ConvocatoriesFiestes El conceptu d’historia en Walter Benjamin centraliza’l Seminariu del Atenéu Obreru de Xixón by asturnet 25 de xineru, 2007 El vienres 26 de xinru, a partir de les 18.30 hores, y el sábadu 27, a partir de les 10, la Sala de Conferencies del Antiguu Institutu de Xixón acoyerá un Seminariu sobre’l conceptu d’historia desendolcáu por Walter Benjamin. Como ponente del Seminariu tará’l profesor Reyes Mate. El seminariu ta organizáu pol grupu Eluterio Quintanilla d’Educación Intercultural y l’Atenéu Obreru de Xixón. La figura de Walter Benjamin y el so estudiu de les Tesis de la Filosofía de la Historia, publicáu embaxo’l títulu “Medianoche en la Historia. Comentarios a las Tesis de Walter Benjamin”. Nesti seminariu yá tán apuntaes, pel momentu, alredor de cincuenta persones, con bien de profesores de Filosofía y Historia. Reyes Mate ye doctor pola Wilhemlms-Universität de Münster y pola Universidá Autónoma de Madrid. Ye profesor d’Investigaciones Científiques nel Institutu de Filosofía, del que fue miembru fundador y director dende 1990 hasta 1998. La so llinia d’investogación xira pel estudiu de les rellaciones ente la relixón y la política, y la preocupación pola relación ente verdá y historia del sofriemientu. Actualmente ye director del proyectu “Enciclopedia Ibero-Americana de Filosofía” y investigador principal del proyectu “Filosofía después del Holocausto”. L’asistencia al Seminariu ye de baldre, anque hai que facer primero la inscripción. Ésta puede facese na sede del Atenéu Obreru de Xixón, na cai Covadonga 7, primeru; o nel teléfonu 985340395. 25 de xineru, 2007 0 FacebookTwitterPinterestEmail
Música Les Bandes de Gaites Villa de Xixón y Corvera dAsturies, ganen el troféu a les meyores bandes foriates del Desfile de San Patriciu en Nueva York. by asturnet 25 de xineru, 2007 La Banda de Gaites Villa de Xixón y la Banda de Gaites de Corvera d’Asturies van recibir de manes del Conseyeru de Rellaciones Esteriores Francisco Javier García Valledor, los trofeos que les acrediten como les meyores bandes foriates del Desfile de San Patriciu en Nueva York onde actuaron xuntes. Na última Parada-Desfile parciparen más de 500 bandes de tolos Estaos Xuníos d’America, amás de bandes foriates d’Irlanda, Gales, Escocia, Canadá, Australia, Nueva Zelanda y Asturies. Los trofeos fueron concedíos pol Xuráu del Comite de la Parada de San Patricio de Nueva York y la entrega oficial va tener llugar nel salón d’actos del EASMU (c/Coronel Aranda nº 2, Uvieu) mañana vienres 26 de Xineru a les 19:30 hores. Nel actu van proyectase imáxenes del desfile y les bandas de gaites van tocar los temes qu’interpretaron nel eventu. Nel actu van tar presentes, tamien, el Director d’Emigración, Luís Miguel Fernández Romero y el Director Xeneral de Cultura, Carlos Madera. 25 de xineru, 2007 0 FacebookTwitterPinterestEmail
Sociedá La Xunta Executiva d’Andecha denuncia l’intentu de secuestru de la organización by asturnet 25 de xineru, 2007 La Xunta Executiva d’Andecha ta acabante emitir un comunicáu nel que denuncia qu’un grupu de militantes de la organización ingresó nel Rexistru de Partíos Políticos una Xunta Executiva diferente de la escoyida nel últimu conceyu nacional. Nel últimu conceyu nacional de la organización Germán Abad foi escoyíu como secretariu d’organización y Roberto Holgado como coordinador de la organización del partíu. Dende dalgunos sectores d’Andecha Astur se ta falando de la esistencia de dos Andeches y que los tribunales habrán decidir cuala ye la válida. La Xunta Executiva encabezada por Germán Abad na carta unviada a la militancia de la organización anunciaba de qu’un grupu de persones, encabezaes por Arturu Bermeyu ente la so incapacidá d’asumir el resultáu del conceyu nacional acababen d’inscrbir una nueva Xunta Executiva. Na carta considérase que l’actuación intenta “mediante’l golpismu, la imposición y la corrupción” apropiase del destín del partíu políticu. Dende la Xunta Executiva considérase qu’esti grupu aplica “métodos fascistes” amás de qu'”entienden la organización como un patrimoniu personal” y nun son capaces de “convivir nuna organización con pluralidá, discrepancia y democracia” El grupu encabezáu por Arturu Bermeyu, y nel que figuraríen persones como Marcos Abel Fernández Marqués o’l representante de Darréu, Mario Arbesú, rexistró un acta d’un conceyu nacional que se cellebrera’l 9 d’avientu, la mesma celebración del conceyu ponse en dulda dende la Xunta Executiva d’Abad. Dende la Xunta Executiva considérase qu’esiste una “falsificación” d’un documentu y qu’amás esta entregóse nel Rexistru de Partíos Políticos. Dende la Xunta Executiva de la organización d’izquierda nacionalista consideren que los movimientos tendríen por finxu “evitar qu’Andecha se presente a les prósimes elecciones”, asina mesmo la Xunta Executiva afirma que salió col 90% de los votos nel Conceyu Nacional fechu en Candás. La Xunta Nacional afítase como la escoyeta “democrática de les bases” contra “la imposición del grupu de Bermeyu”. La executiva pide que los militantes defiendan la organización de los ataques del fascismu y la corrupción”. 25 de xineru, 2007 0 FacebookTwitterPinterestEmail
Sociedá Izquierda Xunida reclama un plan de movilidá pal fomentu del usu del tren by asturnet 25 de xineru, 2007 El coordinador xeneral d’Izquierda Xunida d’Asturies, anunció ayeri la so apuesta pola redacción d’un plan de movilidá sostenible. Esti plan habría fomentar y potenciar l’usu del tren n’Asturies. Iglesias reclamó qu’el proyectu forme parte del Plan Estratéxicu d’Infrastuctures y Tresporte estatal. Jesús Iglesias reclamó que se treslladen a Asturies los conteníos del plan estratéxicu, que permitan meyorar les comunicaciones dientro del aria metropolitana del país. Pa ello Iglesias considera qu’el “ferrocarril ha ser un elementu central pa la articulación de los servicios intermodales de tresporte”. El coordinador de la coalición d’izquierdes pidió qu’Asturies nun quede fuera de les inversiones estatales que se tán desenvolviendo pa facilitar l’usu del tresporte públicu. Pela so parte Oscar Sainz, Secretariu Xeneral Estatal del Sector Ferroviariu, reconoció qu’el gobiernu asturiana taba en conversaciones con FEVE pa facer estudios sobre’l proyectu del tren-tran. El tren-tran ye un modelu intermediu ente’l tranvia urbanu y el tren de cercaníes. El proyectu del gobiernu asturianu ye facer una llinia d’esti tipu de ferrocarril que conecte les cuenques col centru d’Asturies. Esti proyectáu foi criticáu y rechazáu polos sindicatos UXT y CCOO que consideren que “nun resolverá los problemes de comunicación de la comarca minera”. 25 de xineru, 2007 0 FacebookTwitterPinterestEmail
Sociedá IAS critica la política de vivienda del Gobiernu Asturianu by asturnet 25 de xineru, 2007 Pa Inaciu Llope, candidatu nacional d’Izquierda Asturiana, les últimes declaraciones de Laura González, conseyera de Bienestar Social constitúin “una amuesa más de derechización de la coalición de gobiernu y psoeización d’Izquierda Xunida”. La Conseyera de Vivienda afirmaba ayer qu’el Gobiernu adoptaría medíes sancionadores contra los propietarios de viviendes vácies nel casu de que les ayudes de fomentu del alquiler nun funcionen. Dende Izquierda Asturiana consideren que la política de vivienda del gobiernu asturianu ye un “fracasu” y que nun se dan soluciones pal problema de les vivienes vacies. Estes viviendes seríen unes 76.000, constituyendo’l 14% del parque total de vivienda del país. Dende Izquierda Asturiana reclamen a la Conseyería polítiques “valientes” similares a les que se vienen desendolcando polos gobiernos d’Euskadi o Catalunya pa frenar la especualción y poner nel mercáu les viviendes vacies. Llope criticó que l’accesu a la vivienda se tea convirtiendo nun “lluxu asiáticu” nun contestu internacional onde se-y “tán tirando de les oreyes al gobiernu español polos precios de la vivienda”. L’exemplu de los últimos movimientos populares na República Francesa p’algamar qu’el derechu a la vivienda seya reconocíu como tal ye tomáu como modelu pol candidatu d’Izquierda Asturiana Inaciu Llope. Conseyería de Vivienda 25 de xineru, 2007 0 FacebookTwitterPinterestEmail
Sociedá La Universidá Popular amplia’l plazu d’inscripción pa los cursos d’asturianu by asturnet 25 de xineru, 2007 La Universidá Popular de Xixón amplia’l plazu d’inscripción, pa los cursos de llingua asturiana, hasta’l 2 de febreru, qu’inclúi el so programa. Los cursos, d’iniciación, afondamientu y traducción, tienen una duración de 60hores y un preciu de 23. A les y los escolinos qu’asistan al 80% de les hores daráse-yos un certificáu d’asistencia. El cursu d’iniciación fadráse n’horariu de mañana, ente les 10 y les 12, nel Antiguu Institutu Xovellanos tolos llunes y miércoles. Peles tardes, de los mesmos díes, esti cursu podrá facese n’horariu de 19.30 a 21.30 nel Centru Integráu de Pumarín Xixón Sur. El cursu d’afondamientu, Llingua Asturiana II, fadráse los martes y xueves nel Antiguu Institutu ente les 19.30 y les 21.30 tolos martes y xueves. El cursu de traducción fadráse tolos llunes y xueves nel Antiguu Institutu de 19.30 a 21.30. La matrícula nestos cursos puede facese na Rede de Caxeros Ciudadanos de Xixón o na web de la Universidá Popular. Cursos de la Universidá Popular 25 de xineru, 2007 0 FacebookTwitterPinterestEmail
Cooperación Xornaes sobre los Derechos Humanos nel Mediu Oriente by asturnet 24 de xineru, 2007 A partir del día 25 y hasta’l 27 de xineru Uviéu y Xixón acoyerán les Xornaes Internacionales sobre Derechos Humanos n’Oriente Mediu. L’obxetivu de les xornaes ye que dende’l debate xurídicu s’algame dar conocencia a la sociedá de la situación de privación de derechos que viven los pueblos de los países del mediu oriente ocupaos militarmente. Estes Xornaes Internacionales sobre los derechos humanos n’Oriente Mediu tienen como fin abordar dende una perspectiva plural la situación esistente nos países y pueblos d’Oriente Mediu sometíos a una ocupación militar (Iraq y Palestina). Con eso fin, aconceyarán xuristes, políticos, profesores y dirixentes sociales del Estáu español y d’otros estaos europeos; asina mesmo, cuntaráse cola presencia de representantes de colectivos y asociaciones de los países ocupaos. Los aspectos políticos y xurídicos que plantega l’actual situación del Oriente Mediu y la posición d’Europa frente a los conflictos esistentes nel aria; tamién se van revisar les diferentes violaciones a los derechos humanos de les poblaciones de los países ocupaos. Les xornaes tán organizaes pola asociación Jueces para la Democracia, la Conseyería de Xusticia y de la Unión Progresista de Fiscales Derechos Humanos n’Oriente Mediu 24 de xineru, 2007 0 FacebookTwitterPinterestEmail
Plástiques “Imaxe y Identidá”, diez visiones artísticques sobre l’home contemporáneu by asturnet 24 de xineru, 2007 La Obra Social de “La Caixa” y l’Ayuntamientu de Xixón presenten nel Antiguu Institutu Xovellanos una amuesa sobre la representación de la figura humana nel arte contemporáneu. La Obra Social de “La Caixa” en colaboración cola Fundación Municipal de Cultura de Xixón presenten una selección d’obres de la Colección d’Arte COntemporáneu de la Fundación “La Caixa” al rodiu del conceptu del retratu embaxo 15 semeyes y videointalaciones, una parte mínima de les 800 qu’integren los fondos de la colección d’arte contemporáneu de La Caixa. L’amuesa ye una galaería d’imáxenes creaes por diez artistes que tresformaren el tradicional xérneru del retratu dende puntos de vista bien diferentes. Christian Boltanski, Gillian Wearing, Cindy Sherman, Sam Taylor-Wood, Günther Forg, Craigie Horsfield, Óscar Muñoz, Bruce Nauman, Carlos Pazos y Stefan Hablutzel esploren los medios de representación y les convenciones culturalmente establecíes pa destacar que, a la fin, toda imaxe ye una ficción. L’amuesa aconceya, sobre too, fotografíes y videointalaciones que planteguen una reflexón sobre la natura mesma de la imaxe col obxetivu de romper les barreres que faen de llende ente’l públicu y la creación contemporánea y promover l’accesu de la sociedá al arte. 24 de xineru, 2007 0 FacebookTwitterPinterestEmail
Lliteratura El periodista y Premiu Príncipe d’Asturies Ryszard morrió ayeri by asturnet 24 de xineru, 2007 El destacáu escritor y reporteru polacu Ryszard Kapuscinski morrió’l martes, en Varsovia, a los 75 años. El sábadu pasáu sometiéronlu a una complicada operación. Kapuscinski alagamó’l Premiu Príncipe d’Asturies de Comunicación y Humanidaes en 2003. Taba consideráu como un de los mayores mayestros del periodismu modernu, asina como l’autor polacu más traducíu y publicáu fuera de Polonia. Kapuscinski entamó nel periodismu con 17 años nas revista “Güei y mañana”, pero la so carrera profesional desendolcóse na axencia PAP, na que trabayó como reporteru durante 30 años. Nesi tiempu fue testigu d’infinidá d’acotencimientos mundiales como los numerosos cambios políticos de países del Tercer Mundu, dende Angola hasta l’antiguu Zaire (República Democrática del Congo). Cubrió, tamién, la descolonización y posterior independencia de los países del Tercer mundu, asina como fechos históricos como la cayida de la democracia en Chile o la revolución iraní. Na so llarga carrera presenció 27 revoluciones, vivió 12 frentes de guerra y tuvo cuatro vegaes condenáu a morrer fusiláu. Na década de los 80 entamó a collaborar cola prensa occidental en medios como “The New York Times” o el “Frankfurter Allgemeine Zeitung”. Nesi periodu sedría cuando entamara’l so camín lliterariu mediante’l gran reportaxe. Anque la so primer obra lliteraria datara de 1962, “Bus po polsku”, nun sedría hasta la publicación de “El Emperador” en 1978, llibru sobre la cayida del tronu de Haile Selassie n’Etipopía cuando algamara’l reconocimientu internacional pola so faceta lliteraria. A esti títulu siguieron “El Sha o la desmesura del poder” (1987), “Lapidarium” (1990), “La guerra del fútbol y otros personaxes” (1992), “L’imperio” (1993), “Ébano” (1998), “Los cínicos nun valen pa esti oficiu” (2000), “Dende África” (2001), “Los cinco sentíos del periodista” (2003) y el llibro-taller de la Fundación pa un Nuevu Periodismu Llatinoamericanu (FNPI, 2004). La gran mayoría de les sos obres son una combinación de como la gran historia afecta a los indivíduos, dende un analís pormenorizáu de los fechos y reflexones. L’acta del xuráu que-y concediera’l Premiu Príncipe d’Asturies de Comunicación y Humanidaes destaca la “preocupación polos sectores más desfavorecíos y pola so independencia frente a presiones de tou signu, que trataren de tersiverxar el so mensaxe”. Nesa mesma acta reseñaba’l Xuráu que “nun se llimitó a describir esternamente los fechos sinos qu’indagó nes sos causes y analizando les repercusiones, sobre tou ente los más humildes, colos que se siente fondamente comprometíu”. 24 de xineru, 2007 0 FacebookTwitterPinterestEmail
Educación La Conseyería de Xusticia ufre tres beques de formación by asturnet 24 de xineru, 2007 La convocatoria d’estes tres beques respuende a la política de formación en materia de rellaciones internacionales y europees, que dende la Dirección Xeneral de Rellaciones Esteriores y Asuntos Europeos se vien desarrollando nos últimos años. Les beques tan empobinaes a los estudiantes d’últimu cursu de la Universidá d’Uviéu o del Centru Asociáu de la UNED n’Asturies que cursen les carreres de Derechu, Económiques, Polítiques, Socioloxía, Xeografía e Historia. La xera durante la duración de les beques va consistir na collaboración nel trabayu diariu que se fai na Dirección Xeneral de Rellaciones Esteriores y Asuntos Europeos. Durante diez meses los becarios van tener la oportunidad de trabayar na Dirección Xeneral de Rellaciones Esteriores del Principáu y recibir formación específica rellacionada col so puestu .Los beneficiarios de la beca van recibir una ayuda mensual de 400 euros o la cantidá correspondiente nel casu de que por dalgún motivu la duración de la beca fuese inferior. Todos aquellos estudiantes interesaos en optar a les beques deberán presentar la so solicitú conforme a los requerimientos publicaos nel Boletín Oficial del Principáu d’Asturies del 15 de xineru de 2007 nel Rexistru de la Conseyería de Xusticia, Seguridá Pública y Rellaciones Esteriores del Principáu d’Asturies (c/ Uría, 10, 8.ª planta, 33071 Uviéu) a l’atención del Ilmo. Sr. Conseyeru de Xusticia, Seguridá Pública y Rellaciones Esteriores del Principáu d’Asturiaes nel plazu de venti díes hábiles, contaos a partir del día siguiente a aquel nel que tenga llugar la publicación de la presente convocatoria nel BOPA. Procedimientu solicitú de les Beques de Formación 24 de xineru, 2007 0 FacebookTwitterPinterestEmail