Sociedá Cultura asegura que nun demorará la primer validación de topónimos tradicionales nel Gobiernu by asturnet 11 de payares, 2004 La Conseyería de Cultura elevará al Conseyu de Gobiernu antes de fin d’añu, “o como muncho a primeros del añu que vien”, los primeros llistaos de nomes de conceyos n’asturianu pa oficializar la so denominación tradicional. Asina lo anunció esta mañana en Lluanco el director xeneral de Política Llingüística, Carlos Madera, quien precisó que’l so departamentu nun esperará a qu’haiga un “gran númberu” d’espedientes remataos, sinón que llevará énte l’Executivu los primeros que se vaigan completando. Pol momentu, nesa situación encaxen namás los llistaos toponímos de tres conceyos: Carreño, El Franco y Llanes, que yá superaron el mes preceptivu de consultes y qu’agora enfilen la so recta final p’hacia el Conseyu de Gobiernu, depués que la Xunta Asesora de Toponimia, aconceyada güei en Gozón, los analizare otra vuelta. En total, son 19 los conceyos qu’entamaron la recuperación de los sos nomes de llugar tradicionales, lo que n’opinión del titular de la Oficina de Política Llingüística, Ramón D’Andrés, amuesa que l’Alministración llocal ta revelándose como especialmente activa na normalización de la llingua asturiana. Los miembros de la Xunta de Toponimia treslladáronse güei a Gozón pa revisar l’espediente d’esti conceyu, que lleva alantre estremaes midíes de promoción del asturianu dende la Mancomunidá del Cabu Peñes, qu’agrupa a los municipios de Gozón y Carreño. Les Cases Consistoriales de dambos conceyos tarán retulaes darréu en llingua asturiana, y el serviciu de normalización de la Mancomunidá tien previsto empezar en breve plazu el primer cursu de Llingua que se cellebra en Gozón dende hai una década. Nuna comparecencia pública cellebrada nel Ayuntamientu gozoniegu, los alcaldes d’esti municipiu y de Carreño, Salvador Fernández (PP) y Ángel Riego (PSOE), respectivamente, sorrayaron el compromisu de dambes Corporaciones llocales cola normalización de la llingua asturiana y felicitáronse, n’alusión al al llabor de la Xunta de Toponimia, de la recuperación de la “forma natural en que la xente espresa les coses”. 11 de payares, 2004 0 FacebookTwitterPinterestEmail
Sociedá Los siete nuevos vehículos de los Bomberos del Principáu estrenen retulación n’asturianu by asturnet 11 de payares, 2004 La llingua asturiana llega a los servicios d’emerxencia. Siete nuevos vehículos del parque móvil de los Bomberos del Principáu, con sé en Llanera, incluyen por primer vegada retulación billingüe n’asturianu y castellán y estrenen la denominación ‘Bomberos d’Asturies’. En total, trátase de dos furgones y cuatro autobombes nos que’l Gobiernu autonómicu invirtió un millón d’euros. La nueva retulación en llingua asturiana apaez de mou visible y nel tipu de lletra corporativa del Principáu nos llaterales de los vehículos, tal como se pue apreciar, de forma ampliada, calcando enriba de la imaxe de la drecha. La presencia de la nueva denominación ‘Bomberos d’Asturies’ aportará a toles zones del Principáu, yá que les xunidaes móviles tendrán les sos respectives bases nel centru, l’oriente y l’occidente. Asina, Avilés acoyerá una ambulancia multisocorru y una autobomba urbana pa estinción d’incendios, mientres que’l segundu d’esos vehículos permanecerá en Llanera. Villaviciosa contará con otra nueva ambulancia, y Tinéu, Cangas de Narcea y Cangues d’Onís repartiránse los tres camiones d’estinción d’incendios forestales. El conseyeru de Xusticia, Seguridá Pública y Relaciones Esteriores, Francisco Javier García Valledor, presentó los nuevos vehículos el pasáu llunes nel trescursu d’un actu en Llamorgal, pero la información sobro la retulación n’asturianu nun trascendió hasta güei. 11 de payares, 2004 0 FacebookTwitterPinterestEmail
Patrimoniu El Principáu cree superáu el “caos absolutu” nes grandes obres culturales comprometíes por Cascos by asturnet 10 de payares, 2004 Superóse el “caos absolutu” instauráu pol anterior Gobiernu central y siguiránse “criterios oxetivos”. Esi ye’l diagnósticu del Executivu asturianu sobro los grandes proyectos comprometíos por Francisco Álvarez-Cascos pa sufragar obres n’Asturies col denomináu 1 por cientu cultural, obligación de cada ministeriu de reservar esi procentaxe p’acciones culturales nes inversiones propies de más de 100 millones de pesetes. Sólo siete d’esos proyectos se mantienen en pie. Al xuiciu de la conseyera de Cultura y vocera’l Gobiernu asturianu, la socialista Ana Rosa Migoya, por primer vez s’algamó una “clarificación” nos proyectos comprometíos en tol Estáu pol PP y que diben ser sufragaos na so mayor parte pol ministeriu de Fomento, tuteláu por Álvarez-Cascos, al ser esi departamentu el que mayores inversiones xenera. Pal Gobiernu autonómicu, canten les cifres: Anque los conservadores prometieron un total de 900 millones d’euros pa financiar proyectos culturales en toa España, el nuevu Gobiernu socialista constató que namás hai disponibles 35 millones. Y eso, insistió güei Migoya, demuestra que l’anterior Executivu del PP fizo “pura propaganda”. Poro, la titular de Cultura advirtió-y al alcalde d’Uviéu, Gabino de Lorenzo (PP), qu’esi ayuntamientu habrá acatar los nuevos criterios afitaos en Madrid pa saber si pue o non financiar con cargu al 1 por cientu cultural dos grandes obres: El soterramientu de l’autopista ‘Y’ en Santuyano pa salvaguardar el templu prerrománicu allugáu nel entornu, y la creación del Muséu Militar de Trubia. El llunes pasáu, el Gobiernu central avanzó que sólo siete de los 17 proyectos comprometíos pol PP p’Asturies siguen en pie: los remocicamientos de les cubiertes de la Catedral, el claustru’l monasteriu de San Pelayu, la Torre’l Reló de Castropol y el monasteriu de Corniana; la preservación del cascu hestóricu de Llastres; les obres na Casa Hevia, en Villaviciosa; y la fechura’l proyectu de recuperación del entornu de la ilesia de Santuyano, n’Uviéu. 10 de payares, 2004 0 FacebookTwitterPinterestEmail
Tecnoloxía L’apaición de Firefox 1.0 revoluciona la navegación por Internet by asturnet 10 de payares, 2004 La última edición del nomáu comol ‘zorru’ más rápidu del mundiu, la versión 1.0 de Firefox, qu’ayeri llanzó con calter mundial la Fundación Mozilla, ya pue descargase de baldre col asturianu como llingua operativa. El competidor cimeru del Internet Explorer de Microsoft ye un navegador cenciellu pero muncho más eficiente que lExplorer, ensin los problemes de seguridá desti y que sesparde como un regueru de pólvora por mor del boca-oreya ente los usuarios. El 9 de payares foi la xornada elexida pala apaición desti FireFox 1.0, el navegador desendolcáu pola Fundación Mozilla, que ye una rede de programadores que crearon esta utilidá empobinada a competir col navegador de Microsoft, Internet Explorer, actualmente líder indiscutible del mercáu con una penetración penrribal 90%. Sigún los expertos, la versión definitiva del Firefox 1.0 nun sestrema muncho de la “beta” que lleva dende setiembre circulando por Internet. Amás los cambios son malpenes apreciables polos usuarios. Dende esti pasáu día 9 de payares el Mozilla Firefox 1.0 pue descargase en versiones estremaes palos sistemes operativos Windows, Linux y Mac OS X, depués de que nestos meses más de 7 millones de internautes ya descargaren la versión beta, noo que supón un dato gayoleru pala proliferación ente los usuarios de la Rede desti navegador llibremente distribuíu. Dalcuerdu con datos difundidos pola firma WebSideStory la selmana anterior al llanzamientu, la participación de Microsoft en el mercado de los buscadores maenorgó a un 92,9% dendel 95,5% en xunu, y na mesma fastera de tiempu, la cuota de Firefox xorreción a un 6% dendel 3,5%. L’aliendu definitivu pa dar a conocer la versión 1.0 de Firefox ye la publicación dun anunciu, a color y páxina completa, nel diariu The New York Times. Col obxetivu daxuntar dólares abondos pa sufragar la publicidá, la compañía recurrió a les donaciones de los internautes y la campaña de captación de fondos, entamada dende la páxina de marketing de la compañía, Spread Firefox, algamó que 2.500 persones abonaran polo menos 30 dólares en diez díes. Sigún los datos ufiertaos por Bart Decrem, portavoz de la Fundación Mozilla, la so organización algamara 100.000 dólares, una cantidá abonda como pa espublizar dos anuncios nel Times. El dineru que sobre va destinase a financiar otros proyectos de la fundación. Amás, nun cientu paises de tol mundu están promoviéndose, dende abaxo, folixes para cellebrar el llanzamientu de la primer versión estable de Firefox. Pue consultase la páxina mundial en http://www.openforce.at/mozparty2/ y la página dinscripción nel festexu madrilanu en http://www.openforce.at/mozparty2/?party=237. Direicion Oficial de Firefox en castellán 10 de payares, 2004 0 FacebookTwitterPinterestEmail
Educación Educación y Xunta Moza discrepen sobro’l siguimientu de la fuelga en Secundaria by asturnet 10 de payares, 2004 Siguimientu “altísimu” o “mui desigual”. La estaya de mocedá de la Xunta pola Defensa de la Llingua, Xunta Moza, y la Conseyería d’Educación discrepen sobro l’éxitu de la fuelga convocada güei en Secundaria pa reclamar clases d’asturianu en tolos institutos, con independencia’l númberu d’alumnos matriculaos na asignatura. Decenes d’estudiantes concentráronse al mediudía n’Uviéu y Xixón. Frente al “siguimientu desigual” defendíu dende Educación, el collectivu de defensa llingüística, que centró les sos movilizaciones de güei frente a esa Conseyería y na Plaza Mayor de Xixón, aseguró que dellos centros educativos d’Uviéu, Siero, Cangas de Narcea, Mieres y Piloña, ente otros conceyos, rexistraron un altu índiz de participación na psotesta, convocada contra lo que la Xunta considera un incumplimientu llegal que-yos impide cursar Llingua a alumnos que lo soliciten en centros nos que nun hai un númberu mínimu d’estudiantes matriculaos n’Asturianu. El paru alitáu pola Xunta cellébrase un día depués que’l conseyeru d’Educación y Ciencia, José Luis Iglesias Riopedre, comprometiera la presencia de l’asignatura de Llingua en tolos cursos de Secundaria pal prósimu 2005, reconociendo dificultaes pa la matriculación nesta materia nel Bachilleratu. Acordies colos datos asoleyaos pol propiu conseyeru con ocasión de la última Selmana de les Lletres Asturianes, cellebrada en mayu, unos 16.000 escolinos de Primaria y Secundaria recibieron enseñances d’asturianu nel cursu académicu pasáu. Selmanes más tarde, la directora d’Ordenación Académica del Principáu, Dolores Guerra, estimó en 19.523 los alumnos que cursaron Llingua l’añu académicu pasáu, 16.000 en Primaria y el restu en Secundaria. El casu más visible na controvertida enseñanza d’asturianu na Secundaria protagonizólu Arturu Bermeyu, pá d’una alumna a la que se-y negó la posibilidá de matriculase en Llingua nel so institutu d’Uviéu. El pasáu 21 de setiembre, Bermeyu asumió una multa de 90 euros por desobediencia y resistencia a l’autoridá depués que la Policía lu detuviera na sé d’Educación y Ciencia, onde permanecía a la espera d’una rempuesta personal d’Iglesias Riopedre. Arturu Bermeyu asume una multa de 90 euros depués de reclama-y una cita a Riopedre na conseyería 10 de payares, 2004 0 FacebookTwitterPinterestEmail
Sociedá L’Academia pon en marcha el primer cursu de gallegu-asturianu abiertu p’adultos by asturnet 10 de payares, 2004 Diecisiete alumnos estrenen a partir de mañana el primer cursu de gallegu-asturianu abiertu p’adultos. José Antonio Fernández Vior, especialista nesta variedá idiomática, pronunciará nel Institutu d’Educación Secundaria de Tapia la llección inagural del monográficu, entamáu pola Academia de la Llingua, al traviés de la so Secretaría del Navia-Eo y en comuña cola asociación Xeira. Nesi actu, que valdrá de presentación del cursu y cuyu empiezu ta previstu pa les 19,30 hores, participarán la presidenta de l’Academia, Ana Cano; el responsable de la Secretaría Llingüística del Navia-Eo, Xosé Antón González-Riaño; y el presidente de Xeira, Xabiel Menéndez. Nuna nota pública, l’Academia destaca’l calter pioneru del cursu formativu, el primeru que se fai n’Asturies empobináu a un alumnáu adultu en xeneral y al que nun se-y esixe nenguna cualificación determinada. Los 17 matriculaos, alumnos d’estremaos ámbitos profesionales, recibirán en clase nociones básiques sobro la escritura’l gallegu-asturianu, la so hestoria y la lliteratura xenerada nesta variedá llingüística. 10 de payares, 2004 0 FacebookTwitterPinterestEmail
Sociedá Migoya compromete la entrada en vigor del Plan de Normalización pa xineru de 2005 by asturnet 10 de payares, 2004 El documentu col que’l Gobiernu autonómicu planifica y estructura la promoción del asturianu pa los prósimos tres años tará en vigor en xineru de 2005. Asina lo comprometió esti mediudía n’Uviéu la conseyera de Cultura, Ana Rosa Migoya, quien destacó l’aumentu presupuestariu de 1,4 a 1,7 millones d’euros que tendrán l’añu prósimu les polítiques de promoción de la llingua asturiana dende l’Executivu. Nuna comparecencia pública na que detalló les cifres correspondientes a la so Conseyería dientro de los Presupuestos Xenerales del Principáu pa 2005 -cuyu anteproyectu entró el pasáu llunes na Xunta Xeneral-, Migoya precisó que l’aumentu del 20 por cientu na promoción llingüística traduciráse nun incrementu de toles llinies d’ayudes que yá tan en marcha p’alitar l’usu a tolos niveles del asturianu. En total, Cultura manexará en 2005 un presupuestu total de 105 millones d’euros, lo que supón un aumentu relativu del 17,3 por cientu respecto a les cifres de 2003 y favorez al departamentu dirixíu por Migoya como la Conseyería con mayor incrementu presupuestariu. Esi impulsu económicu emplegaráse, ente otres acciones, n’entamar una gran campaña d’ámbitu estatal pa promover Asturies como destín turísticu (3,4 millones d’euros), en sufragar el plan de ‘marketing’ de la Sociedá Rexonal de Turismu (más de 5 millones) y en da-y puxu a la Orquesta Sinfónica’l Principáu, que salvará’l déficit crónicu qu’arrastra con un presupuestu superior a los 4 millones d’euros, un 10 por cientu más que nesti exerciciu. Amás d’eses actuaciones, Cultura sofitará con 840.000 euros los actos conmemorativos del 25 aniversariu de los Premios ‘Príncipe de Asturias’, ingresará nes arques del Conseyu de la Mocedá un total de 343.000 euros y, mui especialmente, apostará por llevar a bon puertu, con 8 millones d’euros, los estremaos proyectos conteníos nel Plan Director de la Universidá Llaboral, en Xixón, que’l Gobiernu prevé tener aprobaos nun plazu másimu de tres meses. Ente ellos figuren la creación d’un centru d’arte y l’habilitación de les instalaciones dende les qu’empezará a emitir, nel segundu semestre de 2005, la radiotelevisión autonómica, ente que consumirá un total de 8,3 millones d’euros pa la so puesta en marcha, incluyendo la construcción de dependencies nel conventu de les clarises de la Llaboral y l’alquisición d’equipos técnicos. 10 de payares, 2004 0 FacebookTwitterPinterestEmail
Plástiques Una esposición desdoblada en dos espacios esparde n’Uviéu el legáu escultóricu de Chillida by asturnet 9 de payares, 2004 El legáu escultóricu d’Eduardo Chillida, en dos escenarios. La sala d’esposiciones del Bancu Herrero y l’edififiu hestóricu de la Universidá d’Uviéu acueyen dende güei, y hasta xineru, una esbilla d’obres ellaboraes pol carismáticu artista vascu en bronce, aceru y fierru que definen, en paisaxes xeométricos y espacios tridimensionales, la propuesta estética del malográu creador. L’amuesa, comisariada por Elvira Maluquer -que yá coordinó en 2002 una esposición n’Uviéu con pieces del artista catalán Antoni Tàpies-, pon a disposición del públicu asturianu más d’una decena d’escultures de mediu tamañu, varios grabaos y una obra de grandes dimensiones allugada, pa la so meyor contemplación, nel patiu hestóricu de la Universidá. Saludada polos espertos como una mecigaya de l’abondosa obra que salió del taller de Chillida, la esposición qu’agora abre les sos puertes na capital del Principáu inclúi amás testos de tou tipu ellaboraos pol artista, ente ellos cites, poemes y el so discursu d’ingresu na Real Academia de Bellas Artes de San Fernando. Premiu ‘Príncipe de Asturias’ de les Artes en 1987 y distinguíu pol públicu, estudiosos y críticos pola so singular concepción de la escultura abstracta, Eduardo Chillida dexó tres de sigo depués del so fallecimientu, n’agostu de 2002, un regueru d’obres plástiques y escultóriques qu’algamaron la so másima popularidá -y en dalgunos casos, controversia- nes sos grandes obres allugaes n’espacios públicos. La relación afectiva del creador vascu con Asturies pasó, amás de pola concesión del ‘Príncipe’ de les Artes, pola construcción de la escultura ‘Elogio del Horizonte’ na Atalaya de Xixón, en 1989. Cuestionada nun principiu por parte de la ciudadanía, la escultura acabó convirtiéndose en seña d’identidá de la ciudá. La decisión del Ayuntamientu d’escavar una zanxa perimetral nel entornu de la obra pa evitar posibles cayíes a la mar, intervención qu’alteró sustancialmente l’entornu, disgustó fondamente a Chillida, que tuvo nel ‘Elogio’ una de les sos creaciones más queríes. Web del muséu permanente de Chillida nel País Vascu 9 de payares, 2004 0 FacebookTwitterPinterestEmail
Lliteratura El Salón del Llibru Iberoamericanu centrará la so edición de 2005 na censura’l pensamientu únicu by asturnet 9 de payares, 2004 El Salón del Llibru Iberoamericanu de Xixón traza yá la so programación de 2005. El certame lliterariu, que se cellebrará baxo la dirección del escritor Luis Sepúlveda en mayu prósimu, centrará la so edición númberu ocho na defensa de la diversidá cultural frente al pensamientu únicu y secundará “con singular estusiasmu” el cuartu centenariu del asoleyamientu de ‘El Quijote’. Nun añu marcáu nel ámbitu lliterariu pola conmemoración de la obra magna de Miguel de Cervantes, pero tamién por ser l’Añu Mundial del Llibru, el Salón plantégase como principiu xenéricu el de “pensar y debatir en voz alta” nel so escenariu habitual, Xixón, y llama a autores y llectores a formular propuestes qu’arriquezan la programación de la prósima edición del certame, qu’agora empieza a concretase. Ente’l 12 y el 17 de mayu prósimos, más de 40 cases editoriales del ámbitu hispanofalante abrirán los sos puestos nel Antiguu Institutu Xovellanos pa da-y vida a la Feria’l Llibru que permanez abierta durante la cellebración del certame. Xunta d’ella, el VIII Salón del Llibru Iberoamericanu mantendrá en 2005 les actividaes que lu vienen definiendo n’años anteriores, ente elles una nueche dedicada a la poesía, talleres internacionales de torna y creación lliteraria y un espaciu propiu pa la poesía asturiana. El Salón dedicará asinamesmo gran parte de la so programación, según Sepúlveda, a provocar una “fonda y exhaustiva reflesión collectiva” al rodiu de delles estayes de la sociedá contemporánea, manteniendo’l pulsu enraigonáu na actualidá d’ediciones anteriores. Web oficial del Salón del Llibru Iberoamericanu 9 de payares, 2004 0 FacebookTwitterPinterestEmail
Música Xixón abre’l telón del so festival de jazz, con Brandford Marsalis, Nnenna Freelon y Bill Bruford by asturnet 9 de payares, 2004 Música pa la seronda. La ciudá de Xixón abre esta tarde el so Festival de Jazz, que tendrá como domiciliu permanente el teatru Xovellanos y por cuyu escenariu pasarán, hasta’l prósimu sábadu, el saxofonista Brandford Marsalis, la vocalista Nnenna Freelon y les bandes lideraes por Terence Blanchard y Bill Bruford. L’encargáu d’estrenar l’eventu musical sedrá, a partir de les 20,30 hores de güei, l’intérprete Brandford Marsalis, ún de los saxofonistes más valoráu nel jazz modernu, formáu nuna dinastía familiar volcada na música y afincada en Louisiana. Fíu y hermanu d’afamaos executores de jazz, Marsalis actuará en Xixón en cuartetu, acompañáu de percusión, pianu y contrabaxu. La banda’l trompetista Terence Blanchard garrará’l relevu el prósimu xueves, con formatu de sextetu qu’incorpora, amás de la trompeta, un guitarrista, mientres que la vocalista Nnenna Freelon actuará el vienres acompañada de Brandon McCune a los teclaos, Wayne Batchelor al baxu, Kinah Boto na batería y Beverly Botsford na percusión. El remate al festival xixonés pondrálu el sábadu -tamién a partir de les 20,30, horariu ecomún a los cuatro conciertos- la banda encabezada pol batería Bill Bruford, consideráu ún de los más destacaos intérpretes nel so xéneru. Web del Teatru Xovellanos 9 de payares, 2004 0 FacebookTwitterPinterestEmail