Hestoria L’Ateneo Obrero recupera les cróniques de la guerra de Marruecos de José Díaz Fernández by asturnet 29 de marzu, 2005 L’Atenéu Obreru de Xixón acaba de recuperar dientro la so colección ‘Fortuna Balnearia’ una amplia selección de les cróniques de la guerra de Marruecos que’l periodista y escritor José Díaz Fernández unvió a lo llargo de casi un añu pal diariu xixonés ‘El Noroeste’. Escrites dende los mesmos campamentos de les tropes coloniales onde Díaz Fernández cumplía’l so serviciu militar, estes cróniques “lléense agora con una sorprendente actualidá énte’l contestu internacional de güei”, según José Ramón González, autor de la edición d’esta obra d’un de los intelectuales republicanos más destacaos, fundador con Azaña d’Izquierda Republicana y autor de la novela vanguardista ‘La Venus Mecánica’. Rescatar parte d’una obra “que cobra nueva actualidá güei nel enfrentamientu que protagoniza Occidente y los Estaos Uníos contra dellos estaos islámicos y que tien elemenentos en común cola aventura colonial española en Marruecos” y al empar recuperar les cróniques d’un José Díaz Fernández “qu’empezaba a formase como escritor” nesos trabayos unviaos pal diariu ‘El Noroeste’, son los motivos que llevaron al autor d’esta edición del Atenéu Obreru a remanecer estos artículos. Amás del interés que pueden tener pa ver la evolución lliteraria y periodística de Díaz Fernández nos inicios de la so carrera, “Crónicas de la Guerra de Marruecos (1921-1922), tienen el valor añadíu de tar escrites non por un periodista profesional o un espertu en xeopolítica del so tiempu dende la distancia física del conflictu tratáu sinón dende la perspectiva d’un rapaz que prestaba los sos servicios como soldáu nes tropes coloniales. Según declaró a Asturnews l’autor d’esta antoloxía, José Ramón González, les cróniques del corresponsal ‘amateur’ del diariu ‘El Noroeste’ de Xixón “adopten la posición crítica que nesa dómina espresaba un estáu d’opinión xeneralizáu na sociedá española, inda tamién les contradiciones que se calteníen respective a la presencia colonial nel norte d’África”, pa González “el valor de los artículos de José Díaz ta en que fala dende la primer llinia d’esa guerra, padeciendo les necesidaes y asistiendo a aquellos sucesos como forzáu protagonista, na so condición de militar de reemplazu”. Non namás se fala de les campañes béliques coloniales nestes cróniques, onde a xuiciu del editor de la esbilla: “hai tamién sitiu pa la pincelada costumista, la descripción demorada d’un escritor en ciernes, la evocación de los contrastes nunos artículos qu’alcuando adopten la forma d’un llibru de viaxes”, tamién los primeros rellumos d’utilización d’un llinguaxe “sorpresivu, minuciosu, peñeráu” del futuru creador de “La Venus Mecánica”, obra señera de la vanguardia española. La esperiencia na guerra de Marruecos foi esencial na formación de Díaz Fernández como periodista y escritor, y asina otra de les sos noveles más conocíes: “El Blocao” desenvuélvese col mesmu escenariu de fondu. L’autor de les cróniques de la guerra de Marruecos publicaes nel periódicu xixonés ‘El Noroeste’ diba escribir años después una famosa crónica en tiempu real de la revolución d’ochobre del 34. Nacíu en 1898 n’Aldeanueva del Obispo (Salamanca), crióse en Castripol y estudió n’Uviéu. Darréu empezará trabayar como redactor de ‘El Noroeste’ en Xixón y ende va desenvolver diverses actividaes dende l’Ateneo Obrero, del que foi secretariu. Fundó con Manuel Azaña el partíu Izquierda Republicana y collaboró nos principales medios de la dómina como “El Sol”, onde diba algamar una gran popularidá. 29 de marzu, 2005 0 FacebookTwitterPinterestEmail
Hestoria Carlos Marín publica un polémicu llibru del celtismu n’Asturies by asturnet 17 de marzu, 2005 La editorial gallega Toxosoutos acaba de publicar un ensayu del hestoriador catalán Carlos Marín Suárez que tien el celtismu asturianu como oxetu de les sos tesis. El trabayu tituláu ‘Astures y Asturianos.Historiografía de la Edad de Hierro en Asturias’ estudia la presencia hestórica de lo celta nel nuestru país y les distintes interpretaciones d’ella que se dieron na sociedá asturiana dende les primeres escavaciones de los afayos castreños hasta anguaño, dende’l rexonalismu conservador d’empiezos del sieglu XX hasta’l nacionalismu d’izquierdes actual. Hacia la utilización del celtismu por parte d’esti movimientu van encaminaes la mayoría de les crítiques que l’arqueólogu espón na parte final d’esti llibru, qu’ensin dulda ha tener una acoyida polémica n’Asturies. El llibru de Marín Suárez que lleva na portada una imaxe del castru de la Campa Torres y un trisquel cola llienda:’Asturies nación celta’, intenta aclariar dende una perspectiva arqueolóxica cuestiones relatives al celtismu y a la so plasmación na formación d’un discursu identitariu n’Asturies. El trabayu del hestoriador catalán va más alló del campu acutáu pol tema central de la so investigación y constitúi un curiosu repasu al asturianismu cultural y políticu dende los primeros rellumos del rexonalismu clásicu hasta la consolidación d’una corriente política nacionalista escamplada cola aparición 1n 1975 de Conceyu Bable y los primeros grupos políticos d’ámbitu esclusivamente asturianu, ensin escluir el tiempu de la dictadura franquista. Los diversos capítulos nos que s’organiza ‘Astures y Asturianos’ afonden n’asuntos como la intepretación profana de los afayos arqueolóxicos, l’entamu de los primeros movimientos ideolóxicos esencialistes, la presencia de lo hestórico na cultura y tradiciones populares o na cultura contemporánea al través de los nacionalismos, con espresiones artístiques d’ésitu masivu como la llamada música celta. El capítulu final trata d’un tema latente a lo llargo de tol estudiu la relación ente l’arqueoloxía y la sociedá. L’autor defende la implicación de los arqueólogos nel espardimientu de los sos conocimientos na sociedá col fin d’ufiertar ferramientes d’interpretación de fechos del pasáu, llendaos güei a la so mera condición mítica nel imaxinariu colectivu. Citando al sociólogu D.J. Haraway, Carlos Marín Suárez, pal que nun hai n’Asturies más celtes que los actuales, afirma: “La ciencia puede vese como la práctica de cuntar hestories y los fechos científicos como narraciones radicalmente hestóriques y continxententes, pero non toles narraciones seríen iguales. Un cientítificu nun ye más qu’un contador de cuentos. De lo que se trata, entós, ye de contar cuentos pensaos históricamente.” Más información 17 de marzu, 2005 0 FacebookTwitterPinterestEmail
Hestoria Un llibru recupera la propaganda socialista d’Andrés Saborit n’Asturies a primeros del sieglu XX by asturnet 21 de xineru, 2005 La memoria, renovada. La Fundación José Barreiro y la editora KRK presentaron ayeri la reedición del llibru ‘Asturias y sus hombres’, asoleyáu orixinalmente en Francia durante’l réxime franquista y agora a disposición del públicu con un aspectu actualizáu. La obra ye clave na investigación de la historia social d’Asturies nel sieglu XX. El volume, asoleyáu en Toulousse en 1964, espeya’l bayurosu llabor de propaganda de Saborit nel Principáu a lo llargo de les tre primeres décades del sieglu pasáu, nun momentu decisivu nel que les ideoloxíes revolucionaries d’izquierdes asentábense n’Asturies y el sistema políticu de la Restauración entró en decadencia, con una casi continua axitación social y una España cada vegada más polarizada. Según el secretariu de Política Municipal y Llibertaes Públiques del PSOE, l’uvieín Álvaro Cuesta, qu’intervino na presentación de la reedición, la obra de Saborit valdrá agora p’acercar la hestoria de la resistencia antifranquista a la mocedá asturiana y afondará na propuesta de sistema democráticu defendíu polos socialistes. Nel actu de presentación tuvieron presentes amás el presidente’l Centru Asturianu de Madrid, Cosme Sordo, y el presidente’l Conseyu de Comunidaes Asturianes, Manuel Fernández de la Cera, quienes saludaron la reedición de la obra d’Andrés Saborit y ficieron votos por que’l testu sirva p’acercase al primixeniu pensamientu progresista. 21 de xineru, 2005 0 FacebookTwitterPinterestEmail
Hestoria El ‘Foro Jovellanos’ reivindica nel so décimu aniversariu a José Miguel Caso y Francisco Carantoña by asturnet 7 de xineru, 2005 La Fundación ‘Foro Jovellanos’ recupera los pasos del estudiosu José Miguel Caso y el periodista Francisco Carantoña. La entidá xixonesa reivindica les figures de dos de los sos ex presidentes nel añu en que se cellebra’l décimu aniversariu del nacimientu de la Fundación. Una conferencia de la escritora Ángeles Caso y una ofrenda floral abren güei les conmemoraciones. La intervención de la periodista asturiana tendrá llugar a les 20 hores nel Muséu Casa Natal de Xovellanos, nel barriu de Cimavilla, y centraráse n’evocar la figura’l so propiu pa, José Miguel Caso, investigador del prócer illustráu xixonés y primer presidente’l ‘Foro Jovellanos’. Darréu de la conferencia, los miembros de la entidá desplazaránse al cercanu Campu Valdés pa depositar un ramu de flores énte’l bustu de Xovellanos. La reivindicación de los ex presidentes de la Fundación ‘Foro Jovellanos’ tendrá continuidá na figura’l segundu presidente de la entidá, el periodista gallegu y ex director del diariu ‘El Comercio’ Francisco Carantoña, quien según los responsables del ‘Foro’ tuvo siempre en Xovellanos la referencia hestórica de reflexón sobre la cotidianidá de la vida xixonesa. Asina lo avanzó esta mañana l’actual másimu responsable de la Fundación ‘Foro Jovellanos’, Jesús Menéndez, na emisora pública Radio 5, nel trescursu d’una entrevista na que precisó que la entidá xixonesa ultima una nueva publicación sobro l’illustráu y mantendrá un ritmu d’a lo menos una actividá por mes pa cellebrar los diez años de vida’l collectivu. El ‘Foro Jovellanos’ quedó constituyíu en Xixón el 6 d’agostu de 1995, siguiendo la güelga’l bicentenariu del Real Institutu Asturianu de Náutica y Mineraloxía fundáu por Gaspar Melchor de Xovellanos na ciudá y el 250 aniversariu de la nacencia l’illustráu. Amás de José Miguel Caso y Francisco Carantoña -dambos fallecíos- foron presidentes de la entidá Luis Adaro y Agustín Antuña. Web de la Fundación ‘Foro Jovellanos’ 7 de xineru, 2005 0 FacebookTwitterPinterestEmail
Hestoria Cangas abre’l 750 aniversariu de la so fundación cola edición d’un calendariu con semeyes d’época by asturnet 23 d'avientu, 2004 Semeyes pa illustrar siete sieglos y mediu d’hestoria. L’Ayuntamientu de Cangas del Narcea abre la conmemoración del 750 aniversariu de la fundación de la villa, que se cumple en 2005, cola edición d’un calendariu con imáxenes d’época tomaes nel conceyu. La Corporación del municipiu suroccidental busca una nueva imaxe corporativa con ocasión de la conmemoración. L’almanaque de paré, en papel estucáu y con lámines de quince por doce centímetros, inclúi semeyes orixinales d’ente 1889 y 1930, y ye’l regalu col que l’Ayuntamientu felicita les fiestes navidiegues y l’añu nuevu a los vecinos del conceyu, yá que ca ún d’ellos recibirá un exemplar de baldre nel so propiu domiciliu. El calendariu ábrese amás con una referencia hestórica al documentu col que’l rei Alfonso X fundó la villa asturiana nel añu 1255, la Carta Puebla, un testu cuyu orixinal nun se conserva pero que nel so momentu dio-y un puxu singular a la comarca al dotala de modernos preseos d’autonomía respecto al poder central, ente ellos l’autorización pa cellebrar un mercáu propiu. Nel 750 aniversariu de la so nacencia como tala, Cangas del Narcea quier amás modernizar la so imaxe corporativa. Pa ello, l’Ayuntamientu busca una marca o logotipu que identifique a la Corporación nos sos servicios al ciudadanu y na promoción esterior del municipiu, dientro d’una redefinición xeneral de la identidá gráfica del conceyu. 23 d'avientu, 2004 0 FacebookTwitterPinterestEmail
Hestoria Bustiello recupera la memoria minera de la cuenca’l ríu Ayer con una esposición de semeyes antigües by asturnet 6 d'avientu, 2004 Alcordances en blancu y negru. El centru d’interpretación del pobláu mineru de Bustiello, na llende de los conceyos de Mieres y Ayer, rescata nes sos parés la memoria de la minería de la comarca al traviés d’una esposición de semeyes d’época que retraten a emplegaos y responsables de la Sociedá Hullera Española, empresa paradigmática del paternalismu industrial y clave na industrialización de la cuenca’l ríu Ayer. Les imáxenes agora a la vista’l públicu nel pobláu de Bustiello, allugáu ente’l calce’l ríu y la nueva carretera d’accesu a Morea dende Santa Cruz de Mieres, son frutu del atropamientu entamáu pola empresa catalana Història Viva, que xestiona’l patrimoniu industrial del pobláu con una concesión municipal y que, por iniciativa propia, decidió señalizar tamién en llingua asturiana toles instalaciones qu’amuesa a los visitantes en Bustiello. Fundáu a finales del sieglu XIX pol segundu marqués de Comillas, l’industrial y ferviente católicu Claudio López Bru, el pobláu mineru de Bustiello foi concebíu p’agospiar a obreros que se consideraben modélicos por amosar una conducta acordies col códigu moral del cristianismu de la época. Por mor d’esi singular orixe, y dotáu con ilesia, escueles y sanatoriu propios, el núcleu mineru convirtióse nun destacáu campu d’ensayu del sistema de relaciones llaborales propuestu poles xerarquíes católiques nel cambiu de sieglos pa evitar l’espoxigue de les ideoloxíes entós llamaes revolucionaries, sobre toes elles el socialismu. Web del centru d’interpretación de Bustiello 6 d'avientu, 2004 0 FacebookTwitterPinterestEmail
Hestoria Trescientes imáxenes y documentos recuperen en Xixón la hestoria de los ‘neños de la guerra’ by asturnet 24 de payares, 2004 Un traxe de milicianu infantil, fragmentos de bombes cayíes sobro Guernica, una aguya de teyer fecha con allambre de campu concentración. La esposición ‘El exilio de los niños’, que güei abre les sos puertes en Xixón, reconstruye la hestoria de la emigración forzosa de miles de neños na Guerra Civil española con trescientes imáxenes inédites y documentos de la época. Con materiales atropaos en casi dos decenes d’archivos y fondos documentales d’Europa y México, l’amuesa quier revivir la hestoria collectiva del exiliu infantil -del que’l puertu d’El Musel fue ún de los puntos de partida- dándo-y un protagonismu especial a les imáxenes, ente les que se cuenten una fotografía de Robert Capa (‘Neña sobre maletes’) y pieces de corresponsales fotográficos qu’informaron sobro la Guerra Civil con un güeyu especial nos neños como víctimes de la engarradiella. Amás, la esposición allugada nel Centru de Cultura Antiguu Institutu pon énte la mirada del públicu, ente otros oxetos, cartes, xuguetes, un par de zapatos colos qu’un cíu cruzó la llende de Francia, una pistola de maera, un mural fechu por escolinos de Guernica y una escenografía emprestada pol Centru Dramáticu Nacional, emplegada nun montaxe de Max Aub. L’amuesa, entamada en comuña poles Fundaciones Francisco ‘Largo-Caballero’ y ‘Pablo Iglesias’ con un llabor d’investigación y busca de fondos que se prollongó un añu y mediu, aporta a Asturies procedente de Valencia y depués de recorrer otres cinco ciudaes españoles, la más cercana d’elles al Principáu, Bilbao. La esposición permanecerá abierta nel Antiguu Institutu de Xixón hasta’l 9 de xineru de 2005, n’horariu de 10 a 14 y de 18 a 21 nos díes llaborables y namás na franxa mañaniega nel casu de los domingos. 24 de payares, 2004 0 FacebookTwitterPinterestEmail
Hestoria Un trabayu analiza les relaciones ente’l movimientu obreru y la llingua asturiana by asturnet 30 d'ochobre, 2004 El movimientu obreru asturianu nun foi ayenu a la realidá llingüística y cultural del país onde desenvolvía la so llucha pola emancipación de los trabayadores. Esta ye la principal conclusión a la que llega l’hestoriador Rafael Rodríguez Valdés nun trabayu nel qu’analiza la presencia de la llingua asturiana nes publicaciones y actos de les organizaciones d’izquierdes y el mesmu usu oral que se facía de la llingua nun contestu social predominantemente asturfalante. L’estudiu publicáu dientro la colección ‘Folletos de Historia’ del Atenéu Obreru de Xixón lleva’l títulu de ‘Llingua asturiana y movimientu obreru’. Nél investígase la presencia del asturianu nun periodu clave pa la formación y espardimientu de les organizaciones d’izquierdes, el comprendíu ente 1899, tres la perda de les colonies españoles n’Ultramar, y 1937, fecha de la caída del frente republicanu n’Asturies.La intención al entamar esti estudiu -declaró’l so autor na presentación de la obra esti viernes 29 en Xixón- foi la de “desmontar dellos mitos que veníen circulando alrodiu de la escasa, cuando non nula, vinculación de la izquierda hestórica d’Asturies cola llingua y la realidá cultural del país”. N’opinión de Rodriguez Valdes a estos prexuicios tienen contribuío sobremanera “tanto los propios hestoriadores como alcuando posiciones ideolóxiques interesaes” de l’Asturies actual. Del resultáu d’esta busca l’hestoriador xixonés atopó una resaltable presencia de la llingua tanto en publicaciones y panfletos de les organizaciones d’izquierdes, como sobremanera na prensa de la dómina que “cuasi siempre espeya a los dirixentes y militantes obreros falando n’asturianu”, l’idioma que según l’autor d’esti trabayu “emplegaben esos homes na so vida cotidiana y por supuesto al dirixise públicamente a una xente predominantemente asturfalante”. Ente los afayos resaltables d’esta investigación Rafael Rodríguez Valdés fizo mención de les versiones alcontraes de La Internacional y otros himnos revolucionarios n’asturianu. El folletu “Llingua asturiana y movimientu obreru” forma parte d’un trabayu d’investigación en marcha del hestoriador xixonés y presentóse nos locales de la entidá editora del mesmu, l’Atenéu Obreru de Xixón esti viernes 29. Unos díes enantes Rodríguez Valdés ufiertara un adelantru del conteníu del so trabayu nel marcu de les Xornaes Internacionales d’Estudiu de l’Academia de la Llingua Asturiana celebraes na facultá de Filoloxía d’Uviéu. 30 d'ochobre, 2004 0 FacebookTwitterPinterestEmail
Hestoria La Fundación Bueno presenta Uviéu como berciu de la hispanidá nel bicentenariu de 1808 by asturnet 18 d'ochobre, 2004 La conmemoranza del doscientos aniversariu del llevantamientu de la Xunta Xeneral d’Asturies contra la invasión napoleónica va ser una vindicación d’Uviéu como ‘cuna de la hispanidá’ y ‘la ciudá más hestórica d’España’, según los deseos de la Fundación Gustavo Bueno, encamentada directamente pol equipu de gobiernu de la ciudá pa dirixir el proyectu. La institución quier facer un percorríu hestóricu dica los oríxenes de la vieya capital del reinu d’Asturies embaxo’l títulu: ‘Oviedo doce siglos’. Responsables de la fundación que preside’l fíu del filósofu Gustavo Bueno piden una cantidá d’alrodiu 160.000 euros pa entamar el proyectu. L’encamientu a la institución privada uvieína pa diseñar y coordinar el plan director de les conmemoraciones de 2008 ye una iniciativa directa del conceyal de Cultura Alfonso Román López, refrendáu pol vistu bonu del alcalde Gabino de Lorenzo. Dende qu’esti encargu se fexo efectivu la Fundación Gustavo Bueno trabayó na elaboración d’un proyectu que tenta presentar a Uviéu como ‘la ciudá más hestórica d’España’ y ‘berciu de la Hispanidá’, al través d’una amplia serie d’actividaes qu’incluin esposiciones, seminarios, conferencies, conceyos d’especialistes y diverses ediciones documentales y divulgatives. La información qu’alrodiu del proyectu ‘Oviedo doce siglos’ na páxina web de la institución que preside Gustavo Bueno Sánchez amuesa un curiosu baturiciu d’opiniones de calter políticu, con resaltables emponderances a la figura del alcalde de Lorenzo y descalificaciones, mesmo personales, a políticos de la isquierda asturiana, incluíu l’actual delegáu del gobiernu Antonio Trevín. A propósitu de los conteníos y desenvolvimientu del plan director la páxina de la Fundación remite a noticies apaecíes en prensa. La conocencia nel so día del encargu directu de la celebración a la institución privada uvieína algamó reacciones polémiques de distintos sectores políticos y académicos. Ente los fines de la Fundación Gustavo Bueno tán, según los sos estatutos, promover “el cultivu de la filosofía” entendida como “un saber que namás alcuentra alimentu nel análisis de los saberes científicos (sobremanera nel nuestru casu, de calter biolóxicu-médicu, como los que tengan relación cola Hestoria de les Ciencies), polítiques, culturales en xeneral”.Como vínculu con estos fines de la fundación, el proyectu plantégase col sotítulu de “Filosofía, teología, metafísica y política ante Oviedo 2008”. 18 d'ochobre, 2004 0 FacebookTwitterPinterestEmail
Hestoria L’aniversariu d’0chobre del 34 recupera la memoria hestórica de los represaliaos del franquismu by asturnet 5 d'ochobre, 2004 La Fundación Juan Muñiz Zapico de CCOO súmase a los actos en remembranza da la revolución d’Ochobre del 34 cola esposición ‘Sueño de libertad’, una amuesa que fai un percorríu hestóricu dende la guerra civil hasta la transición al través de la esperiencia vital de los presos y represaliaos pol réxime franquista. Con esta esposición tenta recuperase la memoria de les víctimes de la dictadura y difundila ente les xeneraciones nueves. L’amuesa entamada pola Asociación d’ex Presos y Represalios Políticos Antifranquistes traza una recordanza de la llucha pola llibertá de cientos d’homes y muyeres persiguíos polos vencedores de la guerra civil hasta’l fin mesmu del réxime de Franco. Los empiezos de la represión, la vida cotidiana nes cárceles, el trabayu clandestín de los represaliaos o los apoyos de solidaridá recibíos dende l’esterior son los exes pelos que s’encadarma la esposición El fin de l’amuesa, en palabres del director de la Fundación Juan Muñiz Zapico, Benjamín Gutiérrez “quier presentar per un llau la llucha y el sufrimientu d’aquellos homes y muyeres, al empar de recordar la solidaridá que foi quien a despertar en tol mundu”. Na opinión del coordinador de l’amuesa n’Asturies la recuperación de la memoria hestórica d’esi tiempu “sigue siendo insuficiente al pesar de tolo que se fizo hasta agora y va selo siempre porque’l drama d’esos lluchadores nunca va poder ser lo bastante pagu con nengún reconocimientu”. Inda asina Gutiérrez considera necesario contribuir con iniciatives como esta a devolve-yos la dignidá a les víctimes del franquismu y reconocer el so papel fundamental na llucha pol remanecer de les llibertaes. La esposición recueye fotografíes, documentos, prensa, poemes y cartes de los propios presos, asina como oxetos cotidianos de la vida carcelaria, un material qu’apurrieron los propios protagonistes de la represión al través de l’Asociación d’Ex Presos y Represaliaos Políticos Antifranquistes. Pal director de la Fundación Juan Muñiz Zapico los actos del aniversariu de la revolución son un marcu afayadizu pa presentar esta amuesa, dao que “munchos de los represaliaos tres la guerra civil participaron nel movimientu revolucionariu y n’entrambes ocasiones la so llucha foi pola llibertá y pola defensa de la clas trabayadora”. Los mesmos actos y la esposición xúnense, a xuiciu de Benjamín Gutiérrez, “pol filu común de que son entamos de rescatar la dignidá de tolos que llucharon poles llibertaes nesti país, munchos d’ellos tovía vivos pa recordanos a toos la delda que tenemos col so llabor”. ‘Sueño de libertad’ va poder visitase hasta’l 15 d’ochobre na Casa Cultura de Riañu, Llangréu y del 18 al 29 d’ochobre na Casa Duró de Mieres. 5 d'ochobre, 2004 0 FacebookTwitterPinterestEmail