dexó de tener financiamientu del principáu dende 2012”. La Universidá d’Uviéu namái ta presente en dos de la totalidá de les llínees d’actuación que contempla dichu Plan, polo que reclama falta de concrección presupuestaria pa llograr caún de los oxetivos previstos y consideró enforma optimista la previsión sobre fondos privaos. 18 de marzu, 2014 0 FacebookTwitterPinterestEmail
Educación El Conceyu Xeneral de la Universidá denuncia la situación na que s’alcuentren estudiantes, profesores y PAS y piden medíes by asturnet 17 de marzu, 2014 El vienres pásau celebrose un Conceyu Xeneral de la Universidá d’Uviéu que tuvo llugar nel Edificiu Históricu, nel cual participaron miembros del estudiantáu, asina como PDI (Personal Docente ya Investigador) y PAS (Personal d’Alministración y Servicios), que dexaron bien a les clares “la crítica que ta viviendo la Universidá Pública” y qu’empobinó a tolos sectores de a comunidá universitaria axuntaos nun Conceyu Abiertu (Personal Docente ya Investigador -PDI-, Personal d’Alministración y Servicios -PAS- y estudiantes) a “denunciar conxuntamente los retayos que se tán llevando a cabu y a aquellos que los idearon y executaron. La sociedá asturiano tien derechu a saber qué ta pasando cola so Universidá y a esixir una Universidá Pública, d’accesu universal y de calidá”. Pa los estudiantes, profesores y PAS axuntaos nesti Conceyu “los problemes son cada vegada más y son mayores. Estos, afecten a tola comunidá universitaria y, desti mou, a la sociedá asturiano”. Nun comunicáu conxuntu afítase que “el PAS y el PDI tan sufriendo un ERE encubiertu yá que s’obliga a trabayar más hores y en condiciones más precaries a los sectores más vulnerables de dambos colectivos. La imposibilidá de la sustitución de les xubilaciones, xunida al nefastu plan de prexubilaciones acometíu pol rectoráu lleva inequívocamente al avieyamientu actual de la plantiya, que queda de manifiestu nel amenorgamientu de 100 places de mozos investigadores nel últimu cursu”. 17 de marzu, 2014 0 FacebookTwitterPinterestEmail
Educación Ignaciu Galán falará esti xueves n’Oxford sobre l’asturianu by asturnet 17 de marzu, 2014 El presidente d’Iniciativa pol Asturianu, Inaciu Galán, va dar una conferencia na Universidá d’Oxford esti xueves dientro del XVI Forum for Iberian Studies, embaxo’l títulu ‘L’asturianu: l’anomalía d’una llingua non oficial nun estáu plurillingüe’. Ignaciu Galán va esplicar a los alumnos y profesoráu de la Faculty of Medieval and Modern Languages de la Universidá d’Oxford, asina como a espertos en llingües ibériques del mundu enteru, la situación llegal del asturianu, como llingua ensin reconocimientu del estatus d’oficialidá, apurriendo casos de discriminación y un repás a la hestoria de la situación llegal del asturianu, La conferencia va dase n’asturianu na Taylor Institution, con una torna en papel al inglés pa les persones que nun seyan a siguila nesti idioma. Ente los conferenciantes presentes nel XVI Forum for Iberian Studies que se celebra nesta prestixosa universidá fundada nel añu 1096, van tar espertos d’universidaes europees y d’otros países pa falar de la hestoria, la situación y les carauterístiques de les llingües que se falen na Península Ibérica Inaciu Galán (Xixón, 1986) ye Máster en Sociedá de la Información y el Conocimientu na UOC, Graduáu en Periodismu pola UDIMA, Diplomáu en Turismu y Especialista en Xestión Cultural pola Universidá dUviéu. El so llabo profesional desendólcalu como periodista en distintes xeres ente les que destaca’l so programa ‘Territoriu Sidreru’ de TPA. 17 de marzu, 2014 0 FacebookTwitterPinterestEmail
Educación El Sindicatu d’Estudiantes anuncia piquetes n’Uviéu, Xixón, Avilés y les Cuenques pal día 26 y manifestaciones pal 27 by asturnet 14 de marzu, 2014 Al tiempu que pidía al PSOE que siga l’exemplu d’Izquierda Xunida nel refugu, ´de verdá´, a la Llei Wert, el SIndicatu d’Estudiantes convocaba ayeri xueves y pal 26 de marzu la puesta en marcha de piquetes n’Uviéu, Xixón, Avilés y Cuenques Mineres y pal 27 de marzu manifestaciones neses mesmes zones, toes elles convocaes pa les 12 hores. El secretariu xeneral del Sindicatu d’Estudiantes, Pablo Alcántara, y los coordinadores de Mocedá y Educación d’IX, David Leis y Fran Rei, ufiertaron esta mañana una rueda de prensa conxunta na que faen un llamamientu a la participación nes movilizaciones. El secretariu xeneral del Sindicatu d’Estudiantes, Pablo Alcántara, pidió ayeri a los socialistes que sigan l’exemplu d’Izquierda Xunida nel refugu a la reforma educativa, nun solo nes instituciones, sinón tamién nes cais. El PSOE, como ta faciendo equí IX, lo que debe de faer ye asitiase en contra d’esta llei de verdá, y asitiase tamién nes cais como tamién ta faciendo IX. Alcántara y los coordinadores de Mocedá y Educación d’IX, David Leis y Fran Rei, ufiertaron una rueda de prensa conxunta na que se punxo de manifiestu’l compromisu d’IX coles protestes y el refugu fronteru a la reforma de la llei educativa que va enzancar, cuando nun va torgar, que los estudiantes con menores recursos queden escluyíos de la formación cimera. Rei, amás, pidió la retirada de la Llei y la dimisión del ministru d’Educación. David Leis destacó’l sofitu de la área de Mocedá d’IX a les movilizaciones. La posición d’IX, afirmó’l coordinador de la área de Mocedá ye clara: defender a los estudiantes frente a unos ataques que solo busquen segregar a los fíos de el trabayadores. 14 de marzu, 2014 0 FacebookTwitterPinterestEmail
Educación SUATEA convoca asamblees polos cambios nes oposiciones by asturnet 11 de marzu, 2014 Los cambios de ponderación de la formación, la esperiencia docente y la nota de la oposición, nes próximes convocatories de secundaria, beneficiandola nota y amenorgando la esperiencia docente del 50% de la ponderación al 35% n’Aturies ye la causa de la convocatoria a Asamblea pa esti miércoles 12 de marzu a les 18,30 nel IES Aramo d’Uviéu que vieno acabante facer el sindicatu SUATEA. Los cambeos cinquen tamién a la formación académica que pasa del 25 al 20% y la meyora de la puntuación de la nota de la oposición nes llistes d’interinos que va pasar del 30% al 50%, anque lloñe del 80% qu supón en Madrid pa ellaborar les llistes d’interinos. 11 de marzu, 2014 0 FacebookTwitterPinterestEmail