Comunicación El Principáu encamienta a la Fundación Príncipe a actuar contra Pérez Espinosa by asturnet 11 de marzu, 2006 El gobiernu asturianu salió al pasu de les declaraciones de la conceyal popular uvieína Isabel Pérez Espinosa nes qu’afirmaba que la ubicación del Muséu de los Premios Príncipe d’Asturies n’Avilés yera’l resultáu d’un alcuerdu ente’l director de la FPA, Graciano García y el presidente del Principáu, Vicente Álvarez Areces. El Principáu caltién que la Fundación ye ayena a la negociación pol afayamientu del muséu y anima a esta institución a actuar xudicialmente contra Espinosa. L’executivu autonòmicu al través d’un comunicáu fechu públicu tres l’últimu Conceyu de Gobiernu califica les manifestaciones de la conceyal del PP de “calumnioses ya inaceptables” y recalca que l’alcuerdu algamáu ente l’administración asturiana y l’Ayuntamientu d’Avilés pal afayamientu del proyectu d’Oscar Niemeyer respuende a equipamientos ya contemplaos nel PGOU d’esi conceyu. Unos proyectos que’l Principáu considera decisivos pal futuro d’Aviles y la so comarca, polo que considera “inadmisible que dende l’Ayuntamientu d’Uviéu se quiera cuestionar la llegalidá d’unes decisiones tomaes democráticamente” pola corporación avilesina. Darréu l’executivu autonómicu manifiesta que “la Fundación Príncipe d’Asturiesy les persones que la representen, ye totalmente ayena al alcuerdu tomáu poles citaes administraciones públiques, polo que consideramos totalmente inxurioso atacar al Presidente y al Director de la Fundación, por parte de la citada portavoz”. Pa rematar, el Principáu cuida que los términos empleaos por Isabel Pérez Espinosa “obliguen, en defensa de la honorabilidá d’instituciones y persones afectaes a encamentar a los Servicios Xurídicos l’inicio de les actuaciones pertinentes pa treslladales al ámbitu xudicial”. 11 de marzu, 2006 0 FacebookTwitterPinterestEmail
Comunicación Areces cifra nunos 24 millones d’euros el costu del muséu de Niemeyer by asturnet 7 de marzu, 2006 El presidente del gobiernu asturianu Vicente Álvarez Areces cifró nunos 24 millones d’euros el costu de l’afayamientu del futuru muséu de los Premios Príncipe d’Asturies n’Avilés proyectáu pol arquitectu brasileiru Oscar Niemeyer. El xefe del executivu fizo pública esta estimación dende Río de Janeiro a onde acudió pa firmar col autor del proyectu arquitectónicu l’alcuerdu pol que’l Premiu Príncipe d’Asturies de les Artes cede a la comunidá autónoma la so obra. Pel so llau la conseyera de Comunicación Social y Cultura, Ana Rosa Migoya, espresó’l so enfotu de que la licitación de les obres del muséu na Ría d’Avilés pueda tar fecho pa finales d’esti añu o principios de 2007. Areces manifestó el deséu del so gobiernu de que Nieyemer pueda tar n’Asturies celebrando’l so centenariu coles obres del so proyectu entamaes y afirmó que si eso fuera posible el Principáu organizaría “una gran folixa” pa festeyalo. Nel otru llau de la realidá, l’alcalde d’Uviéu Gabino de Lorenzo publicó esti llunes 6 na prensa diaria asturiana un bandu nel qu’animaba a los ciudadanos carbayones a sumase a a campaña entamada dende l’equipu de gobiernu municipal pa reclamar el muséu de la Fundación Príncipe pa la capital del Principáu. 7 de marzu, 2006 0 FacebookTwitterPinterestEmail
Comunicación La revista cultural El Summum algama’l so númberu diecinueve by asturnet 6 de marzu, 2006 La revista cultural El Summum algama la so entrega númberu diecinueve con un númberu dedicáu a los temes avezaos nesta publicación trimestral:música independiente y asturiana, cine, lliteratura y arte. Ente los diversos conteníos del nuevu Summum destaca la recuperación n’alcordanza del artista republicanu Goico Aguirre pol hestoriador Rafael Rodríguez Valdés. La obra d’otru artista, nesti casu contemporáneu, Jaime Herrero ye glosada por Xuan Bello y Hilario J. Rodríguez evoca la relación del escritor José Luis García Martín colos llibros. Dylan y Martin Scorsese, Manta Ray, Tuenda, Mari Luz Cristóbal Caunedo, Etore Ecola y Berta Piñán son dellos otros nomes propios que centren l’últimu númberu de la publicación cultural editada por Ámbitu. 6 de marzu, 2006 0 FacebookTwitterPinterestEmail
Comunicación Santiago Carrillo remembra en Xixón la figura d’Horacio Fernández Inguanzo by asturnet 2 de marzu, 2006 L’ex secretariu xeneral del PCE Santiago Carrillo intervién esti xueves 2 en Xixón nun actu d’homenaxe a la figura del hestóricu cabezaleru comunista asturianu Horacio Fernández Inguanzo. El veteranu políticu va remembrar a El Paisano con una conferencia nel Antigu Institutu de Xixón na que la presentación del antigu dirixente del Partíu Comunista va correr por cuenta de Jesús Montes Estrada “Churruca”. La conferencia de Carrillo inxértase dientro los actos d’homenaxe a l’alcordanza d’Horacio que vien desenvolviendo Izquierda Xunida y qu’escomenzaron la selmana pasada con una visita a la tumba de El Paisano nel cementeriu de Xixón. L’actu d’esta tarde escomienza a les 20.00 hores nel salón d’actos del Antigu Institutu. 2 de marzu, 2006 0 FacebookTwitterPinterestEmail
Comunicación Reporteros Ensin Fronteres denuncia la colaboración de Yahoo! cola censura en China by asturnet 1 de marzu, 2006 La organización non gubernamental Reporteros Ensin Fronteres denuncia na so páxina web la colaboración de Yahoo! coles autoridaes chines pa incriminar a un disidente políticu facilitándo-yos datos personales que llevaron a la detención y condena d’un ciudadanu por burlar les llendes de la censura na Rede. El ciudadanu Li Zhi, un ex funcionariu, fue condenáu n’avientu del añu pasáu a ocho años de cárcel por caltener una cuenta de corréu electrónicu en Yahoo! dende la que supuestamente contactaba con otros disidentes del prohibíu Partíu Democráticu de China. La empresa administradora del buscador y administrador de cuentes de corréu xunto a un servidor local facilitaron a les autoridaes datos personales colos que se localizó a Li Zhi y que valieron pa incriminalu. 1 de marzu, 2006 0 FacebookTwitterPinterestEmail
Comunicación Pérez Ornia defende l’Ente autonómicu como xenerador d’empléu directu ya indirectu by asturnet 22 de febreru, 2006 José Antonio Pérez Ornia aprovechó la so comparencencia esti martes 21 na Xunta Xeneral pa defender l’Ente Públicu de Comunicación como xenerador d’empléu directu ya indirectu. El director de la radiotelevisión autonómica desgranó les cifres de los ingresos y gastos de la empresa dende la so creación. Coincidiendo cola presencia d’Ornia nel parlamentu miembros de la Xunta pola Defensa de la Llingua manifestáronse pa protestar pol tratamientu dau al idioma nel ente autonómicu. Pérez Ornia, defendió los beneficios que pal sector audiovisual d’Asturies supón la pueta en marcha de la RTPA que, según los sos cálculos, pueden ser un cientu de puestos de trabayu directos y alrodiu de doscientos indirectos con preferencia pa empreses con mayoria de capital asturianu. A la contra, el diputáu del PP Fernando Goñi criticó al ente públicu polos sos costes dende la integración de la televisión asturiana na FORPA (Federación de Radiotelevisioens Autonómiques), que cifró en 800.000 euros amás de 325.000 euros como pagu anual. A eso, hai qu’añadir, según el parlamentariu popular, 1,2 millones de euros pola tresmisión de partíos de fútbol de Primera y Segunda División hasta’l final d’esta temporada y 445.221 euros pola emisión de películes. Mientres Ornia comparecía nel parlamentu autonómicu un grupu de militantes de la Xunta pola Defensa de la Llingua manifestóse énte les puertes del hemiciclu con una pancarta na que se pidía una televisión asturiana n’asturiano. Díes enantes, esti domingu, la organización cívica tentó desplegar esa mesma pancarta nel estadiu Carlos Tartiere nel partíu del Real Uvièu retresmitíu pola TPA y personal del club azul impidiólo pola fuerza. 22 de febreru, 2006 0 FacebookTwitterPinterestEmail
Comunicación L’Atenéu Obreru de Xixón recibe’l premiu ‘Ciudad Abierta’ de la SER by asturnet 17 de febreru, 2006 L’Atenéu Obreru de Xixón recibe esti viernes 17 el premiu ‘Ciudad Abierta’ que concede la emisora local de la cadena SER. La radio quier reconocer con esta distinción el compromisu cola cultura desempeñáu a lo llargo de los sos más de cien años d’esistencia. El xuráu, a la hora de conceder el premiu al Atenéu Obreru valora la so “dilatada historia y el so papel na cultura y el respetu pa toos”. Formáben el xuráu del Premiu ‘Ciudad Abierta’ Pedro Sanjurjo, Elma Alonso, Carmen Álvarez, Amador García, Celestino Álvarez, Alejandro Ortea y Gonzalo Mieres y taba presidíu por Joaquín Fernández-Carvajal. L’actu d’entrega del galardón de la emisora local de la SER ye esti meudía nel salón de recepciones del Ayuntamientu, presidíu pola alcaldesa Paz Fernández Felgueroso, vilda del que fuera presidente honorariu del Atenéu hasta’l so fallecimientu Daniel Palacios. 17 de febreru, 2006 0 FacebookTwitterPinterestEmail
Comunicación Ansón dexa La Razón por nun querer compartir grupu col diariu Avui by asturnet 17 de febreru, 2006 Luis María Anson, fundador del diariu madrilanu La Razón y el so primer director, anunció qu’abandonaba la empresa periodística polos “problemes de conciencia” que-y creaba compartir grupu mediáticu col rotativu barcelonés Avui . En declaraciones a diversos medios el veteranu periodista afirmó que pa él La Razón “ye como una fía que se casara con un catalán”. Anson, identificáu políticamente col ultranacionalismu español, manifestó que dexaba’l diariu creáu por él tres la so marcha de la dirección d’ABC porque “ye malo que La Razón comparta propietariu con Avui” ya que “ún defende la unidá d’España y l’otru aboga pola independencia de Cataluña”. L’ex director del diariu madrilanu aseguró que respeta les decisiones empresariales del Grupu Planeta, al que pertenez La Razón y mesmo la de facese col principal diariu en llingua catalana, pero qu’eso creába-y “problemes de conciencia”. Luis María Anson declaró que tentó en diverses ocasiones propone-y al cabezaleru de Planeta, José Manuel Lara, compra-y el periódicu fundáu por él ensin ésitu y qu’esi yera’l motivu cimeru pol que tomaba la decisión d’abandonar el periódicu. El creador del diariu ultraconservador pidió a la empresa propietaria del mediu que dexara de figurar el so nome na cabecera como fundador. 17 de febreru, 2006 0 FacebookTwitterPinterestEmail
Comunicación Maragall estrena páxina web nel dominiu .cat y con un blog selmanal by asturnet 16 de febreru, 2006 El presidente de la Generalitat de Cataluña, Pasqual Maragall, va comunicase colos ciudadanos al través d’un blog personal, actualizáu, polo menos una vez a la selmana. El cabezaleru del executivu catalán estrena páxina web nel nuevu dominiu .cat y defende la validez de los blog pa les comunicaciones ente los políticos y la xente. El nuevu sitiu web de Maragall puede atopase na dirección www.presidentmaragall.cat y nella el cabezaleru de la Generalitat quier contribuir a que se supla’l déficit comunicativu que, según desplicó el propiu ‘president’, esiste ente la sociedá y los sos representantes institucionales. Pasqual Maragall declaró que col so blog va facer llegar a los ciudadanos les sos reflexones y aseguró que “Préstame desplicar y préstame escuchar” y nesi sen considera que “hai un dèficit d’esplicación y d’escuchar porque tamos enforma pautaos nel actual sistema d’información'”. Nel so blog el presidente catalán non namás apurrirá les explicarà les sos pròpies reflexiones sinón que va recoyer tamién les opiniones de los ciutadanos. Maragall asseguró que nos sos escritos de la bitácora va mantenese fiel a los principios de “circumspección, claridá y sinceridá”. 16 de febreru, 2006 0 FacebookTwitterPinterestEmail
Comunicación La revista asturiana El Catoblepas publica les caricatures de Mahoma by asturnet 13 de febreru, 2006 La revista dixital El Gatoblepas reproduz na so última entrega les caricatures de Mahoma publicaes en setiembre del añu pasáu pol rotativu danés Jyllands Posten y qu’armaron l’espolín nel mundu islámicu. La publicación empobinada por Gustavo Bueno Jr. afirma que se reproducen “como amuesa de la nuestra falta respetu hacia supersticiones relixoses que se quieren imponer a les naciones polítiques formaes tres la Revolución francesa”. La revista de pensamientu acompaña les estampes de Mahoma d’una escoyeta de testos del Ayatolah Jomeini, tomaos de la edición española de los sos “Principios políticos, filosóficos, sociales y religiosos”. Nes llinies coles que se da acoyida a los dibuxos la publicación afirma que la decisión de reproducir les caricatures del diariu danés nun ye tanto por reivindicar “supuestes llibertes d’espresión que tuvieran puestes n’entedicho pol iconoclasmu islámicu nin porque talos dibuxos tengan por ellos mesmos interés dalgún” y que lo faen como amuesa de la so falta de respetu énte “supersticiones relixoses” como la representada pol movimientu integrista islámicu. Los doce dibuxos que provocaron la ira de millones de musulmanos en tol mundu aparecieron nel Jyllands Posten, talo desplica l’editor del rotativu nuna deplicación a los Honorables conciudadanos del mundu musulmán, como una obra colectiva d’otros tantos humoristes gráficos con motivu d’un debate alrodiu de la llibertá d’espresión. Nel so encamientu a los fieles islámicos el periódicu danés defínese como respetuosu con cualquier creyencia relixosa y califica l’espolín armáu de “malentendíu”. 13 de febreru, 2006 0 FacebookTwitterPinterestEmail