Comunicación Periodistes de toa España debatirán en Xixón les condiciones llaborales de la profesión by asturnet 31 d'avientu, 2004 Periodistes de toa España citaránse en Xixón pa falar y escribir sobro’l so oficiu. La ciudá acoyerá ente’l 24 y el 26 de xunu de 2005 la IV Convención de Periodistes d’España, un alcuentru entamáu poles organizaciones corporatives de los profesionales de la información qu’abordará les condiciones llaborales y la nueva regulación llegal de la profesión. Esti segundu puntu tendrá una presencia destacada nes tres xornaes d’alderique periodísticu n’Asturies, yá que según les previsiones espresaes polos organizadores del cónclave les feches del congresu coincidirán col desendolcu nes Cortes del Estatutu’l Periodista Profesional, un testu normativu llargamente xestáu que pretende regular el llabor de los informadores. L’alcuentru ocuparáse amás de forma singular del papel del periodismu na sociedá d’anguaño y del precarizáu réxime llaboral nel que trabayen los profesionales de los medios, que n’Asturies nun cuenten con un sindicatu específicu nin con Colexu Profesional propiu, sinón con una xenérica Asociación de la Prensa. Xunta Cataluña, Madrid, Andalucía, Baleares, La Rioja y Canarias, la vecina Galicia ye la comunidá que más recientemente orixinó un sindicatu de periodistes, órganu cuyu congresu constituyente ta fixáu pal prósimu mes de febreru y nel que yá figuren más d’un cientu de profesionales de los medios de comunicación gallegos en calidá de preafiliaos. La IV Convención de Periodistes d’España aportará a Xixón depués de pasar, n’años anteriores, por Cádiz, Valladolid y Tarragona, y ta promovida pol Foru d’Organizaciones de Periodistes (FOP), qu’a la so vegada integren les agrupaciones de periodistes d’UXT y CCOO, los Colexos Profesionales de Periodistes de Cataluña y Galicia, la federación d’Asociaciones de la Prensa y la Federación de Sindicatos de Periodistes. 31 d'avientu, 2004 0 FacebookTwitterPinterestEmail
Música El director Iván del Prado y la solista Svetla Krasteva protagonicen los conciertos de fin d’añu by asturnet 31 d'avientu, 2004 Música pal cambiu de ciclu. Los directores Iván del Campo y Óliver Díaz, y la solista Svetla Krasteva, protagonicen los dos principales conciertos d’añu nuevu que se cellebren n’Asturies, colos teatros Campoamor y Xovellanos como escenarios n’Uviéu y Xixón. El programa de los recitales, que tendrán les sos respectives répliques el domingu, inclúi pieces de Strauss, Offenbach, Dvorak y Sorozábal. Los uvieínos sedrán los primeros. El Campoamor recibe l’añu nuevu con música a la 1 de la madrugada del 1 de xineru, una hora depués de les campanaes que marquen el fin de 2004. Baxo la dirección del cubanu Iván del Prado por segundu añu, la Orquesta Sinfónica Ciudá d’Uviéu interpretará composiciones de Johan Strauss, Franz Von Suppé y Jacques Offenbach. El conciertu’l Campoamor repetiráse a les 20 hores del domingu 2 de xineru, coles llocalidaes a un preciu inferior al del espectáculu d’añu nuevu: Les entraes cuesten ente 13 y 17 euros pal recital d’esta nueche, y véndense a un preciu de 4 a 8 euros pa la repetición del día 2. En Xixón, pol contrariu, los precios son los mesmos pa los dos pases de la Orquesta Sinfónica Millenium, dirixida por Óliver Díaz y con Svetla Krasteva como solista: Acceder al recital cuesta ente 12 y 20 euros tanto pal conciertu d’añu nuevu -sábadu a les 20,30 hores- como pa la repetición del espectáculu al otru día, domingu, nel mesmu horariu. Nel teatru Xovellanos, Xixón recibirá l’añu 2005 con un programa diversu nel que figuren pieces de Dvorak, Puccini, Sorozábal y Strauss, ente otros autores. Pol so llau, Avilés cellebrará una gala lírica na Casa la Cultura a partir de les 20,15 hores del domingu. 31 d'avientu, 2004 0 FacebookTwitterPinterestEmail
Sociedá Asturies pieslla l’añu con seis servicios llocales de normalización y 20 conceyos na revisión toponímica by asturnet 31 d'avientu, 2004 Balance llingüísticu d’un añu. Asturies pieslla 2004 con un total de seis servicios llocales de normalización y venti conceyos implicaos na recuperación de la toponimia tradicional, depués d’un añu marcáu pola política llingüística dende’l Principáu, la controversia con Galicia, la postergación de la coficialidá y la concentración de grandes eventos en payares y avientu. Dos de les oficines municipales de promoción del asturianu yá esistíen -Llangréu y L.lena-, pero les otres cuatro echaron a andar, con ritmu desigual y concepciones estremaes, a lo llargu del añu que güei acaba: Xixón, Siero y les Mancomunidaes del Cabu Peñes y la Comarca de la Sidra. Los cálculos de los responsables autonómicos de política llingüística pasen por doblar esi númberu en 2005, depués del interés amosáu por otros conceyos. Magar d’ello, la cifra más bultable na recuperación del asturianu dende l’ámbitu llocal dióla la Xunta Asesora de Toponima, que tres de la so constitución nel mes de mayu fue quien a movilizar a venti conceyos nos sos primeros siete meses de vida. Esa ye la cantidá d’ayuntamientos qu’hasta agora solicitaron la recuperación oficial de los sos nomes de llugar en llingua asturiana, nun procesu qu’inda nun algamó en nengún de los casos el pasu final: la ‘oficialización’ de los topónimos pol Conseyu de Gobiernu. La XXV Selmana de les Lletres Asturianes cellebróse en mayu, nes feches habituales del eventu, con una riestra d’actos n’alcordanza del escritor xixonés Andrés Solar y baxo’l sempiternu signu de la división na reivindicación llingüística. Ensin embargu, la novedá de 2004 llegó nos meses finales del añu: Conceyu Bable recibió durante seis díes un homenaxe pol so 30 aniversariu en payares, Xixón entamó nesi mesmu mes unes xornaes pioneres sobro normalización nel ámbitu llocal y Llangréu garró’l relevu con una selmana dedicada a la llingua asturiana. El caberu fin de selmana de payares acoyó amás la primer Xunta d’Escritores n’asturianu que se cellebraba depués de seis años ensin cónclaves, alpenes cuatro díes depués que l’Academia de la Llingua denunciara la ‘galleguización’ del occidente pola vecina Galicia, que ta acabante aprobar un plan pa espardir l’idioma gallegu na comarca Navia-Eo. Too ello queda asolombrecío poles declaraciones que la conseyera de Cultura, Ana Rosa Migoya, fizo esta mesma selmana a la Cadena Ser, nes qu’avanzaba que los socialistes -grupu mayoritariu nel Parlamentu autonómicu- opondránse dafechu a incluyir la coficialidá na inminente reforma del Estatutu d’Autonomía y apostarán por una promoción del asturianu en nengún casu cola oficialidá nel horizonte. Diez referencies cronolóxiques 7 mayu. Manifestación n’Avilés del Día les Lletres 18 mayu. Constitución de la Xunta de Toponimia 18 xunu. El Gobiernu prepara’l Plan de Normalización 11 payares. Xornaes de normalización en Xixón 16 payares. Una alusión del Príncipe dispara les ventes de Berta Piñán 22 payares. L’Academia denuncia ‘galleguización’ nel occidente 23 payares. Realcuentru de fundadores de Conceyu Bable 2 avientu. Especialistes europeos clamen pol asturianu n’Uviéu 9 avientu. Balance de la Xunta d’Escritores 28 avientu. Los socialistes opondránse a la coficialiá 31 d'avientu, 2004 0 FacebookTwitterPinterestEmail
Tecnoloxía El Canon de los CDR y DVDR va xubir alrodiu dun 30 por cientu dende’l día 1 de xineru by asturnet 30 d'avientu, 2004 El canon de los CD y DVD vírxenes va xorrecer ente un 27 y un 35 por cientu dende’l día 1 de xineru, sigún denunciaron esti día lAsociación dInternautes (AI) y Comisiones Obreres (CCOO). Dambes entidaes reclamen al Gobiernu quimpida una situación que supón una inxusticia enforma granible pa los que graben nesos soportes creaciones propies o trabayos dordenador. El mes de xineru va entamar sigún delles fontes informatives con mui mal pie. Sigún asoleyaben webs tecnolóxiques como Elotrolado.net o Barrapunto la SGAE taría unviando cartes a los distribuidores de discos ópticos avisando de la xuba del canon que nEspaña soporten los CD y DVD grabables. Nestes cartes taría informándose qua partir del 1 de xinerul canon sobro CDR Data sedrá de 0,21 euros, sobro CDR Audio de 0,46 euros y sobro Minidisks de 0,46 euros (precios ensin IVA), lo que supondría un xorrecimientu nel preciu dhasta un 24 por cientu. Magar que l’anuncia se calificó dinocentada por munchos, al espardese la noticial día 28 davientu, nun salbidra que puea ser tala, yá que nun hai confirmación denguna pero tampoco nun satopa desmentíu dengún na páxina web de la SGAE. Lo que fain yá munchos españoles pa evadir el polémicu canon ye mercar los sos CD y DVD pa grabar en sitios web dotros países dEuropa onde nun se penalicen los discos vírxenes con dengún canon. Esi yel casu de Francia onde salluguen tiendes web como Nierle. Nesta tienda online puen mercase, como exemplu, 100 cds dende 12 hasta 22 euros, dependiendo de la marca, Un exemplu concretu podría ser el costu de 900 CD de la marca Datasafe que puen mercase por 16 euros ca 100, a la escontra del preciu que satopa davezu nos megastores españoles que supón 40 euros por ca 100 CD. Baxen el canon sobro los DVDR nos Países Baxos Mentantu nEspaña vamos sufrir en 2005 una xuba del 30 por cientu nel canon de los CD grabables (pasando de los actuales 17 céntimos por discu a 22 céntimos, más IVA), los nuesos vecinos holandeses van beneficiase d’una baxa nel canon sobro DVDR. Lañu entrante los nuesos vecinos europeos van pasar a pagar 0,60 euros por DVD-R (igual que nós) y 0,40 euros por DVD+R (un 33% menos que nosotros), teniendo en cuenta quel nivel de vida ellí ye muncho mayor y, darréu dello, los sueldos enforma mayores tamién. En munchos países dEuropa, comol mentáu Francia, nun se conbra dengún canon polos discos grabables. Lo que cobra la SGAE por actos publicos y les sos tarifes completes 30 d'avientu, 2004 0 FacebookTwitterPinterestEmail
Escéniques Trescientes compañíes d’Europa y América interésense en participar na Feria de Teatru pa Neños by asturnet 30 d'avientu, 2004 Habrá qu’escoyer ente trescientos candidatos. Un total de 297 compañíes de trece países d’Europa y América presentaron la so solicitú pa tomar parte de la XIV Feria Europea de Teatru pa Neños (Feten), que se cellebrará en Xixón a finales de febreru entamada pola Fundación Municipal de Cultura y que se consolida como un referente internacional del teatru infantil. El númberu de candidatures asoleyólu güei un responsable de comunicación de la Fundación Municipal de Cultura, Educación y Universidá Popular, entidá qu’agora deberá facer una esbilla, acordies cola calidá y la idoneidá de los espectáculos propuestos, de la que saldrán les 45 compañíes participantes nel certame. Ente’l 20 y el 25 de febreru de 2005, Xixón acoyerá unes 60 representaciones escéniques pa neños, ente animaciones de cai, obres convencionales, montaxes de títeres y númberos circenses, too ello nos mesmos escenarios que na edición anterior del festival: El teatru Xovellanos, l’Antiguu Institutu Xovellanos, el Centru Integráu de Pumarín la Colexata San Xuan Bautista y les propies cais de la ciudá. En 2004, la sensibilidá oriental y les hestories inspiraes en noveles d’aventures protagonizaron el certame xixonés, nel que la compañía andaluza ‘La Canela Teatro’ algamó’l premiu al meyor espectáculu por ‘Mil grullas’, mientres que los vascos ‘Teatro Gorakada’ ficiéronse colos premios a la meyor dirección y a la meyor escenografía. Información sobro Feten na web del Ayuntamientu de Xixón 30 d'avientu, 2004 0 FacebookTwitterPinterestEmail
Escéniques L’Ayuntamientu compromete una rempuesta sobro’l plan de viabilidá pal Arango a primeros de xineru by asturnet 30 d'avientu, 2004 L’Ayuntamientu de Xixón pronunciaráse sobro’l plan de viabilidá pal teatru Arango depués del día de Reis. La conceyala de Cultura, la socialista Mercedes Álvarez, citó a los responsables de la plataforma Cultura pal Arango pa una xuntanza, inda ensin fecha esacta, na que la Corporación dará por primer vegada la so opinión pública sobro’l documentu que’l collectivu entregó a los rexidores municipales hai agora un mes. Asina lo confirmaron güei representantes de la plataforma ciudadana, que reclama la recuperación del Arango como espaciu cultural y que defende la plena validez del plan de viabilidá pa evitar que’l céntricu teatru xixonés se convierta únicamente nuna macroclínica de Corporación Dermoestética. Los responsables de Cultura pal Arango presentaron ayeri n’asamblea el conteníu’l plan, qu’Asturnews avanzó la selmana pasada, y felicitáronse de que l’Ayuntamientu se comprometa a proporciona-yos “una contestación nuna mesa, y non na prensa al traviés de nun se sabe quién”, n’alusión a les declaraciones d’un altu funcionariu anónimu al diariu ‘El Comercio’, nes que denostaba les soluciones propuestes nel plan. Sálvese o non el teatru Arango -emplegando la terminoloxía de la plataforma cultural-, los miembros del collectivu volvieron poner enriba la mesa la conveniencia de da-y continuidá a la movilización xestada al rodiu de la recuperación de la sala xixonesa, “porque la confluyencia d’idegues crítiques ye un avance qu’hai que mantener”. Siete grandes cifres Nel plan de viabilidá plantéguense siete grandes cifres pa sufragar el ‘rescate’ cultural del teatru xixonés: 900.000 euros p’acondicionamientu del teatru, 240.000 pa la estructura del edificiu, otros 180.000 pa igües nel contiguu cine Albéniz, 160.000 pa equipamientu escénicu y 126.000 euros más empobinaos a mobiliariu. Otres dos partíes menores completen les cantidaes suxeríes pa remocicar el céntricu edificiu de Xixón: 48.000 euros baxo’l conceptu d’instalaciones en xeneral y 14.000 euros más destinaos a valtiamientos y llimpieza. En total, 1.668.000 euros, que los representantes de la plataforma cultural proponen financiar creando una nueva fundación d’investigación, promoción y difusión de la cultura asturiana, liderada pola propia Corporación Dermoestética, qu’asumiría el pagu de 1,2 millones (tola inversión prevista, menos los 434.000 euros necesarios pa dividir horizontalmente el teatru, que pagaría directamente Dermoestética). Archivu. Cultura pal Arango plantega un teatru de 350 butaques y una fundación pactada con Dermoestética 30 d'avientu, 2004 0 FacebookTwitterPinterestEmail
Sociedá El Conseyu de Gobiernu define los criterios políticos del Plan de Normalización by asturnet 30 d'avientu, 2004 El Conseyu de Gobiernu entamará güei la tramitación interna del Plan de Normalización Sociollingüística de la Llingua Asturiana, cola aprobación de los criterios políticos del mesmu. Cumplirá asina cola anuncia pública que ficiere yá por dos vegaes la Conseyera de Cultura, Comunicación Social y Turismu, Ana Rosa Migoya, que dende’l mes de payares vien dexando afitao quel plan entrará en vigor nel mes de xineru. Nesi documentu, cuyos conteníos ya inspiración adelantó Asturnews yá nel mes de xunu, la titular de Cultura ve’l preséu fundamental de la política llingüística del Executivu dende quentamó a asoleyar la so aprobación pa Xineru en delles ocasiones. La cabera vegada que lo fizo foi darréu de mantener una xuntanza con miembros del Comité internacional pola salvaguarda de los drechos llingüísticos n’Asturies, que-y entregó un informe nel que se destacaba la necesidá imperiosa de declarar, o a lo menos prever, la coficialidá pa garantizar la sobrevivencia del idioma. Nes noticies que la Conseyera diere hasta agora del Plan, vien defendiendo que va ser “transversal”. De fechu, Migoya sorrayó na cabera comparecencia que parte de les conclusiones del informe que-y entregaron los espertos europeos coincidíen colos plantegamientos del Plan de Normalización, que persigue, precisó la conseyera, “frenar la desapaición de la llingua común”. La primer vegada que la Conseyera comprometió que’l documentu col que’l Gobiernu autonómicu planifica y estructura la promoción del asturianu pa los prósimos tres años tará en vigor en xineru de 2005 foi el pasáu 10 de payares. Entós, Ana Rosa Migoya destacó l’aumentu presupuestariu de 1,4 a 1,7 millones d’euros que tendrán l’añu prósimu les polítiques de promoción de la llingua asturiana dende l’Executivu. Migoya avanza que los socialistes opondránse a incluyir la coficialidá na reforma del Estatutu 30 d'avientu, 2004 0 FacebookTwitterPinterestEmail
Sociedá Un 70 por cientu de xixoneses apoya que la Feria de Muestres y la Selmana Negra seyan billingües by asturnet 30 d'avientu, 2004 Sólo un 2 por cientu de los xixoneses conoz la Oficina de Política Llingüística del Principáu. Asina lo amuesa la Encuesta Sociollingüística que’l caderalgu Francisco Llera Ramo ultima na so edición definitiva y cuya información gráfica ufre güei Asturnews de forma íntegra a los sos llectores. Nos gráficos destaquen los porcentaxes de xixoneses que reclamen billingüismu total na Selmana Negra (71 por cientu), la Feria de Muestres (70 por cientu) y el Festival de Cine (68 por cientu). Los resultaos xenerales de la encuesta foron avanzaos el pasáu 15 d’avientu pol propiu Llera Ramo, pero la información gráfica qu’illustra el testu añade nuevos datos al resume qu’entós se dio a conocer. Ente ellos, asoléyase que porcentaxes superiores al 66 por cientu de los ciudadanos encuestaos ven con bonos güeyos que’l Salón del Llibru Hispanoamericanu, el Concursu Hípicu Internacional, el Festival de Cine, La Feria de Muestres, los Alcuentros de Mocedá de Cabueñes y la Selmana Negra -principales eventos de la ciudá- se denominen, publiciten y comuniquen dafechu n’asturianu y castellán. Acordies col estudiu dirixíu por Llera Ramo, que cuenta col auspiciu del Ayuntamientu de Xixón -al traviés de la Oficina Municipal de la Llingua, dirixida por María Xosé Rodríguez- y ta ellaboráu a partir de 600 entrevistes, altos porcentaxes de la ciudadanía reclamen amás qu’esa visibilidá de la llingua asturiana s’estienda a los productos y servicios qu’ufren los comercios de la ciudá (55 por cientu) y a les cartes de la hostelería (52 por cientu), en tantu qu’un 49 por cientu de los encuestaos aboga por que l’asturianu tea presente n’ocasionales actos públicos. Altu desconocimientu Ente la información adicional que proporcionan los gráficos asoleyaos güei por Asturnews destaca asinamesmo l’alta tasa de xixoneses que desconoz les entidaes de promoción y recuperación de la llingua asturiana: Sólo’l 18 por cientu d’ellos diz conocer dalguna entidá. A partir d’esa cifra, los datos son más bien desoladores. Asina, L’Academia de la Llingua Asturiana ye la entidá más conocida polos encuestaos, con sólo un 9 por cientu. Tres d’ella, un 5 por cientu de los xixoneses encuestaos asegura conocer partíos políticos nacionaliegos que trabayen pol asturianu, un 3 por cientu menciona a La Xunta pola Defensa de la Llingua y l’Ayuntamientu de Xixón, y sólo un 2 por cientu de los encuestaos declara que conoz la Oficina de Política Llingüística del Principáu. Idénticu porcentaxe cita a la Conseyería de Cultura como entidá que promueve la llingua asturiana. Archivu. La mitá de los xixoneses fala o escucha asturianu en casa, pero la mayoría prefier el castellán en sociedá 30 d'avientu, 2004 0 FacebookTwitterPinterestEmail
Patrimoniu Xixón lidera la recuperación d’illustraciones antigües cola alquisición de cinco cartelos descatalogaos by asturnet 29 d'avientu, 2004 “Única n’Asturies y mui rara n’España”. Con estes pallabres definió güei l’estudiosu Francisco Crabifosse la recuperación de grabaos, illustraciones y cartelos antiguos que faen dende Xixón los Museos Casa Natal de Xovellanos y del Pueblu d’Asturies. Crabifosse censuró la “falta de sensibilidá” de les instituciones nel rescate y dignificación de les artes gráfiques. Pal especialista xixonés, investigador de la hestoria’l grabáu y la litografía n’Asturies, les autoridaes públiques han mirar con más procuru pa la conservación de documentos gráficos que lluchen contra dos grandes enemigos: La propia vulnerabilidá del papel y la negativa, común según Crabifosse, d’entidaes y particulares a rexistrar los cartelos nel depósitu llegal, lo qu’impide conservar a lo menos una copia a salvu de la desapaición total. El Muséu’l Pueblu d’Asturies presentó esti mediudía les sos cinco últimes alquisiciones, toes elles anteriores precisamente a la entrada en vigor del depósitu llegal, nel añu 1958. Un cartelu de promoción turística d’Asturies orixinal de Joaquín Vaquero Palacios y fecháu en 1929, col paisaxe de Cuadonga como motivu central, cuelga yá nes parés del centru etnográficu xixonés. Tamién s’amuesen al públicu un segundu cartelu de promoción del turismu ellaboráu yá na posguerra, col horru como motivu central; una singular llamada gráfica a la victoria’l bandu nacional na Guerra Civil, producíu en L.luarca; y un cartelu que publicitó la Feria de Muestres d’Asturies en 1929, un añu depués que los artistes de Xixón protagonizaren múltiples engarradielles énte la convocatoria d’un concursu p’algamar un cartelu promotor del certame. Completa la llista d’alquisiciones recientes del Pueblu d’Asturies un diploma de méritu otorgáu pola Escuela d’Artes y Oficios d’Avilés en 1912, con un debuxu orixinal de José Cuevas. Toos esos elementos sumáronse güei formalmente a la colección gráfica del equipamientu etnográficu xixonés, que conserva rares estampes relixoses, etiquetes de llicores, grabaos d’época y, en pallabres del director del centru, Juaco López, un abondosu catálogu que va “de los envoltorios de carambelos a les pegatines y los cartelos”. 29 d'avientu, 2004 0 FacebookTwitterPinterestEmail
Comunicación ‘La Voz de Asturias’ rescinde contratos indefiníos en Xixón al traviés d’una sociedá subordinada by asturnet 29 d'avientu, 2004 El diariu ‘La Voz de Asturias’, propiedá’l Grupu Zeta de comunicación -que xestiona ente otres cabeceres ‘El Periódico de Catalunya’- y con edición propia en Xixón, reduz el so personal na delegación d’esa ciudá depués que se-yos comunicare a trabayadores despidíes que’l cese débese a la disolución de la sociedá ‘Comunicación y Medios de Asturias SL’, cuyu capital rexenta al cien por cien el propiu diariu de Zeta n’Asturies. Asina, y según los datos comunicaos a emplegaes destituyíes -que desendolcaben llabores de redacción y otres xeres con contratos de duración indefinida-, la desapaición de la firma cola que ‘La Voz de Asturias’ comercializaba la so cabecera específica de Xixón determina’l despidu de varies trabayadores. El restu d’operarios que permanecen en plantiella pasarán agora a depender directa y formalmente de ‘La Voz de Asturias’, que s’edita n’Uviéu. La páxina web del Grupu Zeta inclúi a la entidá ‘Comunicación y Medios de Asturias Sociedad Limitada’ na so división d’empreses comercializadores y ausiliares, como responsable de ‘El Periódico de Gijón’ -edición específica de ‘La Voz de Asturias’ nesa ciudá. Nos últimos años, esti diariu fizo un apueste pola so presencia en Xixón col llanzamientu d’una delegación allugada na cai Padilla, pero les evoluciones del negociu periodísticu determinaron tresllaos de redactores a Uviéu, ceses y una intermitente sensación d’inseguridá llaboral ente los trabayadores de la publicación. 29 d'avientu, 2004 0 FacebookTwitterPinterestEmail