Comunicación La Universidá plantégase más cursos de Llingua pa periodistes, depués del ésitu de la primer convocatoria by asturnet 15 de setiembre, 2004 Más cursos de llingua asturiana p’atender la demanda de los trabayadores de los medios de comunicación. La Universidá d’Uviéu, en comuña cola Oficina de Política Llingüística, plantégase convocar nuevos monográficos nel segundu cuatrimestre, depués que les 35 places pal primeru de los cursos quedaren cubiertes nos primeros seis díes naturales del plazu de matrícula. Asina, el periodu d’inscripción abrióse’l pasáu 9 d’ochobre y, depués de rexistrar 15 matrícules na primer xornada, completó les 35 places ufiertaes nel cuartu día hábil pa la matriculación, el pasáu martes. Poro, el cursu de llingua asturiana nel ámbitu de la información y la comunicación, dirixíu por Xulio Viejo, desendolcaráse ente’l 1 d’ochobre y el 13 de payares n’Uviéu y Xixón col aforu completu. La Universidá y la Oficina de Política Llingüística tendrán una segunda ocasión de valorar l’ésitu de la so convocatoria específica pa formar periodistes nel usu del asturianu a partir del prósimu 29 d’ochobre, día en que quedará abiertu’l plazu pal segundu de los cursos previstos nesti cuatrimestre: un monográficu especializáu en comunicación audiovisual nes situaciones de minorización llingüística. La conseyera de Cultura, Comunicación Social y Turismu, Ana Rosa Migoya, presentó’l pasáu 9 de setiembre los cursos empobinaos a periodistes como un preséu útil pa capacitar a profesionales qu’usen l’asturianu nos medios de comunicación, un entornu fundamental pal caltenimientu d’un idioma. Migoya: “Ye una obviedá que l’asturianu tará presente na radio y na televisión autonómiques” 15 de setiembre, 2004 0 FacebookTwitterPinterestEmail
Escéniques ‘Cultura pal Arango’ busca nuna manifestación l’aprobación ciudadana pa recuperar el teatru by asturnet 15 de setiembre, 2004 ‘Cultura pal Arango’ afronta una preba de sobrevivencia. La plataforma, que reclama la recuperación del teatru xixonés como espaciu cultural, plantega pa güei una manifestación na que los responsables del collectivu quieren midir el sofitu ciudadanu a la so reclamación. La marcha defenderá la participación popular na cultura de la ciudá, lloñe del “unos faen, el restu agüeyamos”. Asina lo precisa’l cartafueyu col que ‘Cultura pal Arango’ convoca la manifestación, que saldrá a les 19 hores dende’l teatru y pidirá poles cais de Xixón la reapertura de la sala como espaciu cultural “dientru d’un proyectu xeneral d’afitamientu, espardimientu y esporpolle de les artes escéniques y musicales n’Asturies”. La manifestación, con fecha prevista hai yá varies selmanes, cellebraráse nun momentu nel que Corporación Dermoestética asegura tener yá peslláu l’alcuerdu colos propietarios del inmueble pa xestionalu nos prósimos venti años como clínica d’estética, mientres l’alcaldesa de la ciudá, la socialista Paz Fernández Felgueroso, insiste en descartar una inyección de fondos municipales na recuperación del teatru. Pol so llau, los miembros de ‘Cultura pal Arango’ enfótense entá en poder acceder al edificiu -pa lo que necesiten el preste de los dueños del inmueble-, pasu imprescindible pa sacar alantre el proyectu técnicu de viabilidá que’l collectivu yá tien en marcha pa valorar y tasar el remocicamientu del teatru como espaciu cultural. Miembros de la plataforma entamaron ayeri un itinerariu guiáu por Héctor Blanco nel que recorrieron los llugares onde tuvieron asitiaes les primeres sales cinematográfiques de la ciudá, ente elles el primitivu teatru Xovellanos -onde se rexistró la primer proyección de cine, en 1896-, el María Cristina, el Roma, l’Albéniz, el Robledo y el cine Hernán Cortés. Web de ‘Cultura pal Arango’ 15 de setiembre, 2004 0 FacebookTwitterPinterestEmail
Educación La denominación ‘Lengua tradicional: bable asturiano’ desapaez del currículu de Secundaria by asturnet 15 de setiembre, 2004 L’asignatura ‘Lengua tradicional: bable/asturiano’ desapaez na Secundaria. El Gobiernu autonómicu aprobó na so xuntanza de güei la modificación del currículu d’esa materia na Educación Secundaria Obligatoria (ESO), que mantién no esencial el testu en vigor dende 2002 pero recupera la denominación xenérica ‘Llingua Asturiana y Lliteratura’. Acaben asina más de dos años d’engarradiella terminolóxica ente l’asturianismu y sectores de la comunidá educativa, per un llau, y la Conseyería d’Educación y Ciencia, por otru, con una rectificación llegal que l’Executivu xustifica, nel decretu aprobáu güei, na necesidá de que l’asignatura de Llingua “reciba una única denominación en toles etapes educatives”. De fechu, el cambiu resúmese nun artículu únicu desdobláu en dos puntos que desanicia la espresión ‘Lengua tradicional: bable/asturiano’ y camúdala pola de ‘Llingua Asturiana y Lliteratura’ nes 28 fueyes qu’integren el currículu, nuna modificación que respeta no esencial el testu orixinal del currículu -planificación de la educación con conteníos, plazos y oxetivos mui precisos- ya inclúi puntuales y pequeñes omisiones na introducción respectu a la norma qu’agora ta en vigor, tamién rellacionaes cola terminoloxía más que colos conteníos. Amás de modificar el testu referíu a la Educación Secundaria Obligatoria, l’Executivu sacó alantre na so xuntanza de güei el currículu de Llingua Asturiana pal Bachilleratu. Dambes disposiciones cuenten col informe favoratible del Conseyu Escolar del Principáu d’Asturies. El Gobiernu ultima la recuperación de la espresión ‘Llingua Asturiana’ nel currículu de Secundaria 15 de setiembre, 2004 0 FacebookTwitterPinterestEmail
Sociedá L’Ayuntamientu d’Uviéu ignora dos peticiones de les mocedaes socialistes pa potenciar l’asturianu by asturnet 15 de setiembre, 2004 Dos cartes ensin rempuesta. Les Mocedaes Socialistes d’Uviéu mantiénense entá a la espera de recibir una contestación a sendes peticiones cursaes énte l’Ayuntamientu de la ciudá en febreru y mayu pasáu, nes que-y reclamaben al Consistoriu una normalización llingüística planificada pa recuperar y dignificar la llingua nel conceyu. Asina lo afirma’l secretariu xeneral de les Mocedaes Socialistes d’Uviéu, David Rodríguez, pa quien los militantes más mozos del PSOE asturianu “ya tienen asumida” la reivindicación de la coficialidá na prósima reforma del Estatutu d’Autonomía. “Cada vez hai más xente a favor dientro’l partíu, anque tovía nun somos mayoría”, asegura Rodríguez. Les Mocedaes Socialistes d’Uviéu entamaron esti mediudía una simbólica clase de llingua asturiana al aire llibre, nún de los puestos allugaos na cai San Francisco con ocasión de les fiestes de Samatéu. N’opinión de los militantes más mozos del PSOE uvieín, “la difusión del asturianu debe ser una prioridá de toles instituciones”, un xuiciu que nun comparte na práctica un sector de cabezaleros de la Federación Socialista Asturiana. Pesie a pesllar con una breve cita n’asturianu el so discursu institucional nel actu d’entrega de les Medalles d’Asturies, cellebráu el pasáu 7 de setiembre n’Uviéu, el presidente autonómicu, el socialista Vicente Álvarez Areces, manifestara pocos díes antes la so apuesta por postergar la coficialidá de la llingua asturiana “pa nun reforzar lo que nos separa de los demás”. Francisco Llera retrúca-y a Areces qu’apostar poles señes d’identidá “refuerza la España plural” 15 de setiembre, 2004 0 FacebookTwitterPinterestEmail
Patrimoniu Galicia basará la promoción del Camín de Santiago na concesión del ‘Príncipe de Asturias’ de la Concordia by asturnet 15 de setiembre, 2004 El nome d’Asturies tará en toles grandes promociones turístiques del Camín de Santiago en 2005. Darréu acabe l’Añu Santu Compostelanu inda en cursu, la Xunta de Galicia basará la difusión y propaganda de la ruta xacobea na concesión del premiu ‘Príncipe de Asturias’ de la Concordia, qu’una representación d’instituciones y comunidaes vinculaes al Camín recibirá n’Uviéu el mes prósimu. Según anunció ayeri el conseyeru gallegu de Cultura, Xesús Pérez Varela, el Gobiernu de Galicia, la sociedá Turgalicia y el Plan de Xestión del Xacobeo tienen claros dos puntos sobro los que van afitar la campaña de la ruta xacobea l’añu prósimu: La referencia destacada al galardón otorgáu n’Uviéu hai agora una selmana y el lema de la campaña, que sedrá “dame la to mano, toma la mio mano”. Premiu a El Guerruj Dotramiente, los xuraos de los Premios ‘Príncipe de Asturias’ finaron esti mediudía la so actividá de la edición d’esti añu col asoleyamientu’l fallu del galardón correpondiente a los Deportes, que recayó nel atleta marroquí Hicham El Guerruj pol so “compromisu col deporte y cola sociedá”, materializáu na ayuda a los necesitaos al traviés de la so participación n’acciones benéfiques y na “rebelión contra la desgracia” que-y impidiera, hasta esti veranu, algamar la medalla d’oru olímpica na so especialidá, la carrera de los 1.500 metros. Amás, el xuráu reconoció los méritos más recientes del “estraordinariu deportista” magrebí, que nes Olimpiaes d’Atenas llogró tamién la medalla d’oru na preba de los 5.000 metros, doblete del que namás hai un precedente na hestoria. Un total de 15 candidatures procedentes de nueve nacionalidaes opten al últimu de los ‘Príncipe’ de 2004, que na so edición anterior correspondió-y al Tour de Francia y que ta empobináu a persones, collectivos o instituciones que tengan algamao nueves metes “na llucha del home por superase a sigo mesmu”. El ‘Príncipe’ de la Concordia reconoz el simbolismu hestóricu de les pelegrinaciones a Santiago 15 de setiembre, 2004 0 FacebookTwitterPinterestEmail
Emigración El Principáu quier escenificar nos actos al rodiu’l 8 de Setiembre la xunidá de la colonia asturiana en Madrid by asturnet 15 de setiembre, 2004 Superar “controversies” pasaes. Esi ye l’envís central que’l Gobiernu’l Principáu quier asigna-y a la primer cellebración itinerante del Día d’Asturies nel esterior, que va desendolcase en Madrid a partir del vienres y na que l’Executivu quier escenificar l’intierru de la llarga engarradiella ente los dos grandes collectivos d’asturianos na capital: el Centru Asturianu y l’asociación Asma. Asina lo declaró güei n’Uviéu el conseyeru de Xusticia, Seguridá Pública y Relaciones Esteriores, Francisco Javier García Valledor, que presentó los actos previstos en Madrid como unes cellebraciones concebíes pa que “la comunidá asturiana proyecte una imaxen de xunidá” nel Ateneo de Madrid, un espaciu elixíu, según el conseyeru, porque permite acoyer a un mayor númberu d’asistentes. Les invitaciones difundíes son billingües n’asturianu y castellán. Como ayeri adelantó Asturnews, l’Executivu autonómicu escoyó Madrid como sé del primer Día d’Asturies itinerante nel esterior n’atención al gran númberu d’emigraos asturianos residentes na capital y a la veteranía’l Centru Asturianu de Madrid, pero tamién, aseguró güei Valledor, como “un actu de solidaridá col pueblu de Madrid, que llogró convertir la conmoción n’acción” nos atentaos del pasáu 11 de marzu. “Los nuesos emigrantes son un capital social y humanu imprescindible pa la construcción d’Asturies”, señaló’l conseyeru, que na so comparecencia tuvo flanqueáu pol director de l’Axencia Asturiana d’Emigración, Luis Miguel Fernández Romero; representantes de les empreses Alsa y Caxastur, que collaboren na organización de los actos; y Fe Santoveña, secretaria del collectivu Muyeres, cuyu conciertu abrirá’l vienres les cellebraciones. Nesi recital, que supondrá la presentación en Madrid de la formación vocal asturiana -entamada en 1994 sobro una idega’l productor Lisardo Lombardía y a partir de grupos d’investigación etnográfica-, Muyeres fará un recorríu musical a la xeografía asturiana con un repertoriu de 25 pieces, ente elles siete bailles tradicionales. Darréu de l’actuación del grupu, los asistentes a la cellebración -que’l Gobiernu’l Principáu calcula en más de 300 persones- participarán nuna espicha con sidra de mesa, quesos y otros productos asturianos. Más de 300 persones participarán en Madrid na primer cellebración itinerante del 8 de Setiembre 15 de setiembre, 2004 0 FacebookTwitterPinterestEmail
Educación Les prebes de selectividá de setiembre comiencen con un 10 por cientu menos d’estudiantes qu’en 2003 by asturnet 14 de setiembre, 2004 Menos que l’añu pasáu. Los esámenes de les Prebes d’Accesu a la Universidá (PAU) na so convocatoria de setiembre arranquen güei con un 10 por cientu menos d’alumnos matriculaos qu’en 2003, por mor de l’alta cifra d’aprobaos rexistrada en xunu y de la baxada xeneralizada d’estudiantes nel Bachilleratu. Más de mil alumnos esaminaránse hasta’l vienres en 16 sés allugaes n’Uviéu, Xixón, Avilés, Llangréu, Mieres, Cangas, Tapia y Ribesella. Acordies cola planificación afitada pola Universidá d’Uviéu, l’empiezu de les prebes ta previstu pa les 15 hores de güei con una esplicación previa a los primeros esámenes, los de Filosofía, Historia y Llingua Castellana. Na xornada de mañana, xueves, cellebraránse les prebes d’idioma estranxeru, Química, Llatín, Física, Economía, Matemátiques y Ciencies de la Tierra. Los alrodiu de 1.060 alumnos que tan convocaos pa los esámenes finarán los sos exercicios el vienres, darréu completen les prebes d’Arte, Música, Griegu, Bioloxía, Xeografía, Debuxu y enseñances técniques aplicaes. Los estudiantes qu’algamen l’aprobáu tendrán entá posibilidaes d’acceder a dalgunes carreres con places llimitaes na Universidá d’Uviéu, ente elles Turismu, Topografía, Bioloxía y Maxisteriu, y podrán solicitar asinamesmo l’almisión n’otres titulaciones ensin númberu másimu de places. Web oficial de la Universidá d’Uviéu 14 de setiembre, 2004 0 FacebookTwitterPinterestEmail
Emigración Más de 300 persones participarán en Madrid na primer cellebración itinerante del 8 de Setiembre by asturnet 14 de setiembre, 2004 Más de 300 persones. Esa ye la cifra d’asturianos emigraos a Madrid que’l Principáu espera reunir na primer cellebración itinerante del Día d’Asturies nel esterior, que se desendolcará’l prósimu sábadu y tendrá los sos actos centrales nun recital del grupu Muyeres y nuna espicha con sidra de mesa. Na cellebración na distancia del 8 de Setiembre, que se treslladó al prósimu fin de selmana al nun ser festivu en Madrid el Día d’Asturies, participarán miembros de los centros asturianos de Madrid, Tres Cantos, Alcobendas, Alcalá de Henares y Toledo, amás de responsables del collectivu Asturianos en Madrid (Asma). El Gobiernu’l Principáu prevé, asinamesmo, qu’una representación d’artistes asturianos afincaos na capital s’axunten a la cellebración. El primer Día d’Asturies nel esterior con calter itinerante, promovíu dende la Conseyería de Xusticia, Seguridá Pública y Relaciones Esteriores, tendrá como escenariu Madrid n’atención al altu númberu d’asturianos que residen nesa comunidá y a la veteranía’l Centru Asturianu de la capital, el más vieyu ente los sos homólogos. El conciertu de Muyeres, previstu pa les 20 hores del sábadu nel Ateneo de Madrid, na cai d’El Prado, valdrá-y al grupu vocal como tarxeta de presentación na capital, y daqué asemeyao ocurrirá cola sidra de mesa que va servise de baldre darréu’l recital, una variedá poco áceda que nun requier escanciáu, sírvese en frío y caltién el sabor de la sidra natural, según defenden los sos ellaboradores. El conseyeru de Xusticia, Seguridá Pública y Relaciones Esteriores, Francisco Javier García Valledor, anunció’l pasáu 3 de xunu n’Uviéu l’envís del Gobiernu’l Principáu d’entamar una cellebración adicional y rotativa del Día d’Asturies nel esterior a partir d’esta edición, cola idea de que cada añu seya una ciudá distinta la qu’acueya los actos conmemorativos, pa facilitar la participación de los asturianos emigraos a mui estremaos llugares. Miles de persones acudieron a Mieres pa participar nos actos oficiales del 8 de Setiembre 14 de setiembre, 2004 0 FacebookTwitterPinterestEmail
Comunicación Los asturianos somos los que mas periódicos lleemos d’España, sigún l’Institutu Nacional d’Estadística by asturnet 13 de setiembre, 2004 Los asturianos tamos a la cabeza de les comunidaes autónomes del Estáu Español na llectura de prensa, con un 59,9% de los mayores de 14 años lleendo davezu la prensa diaria. El Principáu d’Asturies, la Comunidad Foral Navarra y el País Vascu somos les tres Comunidades que más lleen de tol Estáu, onde la media ye del 39,7%. En Navarra lleen periódicos el 57,3% de los mayores de 14 años, y nel País Vascu’l 54%, pero nes dos comunidaes bien amenorgándose la cifra nos últimos dos años. Los vascos yeren hasta hai poco los habitantes del Estado español que más periódicos lleíen, sigún los datos del Instituto Nacional de Estadística de España (INE). La situación en País Vascu ye especialmente significativa, porquela llectura de periódicos baxó nestos dos años del 59,3% del estudiu del INE de 2002, al actual 54%. Nel otru cabu alcuéntrense les comunidaes con menor porcentax de llectores de prensa: Castilla La Mancha ( 22,4%), Andalucía (28,1%), Valencia (29,3 por cientu), Murcia (31,1%) y Extremadura (32,3%). Los datos del INE dexen nidio, amás, que na zona norte d’españa ye onde más persones lleen la prensa diariamente y na metá sur onde menos. 13 de setiembre, 2004 0 FacebookTwitterPinterestEmail
Educación El Gobiernu ultima la recuperación de la espresión ‘Llingua Asturiana’ nel currículu de Secundaria by asturnet 13 de setiembre, 2004 L’asignatura de Llingua Asturiana vuelve a esistir como tala na Educación Secundaria. Un nuevu testu’l currículu d’esa materia que coincide no esencial col que yá ta en vigor dende 2002, pero que desanicia la denominación ‘Lengua tradicional: Bable/Asturiano’, algamará’l preste del Conseyu de Gobiernu na so prósima xuntanza, fixada pal xueves, según la previsión de la Conseyería d’Educación y Ciencia. Al traviés d’un artículu únicu desdobláu en dos puntos, l’Executivu aprobará la modificación del decretu nel que, en mayu de 2002, s’estructuró con calter xeneral la Educación Secundaria Obligatoria (ESO) n’Asturies, de sutaque’l Principáu asumió les competencies nesa estaya. Nesa disposición qu’agora se modifica afitábase un currículu -planificación de la educación con conteníos, plazos y oxetivos mui precisos- específicu pa l’asignatura ‘Lengua tradicional: Bable/Asturiano y Literatura’, denominación que desapaez dafechu y se sustitúi pola de ‘Llingua Asturiana y Lliteratura’. Acordies con esi cambiu, nes 28 fueyes qu’integren el currículu elimínense toles referencies al ‘bable/asturiano’ y empléguense les espresiones ‘llingua asturiana’ o ‘asturianu’ pa designar esi idioma. En sustancia, esi ye l’únicu cambiu que’l Gobiernu prevé aprobar pasao mañana sobro’l testu orixinal de l’asignatura de Llingua en Secundaria, sacante pequeñes omisiones na introducción respectu a la norma qu’agora ta en vigor, tamién rellacionaes cola terminoloxía, más que colos conteníos. Crítiques al testu orixinal L’aprobación, hai agora más de dos años, d’un currículu específicu pa la materia de ‘Lengua tradicional: Bable/Asturiano’ collechó delles crítiques dende l’ámbitu del asturianismu qu’agora se quieren aplacar. Sectores del profesoráu censuraron amás lo que na so opinión foi l’ausencia d’un tratamientu del asturianu como llingua que sufre un procesu de minorización, en clara desventaxa respecto al castellán, y denunciaron una falta de correspondencia ente lo afitao nel testu y la práctica cotidiana de la enseñanaza de Llingua nos centros de Secundaria. El Gobiernu autonómicu prevé asinamesmo aprobar darréu el currículu d’asturianu pal nivel de Primaria, qu’apuesta pola oralidá del idioma, llama a emplegar la informática na ellaboración de testos y plantégase formar ciudadanos que participen de mou “constructivu y respetuosu nos distintos foros de comunicación”. El nuevu currículu de Llingua prioriza l’idioma faláu y prevé formar escolinos “constructivos y respetuosos” 13 de setiembre, 2004 0 FacebookTwitterPinterestEmail