Comunicación La mitá de los xixoneses considera escasa la presencia del idioma nos medios de comunicación by asturnet 10 de xineru, 2006 La mitá de los encuestaos nel estudiu del equipu Euskobarómetro considera que la presencia del asturiano nos medios de comuniciación ye escasa o insuficiente. Asina un 49% considera que l’usu de la llingua ye escasu na radio y un 50,8 na televisión; un 46,7 por cientu cuida que ye insuficiente l’asturianu nos periódicos. Tocante a la ufierta de medios dixitales editaos esclusivamente en llingua asturiana namás un 8% cientu de los encuestaos afirma conocelos y un 5% usalos. Ente los medios que se citen nel estudiu ta Asturnews, qu’afirmen conocer y utilizar el 0,5 de los encuestaos. Respective al usu del asturianu na web oficial del Ayuntamientu de Xixón, un 43 % considera que nun ye abondo. 10 de xineru, 2006 0 FacebookTwitterPinterestEmail
Comunicación La Fundación Príncipe d’Asturies abre’l plazu pa presentar candidatures a los Premios by asturnet 9 de xineru, 2006 La Fundación Príncipe d’Asturies acaba d’abrir el plazu de presentación de candidatures a los premios que lleven el so nome y qu’esti añu cumplen la so vixesimosesta edición. Miles de folletos tán distribuyéndose per tol mundu pa que la información sobre les propuestes de candidatos llegue a los más llugares posibles. La convocatoria pa presentar candidatures a los galardones de la FPA tien la so fecha llende el 15 de marzu a nun ser pa les propuestes a los premios de Concordia y Deportes que fina el 28 de xunetu. Les candidatures pueden presentase na sé de la Fundación, por corréu postal, corréu electrónicu (info@fpa.es) o nes embaxaes o representaciones consulares españoles nel extranxero. Los Premios Príncipe d’Asturies son ocho: Comunicación y Humanidades, Artes, Lletres, Ciencias Sociales, Investigación Científica y Técnica, Cooperación Internacional, Deportes y Concordia. Según los Estatutos de la Fundación, tán destinaos “a galardonar el llabor científico, técnico, cultural, social y humano fecho por persones, equipos de trabayu o instituciones nel ámbitu internacional. Fundación Príncipe d’Asturies 9 de xineru, 2006 0 FacebookTwitterPinterestEmail
Comunicación RTPA va usar la señal y la producción de la TVG na tresmisión del Ferrol-Sporting by asturnet 3 de xineru, 2006 La primer retresmisión deportiva de la Radio Televisión del Principáu d’Asturies (RTPA) va utilizar la señal y la producción de la Televisión de Galicia (TVG) pa la difusión del partíu Rácing de Ferrol-Sporting de Xixón del prósimu sábadu 7 de xineru. El primer alcuentru televisáu con producción propio pola autonónica asturiana va ser al día siguiente dende l’estadiu Miramar de Lluanco cola emisión del partíu Marino-Durango. La RTPA va desplazar esti domingu 8 hasta la capital gozoniega el so primer equipu de retresmisiones deportives compuestu por una unidá móvil y seis cámares. Cola emisión d’estos dos alcuentros deportivos la televisión autonómica escomienza nel so periodu de prebes la programación de partíos d’equipos asturianos. El Sporting, el Marino y darréu el Real Uviéu, son los clubes colos que RTPA tien llegao a alcuerdos pa la emisión de los sos partíos. 3 de xineru, 2006 0 FacebookTwitterPinterestEmail
Comunicación RTPA estrena les sos tresmisiones deportives col partíu Sporting-Ferrol by asturnet 30 d'avientu, 2005 La Radiotelevisión del Principáu d’Asturies (RTPA)va estrenar les sos retresmisiones deportives nel so periodu de prebes col alcuentru que disputen el prósimu 7 de xineru el Sporting de Xixón y el Ferrol nel estadiu coruñés d’A Malata. Los siguientes partíos televisaos van ser el del Marino de Lluanco contra la Cultural de Durango esti 8 de xineru nel estadiu gozoniegu de Miramar y el del Real Uviéu contra l’Unión d’Irún el domingu 15 nel Carlos Tartiere. La televisión autonómica quier aprovechar el so periodu d’emisión en prebes p’amosar un adelantru de lo que van ser los conteníos de la futura programación de la canal pública asturiana una vez completaos los llabores técnicos pa la so rededifusión y axeitada la so parriella definitiva. El prósimu domingu 7 de xineru del nuevu añu va ser la estrena de les sos retresmisiones deportives cola difusión del partíu que van disputar el Sporting y el Ferrol nel estadiu d’esti últimu equipu. El Marino y el Real Uviéu van ser los siguientes equipos de fúbtol asturianos en ver emitíos los sos alcuentros cola Autonómica. L’ente públicu de comunicación del Principáu va tresmitir partíos, de mano, d’estos tres equipos, darréu del principiu d’ alcuerdu algamáu coles directives de les entidaes deportives pa la merca de los derechos d’emisión, un alcuerdu qu’inda nun ye definitivu nel casu del Real Uviéu y que nel casu del Sporting ta supeditáu a lo roblao pol equipu xixonés cola asociación audiovisual FORPA, cola que ya tien un alcuerdu asemeyáu al que tenta formular RTPA. L’únicu club al que-y paez prestar el contratu cola autonómica asturiana ye’l Real Marino de Lluanco. El gabinete de prensa del canal televisiva al dar a conocer la estrena de les retresmisiones deportives nel periodu de prebes nun aclarió si se contempla nelles la locución n’otra llingua que nun sea’l castellano. 30 d'avientu, 2005 0 FacebookTwitterPinterestEmail
Comunicación El Centru Asturianu concede los sos Urogallos del 2005 by asturnet 26 d'avientu, 2005 El Centru Asturianu de Madrid fizo públicos los nomes de los personaxes y colectivos que reciben esti añu los sos Urogallos de Bronce. Ente los distinguíos resalten l’académicu Xosé Bolado nel apartáu de llingua asturiana y el cuentacuentos Milio’l del Nido como personaxe más popular. El teólogu José María Díez Alegría y el gastrónomu José Antonio Fidalgo reciben Urogallos especiales poles sos respectives trayectories humanes. Los otros galardonaos son: n’artesanía, el constructor y restaurador d’horros Abel Llosa; en baile tradicional el grupu Escarpinos; Salvador Vázquez Sánchez, en tonada; Oscar Fernández, na categoría de gaiteru solista; el restaurante Casa Emburria de Tineo en gastronomía; en defensa de la natura, el Parque de Redes y el Muséu de la Madera; por último, en fiestes populares, los Güevos Pintos de La Pola Siero. El Centru Asturianu de la capital del estáu concede tamién los Urogallos especiales que nesti añu 2005 correspuenden al músicu Pedro Pangua; al conductor del programa “Bravo asturianísimo”, Gonzalo Mieres; a los restauradores Josefa Suárez y Máximo Díaz de La Parra d’Avilés; y al monologuista José Manuel Reguero “El Maestru”. Los premios con Urogallos especiales y mención honorífica son el teólogu y xesuíta José María Díez Alegría, el gastrónomu José Antonio Fidalgo, l’inxenieru Avelino Suárez y la Hermandá La Probe de Morcín. 26 d'avientu, 2005 0 FacebookTwitterPinterestEmail
Comunicación Industria reconoz que la TVG llega hasta San Xuan de Nieva by asturnet 26 d'avientu, 2005 La Xefatura Provincial de la Inspección de Telecomunicaciones n’Uviéu del ministeriu d’Industria reconoz nun escritu unviáu a Andecha Astur que les emisiones de la televisión autonómica de Galicia lleguen hasta San Xuan de Nieva. El organismu oficial respuende a la denuncia fecha pola formación política asturiana remitiendo ésta a Madrid pa qu’investigue la posible irregularidá de les emisiones de la TVG. L’escritu de la delegación de Telecomunicaciones reconoz qu’esistieron va años repetidores de l’Autonómica gallega nes prosimidaes de Xixón y Avilés por mor de la celebración de dellos alcuentros deportivos y a cuenta d’un conveniu con TVE. Al empar Industria afirma qu’anguaño nun hai nengún repetidor instaláu en territoriu asturianu polo que remite a Andecha a presentar la denuncia na sé central del ministeriu en Madrid. Nes midiciones feches pola Inspección por solicitú d’Andecha Astur l’organismu oficial reconoz que les emisiones de la TVG lleguen hasta San Xuan de Nieva y que l’orixe d’estes emisiones ye’l repetidor instaláu pol ente de comunicación de la comunidá vecina en Ribadeo, na llende con Asturies. La delegación del ministeriu n’Asturies insta a qu’Andecha pida a la sé central d’Industria en Madrid pa que s’averigüe si esti algame de les emisiones supón dalguna irregularidá acordies cola lexislación vixente. 26 d'avientu, 2005 0 FacebookTwitterPinterestEmail
Comunicación El PP anuncia la so intención de sentar nel Conseyu d’Aministración de la tele autonómica by asturnet 23 d'avientu, 2005 El diputáu del Partido Popular (PP) Fernando Goñi anunció esti xueves 22 la intención del so grupu de sentar nel Conseyu d’Administración del Ente Públicu de Comunicación del Principáu a los seis representantes qu’hasta agora renunciaran a participar. El cambiu d’idea vien motiváu, según declaró’l parlamentariu del PP, pol enfotu de los populares en “fiscalizar dende dientro” a la televisión autonómica. Los seis representantes del PP nel Conseyu d’Aministración de RTPA van empezar a asistir a les reuniones col oxetivu d’acceder a información sobre l’Ente que, según afirmó Goñi, hasta agora nun disponíen al través de la Xunta Xeneral. Dende la creación del Conseyu d’Aministración de la radiotelevisión del Principáu los representantes del Partido Popular refugaron participar dende los seis puestos que-yos asignara la Xunta Xeneral. De magar los populares denunciaran repetidamente nel parlamentu asturianu falta d’información de los responsables del Ente. Tener accesu directu a esta información ye’l principal motivu esgrimíu por Fernando Goñi pa desplicar el cambiu de decisión del PP. 23 d'avientu, 2005 0 FacebookTwitterPinterestEmail
ConvocatoriesFiestes Caltiense abiertu el plazu pa los concursos de creación ya investigación de l’Academia by asturnet 22 d'avientu, 2005 L’Academia de la Llingua Asturiana caltién abiertu hasta’l prósimu 15 de xineru de 2006 el plazu d’acoyida d’orixinales pa los diversos concursos de creación ya investigación que convocó en mayu d’esti añu. El meyor dotáu económicamente ye’l premiu de cortometraxes, con 1.200 euros. Los trabayos ganadores d’otres categoríes van recibir diverses compenses económiques amás de la posibilidá de publicación. Na estaya d’investigación tán convocaos un concursu de recoyida de material toponímico oral, ensin asoleyar, quabarque la totalidá duna parroquia, grupu de parroquies o Conceyu, siguiendol modelu afitáu na coleición «Toponimia» asoleyada pola Academia y otru pa recoyida oral de léxicu asturianu ensin asoleyar, dotaos entrambos con 600 euros.Dotáu cola mesma cantidá hai otru premiu pa trabayos dinvestigación llingüística ensin asoleyar que tenga aspeutos llingüísticos o sociollingüísticos dAsturies como oxetu destudiu, dende una perspeutiva sincrónica o diacrónica. El trabayu pue cincar aspeutos xenerales o específicos. Tamién un trabayu dinvestigación sobre lliteratura asturiana (oral o escrita). Tocante a la estaya lliteraria tán dientro la convocatoria fecha pola Academia en mayu de 2005 les categoríes de Llectures pa rapazos, Teatru, Creación Lliteraria ‘Llorenzo Novo Mier’, Recoyida de Material Lliterario Escrito ‘Federico Fierro-Botas’ y Recoyida de Material Lliterario Oral, toos ellos dotaos con 600 euros, a nun ser el premiu de recoyida de material oral que lo ta con 300. El premiu de curtios cinematográficos ta dotáu con 1.200 euros y empobínase a trabayos presentaos en formatu DVD que qua xuiciu del xuráu tenga más valir llingüísticu, teniendo siempre en cuenta, amás la calidá artística de los cortometraxes presentaos. Les bases completes de la convocatoria del 04/05/05 pueden consultase na páxina institucional de l’Academia de la Llingua. Bases de los concursos de l’Academia de la Llingua 2006 22 d'avientu, 2005 0 FacebookTwitterPinterestEmail
Comunicación El Conceyu de Llangréu organiza un seminariu sobre información y comunicación by asturnet 22 d'avientu, 2005 Llangréu va acoyer esti viernes 23 un seminariu sobre información local y comunicación organizáu pol Ayuntamientu y nel que van participar destacaos especialistes universitarios xunta diversos profesionales de los medios. El director d’Asturnews, Próspero Morán; Bernardo Díaz-Nosty, presidente del Conseyu Asesor de RTPA o el responsable de la web Informativos Telecinco, Ignacio Escobar, son dellos de los ponentes. El papel que xuega la información local nel actual panorama mediáticu ye l’asuntu sobre’l que va debatise nesti seminariu alrodiu de la trescendencia ya importancia d’esti tipu de información especializada nes tendencies informatives d’anguañu. Amás de los ya citaos especialistes van participar nel alcuentru: Emilio Martinez Peña, profesor de la Universidá Autónoma de Barcelona; María José Cantalapiedra, de la Universidá del País Vascu; Leire Iturregi, periodista de la Cadena SER; Íñigo Kortabitarte, director de Dixital Vasca; Enrique Bueres, responsable de programación cinematográfica de Sogecable y los redactores de TVE José Manuel Patterson y Mario Bango. El seminariu escomienza a les 10 de la mañana d’esti viernes 23 y va siguir hasta les 15.00 hores en xornada matinal y de 17.00 a 19.00 hores na Casa de Cultura de La Felguera. La inscripción y la entrada al seminariu son llibres. 22 d'avientu, 2005 0 FacebookTwitterPinterestEmail
Comunicación La televisión autonómica escomienza les sos emisiones en prebes by asturnet 21 d'avientu, 2005 La primer emisión de la Radiotelevisión del Principáu d’Asturies (RTPA) entamó esti martes 20 dende’l Parque Tecnolóxicu Científicu de Xixón con un programa en directu nel que’l másimu responsable del Ente José Ramón Pérez Ornia espunxo les llinies maestres del proyectu audiovisual del gobiernu de Vicente Álvarez Areces. Una versión eléctrica del ‘Asturies patria querida’ animó les primeres imáxenes de l’Autonómica. L’aparición del logo de la nueva empresa de comunicación y la versión del himnu d’Asturies fecha por músicos del país, ente ellos Jorge ‘Ilegal’ Martínez, Ígor Pascual, Los Berrones o Stoormy Mondays, abrió la primer emisión de la RTPA. Darréu les cámares de la nueva canal retrasmitieron l’actu de presentación coles intervenciones del presidente del Conseyu d’Administración del Ente, José Ramón Pérez Ornia, el presidente del Principáu, Vicente Álvarez Areces y la conseyera de Cultura, Ana Rosa Migoya. La emisión d’un documental elaboráu por TVE y tituláu “Crónica de un siglo” y diversos conteníos sobre gastronomía y otres amueses de cultura popular centraron les primeres dos hores de programación de l’autonómica. Dende esti martes van siguir les emisiones en prebes toles nueches de nueve a once hasta la puesta en marcha de la programación formal prevista pa la primavera del añu qu’entra. 21 d'avientu, 2005 0 FacebookTwitterPinterestEmail