Hestoria Homenaxe en Xixón a los españoles deportaos en Mauthausen by asturnet 11 de mayu, 2006 Güei, l’Ateneu Obreru de Xixón va ufiertar una conferencia a les ocho la tarde n’homenaxe a los españoles deportaos nos campos de concentración nazis. Nel actu van intervinir Silvia Cueto, presidenta de l’Asociación de familiares de deportaos españoles en Mauthausen residentes n’Austria, y Angelita Andrada, representante n’Asturies d’AMICAL Mauthausen. El 5 de mayu de 1945, cuando les tropes aliaes llegaben al Campu de Concentración de Mauthausen, foron recibíes con una pancarta en castellán que dicía: ‘Los españoles antifascistas saludan a las fuerzas aliadas de liberación’. Coincidiendo col aniversariu de la lliberación d’esti campu de concentración, el domingu 7 de mayu van cellebrase una serie d’actos oficiales n’Austria, nos que va tar presente una delegación asturiana, integrada por una representación social y otra institucional del Principáu d’Asturies. Y nesti marcu l’Ateneu Obreru de Xixón quier sumase a la conmemoración de la efemeride, cola organización d’esti homenaxe nel que se van espresar testimonios directos de los asturianos que vivieron esa situación. El sábadu 13 de mayu, a les doce y media la mañana, va facese una ofrenda floral ente’l monumentu llevantáu pola Xunta Xeneral del Principáu y los Ayuntamientos asturianos, n’Homenaxe a los Republicanos Deportaos nos Campos de Concentración y Esterminiu Nazis. La ofrenda va tener llugar na Sienda del Cervigón, en Xixón. 11 de mayu, 2006 0 FacebookTwitterPinterestEmail
Hestoria Trabau, tierra de cunqueiros, tamién tien el so rincón na internet by asturnet 18 d'abril, 2006 El pueblu de Trabau, na parte de Degaña, ye tierra de tixileiros y cunqueiros, un antiguu oficiu que llucha escontra l’olvidu y que, faciendose a los tiempos modernos, agora ta a la mano de los irternautes al travies d’una web na que se puede conocer dende’l llabor d’estos artesanos, como tola cultura tradicional de la zona, qu’abarca dende la fabricación de mantegues a los trabayos de los ferreiros. Col envís d’amosar non solo l’artesanía del occidente asturianu, sinón los materiales, los procesos de fabricación y la localización de los diferentes artesanos que siguen trabayando anguaño, El rincón cunqueiru trabayó nuna completa páxina web na que puen apreciase dende les famoses semeyes feches pol etnógrafu Fritz Krüger, conocese les diferentes ferramientes coles que se vivía na epoca, asina como los procesos de fabricación de les mesmes. Alimentación, vistimenta o fiestes, son otros de los temes que recueye esta páxina web qu’allega’l mundu tradicional asturianu a los tiempos futuros. El Rincón Cunqueiru 18 d'abril, 2006 0 FacebookTwitterPinterestEmail
Hestoria Teoría y historia de los nacionalismos na Universidá d’Uviéu by asturnet 4 d'abril, 2006 La Universidá d’Uvieu acueye esta selmana les V Xornaes d’Historia Contemporanea, organizaes pol Conceyu de Xóvenes Historiadores, y que nesta edición tán dedicaes monográficamente al analís y debate de los nacionalismos. Esta tarde el profesor de filosofía de derecho, Xacobe Bastida y l’historiador, Fernando Wulff van debatir sobre “España: ¿realidad o mito?”, reflexonando sobre la complexa construcción nacional d’España. Valentín Burgos, Iñaqui Gutierrez de Terán y Carlos Taibo son dalgunos de los ponentes d’esti seminariu que termina’l prósimu día 6 d’abril. “¿Es una nación una patata?”, ye la conferencia cola que Fernando Wullf abre la mañana del miercoles, a les doce y media, proponiendo un nuevu internacionalismu ensin naciones. A les siete y media de la tarde, Valentín Burgos presentará “De los zares a los soviets: nacionalismu y islamismu na antigua Unión Sovietica”. El xueves 6 d’abril, Iñaqui Gutierrez de Terán analizará a les doce y media l’espoxigue y la caída del nacionalismu árabe, mentes que Carlos Taibo dará una comunicación a les siete y media sobre l’españíu nacionalista n’Europa del Este. 4 d'abril, 2006 0 FacebookTwitterPinterestEmail
Hestoria Los carlistes asturianos rinden homenaxe a Xuan María Acebal by asturnet 31 de marzu, 2006 Les Xuventúes Carlistes d’Asturies entamen esti sábadu 1 d’abril un homenaxe al poeta Xuan María Acebal énte la so tumba nel cementeriu de San Salvador d’Uviéu. Javier Cubero, voceru del Partíu Carlista d’Asturies y l’académicu Lluis Xabel Álvarez, ‘Texuca’, van remembrar la figura y la obra del poeta en llingua asturiana, autor de ‘Cantar y más cantar’ y traductor d’Horacio al nuestru idioma. Xuan María Acebal (1815-1895) fue un destacáu militante carlista, una causa política pola que tuvo d’esiliase a Francia. Como escritor n’asturiano, amás de tornar delles odes horacianes en versiones que merecieron los emponderamientos ente otros del ortodoxu Menéndez y Pelayo, destacó pol procuru d’una llingua lliteraria basada nel estándar central y por ser el primer poeta en buscar les posibilidaes líriques del nuestru idioma. Enantes d’esti homenaxe de los carlistes asturianos la so tumba nel cementeriu uvieín de San Salvador recibió l’homenaxe de la tertulia Zimbru, un grupu d’escritores de la segunda xeneración del Surdimientu agrupaos alrodiu la revista del mesmu nome y ente los que taben Antón García, Xuan Bello, José Luis Piquero, Ramón Lluis Bande, Fonsu Martín y Pablo Antón Marín Estrada, ente otros. L’actu de les Xuventúes Carlistes escomienza a les 13,00 hores y amás de les intervenciones de Javier Cubero y Lluis Xabel Álvarez, va entamase una ufierta floral y el gaiteru Marcos Fernández aportará la solemnidá de la so música al homenaxe a Acebal, que dellos autores consideren el primer escritor modernu en llingua asturiana. 31 de marzu, 2006 0 FacebookTwitterPinterestEmail
Hestoria Los museos de Xixón esponen los sos fondos sobre la guerra civil n’Asturies by asturnet 31 de marzu, 2006 La rede municipal de museos de Xixón va entamar nos prósimos meses diverses esposiciones sobre la guerra civil n’Asturies con material de los fondos del propiu conceyu. El programa inclúi documentación, cartelería, obres artístiques y una parte del abondosu archivu gráficu que se guarda nos espacios museísticos xixoneses de fotógrafos como Constantino Suárez y Florentino López ‘Floro’. La iniciativa nomada “Asturias en guerra. La guerra civil en las colecciones municipales” va desarrollase nos museos del Ferrocarril, Piñole, Casa Natal de Xovellanos, Pueblu d’Asturies y Parque Natural Arqueolóxicu de la Campa de Torres. La primer esposición va inaugurase n’agostu nel Muséu Etnográficu Pueblu d’Asturies y va amosar documentación sobre la contienda bélica asina como una parte significativa de la crónica gráfica de la guerra civil de los fotógrafos Constantino Suárez y Florentino López ‘Floro’, el primeru dende’l llau republicanu y el segundu dende’l ‘nacional’. Darréu ente los meses de setiembre hasta avientu la Casa Natal de Xovellanos y el Muséu Piñole van acoyer l’amuesa “Testimonios desde la retaguardia” con pintures de Nicanor Piñole y Mariano Moré sobre la revolución del 34 y la guerra del 36, asina como fotografíes de Constanino Suárez. El Muséu del Ferrocarril, pel so llau, dende ochobre a avientu, va acoyer la esposición “El ferrocarril asturiano en la guerra” y el muséu del Parque Natural Arqueolóxicu de la Campa Torres, ente payares y avientu, l’amuesa titulada “La Campa durante la guerra”. 31 de marzu, 2006 0 FacebookTwitterPinterestEmail
Hestoria Les muyeres antifranquistes protagonicen la III Selmana Cultural Pasionaria de Llangréu by asturnet 29 de marzu, 2006 La III Selmana Cultural Dolores Ibárruri ‘Pasionaria’ de Llangréu escomienza esti miércoles 29 cola inauguración na Casa de Cultura de La Felguera d’una esposición sobre les muyeres militantes na llucha antifranquista. Un homenaxe a les represaliaes y asesinaes pola dictadura española, la presentación d’un documental y diveres charles-alderique van completar estes xornaes entamaes pola estaya local del PCA y la Fundación Muñiz Zapico. Los actos escomiencen el prósimu llunes 3 d’abril col coloquiu “La llucha de les muyeres: protagonistes invisibles”, presentada por Dolores González y na qu’intervienen Carmen Domingo, autora de los llibros “Con voz y voto” y “Nosotras también hicimos la guerra”; y Marisa Castro ex diputada d’Izquierda Unida. El xueves 6 de abril celébrase l’alderique tituláu “Histories lleíes. Relatos de muyer” y darréu va actuar el Coro Pasionata Langreana. La proyección del documental “Que mi nombre no se borre de la historia” centra l’actividá del viernes 7 d’abril, cola presencia de Javier Ruiz, secretariu de Memoria Histórica del PCE, xunto a Concha Carretero y Maruja Morrel, veteranes militantes comunistes qu’intervienen nel llargometraxe. El pieslle de la Selmana Cultural va ponese el sábau 8 d’abril con una concentración al meudía nel monolitu que recuerda a la Pasionaria en La Felguera y un actu políticu nel qu’intervienen dirixentes locales del PCA, xunta la diputada d’IX-BA Noemí Martín y el secretariu xeneral de PCE, Paco Frutos. Darréu va entamar un homenaxe a toles muyeres víctimes del franquismu y una corderada nel local del Partíu Comunista en El Carbayu, pondrá’l remate a esta tercer selmana cultural. 29 de marzu, 2006 0 FacebookTwitterPinterestEmail
Hestoria Xuan Cándano analiza la caída del Frente Norte na guerra civil by asturnet 20 de marzu, 2006 El periodista Xuan Cándano ta acabante publicar “El pacto de Santoña. La rendición del nacionalismo vasco al fascismo”, una investigación hestórica sobre la capitulación del gobiernu del lehendakari Aguirre énte l’avance del exércitu de Franco nel Frente Norte y que propició darréu la caída de Cantabria y Asturies. Cándano, redactor del centru territorial de RTVE n’Asturies, estudia los alcuerdos a los que llegaron les autoridaes nacionalistes vasques y les tropes italianes qu’encabezaben l’avanzada del exércitu rebelde español y tamién les consecuencies qu’esti pactu, nomáu de Santoña, tuvieron pa la situación del frente republicanu nel norte del Estáu y pal devenir mesmu de la contienda. Una de les conclusiones del trabayu fechu pol periodista asturianu ye que’l Pautu de Santoña “fue una traición y una rendición en toa regla” de los nacionalistes vascos y tamién que tuvo un efectu fatídicu pa emburriar la suerte de la guerra del llau franquista, tres la caída d’un frente fundamental como’l que representaba la mitá norte d’España. El llibru “El pacto de Santoña. La rendición del nacionalismo vasco al fascismo” ta publicáu por La Esfera de los Libros y va presentase nes prósimes selmanes n’Uviéu. 20 de marzu, 2006 0 FacebookTwitterPinterestEmail
Hestoria El Conseyu d’Europa apreba una condena internacional poles atrocidaes del franquismu by asturnet 18 de marzu, 2006 L’asamblea parlamentaria del Conseyu d’Europa aprebó esti viernes 17 una propuesta de condena internacional poles graves violaciones de los derechos humanos cometíes pola dictadura del xeneral Franco dende 1937 hasta la muerte del tiranu en 1975. La resolución, presentada pol diputáu socialista maltés Leo Brincat, propón el 18 de xunetu como día oficial de condena del franquismu y la reconversión del Vai de los Caídos nuna amuesa permanente d’esi periodu de terror na historia d’Europa. L’informe del diputáu socialista remembra que Franco llevó a cabu “una política de represión contra cualaquier individu susceptible de constituir una amenaza pal réximen”. Como consecuencia d’ello, “miles de republicanos fueron executaos sumariamente o enviaos a prixones, y otros munchos fueron sometíos a diverses formes de sanciones polítiques o económiques”. El documentu aprebáu por esti organismu parlamentariu del Conseyu d’Europa proponse al Gobiernu español que ponga en marcha “una comisión nacional d’investigación sobre les violaciones de Derechos Humanos cometiés embaxo’l réximen franquista” pa conseguir establecer “la verdá sobre la represión”. Amás, l’informe afala a les autoridades locales a erixir monumentos en memoria de les víctimes del réximen franquista nes principales ciudaes del estáu. 18 de marzu, 2006 0 FacebookTwitterPinterestEmail
Hestoria Gabriel Santullano estudia la prensa clandestina n’Asturies de la dictadura by asturnet 17 de marzu, 2006 L’hestoriador Gabriel Santullano ye l’autor del volume “La prensa clandestina en Asturias”, editáu pol sellu uvieín KRK embaxo l’agospiu de la Fundación Juan Muñiz Zapico. El llibru estudia les publicaciones de la resistencia antifranquista dende la entrada del exércitu rebelde na seronda de 1937 hasta la muerte del dictador en 1975. Santullano, especialista n’hestoria contemporánea y militante activu de la izquierda antifranquista nos años sesenta y setenta, presenta nesti estudiu un minuciosu trabayu d’investigación sobre la voz de los que nun teníen voz tres la derrota republicana y prosiguíen la so llucha al través del poder de la palabra. La obra de Gabriel Santullano va presentase en Xixón esti martes 21 nun actu nel Atenéu Obreru nel que l’autor va cuntar cola presentación del sindicalista de Comisiones Obreres Francisco Prado Alberdi. 17 de marzu, 2006 0 FacebookTwitterPinterestEmail
Hestoria El Congresu de Madrid alcuerda que 2006 sea Añu de la Memoria Hestórica by asturnet 8 de febreru, 2006 El Congresu de los Diputaos aprebó colos votos de tolos grupos parlamentarios, a nun ser el del PP, qu’esti añu 2006 tea dedicáu institucionalmente a la Memoria Hestórica y la reparación moral de les víctimes de la guerra civil y la dictadura de Franco. La propuesta, presentada por Izquierda Unida, quier aprovechar la conmemoranza del 75 aniversariu de la II República pa facer xusticia coles xeneraciones condenaes al escaezu. Na proposición aprebada pol Congresu reconozse al réxime proclamáu el 14 d’abril de 1931 como antecedente del actual periodu democráticu. Nesi sen, remémbrase que la Constitución republicana, aprobada fai 75 años fue la primera que reconoció el sufraxu universal -recoyendo el derecho a votu de les muyeres-, abordó l’afitamientu de los derechos sociales y económicos, poniendo les bases de los que güei conocemos como Estáu del bientar, y trató de solventar l’articulación territorial del estáu al través d’estatutos de autonomía. Cola iniciativa aprebada, qu’agora entama’l so trámite parlamentariu, el Congresu encamienta al Gobiernu a que promueva nesti añu, en colaboración coles comunidaes autónomes y conceyos, actos d’homenaxe a los que fueron víctimes de la Guerra Civil española y del franquismu. Esti reconocimientu va acompañase de la puesta en circulación de sellos y monedes en recordanza de les persones que defendieron “l’orden constitucional establecíu na II República” y padecieron la represión de los vencedores de la guerra española. 8 de febreru, 2006 0 FacebookTwitterPinterestEmail