ConvocatoriesFiestes La Unión Europea convoca un concursu pal logotipu de 50 aniversariu del Tratáu de Roma by asturnet 10 de xunetu, 2006 La Unión Europea invita a estudiantes y profesionales d’arte y diseñu a facer el logotipu de cumpleaños, que l’añu que vien va ser el símbolu oficial del 50 aniversariu de la firma del Tratáu de Roma. En 2007, la Comisión y les demás instituciones europes van gastar el logotipu ganador en tolos actos rellacionaos col 50 aniversariu. La fecha tope pa la entrega de trabayos ye’l 30 de Setiembre de 2006 y les decisiones finales van anunciase na ceremonia d’entrega de premios en Bruseles n’ochobre. La iniciativa, baxo l’eslogan “¡Feliz cumpleaños, Unión Europea!”, fue organizada pola Comisión Europea, el Parlamentu, el Conseyu, el Comite Económicu y Social y el Comite de Rexones y tien una dotación en premios de 6000 euros al meyor logotipu y 4000 y 2000 pal segundu y terceru respectivamente. Na seronda, los tres diseñadores premiaos van participar nuna ceremonia d’entrega de premios en Bruseles. Tán convidaos a participar nel concursu tolos estudiantes d’arte, diseñu gráficu, diseñu de comunicación, comunicación visual, diseñu de medios de comunicación o disciplines afines procedentes de los veinticinco Estaos miembros, asina como Bulgaria y Rumanía. Tamien los diseñadores profesionales que se graduaren en 2006. Los participantes van tener que facer un logotipu y, tamien, si quieren, un lema sobre la integración europea. El logu tien de facer referencia al 50 aniversariu del Tratáu de Roma y espeyar los llogros de la Unión Europea y el so futuru, quier dicise: que clas d’UE quieren pa les futures xeneraciones. El procesu de selección del ganador va tratar de dos etapes. En primer llugar, un grupu d’especialistes de renome internacional nel mundu del diseñu va esaminar toles propuestes y escoyer les diez más convincentes. A continuación, los tres meyores que pasaron la escoyeta van ser seleccionaos por un segundu tribunal compuestu por representantes de les distintes instituciones organizadores, y presidíu conxuntamente polos Vicepresidentes Margot Wallstön y Alejo Vidal-Quadras. La fecha tope pa la entrega de trabayos ye’l 30 de Setiembre de 2006 y les decisiones finales van anunciase na ceremonia d’entrega de premios en Bruseles n’Ochobre. Más información 10 de xunetu, 2006 0 FacebookTwitterPinterestEmail
ConvocatoriesFiestes Siero dedica los premios de les Fiestes del Carmín a la muyer y la so participación social by asturnet 3 de xunetu, 2006 La conceyalía de Bienestar Social y Polítiques d’Igualdá del conceyu de Sierto ta acabante de convocar los sos concursos de les Fiestes del Camen y el Carmín, dedicaos nesta edición a les muyeres y la so participación. Cola temática de la participación femenina n’ámbitos sociales, culturales, polítcos y económicos, el consistoriu sierense convoca la quinta edición del so concursu de fotografía y per primer vez establez una cateogoría d’audiovisuales, amás de dos premios de poesía y rellatos. En les distintes modalidaes, los premios van de los 450 euros pal ganador, asina como un accesit de 300 euros pa una obra esbillada ente les presentaes dende’l propiu conceyu. 3 de xunetu, 2006 0 FacebookTwitterPinterestEmail
Cooperación El Teatru Campoamor acueye una gala solidaria d’apoyu al pueblu saharaui by asturnet 28 de xunu, 2006 Tontxu, Javier Gurruchaga y Caco Senante son dalgunos de los artistes que van participar el prósimu día 8 de xunetu na primer gala de la solidaridá “Asturies col pueblu saharaui”, que va ser presentada por Marta Reyero, Pepe Colubi, Gonzalo Moure y Esther Canteli, nel Teatru Campoamor, a les siete la tarde. La gala ta organizada pola Asociación Asturiana d’Amigos del Pueblu Saharaui y la Delegación Saharaui p’Asturies en collaboración con distintes empreses, l’Ayuntamientu d’Uvieu y el Gobiernu del Principáu d’Asturies. La gala estará coordinada por Ignacio Gómez Sandoval. Cola recaudación de les entraes, que van costar 20 euros pa los adultos y seis pa los neños, van facese distintos proyectos nos campamentos de refuxaos de Tinduf 28 de xunu, 2006 0 FacebookTwitterPinterestEmail
Cooperación El secretariu xeneral de la Fundación Príncipe d’Asturies nomáu Caballeru de la Lexón d’Honor francesa by asturnet 20 de xunu, 2006 El Gobiernu frances ta acabante de nomar al secretariu xeneral de la Fundación Príncipe d’Asturies, Juan Luis Iglesias Prada (Sama, 1941) Caballeru na Orden Nacional de la Lexón d’Honor, condecoración más alta que concede’l gobiernu de Jacques Chirac que vien a reconocer la trayectoria de diferentes personales que destacaren polos sos meritos estraordinarios nel ámbitu civil o militar. Juan Luis Iglesias Prada ye doctor en Derechu y catedráticu de Derechu Mercantil na Universidá Autónoma de Madrid, foi secretariu xeneral tecnicu del Ministeriu d’Educación y Ciencia y conseyeru nacional d’Educación. Secretariu xeneral de la Fundación Príncipe d’Asturies dende 2004 y vocal del so Patronatu, ye amás academicu de númberu de l’Academia Asturiana de Xurisprudencia y de los patronatos de la Universidá Antonio de Nebrija y de la Fundación “Profesor Rodrigo Uría”. Sociu fundador del bufete d’abogaos “Uría-Menendez”, Iglesias Prada ye director adxunto de la Revista Derecho Mercantil y miembru del conseyu de redacción d’otres espublizaciones xurídiques, asina como vocal permanente de la Comisión Xeneral de Codificación. 20 de xunu, 2006 0 FacebookTwitterPinterestEmail
Comunicación L’Asociación Periodistes pol Asturianu denuncia l’imcumplimientu de les lleis que regulen la presencia del asturianu na RTPA by asturnet 15 de xunu, 2006 L’Asociación de Periodistes pol Asturianu denunció nun comunicáu fechu públicu na tarde d’ayeri la so preocupación ente les primeres emisiones de la televisión autonómica, ‘nes que la llingua asturiana nun tuvo nenguna presencia’. Pa los profesionales del mediu ‘nun tien nengún xacíu que nuna comunidá con llingua propia s’inore la so existencia nun mediu públicu que quier ser reflexu d’Asturies’ y entienden que ye ‘intolerable y incomprensible’ que e tapeza parte de la realidá asturiana, al empar que se tán vulnerando les lleis que regulen la presencia de la llingua asturiana na RTPA. Periodistes pol Asturianu considera que, polo que se vio nestes primeres emisiones de la televisión pública asturiana, se ta falando de ‘parcialidá y de discriminación pa con una parte importante de la población asturiana’ y por ello reclama qu’esti mediu que ta pagáu con dineru públicu ‘tien de tener presencia de la llingua pa que’l mediu, como tal, funcione como una ferramienta de normalización y non d’aniquilación llingüística’. Los profesionales del periodismu tachen de chocante’l fechu de que nun s’atienda a los principios d’actuación nos que s’inspira’l mediu: ‘Promoción de la cultura y la educación, con especial protección del bable, pente la promoción del so usu y difusión nos medios de comunicación social’. Asina, aseguren que la promoción de les llingües minorizaes ye ún de los motivos básicos que xustifiquen la puesta en marcha d’estos medios, por eso encuentren ‘difícil d’entender que s’arrequexe esti potencial nel mediu acabante d’echar a andar’. 15 de xunu, 2006 0 FacebookTwitterPinterestEmail
Cooperación L’Axencia Asturiana de Cooperación presenta un mundu más solidariu n’asturianu by asturnet 13 de xunu, 2006 ¿Si’l mapa mundi representare les verdaderes proporciones de los países cambiaría’l nuestru conceptu del mundu, fomentando la solidaridá ente los pueblos? Con esa filosofía Arno Peters espublizaba en 1974 un mapa fiel a la realidá del planeta, pa terminar cola imaxe ‘eurocentrista’ de la tierra que se popularizare nos últimos cuatro sieglos. Na busca d’esi mundu más solidariu, el director de l’Axencia Asturiana de Cooperación al Desarrollu, Rafael Palacios, presentaba esta mañana na Sala de Prensa de la Conseyería de Xusticia’l primer mapa de Peters en llingua asturiana. Nel añu 1569 espublizábase’l primer mapa del mundu, calculáu pol cartógrafu Gerhard Kremer y que pasó a la hestoria conocida como Mercator. Esta representación de la Tierra ye, ensin duda, la que fue más aceptada y usada nos últimos cuatro sieglos d’hestoria. Sin embargu, l’hestoriador Arno Peters demostró les abondes incorrecciones d’esta proyección qu’en munches ocasiones vieno a ser llamada ‘eurocentrista’ poles desproporcionaes representaciones de los continentes que-y daba al europeu unes dimensiones mui superiores a les que tien. ‘Son siempre los países del Tercer Mundu, los estaos excoloniales, les perxudicaes nel mapa Mercator’, escribía Peters. ‘Esti mapa correspuende a una espresión de la epoca d’europeización del mundu, na dómina na que l’home blancu dominaba’l planeta’. La poca esactitú del mapa conocíu como Mercator, nel qu’Europa (9,7 millones de km. cuadraos) apaez mayor qu’America del Sur (17,8 millones de km. cuadraos), fue tachada por munchos por esparder una imaxe del mundu enquivocada que venía a fomentar la insolidaridá ente los pueblos. Ésta foi la razón de que Peters trabayare nun nuevu mapa que, ente otres coses, representare fielmente les árees xeográfiques riales, espublizándose en 1974 y garrando cada día más apoyu sobre too ente persones, grupos ya instituciones comprometíes col desarrollu del Tercer Mundu. N’España, el mapa Peters fuere editáu pola Coordinadora d’Organizaciones Non Gubernamentales y agora, l’Axencia Asturiana de Cooperación al Desarrollu, ta acabante d’imprimilu en llingua asturiana. 13 de xunu, 2006 0 FacebookTwitterPinterestEmail
Comunicación La XPDLLA acusa al Gobiernu de desaniciar l’asturianu énte la puesta en marcha de la RTPA by asturnet 8 de xunu, 2006 Güei empiecen les emisiones regulares de la canal pública de televisión asturiana cola programación, a les ocho, del parte informativu de la tarde. Énte la puesta en marcha de la RTPA y la “presencia marxinal del asturianu nes sos emisiones”, la Xunta pola Defensa de la Llingua Asturiana denunció “‘l despreciu del Gobiernu asturianu pola opinión de los asturianos, que dende hai más de 15 años vien manifestándose mayoritariamente a favor de la esistencia d’emisores públiques de radio y televisión qu’emitan íntegramente n’asturianu” y acusólu d’ “avanzar nel procesu de substitución y desaniciu de la llingua”. La Xunta pola Defensa de la Llingua Asturiana considera inalmisible que la presencia de l’asturianu nes emisiones de la RTPA se solventen cola “especial protección al bable” que figura na llei que dio pie a la creacción del Ente de Comunicación públicu asturianu. “El Gobiernu asturianu demuestra que non solo nun tien intención de trabayar na defensa del patrimoniu llingüísticu d’Asturies, sinon que mantien firme la so voluntá de siguir avanzando nel procesu de substitución y desaniciu de la llingua asturiana”, asegura la organización cívica nun comunicáu públicu. “La esperiencia d’otres comunidaes con llingua propia que yá cunten con organismos de radiotelevisión amuesanos que los medios de comunicación audiovisuales son ferramientes indispensables de normalización social de les llingües amenazaes”, poro l’asociación en defensa de la llingua asturiana considera que quita-y esi usu na televisión pública a l’asturianu ye “imponer el castellanu nun ámbitu nuevu d’usu que-y va dar más puxu na presión qu’exerce pola sustitución llingüística total y apostar pola muerte segura del nuesu idioma autóctonu”. Por ello, la Xunta pola Defensa de la Llingua Asturiana acusa al Gobiernu asturianu “d’actuar d’espaldes a la Constitución, qu’afita como obligación de los poderes públicos «promover les condiciones pa que la llibertá y la igualdá de los individuos y de los grupos nos que s’integra seyan reales y efectives, a la vez que reconoz y garantiza’l derechu a la llibre espresión y al accesu a los medios de comunicación públicos de los grupos sociales significativos, respetando el pluralismu de la sociedá y les demás llingües d’España»; de nun respetar l’Estatutu d’Autonomía d’Asturies, qu’otorga a Asturies les competencies sobre’l desarrollu llexislativu y execución del rexime de tolos medios de comunicación social y sobre’l fomentu y protección del asturianu; y d’incumplir la Llei 1/98, d’Usu y Promoción del Asturianu, qu’obliga a l’Alministración Autonómica a velar por una presencia axeitada del asturianu nos medios de comunicación nos que participe”. 8 de xunu, 2006 0 FacebookTwitterPinterestEmail
Comunicación La TPA empieza a emitir en pruebes dende la Laboral de Xixón by asturnet 6 de xunu, 2006 La Radiotelevisión del Principado de Asturias (TPA) va estrenar les sos emisiones regulares el prósimu vienres, 9 de xunu, colos partes informativos de les ocho y media la tarde. Echa a andar d’esta manera la televisión pública asturiana que, anque yá empezó a emitir en pruebes dende la so se na Laboral de Xixón, va dir a poco y a poco completando la so parrilla de programación. Esti empiezu d’emisión “ye’l pasu definitivu pa la puesta en marcha d’un complexu tecnolóxicu que se va encargar de la emisión regular de la programación” al travies d’un sistema basáu dafechu na tecnoloxía dixital, según afirmaron los responsables de la canal pública rexonal que tovía nun confirmen los conteníos de tala programación. 6 de xunu, 2006 0 FacebookTwitterPinterestEmail
ConvocatoriesFiestes El CA de Barcelona convoca’l XX Certame Lliterariu de Poesía y Narrativa ‘Alfonso Camín’ by asturnet 31 de mayu, 2006 El Centru Asturianu de Barcelona ta acabante de convocar la XX edición del Certame Lliterariu de Poesía y Narrativa ‘Alfonso Camín’. Los trabayos tienen d’unviase a nome de la entidá nes cais Naranjo de Bulnes 1-7 y Ráfols 17-21 (CP 08034) de Barcelona enantes del 5 de setiembre, mes nel que se va facer la entrega de premios, coincidiendo cola celebración del Día La Santina na ciudá condal. Pal certame de poesía la estensión de los trabayos va ser de dos folios per una sola cara y a doble espaciu, mentes que na narrativa la estensión másima ye de cuatro folios. Los trabayos recibíos van quedar en poder del Centru Asturianu pa les sos posteriores reproducciones. Emigrastur 31 de mayu, 2006 0 FacebookTwitterPinterestEmail
Cooperación Valledor inaugura la II Conferencia Internacional de Salú y Desarrollu en Centroamérica by asturnet 30 de mayu, 2006 El conseyeru de Xusticia, Francisco Javier García Valledor, inauguraba ayeri la II Conferencia de Salú y Desarrollu en Centroamerica n’El Salvador, financiada pol Principáu d’Asturies y los Ayuntamientos de Xixón y Aviles, cola que terminaba’l so viaxe institucional per Venezuela y El Salvador. En talu viaxe, Valledor pudo visitar y inaugurar un Centru de Día pa mayores del Centru Asturianu de Caracas, asina como participar nel hermanamientu de los grupos folclóricos Covadonga de Caracas y Azabache de Xixón. Na so intervención d’ayeri na inauguración de la II Conferencia de Salú y Desarrollu en Centroamerica, el Conseyeru Valledor destacó l’apoyu del Gobiernu d’Asturies pa financiar diferentes proyectos de cooperación que tengan por oxetivu’l desarrollu integral de les persones, nel que la salú tien un papel primordial. De fechu, a lo llargo del añu 2005 l’Axencia Asturiana de Cooperación al Desarrollu del Gobiernu del Principáu d’Asturies destinó más d’un millón cien mil euros a financiar proyectos de salú, dedicando más del 75% a iniciatives llegaes d’America Llatina. Valledor terminaba asina’l so viaxe per Venezuela y El Salvador, qu’escomenzaba’l pasáu 26 de mayu en Caracas, onde’l conseyeru de Xusticia mantuvo un alcuentru cola Directiva del Centru Asturianu, onde inauguró un Centru de Día pa los mayores de tala entidá. Enantes de salir pa El Salvador, col oxetivu d’asistir a la inauguración d’estes xornaes sobre salú y desarrollu, el Conseyeru participó nel hermanamientu ente los grupos folklóricos Covadonga de Caracas y Azabache de Xixón, que terminó con una fiesta asturiana nes instalaciones del Centru Domingo. 30 de mayu, 2006 0 FacebookTwitterPinterestEmail