Cine Palmarés del 44 Festival Internacional de Cine de Xixón by asturnet 4 d'avientu, 2006 El Festival Internacional de Cine de Xixón peslló la so 44 edición dexando atrás una selmana d’intensa actividá cinematógrafica en Xixón, amás de les fiestes, exposiciones y demás actividaes relacionaes colos diferentes ciclos del Festival. El xuráu del 44 Festival Internacional de Cine de Xixón, compuestu por Tiziana Finzi, Thomas Clay, Isaki Lacuesta, Mark Peranson y Javier Pereira, concedió’l premiu al meyor llargumetraxe a Sehsucht (Longing) de Valeska Grisebach. El premiu del Día d’Asturies concedióse a “La Marea” un curtiumetraxe dirixíu por Jim-Box, Iván Sáinz Pardo y Dirk Sodner. El xuráu d’esti Premiu taba compuestu por José Ramón Pérez Ornia, Tino Pertierra y Manuel Lechón. El premiu Nuevos Realizadores del Principáu d’Asturies concedióse a Tenemos que hablar, presentáu por Alberto Rodríguez de la Fuente y el Segundu Premiu d’esta categoría concedióse a “Único” presentáu por Carmen Rico Cabrera Festival Internacional de Cine de Xixón 4 d'avientu, 2006 0 FacebookTwitterPinterestEmail
Comunicación La futura Llei de Puxu de la Sociedá de la Información podría poner llendes a la llibertá d’espresión by asturnet 29 de payares, 2006 Presentóse’l borrador de la futura Llei de Puxu de la Sociedá de la Información, na que, según l’Asociación d’Usuarios d’Internet (AUI), nun se recueyen les peticiones feches pol Conseyu Asesor de Telecomunicaciones Estes peticiones trataben sobre les garantíes xudiciales nel intre de retirar un conteníu de la rede o torgar l’accesu a una páxina concreta. La AUI mantién que tien d’esistir un mandáu xudicial mesmo pa poder pesllar un web como p’acceder a los datos que tán obligaos a guardar los proveedores y, finalmente, quitar de la llei la posibilidá de qu’un proveedor pueda desmañar a un usuariu acceder a un conteníu concretu. Sicasí’l testu remitíu establez que “cuando un órganu competente ordenare, n’exerciciu de les competencies que llegalmente tuviere atribuyíes, que s’interrumpa la prestación d’un serviciu de la sociedá de la información o la retirada de dellos conteníos provenientes de prestadores establecíos n’España (…), esti órganu podrá ordenar a los citaos prestadores que suspendan el correspondiente serviciu d’intermediación utilizando pa la provisión del serviciu de la información o de los conteníos cuya interrupción o retirada fueren ordenoa respectivamente. L’Asociación d’Usuarios d’Internet entrúgase por cuálos son los órganos competententes, dao qu’el testu nun lo especifíca en nengún puntu. “Una páxina web ye a tolos efectos un mediu de comunicación y como tal ha ser tratáu; si nun lo camentamos asina, podemos cayer en situaciones como les recién pasaes en China”, dizo Pérez Subías, presidente de l’AUI. La Nueva llei tamién responsabiliza al proveedor del enllace o del motor de búsqueda de los conteníos de los que se tien conocencia porque fueron ellaboraos embaxo la so dirección, autoridá o control. Pa l’AUI, esta midía ta en contra de la Web 2.0, de los espacios públicos de los usuarios, yá qu’internet ye dinámica y cambiante. El presidente de l’AUI entrúgase “¿Por qué sí alguién pon un enllace nel mio blog a otra páxina tengo que ser yo responsable de los conteníos d’esta páxina, si estos pueden cambiar cada minutu?. “L’alministración o, nel so defectu, los órganos competentes” nun han decidir qué conteníos se pueden o non espublizar. Esta midía supón una restricción y un vetu a los usuarios p’acceder a páxines y sitios d’Internet” , afirma l’AUI Amás, l’asociación nun descarta entamar aiciones llegales y recurrir la LPSI ente otres instancies por entender que se vulneren los derechos de los usuarios. Asociación Usuarios d’Internet 29 de payares, 2006 0 FacebookTwitterPinterestEmail
Cine El Congresu de los Diputaos quier desenvolver la distribución y exhibición de películes nes llingües oficiales by asturnet 29 de payares, 2006 El Congresu de los Diputaos insta a desenvolver la distribución y amuesa de les obres cinematógrafiques nes llingües oficiales. El Congresu instó al Gobiernu a que nel prósimu periodu de sesiones se presente’l Proyectu de Llei del Cine, cola fin de dinamizar el sector. La Cámara Baxa española aprobó, con 239 votos a favor, dos abstenciones y nengún votu en contra, una moción sobre la situación de la industria cinematográfica. El testu alcordáu pide l’establecimientu de midíes de sofitu y fomentu a la producción independiente pa desenvolver una actividá creativa propia en base a la diversidá cultural y llingüística del Estáu y que se faigan les midíes afayadices pa garantizar la distribución de les obres cinematográfiques nes diferentes llingües oficiales nel territoriu español. El proyectu de llei habrá establecer programes de difusión y promoción publicitaria de les obres cinematográfiques españoles y promocionar los mecanismos de cooperación de la futura axencia estatal de la cinematografía coles entidaes correspondientes de les Comonidaes autónomes. Tamién s’habrá de garantizar la suficiencia d’un fondu específicu empobináu al fomentu de la cinematografía dende los presupuestos xenerales del estáu y facilitar l’accesu al créditu oficial y al créditu priváu a les productores independientes. La producción cinematográfica en llingua asturiana, por nun ser llingua oficial, nun va tar afectada pola midía 29 de payares, 2006 0 FacebookTwitterPinterestEmail
Cine Lucinda Torre presentó nel Festival Internacional de Cine de Xixón “Resistencia” by asturnet 27 de payares, 2006 La directora asturiana Lucinda Torre presentó la película documental “Resistencia” sobre la llucha de los trabayadores de Duro Felguera pol so puestu de trabayu. El domingu 26 de payares el Teatru Xovellanos de Xixón abellugó la presentación del primer llargumetraxe de la directora llangreana. La hestoria de llucha de los trabayadores de la Duro Felguera na defensa del so puestu de trabayu, la implicación de les sos families como parte activa na movilización, la movilización social que fizo posible parar el despidu de los 232 trabayadores afectaos, centren el llagumetraxe de Lucinda Torre. Resistencia ye un documental que cuenta’l conflictu llaboral más llargu de la historia d’Europa, afondando na esperiencia del Colectivu de Despedíos de Duro Felguera. La so llucha algamó los sos oxetivos, recuperar los sos trabayos y poner a funcionar, otra vegada, una fábrica que dende mediaos del sieglu XIX configuró un paisaxe industrial nel conceyu de Llangréu. El relatu de sobrevivencia, la dignidá de la llucha pol futuru del país son aspectos nos que Lucinda Torre afonda nel llargu del documental, al tiempu que val de reflexón colectiva sobre les consecuencies de les polítiques neolliberales nel mundu actual. La banda sonora, compuesta pol compositor asturianu Ramón Prada, sumerxe al espectador dientro de la película, faciendo de complementu a les imáxenes ya intervenciones de los actores principales del conflictu llaboral de la Duro. Lucinda Torre ye autora del curtiumetraxe “El beso de la tierra” qu’algamara’l Premiu del Xuráu xoven del Festival de Cine de Xixón nel añu 1999, el Premiu de l’Audiencia del Créteil International Women’s Film Festival de 2000 y algamara una nominación al meyor curtiumetraxe de ficción de los Premios Goya nel añu 2001 Resistencia va volver proyectase güei llunes 27 de payares a les 22,30 nel Centru Xixón Sur y el miércoles nel Teatru Prendes de Candas a partir de les 20,00 hores. web de la película 27 de payares, 2006 0 FacebookTwitterPinterestEmail
Cine Cine popular na Guerra Civil Española by asturnet 24 de payares, 2006 Nel marcu del Festival Internacional de Cine de Xixón, el día 25 de payares a partir de les 17,00 hores, la sala 4 de los Cines Centro proyectará una riestra documentales realizaos por Film Popular durante la Guerra Civil. Esta proyección, organizada pol Atenéu Obreru de Xixón, tará presentada pol historiador Rubén Vega. En 1937 créase Film Popular, productora-distribuidora empobinada a ser la voz del PCE-PSUC y organizacones averaes. En pocu tiempu, la so importancia foi perdestacada pol so llabor informativu y propagandísticu. Nel añu 2004 la Filmoteca Español reconoció que Film Popular yera una productora dependiente del Partíu Comunista d’España, polo que los derechos sobre los títulos y documentación xeneraos por esta productora pertenecíen al PCE. Nuna primer entrega, l’Archivu Históricu del PCE recuperó dalgunos de los títulos más significativos producíos por Film Popular, como son los que mañana se van exhibir na 44 edición del Festival Internacional de Cine de Xixón. Los documentales que se van proyectar son “Juventud”, “La mujer en la guerra”, “La mujer y la guerra”, “Conferencia Nacional de Juventudes”, “Traición”, “Defensa de Madrid”, “Norteamérica en España” y “Celestino García Montero”. 24 de payares, 2006 0 FacebookTwitterPinterestEmail
Cine Cine social nel Festival Internacional de Cine de Xixón by asturnet 24 de payares, 2006 El certame cinematográficu presentará n’Asturies los documentales “Resistencia” de Lucinda Torre, sobre la llucha de los trabayadores de Duro Felguera, “En el hoyo” del mexicanu Juan Carlos Rulfo, y el llargumetraxe de ficción “La Línea recta” de José María Orbe, cola precariedá llaboral como fondu. “Resistencia” el documental de la llangreana Lucinda Torre sobre la llucha de la plantiya de Duro Felguera contra’l peslle de la fábrica metalúrxica asturiana, estrenaráse nel certame xixonés dientro de la sección oficial fuera de competición. El llargumetraxe desenvuelve la historia d’estos trabayadores de la cuenca del Nalón despedíos nos momentos más duros de la crisis asturiana, que decidieron nun quedar paraos y lluchar pola readmisión y el mantenimientu de l’actividá indistrial en Llangréu. Una historia de trabayadores a contracorriente, qu’a base de llucha y movilización algamaron lo que queríen, que nengún compañeru fuere echáu al paru y qu’una fábrica centenaria nel país nun se fugase a los paraísos fiscales y medioambientales del Tercer Mundu (anguaño les empreses tienen ruedes diz un de los porotagonistes de la película). Lucinda Torre vuelve encerrase colos trabaydores nel Ayuntamientu de Llangréu, vuelve a viri la so fuelga de fame, visita con ellos la catdral d’Uviéu y sobre too, como na yá llexendaria película de H.erbert Biberman “La Sal de la Tierra”, da la pallabra a les muyeres, sofitu indispensable pa que la movilización llegase a bon puertu. BAC films y Televisión ESpañol producen esti saludable recordatoriu de ñla nuesa memoria histórica más reciente, que s’estrenará’l domingu 26 a les 17,00 nel Teatru Xovellanos de Xixón. Como la vida de bien de persones nesti país, “La línea recta” tien la precariedá como telón de fondu. José María Orbe, director de la cinta, y productor d’una de les meyores películes del últimu cine español “Las horas del día”, escueye pal so debú la dura historia d’esta moza que vive nuna pensión y trabaya buzoneando. Los responsables del film escoeyeron Xixón pal estrenu mundial de la película. Fadráse’l llunes 27 nel Teatru Xovellanos de Xixón a les 20,00. Nel apartáu de la sección oficial a concursu estranráse nel Estáu Español el documental “El hoyo”, cinta ganadora nos festivales de Sundace y Buenos Aires, y que relata la historia d’un grupu d’obreros que llevanta una autovía nel Departamentu Federal con “sangre, sudor y lárimes”. La película dirixida pol mexicanos Juan Carlos Rulfo, fiu del novelista Juan Rulfo, autor de “Pedro Páramo” y “El llano en llamas”. El llunes 27 de payares podremos vela nel Teatru Xovellanos. 24 de payares, 2006 0 FacebookTwitterPinterestEmail
Cine ASBRU entama un ciclu de curtiometraxes asturianos en Bruseles by asturnet 23 de payares, 2006 L’Asocición Asturianos en Bruseles “dalcuerdu col so oxetivu de promocionar la cultura asturiana nes sos diferentes manifestaciones y vertientes, presentará en collaboración col Festival de Cine de Xixón, una amuesa de curtiometraxes asturianos los díes 23 y 24 de payares na Casa d’Asturies de la capital belga. Los actos tendrán un programa doble nel que se va proyectar una selección de les meyores obres integraes nos últimos años nel denomináu Día D’Asturies del certame xixonés. Ente los curtiometraxes escoyíos -once en total- pol Festival de Cine de Xixón pa ser proyectaos en Bruseles alcuéntense dalgunos de los más premiaos nos últimos años mesmo a nivel estatal como internacional como por exemplu Último tren a Tahití de Carlos Navarro, Tierra de Guerrilleros, d’Amanda Castro, Entaína, d’Alberto Pardo, y 7337, de Sergio G. Sánchez, realizador esti últimu que va tar presente na Clausura del Ciclu pa debatir col públicu sobre la situación actual de la producción audiovisual n’Asturies y la so proyección nel esterior. 7337, rodáu en 2000 n’asturianu y qu’algamó, ente otros, el premiu al Meyor Guión nel Festival Internacional de Cine Fantásticu de Bruseles (2001), el premiu Día d’Asturies nel Festival Internacional de Cine de Xixón (2000) y el premiu del públicu al Meyor Curtiumetraxe nel Festival de Cine Español de Málaga (2001), narra la hestoria d’una mayestra moza que en 1973 marcha pa un llugar separtáu nos montes d’Asturies pa facese cargu d’una escuela rural ensin usar dende la Guerra Civil. Estes selmanes el director y guionista ta acabando en Barcelona la preparación del que va ser el so primer llargumetraxe “From the grave to the cadle” que va rodar l’añu qu’entra. El peslle del ciclu cuntará tamién cola participación de José Braña, director de “Lo que el ojo no ve”, curtiumetraxe rodáu en 2003 que cuenta la tráxica deriva d’un partíu de fútbol de dos equipos rivales nuna división rexonal. Con esta actividá ASBRU pretende siguir na llinia, entamada l’añu pasáu, de divulgar los diferentes aspectos de la cultura asturiana en Bruseles y d’ufrir la posibilidá de conocer los sos aspectos más innovadores a un públicu ampliu ya internacional. No que va d’añu, l’asociación xoven promovió bien d’esistoses iniciatives como les xornaes dedicaes a la nueva cocina asturiana que se ficieron nel mes de xunu o’l I Concursu de Fotografía ASBRU-ASMA, fechu en xunetu en collaboración cola asociación Asturianos en Madrid (ASMA). 23 de payares, 2006 0 FacebookTwitterPinterestEmail
Comunicación Tribuna ciudadana organiza una conferencia embaxo’l títulu Archivos versus Corrupción by asturnet 22 de payares, 2006 L’asociación Tribuna Ciudadana, organiza’l prósimu vienres 24 de payares, una conferencia embaxo’l títulu Archivos Versus Corrupción. La conferencia tará desenvuelta por Aída Luz Medoza Navarro, archivera y xurista. Presentarán la conferencia Mª Ángeles Valle del Juan, xefa del Archivu del Senáu español y vicepresidenta del Padronalgu del Archivu de la Guerra Civil. La conferencia fadráse a partir de les 20,00 hores nel Club de Prensa Asturiana. 22 de payares, 2006 0 FacebookTwitterPinterestEmail
Cine Día d’Asturies del Festival de Cine de Xixón. by asturnet 22 de payares, 2006 L’alcuentru colos curtiometraxes asturianos tendrá dos cites a lo llargo del Festival de Cine de Xixón, 25 y 28 de payares. El sábadu 25 de payares proyectaránse “Painting soldiers”, “Gijón City Hestories”, “El plan b”, “El cuadro” y “Peces Pequeños”. La segunda sesión del Día d’Asturies fadráse’l martes 28 de payares cola proyección de “Terapia peculiar”, “Respirar”, “Conjuntos disjuntos”, “24 escaleras”, “Sacrificio”, “El Torreón” y el “Cantar del agua”. La participación de los curtiometraxes asturianos tará presente tamién na competición del Festival onde “The party is over”, “Recuerdo”, “La Marea”, “La Terapia”, “Vacyo”, La invasión de los hiperpúberes” y “Gertrud” proyectaránse dientro de les sesiones del Festival xixonés 22 de payares, 2006 0 FacebookTwitterPinterestEmail
Cine “HISTORY BOYS” inaugura la 44 edición del Festival de Cine de Xixón by asturnet 20 de payares, 2006 Avance de la programación de la Sección Oficial y les películes que se proyectrán nes gales d’inauguración y clausura de la 44 edición del Festival Internacional de Cine de Xixón. The History Boys ye la película escoyida pa la sesión inaugural, la película ta dirixida por Nicholas Hytner. Esta producción británica ye l’adaptación cinematográfica de la obra teatral d’Alan Bennet que, nel añi 2004, arrasó na taquilla llondinense y algamó seyes premios Tony -los Oscar del teatru- na última edición de 2006 Ambientada nos díes de la llegada al poder de Maragaret Thatcher en 1980, la cinta cuenta les aventures d’un garrapiellu de mozos estudiantes nuna escuela privada del norte d’Inglaterra, y los sos intentos por entrar nes universidaes d’Oxford y Cambridge, de la mano de dos profesores con caracteres bien distintos. Idlewild na sesión de clausura, de Bryan Barber. Protagonizada por Big Boi y André 3000, del dúu musical Outkast -un de los más especiales y talentosos de la escena del hip-hop americanu- y la dirección de Barber, qu’aveza dirixir los sos video-clips, Idlewild foi una de les sorpreses del añu nos Estaos Xuníos. Con un conteníu visual ablucante, la cinta amiesta’l musical, el cine negro, el drama y la comedia nuna historia ambientada nun club de los años 30. A Guide to Recognizing All Your Sints una obra de Dito Montiel, qu’algomó por ella’l premiu al Meyor Director nel Festival de Sundance asina como’l Premiu de la Selmana de la Crítica en Venecia. Cuenta cola participación de nomes consagraos como Robert Downey J.r, Chazz Palmintieri o eric Roberts, pa una historia sobre la delincuencia nel Queens niuyorquín. Shortbus de John Cameron-Mitchell, los amantes de la conversación ya’l sexu alcuéntrese nun sitiu onde nun hai espaciu pa pudores nin inhibiciones. Demented, de Laurent Achard foi Leopardo de Plata en Locarno y premiu Jean Vigo al director novel del añu en Francia. I don’t want to sleep alone, supón el regresu a Xixón de Tsa Ming-Liang tres la retropsectiva que’l Festival-y dedicara en 2004. El director Juan Carlos Rulfo presentará “En el hoyo”, Gran Premiu del Xuráu en Sundance y Meyor Película nel Festival de Cine Independiente de Buenos Aires, nuna historia sobnre los obreros d’una autopista mexicana. Offsiden, del iraní Jafar Panahi, ganó l’Osu de Plata en Berlín, un grupu de muyeres intenta entrar nun partíu de fútbol de la selección d’Irán, pero esi nun ye llugar pa elles. Quiceañera, EEUU, foi premiu del públicu y Especial del xuráu de Sundance, pa cuntar una historia de conflictos raciales, adolescentes llatines embarazaes y cuelbrones a ritmu de reggaeton. “La línea recta” (España) de José María de Orbe, representa un duru retratu xeneracional al través de la mirada d’una moza repartidora de publicidá. “Longing” (“Sehnsuch”) (Alemania) foi revelación del últimu cine alemán, con una infidelidá como detonador del conflictu. “On Fire” (“Ça Brule”) (Francia) cuenta la pasión arrolladora d’una adolescente y un bombero que podría ser el so padre. Quinceañera”Nº 2″ (Nueva Zelanda), Premio del Públicu en Sundance pa esta comedia coral sobre asuntos de familia con una matriarca mui especial. En “Slumming” (Austria) de Michael Glawogger, el director de Workingman’s Death, vuelve con una ficción sobre un ricu ociosu que se entretién gastando bromes a los paries de Viena. “Daratt” (Chad, Francia, Bélxica, Austria) algamó’l Premiu Especial del Xuráu en Venecia, coles consecuencies de la guerra del Desiertu del Chad como telón de fondu. Pa finalizar “Gradually” (“Be Ahestegi”) (Irán) de Maziar Miri, introduznos nos problemes d’un país con un réxime teocráticu que llexisla hasta en materia d’amor Fuera de competición proyectaránse “Suely in the Sky” qu’algamó los principales premios nel Festival de Rio de Janeiro. “Old Joy”, trunfadora nel festival de Rotterdam. Container del avezáu del Festival Lukas Moodysson. In Between Days, premiu de la Crítica en Berlín y Premiu Especial del Xuráu en Sundance. Day night day night” Premiu “Mirada Joven” na quincena de Realizadores de Cannes y “Resistencia” de Lucinda Torre, que recuerda conflictos llaborales y la llucha de más de diez años de los obreros de Duro Felguera. 20 de payares, 2006 0 FacebookTwitterPinterestEmail