Plástiques Ángeles Muñiz retrata los trabayos y los díes del artista Jaime Herrero by asturnet 21 de marzu, 2006 La realizadora Ángeles Muñiz presentó esti llunes n’Uviéu el so documental “Jaime Herrero…pinta de escritor”, un percorríu pela obra y la vida del artista qu’aumesa tamién un periodu del mundu creativu asturianu dende les últimes décades del sieglu pasáu hasta l’actualidá. Muñiz (autora ente otres obres de la película breve “La neña los mios güeyos”) sigue al pintor y escritor Jaime Herrero pelos diversos escenarios vitales onde desenvuelve la so obra, una de les más singulares del panorama artísticu del nuestru país. El propiu artista ye’l que va devanando el filu narrador d’esti documental de cuarenta y cinco minutos de duración y que fue producíu pola Obra Social y Cultural de Caxastur. 21 de marzu, 2006 0 FacebookTwitterPinterestEmail
Plástiques La coordinadora de ONGD convoca un concursu de cartelos by asturnet 6 de marzu, 2006 La Coordinadora de ONGD d’Asturies convoca un concursu de cartelos dotáu con un premiu de mil euros y empobináu a ilustrar como imaxen los IV Alcuentros de Cooperación al Desarrollu que van celebrase en Xixón del 8 al 11 de payares. El certame ta abiertu a cualquier artista que quiera apurrir la so visión personal al tema del que van tratar los Alcuentros de ONGD: la Delda Esterna. Los cartelos pueden facese al través de cualaquier técnica o procedimientu, siempre que seya posible la so reproducción por medios técnicos y les dimensiones nun pueden superar los 50×70 cm., en cualaquier disposición. El plazu de pieslle pa la recepción d’orixinales remata’l prósimu 4 d’abril. Más información 6 de marzu, 2006 0 FacebookTwitterPinterestEmail
Plástiques Mari Paz Tellez amuesa n’Uviéu el so llau más esistencialista by asturnet 20 de febreru, 2006 La pintora Mª Paz Téllez espón na sala Aula Abierta de la Llibrería Trabe la so obra titulada ‘Frágil’, un conxuntu d’estampes feches con diverses técniques nes que l’artista astur-madrilana amuesa’l so llau más esistencialista. L’autora de ‘Frágil’ ta acabante algamar el premiu ‘Artífice’ de pintura enriba papel, el mesmu formatu que presenta agora n’Uviéu. Téllez, nacida en 1974 en Madrid ye profesora de la escuela artística uvieína Crearte. Nesta esposición que se puede conteplar hasta’l prósimu 9 de marzu na Llibrería Trabe la pintora ufierta trece obres sobre papel d’estraza, realizaes ente 2003 y 2004 con técniques nes que concurren la cera, l’acuarela líquido, el acrílicu y, en dalgunos casos, el betún de Xudea y el carboncillo. 20 de febreru, 2006 0 FacebookTwitterPinterestEmail
Plástiques El Revillaxixéu quier convertise en centru artísticu de referencia mundial by asturnet 15 de febreru, 2006 El Centru d’Arte Revillaxixéu de Xixón allampia por entrar nel circuitu internacional pa poder amosar al públicu asturianu esposiciones de grandes nomes de la pintura y la escultura universales. El muséu que xestiona la Obra Social y Cultural de Caxastur negocia con empreses privaes les posibilidaes pa medrar como centru de referencia mundial. L’amuesa d’a lo menos un par d’esposiciones de grandes artistes a lo llargo del añu podía valir pa que’l Revillaxixéu algamara’l nivel pol qu’allampia. Según informen dellos medios informativos asturianos la Obra Social y Cultural de la Caxa ta negociando ente otres empreses con Aqualium Spain, la galería propiedá del ex ministru del PP Francisco Álvarez Cascos y la so muyer María Porto. 15 de febreru, 2006 0 FacebookTwitterPinterestEmail
Plástiques Una esposición amuesa la China en blanco y negro de Marc Riboud by asturnet 13 de febreru, 2006 Una esposición recueye la mirada personal del fotógrafu francés Marc Riboud sobre los rostros diversos de la China que conoció el míticu reporteru de l’Axencia Magnum. En “China en blanco y negro” Riboud amuesa los cambios esperimentaos pol país asíaticu a lo llargo de la segundá mitá del sieglu XX. Definíes pol propiu autor como “notes de viaxe”, les semeyes d’esta esposición, que puede visitase hasta’l prósimu 24 d’abril na Galería Fotográfica de Fnac en Parque Principado, reflexen la mirada inquieta d’un reporteru escepcional. Marc Riboud nació en Lyon (Francia) en 1923 y a los 14 años recibió de so padre una cámara Kodak como regalu. Después de combatir na resistencia francesa mientres la segunda guerra mundial dedicóse a la fotografía y en 1951 fíxose reporteru independiente. Un añu más tarde entra a trabayar pa l’Axencia Magnum cola que va cubrir gráficamente dellos de los principales conflictos bélicos de les siguientes décades: Camboya, China, Congo, Vietnam…En 1975 ye nomáu presidente de Magnum. 13 de febreru, 2006 0 FacebookTwitterPinterestEmail
Plástiques Ramón Isidoro espón nel Barjola una amuesa de la so colaboración col grupu Manta Ray by asturnet 7 de febreru, 2006 L’artista astur-lleonés Ramón Isidoro espón nel Muséu Barjola de Xixón una amuesa del so trabayu de collaboración col grupu Manta Ray na que la música de la banda xixonesa endólcase coles semeyes y los oxetos de lluz del autor d’esta instalación titulada “Hypersonic Paintings”. La obra de Isidoro va poder visitase hasta’l prósimu 14 de marzu. Isidoro, artista multimedia y técnicu d’imaxe nos conciertos en directu de Manta Ray -amás d’autor de les portaes de lo sos últimos discos- va inaugurar una nueva amuesa del so trabayu plásticu el prósimu 24 de febreru na galería xixonesa Espacio Líquido y na que se recueyen obres de pintura embaxo’l títulu “Tonic Paintings”. 7 de febreru, 2006 0 FacebookTwitterPinterestEmail
Plástiques La Mancomunidá de la Sidra entrega los sos premios de comic n’asturiano by asturnet 3 de febreru, 2006 Esti vienres día 3 de febreru a les 19 hores na Casa la Cultura de Bimenes van entregase los premios del III Concursu de Cómic n’asturianu y del I Concursu de Tires Cómiques de la Comarca la Sidra que son organizaos pol Serviciu de Mocedá de la Mancomunidá Comarca de la Sidra y el Serviciu de Normalización Lligüística de la Comarca la Sidra, col patrociniu de Caxastur y la collaboración de la Conseyería de Cultura, Comunicación Social y Turismu. Los diplomes van ser entregaos pol Alcalde de Bimenes, D. Emilio González Aller; y pol Presidente de la Mancomunidá, D. Francisco Javier Parajón Vigil. Los premiaos nesta ocasión son: MODALIDÁ 1: Cómic n’asturianu, dirixío a autores/as mayores de 14 años Premiu de 500 euros y Diploma a la obra titulada: “OCHO VALLES” l’ autor premiáu ye JOSÉ JUAN GONZÁLEZ GARCÍA El xuráu concedió dos accésit de 200 euros y Diploma a: DAVID LAFUENTE y a TOMÁS GONZÁLEZ CANELLADA MODALIDÁ 2: Tires Cómiques, feches per alumnos/es d’enseñanza primaria y secundaria de los distintos centros educativos de la Comarca la Sidra Categoría del Ciclu Primeru y Segundu de Primaria: Premiu Primeru pa MÓNICA ARCE COSTALES del Colexu Públicu Maliayo de Villaviciosa. Categoría del Ciclu Terceru de Primaria: Primer Premiu pa CLAUDIA MIRAVALLES GONZÁLEZ del Colexu Públicu Maliayo de Villaviciosa. Categoría d’Enseñanza Secundaria Obligatoria: Premiu Primeru pa MARIA SÁNCHEZ DÍAZ de Bimenes. El xuráu quixo destacar l’altu grau de calidá que se vio na modalidá de Cómic, asina como la bayurosa participación de los escolinos/es de la Comarca na modalidá de Tires Cómiques. Nel actu tamién se va inaugurar una esposición coles obres presentaes a concursu asina como la entrega d’una espublización coles obres premiaes y les finalistes. 3 de febreru, 2006 0 FacebookTwitterPinterestEmail
Plástiques Cinco artistes asturianos viaxen cola galería Espacio Líquido a ARCO by asturnet 2 de febreru, 2006 La galería Espacio Líquido presenta el llabor de cinco artistes asturianos na edición de la feria internacional ARCO qu’escomienza en Madrid el prósimu 9 de febreru. Los trabayos de Cuco Suárez, Avelino Sala, Rebecca Menéndez, Pablo San José y Chechu Álava van poder contemplase nesta cita imprescindible del mercáu del arte contemporáneu. La sala xixonesa ye la única d’Asturies qu’acude a ARCO 06 y xunta los creadores mencionaos va llevar tamién obres d’ artistas internacionales como MK Kahne, Aino Kanisto, Lamberto Teotino y Arcángel Constantini. 2 de febreru, 2006 0 FacebookTwitterPinterestEmail
Plástiques La obra de Melquiades Álvarez llega a Barcelona by asturnet 28 de xineru, 2006 El pintor asturianu Melquiades Alvarez (Xixón 1956) expón estos díes na sala d’arte contemporáneo Artur Ramon de Barcelona la parte más recien de la so obra pictórica y dibuxu. Esti artista xixones, lleva dexando la so impronta n’abondos museos y colecciones, dende que nel añu 1973 entamare la so andadura n’exposiciones individuales, siendo la primera d’elles nel Ateneu Xovellanos de Xixón. De la obra de Melquiades Álvares hai destacar que ta presente nel Museu de Belles Artes d’Asturies, nes Conseyeríes de Xultura y Turismu del Principáu d’Asturies, na colección Eduardo Chillida de San Sebastián, na Caxa d’Asturies n’Uvieu y na Fundación Príncipe d’Asturies ente otres. Tamien tien participao en dalgunes exposiciones colectives siendo la primera na Galería Benedet d’Uvieu. 28 de xineru, 2006 0 FacebookTwitterPinterestEmail
Plástiques Jaime Herrero amuesa n’Uviéu más de cuarenta años de llabor artística by asturnet 23 de xineru, 2006 EL pintor Jaime Herrero ye l’autor de la esposición retrospectiva que s’amuesa na Sala Cultural de Cajastur nel Teatru Campoamor d’Uviéu hasta’l prósimu 12 de marzu. Herrero, artista plásticu y escritor, recuerre a lo llargo de cuatro décades el so trabayu a la busca d’un llinguaxe espresionista que nun refuga la voluntá comunicadora. La esposición que se puede visitar n’Uviéu enseña cuarenta y cuatro óleos pintaos pol artista mierense dende 1963 hasta anguaño nuna esbilla comisariada por Luis Feas. Jaime Herrero llevaba más de dieciocho años ensin colgar públicamente una esposición de la so obra: agora nesta amuesa recupera una curiosa parte del so trabayu dende los oríxenes xuniéndolo a les sos últimes aportaciones nel terrén artísticu. 23 de xineru, 2006 0 FacebookTwitterPinterestEmail