Comunicación El PP apreba la camudación de la llei pa entrar nel Conseyu d’Administración de RTPA ensin aclariar si va participar nél by asturnet 10 de febreru, 2006 El Partido Popular dio el so votu favoratible a la camudación de la Llei de Medios de Comunicación del Principáu que dexa abierta la posibilidá de que puedan incorporase al Conseyu del Ente Públicu autonómicu nuevos miembros como los que-y correspuenden proporcionalmente al únicu partíu parlamentariu ensin representantes nel organismu. Los populares, sicasí, nun aclariaron si van participar a la fin nel Conseyu. El diputáu del PP, Fernando Goñi, nun desplicó si el so grupu va entrar dafechu nel organismu de l’Administración de la Radio Televisión del Principáu d’Asturies (RTPA) inda reconoció qu’esa diba ser la única vía que tien el so partíu pa fiscalizar l’Ente y atropar la información, que según afirmó, nun son consiguir fuera d’él. La camudación de la Llei de Medios de Comunicación aprebada na Xunta Xeneral val tamién pa integrar a la Productora de Programes del Principáu nel nuevu Ente Públicu, ensin qu’eso suponga tracamundiar les condiciones llaborales del personal actual d’esta empresa autonómica. 10 de febreru, 2006 0 FacebookTwitterPinterestEmail
Comunicación Gregorio Morán fala en Xixón del pensador llibertariu Rafael Barret by asturnet 9 de febreru, 2006 El periodista ya historiador Gregorio Morán fala esti xueves 9 en Xixón de la figura del pensador anarquista catalán Rafael Barret dientro los actos de la Selmana Cultural del Aula José Luis García Rúa. L’autor de Testamento vasco’ y ‘El maestro en el erial’ -ente otres obres de divulgación político-cultural- va preceder na tribuna al propiu filósofu García Rúa que pieslla los actos d’esta selmana esti viernes 10 con una conferencia titulada ‘Los cortos veranos del anarquismo’. El salón d’actos del Antigu Institutu va ser el sitiu escoyíu pa rematar esta Selmana Cultural qu’organicen delles entidaes ciudadanes xixoneses como l’Atenéu Obreru, la Sociedad Cultural Gijonesa, Radio Krass y el Centru Social Sextaferia, con entrambes conferencies de Gregorio Morán y José Luis García Rúa. La hora de los actos ye a les 20.00 hores. El sábadu 11 los participantes nes actividaes d’esta selmana van xuntase nuna cena de confraternización nel restaurante el Hotel Tryp-Rey Pelayo de Xixón. 9 de febreru, 2006 0 FacebookTwitterPinterestEmail
Comunicación L’asociación El Tueru convoca los sos premios ‘Conceyu de Llanes’ by asturnet 9 de febreru, 2006 La asociación cultural El Tueru acaba de convoca los sos premios Conceyu Llanes que van entregase nun actu públicu nes primeres selmanes del mes de mayu. La asociación entama estos galardones pal reconocimientu a toles persones, colectivos o entidaes que desendolcaran un especial trabayu pola cultura y la llingua asturiana nel conceyu llaniscu. La asociación cultural fai un llamáu a la sociedá del conceyu oriental pa que proponga a les persones o colectivos más afayadizos pa la reconocencia del so llabor con estos premios. El Tueru abre ansina un plazu de tiempu pa que toles persones que quieran manden a nome de la asociación les sos propuestes a la llibrería Clarín de Llanes que collabora na convocatoria y entrega d´estos premios. 9 de febreru, 2006 0 FacebookTwitterPinterestEmail
Comunicación El PP promete privatizar la televisión autonómica si gana les elecciones asturianes by asturnet 7 de febreru, 2006 El Partido Popular d’Asturies anunció por voz del so presidente Ovidio Sánchez que si gana les prósimes elecciones autonómiques tien ente los sos planes el de privatiza l’Ente Públicu de Comunicación del Principáu, al que ‘l cabezaleru de los populares calificó de “chiringuito”. Sánchez sumóse asina al deséu espresáu va unos díes pol alcalde d’Uviéu, Gabino de Lorenzo, que manifestó el so deséu de que la televisión autonómica desapaeciera como empresa pública. Nes mesmes declaraciones el rexidor de la ciudá del Carbayón tamién encamentara el pieslle de les oficines del Principáu en Madrid y en Bruseles. De Lorenzo espresara darréu la so intención de repetir como candidatu a l’alcaldía uvieína, un xestu que’l cuestionáu líder de los populares asturianos, Ovidio Sánchez supo agradecer reconociendo “la xenerosidá” del primer edil carbayón y faciendo suya la so promesa de pesllar la televisión autonómica. 7 de febreru, 2006 0 FacebookTwitterPinterestEmail
Comunicación Pieslla Frikipedia por una denuncia puesta pola SGAE by asturnet 7 de febreru, 2006 Una chancia sobre les siegles de la Sociedad General de Autores de España (SGAE) provocó’l pieslle de la web humorística Frikipedia después de que la entidá que xestiona los derechos d’autor nel estáu español presentara una demanda contra’l responsable de la páxina y la empresa onde taba abellugada. Frikipedia, una parodia de la popular enciclopedia virtual Wikipedia taba colgada na rede dende l’anu 2005 y siguía un sistema calcáu de la web parodiada pol que llegaron a subise alrodiu de 1.200 artículos. Una entrada na que se definía a la SGAE como “Siempre Ganamos Algunos Euros” ye la que motivó la querella de la Sociedá Xeneral d’Autores d’España, inda’l responsable de Frikipedia deféndese afirmando que’l citáu artículu ye anónimu y qu’en realidá la demanda vien d’atrás d’otra definición de SGAE retirada nel so día na que se calificaba a la entidá de “Sociedad de Gángsters, Atracadores y Estafadores”. Dende la so creación la propia Frikipedia aparez recoyida na enciclopedia dixital parodiada. Al pesar de que la web humorística ya nun se puede consultar l’artículu que provocó la demanda de la SGAE puede atopase al través de dellos buscadores o mesmo de páxines como microsiervos, na que s’ufierta l’enlace al artículu demandáu. 7 de febreru, 2006 0 FacebookTwitterPinterestEmail
Comunicación Telecinco suprime de la programación ‘Vientos de agua’ pa ufiertala en DVD by asturnet 6 de febreru, 2006 La cadena estatal Telecinco decidió suprimir de la so programación la serie de Juan José Campanella ‘Vientos de agua’. El motivu de la supresión ye, según informa la canal televisiva na so páxina web oficial>Vientos de agua, evitar que los capítulos de la coproducción hispano-arxentina cayan en manes de la piratería. La serie va ufiertase agora en formatu DVD pa la so vienda en públicu. El formatu escoyíu por Telecinco pa rentabilizar y publicar la obra de Campanella fue acoyíu con resignación y comprensión pol propiu realizador pal que “esti ye’l meyor formatu pa una serie tan sui generis”. 6 de febreru, 2006 0 FacebookTwitterPinterestEmail
Comunicación Colectivos culturales xixoneses organicen la Semana del Aula Popular José Luis García Rúa by asturnet 3 de febreru, 2006 La Semana del Aula Popular José Luis García Rúa escomienza esti viernes 3 en Xixón embaxo’l títulu de “La utopía aplazada”. L’alcordanza y pervivencia de los ideales llibertarios ye un de los asuntos alrodiu de los que van xirar les actividaes programaes nesta Selmana polos colectivos culturales y sociales qu’organicen les xornaes. L’Atenéu Obreru, la Sociedá Cultural Xixonesa, Radio Krass, el centru social Sextaferia y l’Equipu de Teatru La Máscara son los colectivos organizadores de los actos qu’escomiencen esti viernes cola so presentación y siguen el domingu 5 cola proyección a les 19.00 hores de la película “Sacco & Vanzzeti” nel centru social Sextaferia. El llunes 6 Pilar Sampedro ufierta una conferencia titulada “El mito del amor” nel salón d’actos del Antigu Institutu. El colectivu teatral La Máscara representa el martes 7 nel Teatru Xovellanos la obra “Las abarcas de Miguel Hernández”. Les actividaes d’esta selmana cultural siguen el miércoles 8 con una conferencia de Manel Aissa titulada “El anarquismo hoy” nel Antigu Institutu y el xueves 9 nel mesmu sitiu Gregorio Morán va falar sobre “Rafael Barret o la invención del anarquismo”. La última conferencia va pronunciala el filósofu del que cueyen el nome estes xornaes, José Luis García Rúa, que va esplayase el vienres 10 sobre “Los cortos veranos del anarquismo”. Les xornaes rematen el sàbadu con una cena de confraternización nel Hotel Tryp Pelayo. 3 de febreru, 2006 0 FacebookTwitterPinterestEmail
Comunicación Una web recueye firmes pa restituir Vientos de agua’ al so horariu orixinal by asturnet 1 de febreru, 2006 El cambiu d’horariu de la teleserieVientos de aguaa la madrugada fechu pola cadena Telecinco ta siendo retrucáu por una iniciativa de recoyida de firmes na que se pide a la canal privada que restituya la producción del arxentín Juan José Campanella a la so emisión n’hora de prime time. Alrodiu de dos mil firmes avalen esta solicitú de siguidores de la serie. La producción na que se narra la hestoria d’una saga d’emigrantes orixinarios d’Asturies y rodada en parte n’esteriores del nuestru país tuvo nes sos primeres emisiones unos índices d’audiencia que Telecinco nun consideró bastantes pa caltener ‘Vientos de agua’ nel so horariu orixinal, a les 22.00 hores. Aurora Vergara, una avilesina afinancada en A Coruña, ye l’autora de la iniciativa qu’al través de la páxina web www.petitiononline.com pide al equipu directivu de la cadena española la reposición de la serie de Juan José Campanella al horariu nel qu’escomenzó emitise porque a xuiciu de los firmantes “la serie, tanto pola so calidá como pola so temática de gran interés, nun ha ser relegada a la madrugada de los viernes, como ocurrió el día 20 de xinero”. La solicitú ta recibiendo alrodiu de dos mil solicitúes que l’apoyen. Más información 1 de febreru, 2006 0 FacebookTwitterPinterestEmail
Comunicación La Fundación Príncipe d’Asturies convoca’l premiu al Pueblu Exemplar by asturnet 30 de xineru, 2006 La Fundación Príncipe d’Asturies acaba d’entamar la convocatoria pal premiu Pueblu Exemplar correspondiente a esti añu y que va tar abierta hasta’l prósimu 18 d’agostu. Al empar la esposición fotográfica “Impresiones.XV años de los Premios Príncipe d’Asturies” recibió na so primer selmana más de 6.000 visites y va poder vese na Plaza Trescorrales d’Uviéu hasta’l prósimu 10 de marzu. El reglamentu de la convocatoria pal premiu Pueblu Exemplar establez que van poder presentar candidatures al mesmu instituciones, centros culturales, asociaciones de vecinos, entidaes, empreses asina como los ciudadanos que lo deseen. Amás de la documentación y los apoyos que cada candidatura presente nel so favor, la Fundación y los propios miembros del Xuráu pueden solicitar o realizar ocasionalmente los informes precisos a fin de complementar cada propuesta. a Fundación Príncipe d’Asturies escomenzó la distribución de casi 3.000 exemplares del folletu que contién les bases pal premiu Pueblu Exemplar d’Asturies 2006, na so decimoséptima edición. Esta información ta disponible tamién nel portal d’Internet de la FPA (www.fundacionprincipedeasturias.org). La Fundación convoca esti galardón dende 1990 y na so dotación económica, de veinticinco mil euros, colabora al cincuenta por cientu’l Gobiernu del Principáu. Fundación Príncipe d’Asturies 30 de xineru, 2006 0 FacebookTwitterPinterestEmail
Comunicación La organización moza Darréu publica’l so anuariu d’actividaes by asturnet 30 de xineru, 2006 La organización nacionalista moza Darréu acaba d’asoleyar el so Anuariu correspondiente a les actividaes desenvueltes a lo llargo de 2005. Los conteníos íntegros del trabayu pueden consultase na páxina web de la organización en versión dixital y van distribuise como documentos de papel en centros sociales y d’ociu. LAnuariu 2005 de Darréu tien 60 fueyes y dixébrase en tres partes: per un llau les memories dactividaes y actos onde participó o que desendolcó la organización amás de materiales y campañes feches, per otra una seición dedicada a la nuesa páxina web y per último la seición de prensa, onde se recueyen los comunicaos asoleyaos asina como tamién un dossier de prensa nel tan toles noticies de los medios de comunicación escrita y dixital onde se menciona a Darréu. Darréu 30 de xineru, 2006 0 FacebookTwitterPinterestEmail