Comunicación Grupos lleonesistes soliciten un dominiu propiu n’internet by asturnet 8 de xineru, 2007 La estela de la concesión del dominiu .cat llega, tamién, a Lleón. Les propuestes de los internautes lleoneses son les d’interceder énte l’ICANN (l’organismu internacional de xestión de los dominios) pa que reserve dos estensiones ensin emplegar, y que representaríen a Lleón. Los dos dominios sedrién .leo empobinada al territoriu lleonés y el .lli qu’identificaría los asuntos llingüísticos. La reivindicación cibernética entamó a partir de la publicación nel Diario de León pol periodista Antonio J. Nevado d’un artículu nel que se proponía un dominiu d’internet asemeyáu al catalán. La propuesta, pa formalizase, habría crear un comisión que tramitara énte l’ICANN el pagu d’una garantía de 45.000 al organismu internacional asina como la xestión de los sofitos sociales ya institucionales necesarios pal bon desendolcu de la propuesta. 8 de xineru, 2007 0 FacebookTwitterPinterestEmail
Cooperación II Alcuentru de l’Asturianía moza del Conu Sur by asturnet 6 de xineru, 2007 La ciudá chilena de Viña del Mar acoyerá’l 2º Alcuentru de la Mocedá pola Asturianía del Cono Sur. L’Alcuentru cellebraráse dende los díes 18 al 22 de xineru. El Conseyu de la Mocedá del Principáu d’Asturies entamará los actos de l’Asamblea y presentará la Oficina Virtual d’apoyu a l’asturianía moza qu’el colectivu xuvenil asturianu pondrá a furrular cola collaboración de l’Axencia Asturiana d’Emigración. 6 de xineru, 2007 0 FacebookTwitterPinterestEmail
Cooperación Amuesa Artística d’ACSUR-Las Segovias by asturnet 29 d'avientu, 2006 L’asociación Acsur-Las Segovias entamó una amuesa solidaria de pieces d’arte. L’amuesa ta nel Café Xixón hasta’l día 15 de xineru. Los fondos algamaos cola venta d’estes obres empobinaránse a la realización de los más de 120 proyectos que vien realizando l’asociación ACSUR-Las Segovias na cooperación y solidariedá internacional 29 d'avientu, 2006 0 FacebookTwitterPinterestEmail
Comunicación Colunga acueye un Foru sobre la sociedá de la información by asturnet 29 d'avientu, 2006 La Casa de la Cultura de Colunga acoyerá a partir de les 20,00 hores el I Foru de la Sociedá de la Informaciñon. Esti foru tien por obxetu resaltar la importancia pa la humanidá de la era na que vivimos, gracies al desendolcu de les nueves tecnoloxíes. Nesti Foru participarán dellos espertos na materia de la sociedá de la información. 29 d'avientu, 2006 0 FacebookTwitterPinterestEmail
Comunicación Enrique Moradiellos va poner una conferencia sobre la figura de Juan Negrín by asturnet 28 d'avientu, 2006 Charra sobre Juan Negrín de l’asociación Tribuna Ciudadana. L’historiador uvieín Enrique Moradiellos dará’l vienres 29 d’avientu, a partir de les 20,00 hores, una charra titulada “Negrín: la figura más difamada de la España del siglo XX”. La conferencia fadráse nel Club de Prensa Asturiana d’Uviéu. Enrique Moradiellos ye actualmente catedráticu d’Historia Contemporánea de la Universidá d’Extremadura. Ente les sos publicaciones destaquen “1936. Los mitos de la guerra civil” o Franco frente a Churchill. 28 d'avientu, 2006 0 FacebookTwitterPinterestEmail
Comunicación Sariegu dará les campanaes de la TPA by asturnet 28 d'avientu, 2006 El Conceyu de Sariegu, qu’esti añu algamara’l premiu al Pueblu Exemplar d’Asturies, va ser l’espaciu dende’l que l’ente públicu de comunicación tresmita les campanaes de fin d’añu. La retransmisión fadráse dende la capiella del Carme de Sariegu, onde la Casa Conceyu repartirá sidra axampanao y uves pa cellebrar la entrada del añu nuevu nel Pueblu Exemplar d’Asturies 28 d'avientu, 2006 0 FacebookTwitterPinterestEmail
Comunicación L’Oriente d’Asturies esnalará pela banda ancha by asturnet 27 d'avientu, 2006 L’Oriente d’Asturies tendrá banda ancha a final de 2007. El Ministeriu d’Industria aprobó’l poryectu Asturies Paraísu Dixital, presupuestáu en 2 millones d’euros, cola fin d’averar la sociedá de la información a los conceyos del cotarru oriental del país en 2007. El proyectu Asturies Paráisu Dixital centrará les sos actuaciones na Mancomunidá de Conceyos del Oriente na que participen los conceyos d’Amieva, Cabrales, Cangues, Caravia, Llanes, El Valle Altu, El Valle Ba.hu, Onís, Piloña, Ponga, Ribadeva y Ribesella. Con esti proyectu los conceyos de la zona oriental meyorarán los sos accesos a les nueves tecnoloxíes de comunicación. Asina mesmo l’alfabetización de la ciudadanía d’esta fastera ta dientro de les diferentes midíes que va implementar Asturies Paraísu Dixital. Les primeres actuaciones fadránse nel conceyu de Llanes col desendolcu d’una rede fibra óptica qu’asegure una conexión a banda ancha, que permitirá l’accesu a los conteníos más avanzaos de la rede. Dientro d’esti plan alcuéntrase la difusión, y publicitación, de les midíes del Plan Avanza, del Ministeriu d’Industria, pa la compra d’equipos informáticos con un créditu ensin intereses. Col proyectu Asturies Paraísu Dixital l’oriente d’Asturies entra nel programa Ciudaes Dixitales; un programa del Ministeriu d’Industria del que n’Asturies yá veníen participando Avilés y Carreño. 27 d'avientu, 2006 0 FacebookTwitterPinterestEmail
Comunicación El nuevu portal web del Principáu d’Asturies yá ta na rede by asturnet 27 d'avientu, 2006 El Gobiernu d’Asturies acaba de presentar na rede Asturias.es el nuevu informativu, que sustituye a Princast. Esti nuevu portal presenta la opción d’escoyer la llingua d’usu, énte castellano, inglés y asturianu. Dende los diferentes menús del espaciu web autonómicu l’usuariu podrá acceder a los recursos que dende’l Principáu tán dispuestos pa la ciudadanía. La páxina oficial d’Asturies, presentada na rede güei 27 d’avientu de 2006, tien la novedá de poder navegar pel so conteníu n’asturianu y n’inglés, amás del castellano que ye la llingua predeterminada na carga del espaciu web. Asturias.es ufre bien d’información sobre la cultura tradicional del país, dende esplicaciones de los deportes tradicionales, al arte tradicional o a les artes plástiques. L’espaciu web, con un diseñu más amañosu qu’el de l’anterior páxina, www.princast.es, da accesu a los diferentes servicios y entes de l’Alministración Autonómica, bien dende espacios propios o dende enllaces a les paxínes de los órganismos públicos que desendolquen el so llabor na xera buscada pol usuariu. Asturias.es 27 d'avientu, 2006 0 FacebookTwitterPinterestEmail
Cooperación Estudiu sobre la emigración asturiana by asturnet 26 d'avientu, 2006 El Conseyu de la Mocedá del Principáu d´Asturies (CMPA) dientro de la so llinia d´estudios sobre la situación de la mocedá asturiana, tá faciendo una investigación sobre la ´Realidá de la mocedá asturiana nel Esterior´. Esta investigación inscríbese dientro de los oxetivos que se planteen nel Plan Integral d´Emigración 2004-2007, que desenvuelve l’Axencia d’Emigración en collaboración cola institución xuvenil L´Oxetivu concretu d´esti estudiu ye dar a conocer la situación na que viven les y los mozos que, por decisión propia u obligaes/os poles circunstancies, trabayen fuera del país. El CMPA pide la collaboración de la comunidá asturiana nel esterior pa poder desnvolver esti estudiu. L’estudiu fadráse depués d’algamar la información mediante un cuestionariu. El desarrollu de la investigación fadráse ente los y les asturianes que tuvieron que buscar nuevos nortes lloñe del país. 26 d'avientu, 2006 0 FacebookTwitterPinterestEmail
Comunicación La RTPA concluye la so “fase de llanzamientu” by asturnet 22 d'avientu, 2006 L’ente públicu da por concluida la so emisión de llanzamientu, con unos resultaos del 2,6 de cuota de pantalla nel últimu mes. La cadena pública entamó les sos emisiones en prebes hai xusto un añu, con un presupuestu de 20,3 millones d’euros. El presidente asturianu afirmó que la canal pública “promueve la llingua asturiana” El director xeneral del Ente Públicu de Comunicación del Principáu (RTPA), Juan Ramón Pérez Ornia, asoleyó’l Sistema Integráu Multimedia de la RTPA nes instalaciones de la canal autonómica nel Parque Tecnolóxicu de Xixón. Esta presentación fízose’l día enantes del entamu de les emisiones regulares del ente de comunicación asturianu, qu’engloba la televisión, radio, asina como un diariu dixital. Ente les novedaes presentaes tán la de la emisión durante les 24 hores de les canales de radio y televisión, asina como la entrada na programación radiofónica de los informativos. La programación del ente públicu asturianu durante 2006 foi d’un total de 2.544 hores, y pal 2007 prevee emitir un total de 8.760. Les emisiones de los diferentes medios del Ente públicu de Comunicación amás d’al propiu territoriu asturianu lleguen a otros continentes gracies a la conexón cola rede de satélites Hispasat. La presencia de la llingua asturiana nel ente de comunicación, hasta esti momentu ausente de les emisiones televisives, anque les tresmisiones radiofóniques la presencia del asturianu tuvo una presencia diaria, foi un de los temes nos qu’el Director Xeneral del ente abordó dando anuncia a la prósima aparición de programes nos que l’asturianu sedrá la llingua vehicular. L’anuncia y presentación de la fin de les emisiones en prebes, del Ente Públicu de Comunicación, nun cuntó cola participación del Conseyu de Xusticia, Francisco Javier García Valledor, que nuna nota de prensa na que comunicaba la so non asistencia, empoderaba’l bon llabor de los profesionales del mediu, amosaba les sos diferencies y distancia, asina como los d’Izquierda Xunida-Bloque por Asturies, con respectu al modelu que se taba siguiendo. Radiotelevisión del Principáu d’Asturies 22 d'avientu, 2006 0 FacebookTwitterPinterestEmail