Música Dixebra entra nel estudiu pa grabar el so nuevu discu, que s’ellaborará dafechu en Corvera by asturnet 27 d'avientu, 2004 Dixebra vuelve al estudiu. Los integrantes de la banda avilesina, que cumple 18 años la prósima selmana, empiecen a grabar les bases del que sedrá’l so discu númberu ocho, un trabayu qu’esperen asoleyar como mui tarde nel mes de mayu y que s’ellaborará y mezclará dafechu nos Estudios Tutu de Corvera, rexentaos pol técnicu de soníu’l grupu, Sergio Rodríguez. D’esti mou, Dixebra cellebrará’l so decimoctavu cumpleaños rexistrando énte los micrófonos les bases de batería y baxu d’ente seis y ocho temes de los que formarán el nuevu discu’l grupu, frutu d’una primer esbilla de cantares pa los que la banda yá tien perfilaes la lletra y la música. La entrada nel estudiu tendrá poco que ver cola grabación, en 2002, del anterior discu con temes de nueva creación, ‘Sube la marea’: Los músicos asturianos desplazáronse entós a les instalaciones que rexenta nel País Vascu el guitarrista y productor Kaki Arkarazo y completaron la grabación nuna selmana; nesta ocasión, Dixebra quier trabayar con más calma y opta por facelo en casa. De fechu, la banda creada hai agora 18 años renuncia a la idega inicial de recabar la collaboración d’Arkarazo nel procesu final de mezcles por razones d’operatividá, y ‘parirá’ un discu ellaboráu dafechu n’Asturies, como yá ficiera en trabayos anteriores. Poderosos ‘riffs’ de guitarra, guiños al funky, hestories a ritmu de reggae y contundencia ska marquen les llinies poles que caminen los temes del octavu discu de Dixebra, que cumple la so mayoría d’edá n’escena como únicu referente afitáu y durable de la música rock en llingua asturiana. El grupu vien d’escosar les dos primeres tiraes del so últimu trabayu, el recopilatoriu-llibru ‘Cróniques d’un pueblu’, asoleyáu a finales de 2003. Dixebra escosa les dos primeres ediciones del discu-llibru cola so hestoria, ‘Cróniques d’un pueblu’ 27 d'avientu, 2004 0 FacebookTwitterPinterestEmail
Música Dos luthiers familiaricen a los neños cola construcción d’instrumentos musicales nel Xardín Botánicu by asturnet 27 d'avientu, 2004 Música de raigón, en sentíu lliteral. Los luthiers Carlos González y Manuel Paz imparten a partir de mañana nel Xardín Botánicu Atlánticu de Xixón un cursu de construcción d’instrumentos musicales con maera, empobináu a amosa-yos a los más mozos la estrencha vinculación ente los oxetos de la música y los árboles como materia prima. Dambos luthiers impartirán les sos llecciones, n’horariu mañaniegu, ente mañana y el prósimu vienres, nuna actividá que cuenta col auspiciu del Ayuntamientu de Xixón y que s’ufierta a neños y neñes de 9 a 14 años d’edá a un preciu únicu de 30 euros, según precisó esta mañana un responsable de comunicación de la Fundación Municipal de Cultura, Educación y Universidá Popular. En cuatro díes, los asistentes al cursu que se desendolcará nel Xardín Botánicu, allugáu nel entornu de la Universidá Llaboral de Xixón, deprenderán a fabricar instrumentos de cuerda, percusión y vientu a partir de la maera y de pieces concretes d’orixe tamién vexetal, con atención preferente al antiguu virgayu ente l’árbol y la música. Darréu acabe’l cursu, los alumnos podrán llevar pa casa los instrumentos manufacturaos por ca ún d’ellos, depués de familiarizase colos preseos qu’empleguen los artesanos de la música pa facer el so llabor. El taller forma parte d’un ampliu programa d’actividaes municipales entamaes pa da-y puxu al Xardín Botánicu Atlánticu faciéndolu sé de cursos, conciertos y conferencies. 27 d'avientu, 2004 0 FacebookTwitterPinterestEmail
Sociedá L’Academia convoca la primer prueba de conocencia de 2005, abierta al públicu xeneral by asturnet 27 d'avientu, 2004 Del 17 al 27 de xineru. L’Academia de la Llingua Asturiana afita esi plazu pa formalizar la inscripción na primer prueba de conocencia d’asturianu del añu 2005, un exame abiertu al públicu xeneral que se cellebrará n’Uviéu el 29 de xineru y que certificará la capacidá de quienes lu superen pa falar y escribir en llingua asturiana. Nuna convocatoria pública, l’Academia recalca que los aspirantes a aprobar la prueba han conocer les xeneralidaes gramaticales de la llingua asturiana y los aspeutos básicos de la so normativa ortográfica, polo qu’encamienta l’estudiu de los estudios normativos yá editaos y la llectura d’otros testos que respeten l’estándar afitáu pola entidá. El del 29 de xineru sedrá’l primeru de los dos exames que, en principiu, prevé convocar l’Academia de la Llingua a lo llargo del añu qu’entra pa reconocer la cualificación n’asturianu, yá que nel mes de mayu habrá una segunda prueba, acordies col mesmu calendariu que la entidá académica vien aplicando de forma habitual. No concreto, los aspirantes que s’inscriban na prueba deberán acreditar nel exame un nivel afayadizu na conocencia de la gramática, la escritura y l’emplegu oral de la llingua asturiana, amás de demostrar que conocen el contestu social actual del asturianu y el so procesu de normalización. Web de l’Academia de la Llingua Asturiana 27 d'avientu, 2004 0 FacebookTwitterPinterestEmail
Comunicación Camilo Díaz defende una televisión autonómica con respetu “radical” a los trabayadores asturianos by asturnet 24 d'avientu, 2004 Una radiotelevisión autonómica fecha por profesionales asturianos, con un respetu “radical” a ellos y cola llingua asturiana como idioma vehicular. L’escritor y técnicu cultural Adolfo Camilo Díaz, miembru’l conseyu d’alministración del nuevu ente de comunicación, defenderá esi doble plantegamientu, “porque ye lo que dicta la lóxica”, na puesta en marcha de la tv pública, qu’esta selmana nació ‘de fechu’ cola constitución del so másimu órganu decisoriu. A títulu personal y “dende un criteriu lo más seriu y rigurosu posible”, Camilo Díaz precisó, en declaraciones a Asturnews, qu’apuesta por edificar la radiotelevisión autonómica enriba’l pegollu d’una “base humana asturiana qu’habrá que respetar dende’l primer cámara hasta l’últimu trabayador”. Dicho d’otru mou: “Una televisión que s’apellide asturiana” debería facela un equipu de profesionales asturianos. Pa discutir esa y otres cuestiones, reveló Camilo Díaz, el conseyu d’alministración del que forma parte y que quedó constituyíu el pasáu miércoles plantégase con franqueza tar “lo menos politizáu posible” y cuenta con una ventaxa de partida: Ye un órganu integráu por persones “abiertes, non dogmátiques”, según l’escritor y técnicu cultural. Llingua predominante Magar que’l conseyu alpenes echó a andar y que les sos primeres xuntances de trabayu centraránse, previsiblemente, n’asuntos técnicos y de nomamientos, la discusión sobro los conteníos de les futures emisiones habrá llegar nos prósimos meses. Nella, Camilo Díaz plantégase abogar por que la llingua asturiana seya “predominante” na tv en tou tipu de programes, siempre acordies cola diversidá cultural d’Asturies y la presencia na sociedá d’otres llingües, como’l castellán. “L’asturianu habría ser l’elementu audiovisual vehicular, d’información común, en tou tipu d’espacios, dende l’anunciu que s’emite ente programa y programa”, exemplificó Camilo Díaz, siempre espresando criterios estrictamente personales. El miércoles pasáu, la radiotelevisión autonómica asturiana nació ‘de fechu’ cola constitución del conseyu d’alministración del ente, que se pon en marcha sólo colos nueve representantes de los partíos que gobiernen el Principáu -PSOE ya Izquierda Xunida-Bloque por Asturies- y l’ausencia voluntaria’l PP, que renuncia a nomar a los sos conseyeros al entender que la tv ye un proyectu caru y secundariu. El Conseyu de Gobiernu propuso ayeri al periodista y profesor José Ramón Pérez Ornia como primer director xeneral del ente públicu. Archivu. El Gobiernu ratifica que Pérez Ornia sedrá’l director de la radiotelevisión autonómica 24 d'avientu, 2004 0 FacebookTwitterPinterestEmail
Cine El director Ken Loach comentará en Xixón les sos películes, referentes del ‘cine social’ d’anguaño by asturnet 24 d'avientu, 2004 Ken Loach apunta Xixón na so axenda. El director británicu, consideráu un referente del llamáu ‘cine social’ facturáu anguaño, visitará la ciudá na primer quincena de xineru pa esplicar la so filmografía énte’l públicu y asistir a la proyección abierta de cuatro de los sos llargumetraxes: ‘Lloviendo piedres’, ‘My name is Joe’, ‘The navigators’ y ‘Sweet sixteen’. La visita de Loach débese a un ciclu monográficu entamáu pol Atenéu Obreru de Xixón que se cellebrará ente los prósimos 11 y 13 de xineru, y que va completase con una recepción oficial al director británicu nel Ayuntamientu y un alcuentru’l realizador col públicu, na nueche’l 12 de xineru, nel teatru Xovellanos. Sedrá nesta sala onde se proyecten les cuatro películes previstes: ‘Lloviendo piedres’ y ‘My name is Joe’ el día 12, y ‘The navigators’ y ‘Sweet sixteen’ al otru día, 13 de xineru. Toes elles son amueses representatives del cine cultiváu por Ken Loach, ocupáu en llevar a la pantalla hestories de personaxes urbanos en contestos decadentes y situaciones siempres na llende de dalgún abismu. Asina, en ‘My name is Joe’ retrátase l’amor difícil ente un ex alcohólicu y una trabayadora social, mientres que nel llargu ‘Lloviendo piedres’ asoléyase l’enfotu d’un desemplegáu en problemes económicos que llucha por proporciona-y a la so fía una primer comunión al altor de les esixencies sociales. Escenarios problemáticos y trames cercanes a la marxinalidá repítense nes otres dos películes de Loach que se proyectarán en Xixón: Un quinceañeru metíu n’enguedeyos pa face-y prestosa a so ma la salida de la cárcele (‘Sweey sixteen’) y el crucie de caminos al que tá abocáu un grupu de ferroviarios a los que la compañía obliga a optar ente’l despidu indemnizáu o l’acatamientu d’unos nuevos principios. 24 d'avientu, 2004 0 FacebookTwitterPinterestEmail
Música La Fnac apuesta pola música de raigón y promociona los nuevos discos d’Héctor Braga y Celia González by asturnet 24 d'avientu, 2004 La bandurria d’Héctor Braga y la gaita de rabil de Celia González, na Fnac. L’establecimientu que la firma rexenta en Parque Principáu acoyerá en xineru sendos recitales de los dos intérpretes asturianos, que tán acabante de publicar nuevos trabayos discográficos como solistes. Pol mesmu escenariu pasarán tamién Los Berrones, Juanjo Respuela, The Punishers y El Sueño de Morfeo. Asina, la zanfonista Celia González -conocida poles sos intervenciones en discos d’Hevia, Nuberu, Muyeres o Ramón Prada- presentará’l llunes 3 de xineru na Fnac el so primer discu en solitariu, ‘Coloradina la guinda’, nel qu’ufre 18 temes interpretaos con gaita de rabil, la mayoría d’ellos cantaos en llingua asturiana. Pol so llau, el músicu y compositor Héctor Braga visitará les instalaciones de Parque Principáu el sábadu 15 de xineru p’amosa-y al públicu les pieces del so trabayu ‘Encoplando’, un discu con alma básicamente tradicional a partir del propiu soníu de la bandurria, instrumentu qu’anguaño ta en procesu de recuperación. La programación musical de la Fnac de Parque Principáu inclúi amás una nueva presencia de Los Berrones, que’l xueves 20 de xineru presentarán el cenciellu ‘Fai deporte’, grabáu hai agora una selmana xunta decenes de deportistes asturianos; el guitarrista de rock progresivu Juanjo Respuela (día 14); The Punishers (día 8) y El Sueño de Morfeo, grupu qu’ufrirá un recital acústicu el 29 de xineru. 24 d'avientu, 2004 0 FacebookTwitterPinterestEmail
Educación La biblioteca de la Universidá d’Uviéu supera los cien mil usuarios, más del doble de los sos alumnos by asturnet 24 d'avientu, 2004 La Universidá despacha carnés de llector con númberos d’identificación penriba’l cien mil. La biblioteca universitaria d’Asturies, desdoblada en 18 sales de préstamu y consulta nos campus d’Uviéu, Xixón y Mieres, algama un númberu d’usuarios superior al doble de los sos propios alumnos, que sumen poco más de 41.000. El serviciu bibliográficu universitariu ta acabante habilitar una hemeroteca virtual con alertes personalizaes. Esta ferramienta, concebida pa facilita-yos a los investigadores la busca d’artículos en publicaciones especializaes españoles ya hispanoamericanes, ponse al algame de los universitarios asturianos en comuña cola Universidá de La Rioja, ya incorpora una base de datos de casi mediu millón d’artículos asoleyaos en 2.400 revistes científiques. Con esti preséu informáticu, los investigadores vinculaos a la Universidá d’Uviéu puen llocalizar testos de difícil ubicación, acceder a un resume de cada artículu y solicitar l’unvíu d’avisos mui concretos nel corréu ellectrónicu cuando se publiquen artículos que versen sobro un asuntu del interés del usuariu. Orixinaria de 1608, con puxu especial nel sieglu XVIII y modernizada a finales del XIX, la biblioteca de la Universidá d’Uviéu tuvo que ser reconstruyida dafechu depués de la destrucción que sufrió por mor de la revolución d’ochobre de 1934. El serviciu bibliográficu universitariu proporciona anguaño a los sos más de cien mil usuarios les posibilidaes de sacar llibros en préstamu, facer consultes en sala, solicitar l’alquisición de nuevos títulos y acceder a llibros custodiaos n’otres biblioteques, al traviés del denomináu préstamu interbibliotecariu. 24 d'avientu, 2004 0 FacebookTwitterPinterestEmail
Hestoria Cangas abre’l 750 aniversariu de la so fundación cola edición d’un calendariu con semeyes d’época by asturnet 23 d'avientu, 2004 Semeyes pa illustrar siete sieglos y mediu d’hestoria. L’Ayuntamientu de Cangas del Narcea abre la conmemoración del 750 aniversariu de la fundación de la villa, que se cumple en 2005, cola edición d’un calendariu con imáxenes d’época tomaes nel conceyu. La Corporación del municipiu suroccidental busca una nueva imaxe corporativa con ocasión de la conmemoración. L’almanaque de paré, en papel estucáu y con lámines de quince por doce centímetros, inclúi semeyes orixinales d’ente 1889 y 1930, y ye’l regalu col que l’Ayuntamientu felicita les fiestes navidiegues y l’añu nuevu a los vecinos del conceyu, yá que ca ún d’ellos recibirá un exemplar de baldre nel so propiu domiciliu. El calendariu ábrese amás con una referencia hestórica al documentu col que’l rei Alfonso X fundó la villa asturiana nel añu 1255, la Carta Puebla, un testu cuyu orixinal nun se conserva pero que nel so momentu dio-y un puxu singular a la comarca al dotala de modernos preseos d’autonomía respecto al poder central, ente ellos l’autorización pa cellebrar un mercáu propiu. Nel 750 aniversariu de la so nacencia como tala, Cangas del Narcea quier amás modernizar la so imaxe corporativa. Pa ello, l’Ayuntamientu busca una marca o logotipu que identifique a la Corporación nos sos servicios al ciudadanu y na promoción esterior del municipiu, dientro d’una redefinición xeneral de la identidá gráfica del conceyu. 23 d'avientu, 2004 0 FacebookTwitterPinterestEmail
Comunicación El grupu Recoletos sacará a la cai el nuevu diariu gratuitu en papel pa Uviéu y Xixón el 18 de xineru by asturnet 23 d'avientu, 2004 Dientro de menos d’un mes. El 18 de xineru de 2005 ye la fecha escoyida pal llanzamientu’l nuevu diariu gratuitu de Recoletos “Qué!”, un periódicu qu’apuesta pola difusión masiva y que tendrá cabecera propia n’Uviéu y Xixón, baxo la dirección del periodista asturianu Juan Carlos Villar. El diariu naz col envís de convertise nel periódicu d’información xeneral de mayor difusión d’España, dexando de lláu al canal de ventes. Pa ello, y editáu pol grupu de comunicación Recoletos -que xestiona, ente otres cabeceres, Marca, Expansión y Diario Médico-, cuenta col sofitu que-y darán n’Asturies una tirada diaria de 40.000 exemplares, una estensión d’ente 24 y 48 páxines y una apuesta pola cultura, l’ociu, el consumu y el mediu ambiente. El nuevu mediu de comunicación, qu’alterará el mercáu tradicional de la prensa asturiana de papel al ufrir por primer vegada nel Principáu información diaria gratuita de gran difusión, editará les dos cabeceres asturianes dende una redacción única, allugada na cai Campoamor d’Uviéu, na que redactores, fotógrafos y comerciales trabayen dende finales d’ochobre coordinaos por Villar. Un equipu d’once profesionales trabaya yá na preparación d’ediciones de prebes del diariu n’Asturies baxo la coordinación de Villar, periodista conocíu pola so trayectoría nel diariu’l grupu Zeta ‘La Voz de Asturias’, periódicu nel que llegare a ser director, y el so calter d’espertu n’información económica. El grupu Recoletos desembarca n’Uviéu y Xixón con un nuevu diariu gratuitu 23 d'avientu, 2004 0 FacebookTwitterPinterestEmail
Comunicación El Gobiernu ratifica que Pérez Ornia sedrá’l director de la radiotelevisión autonómica by asturnet 23 d'avientu, 2004 “Güei abrimos la ventana”. Con estes pallabres abrió ayeri’l ventanu d’una inédita programación audiovisual pública nAsturies el caderalgu de Periodismu de la Universidá de Málaga Bernado Díaz-Nosty, acabante de ser nomáu presidente’l conseyu d’alministración de la radiotelevisión autonómica. Nosty convidó al PP a entrar nesi muérganu pa evitar que siga “mutiláu” y fizo guiños a la presencia de la diversidá cultural asturiana nel nuevu ente públicu. Asina, el primer presidente’l conseyu de la tv autonómica nun faló específicamente, na so primer comparecencia pública, de programación en llingua asturiana, pero aludió a la bayura cultural d’Asturies y refirióse a la necesidá perentoria de que la nuesa “imaxe culturalmente rica” tea presente na programación de la tv p’ayudar a modernizar la propia comunidá autónoma. El conseyu a cuyu frente ta dende ayeri Díaz-Nosty quedó constituyíu, como s’esperaba, sólo colos nueve representantes de los dos partíos que gobiernen el Principáu, PSOE ya Izquierda Xunida-Bloque por Asturies, una situación que’l presidente’l conseyu de la radiotelevisión tildó de “mutilación” y a la que namás-y ve una igua posible: Que’l PP nome a los seis conseyeros que-y correspuenden. Pérez Ornia, director Esi actu ye decisivu, apuntó Díaz-Nosty, pa llevar a la práctica l’envís cimeru del conseyu qu’ayeri quedó constituyíu: Garantizar la pluralidá de los conteníos na programación del nuevu ente públicu de comunicación, cuyu director xeneral sedrá a la fin el periodista y profesor José Ramón Pérez Ornia. El Gobiernu asturianu ratificó’l so nome na xuntanza ordinaria que güei cellebró l’Executivu, una selmana depués qu’Ornia apaeciera nos medios de comunicación como’l principal candidatu a exercer la dirección de la radiotelevisión pública asturiana. Tovía ayeri, la conseyera de Cultura y Comunicación Social, Ana Rosa Migoya, pospusiera por enésima vegada revelar cuálu yera’l nome pol qu’apostaba el Gobiernu. Fiel al so argumentu de que la tv ye un proyectu caru y prescindible, el PP arrenunció a nomar a los sos conseyeros y tará ausente nel muérganu decisoriu que yá ta constituyíu. Asina, los conseyeros que tan acabantes dasumir el so cargu son namás nueve, acordies cola llista qu’aprobó el Parlamentu asturianu hai agora venti díes: los ex alcaldes socialistes Jesús Landeira (Valdés) y Manuel Amieva (Llanes), la ex conseyera d’Alministraciones Públiques Angelina Álvarez, l’abogáu Francisco Díaz, la notaria Montserrat Martínez, la economista María Luzdivina Rodríguez; el caderalgu de comunicación Bernardo Díaz Nosty que foi nomás presidente del Conseyu; el profesor de Drechu Constitucional Benito Aláez y l’escritor n’asturianu y técnicu cultural Adolfo Camilo Díaz. El profesor y periodista Pérez Ornia, ex director de Telemadrid, perfílase como director de la tv autonómica 23 d'avientu, 2004 0 FacebookTwitterPinterestEmail