Fiestes Melendi y reagge les dos ufiertes de San Mateo na viéspora del so día grande by asturnet 20 de setiembre, 2005 Melendi va ser la estrella indiscutible de la nueche de la viéspora del día grande de San Mateo. El rumberu carbayón va aprovechar el so conciertu en San Llázaro pa grabar un DVD en directu del so prósimu discu. Una banda de gaites y el cantautor Pablo Moro, como teloneru, van acompañar a Melendi nel escenariu. El cantante uvieín ufiertó ayer nel complexu deportivu de San Llázaro un conciertu de baldre pa discapacitaos físicos y psíquicos d’ochenta asociaciones d’Asturies. Na rueda de prensa que celebró en xunto al cantautor Pablo Moro anunció el prósimu empiezu d’una xira per Latinoamérica y contestó a les preguntes nel so estilu: “Si me dan el Príncipe d’Asturies, ‘dabuti'”, afirmó énte una entruga nesi sen y respective al posible triunfu mundial del pilotu Fernando Alonso, l’autor de “Nano”, declaró que-y prestaba tar el prósimu domingu “Bañándome borrachu en La Gabinona”. Melendi actúa esta nueche a les 22.30 nel escenariu de San Llázaron. Na Plaza la Catedral, los amigos de la música reaggue van tener ocasión de disfrutar d’una nueche dedicada a los ritmos xamaicanos y na que van pasar pel escenariu Kenny Knots, Afrikan Simba, Ruff Cut, Don Ricardo, Donna Marie, Don Campbell ya Irie Vibes Sound Systen Bdf. 20 de setiembre, 2005 0 FacebookTwitterPinterestEmail
ConvocatoriesFiestes Los llibreros y el grupu Anaya promueven un premiu de Lliteratura Infantil y Xuvenil by asturnet 14 de setiembre, 2005 L’asociación de Llibreros d’Asturies y el grupu editorial Anaya convoquen el I Premiu de Lliteratura Infantil y Xuvenil “Libreros de Asturias”, empobináu a obres pa rapacinos de seis a doce años y dotáu con 9.000 euros. La Conseyería de Cultura del Principáu sofita económicamente esti certame al que pueden concurrir autores de cualaquier procedencia con noveles escrites en llingua castellana. Les obres preentaes al premiu han tener una estensión mínima de 40 fueyes y ser orixinales. El plazu d’admisión fina’l prósimu 31 d’ochobre y el fallu del xuráu va dase a conocer n’Abril. La editorial Anaya comprométese a publicar la obra ganadora dientro la so colección “El Duende Verde”. Bases 14 de setiembre, 2005 0 FacebookTwitterPinterestEmail
Fiestes Escomienza San Mateo con un pregón de Susana Roza y l’actuación de Bebe na Plaza la Catedral by asturnet 9 de setiembre, 2005 Un pregón de la periodista Susana Roza abre esta tarde les fiestes de San Mateo n’Uviéu. A les 21.30 la Plaza la Catedral acueye la primer nueche de conciertos de baldre coles actuaciones de Bebe y de Muchachito Bombo Infierno. Les Pistes de San Llázaro acueyen un festival de música technocon Lego my Ego, John Acquaviva, Rinoçerose, Kevin Suanderson y Dj Reeko. La programación de conciertos sigue esti sábadu 10 con Chambao, Sara Moritán y el Trío Bombo na Plaza la Catedral y en San Llázaro les actuaciones de La Fuga, Hacia Donde y Def Con Dos. El domingu 11 ye la ocasión de la Nueche Latina na Plaza la Catedral col cubanu Elíades Ochoa, Jose Luis Cortés NG La Banda y la Orquesta Ráfaga. 9 de setiembre, 2005 0 FacebookTwitterPinterestEmail
Fiestes El gobiernu autonómicu celebra’l Día d’Asturies n’Uviéu colos sos actos institucionales by asturnet 7 de setiembre, 2005 El gobiernu asturianu entama esti miércoles 7 la celebración oficial del Día d’Asturies con un plenu estraordinariu de la Xunta Xeneral y l’actu d’entrega de les Medalles d’Asturies nel Auditoriu d’Uviéu. El conceyu de Pravia acueye esti añu la xornada festiva con Tejedor, Víctor Manuel y Ana Belén na cimera del cartelu del conciertu central. Los actos institucionales del 8 Setiembre escomiencen a les 17,30 d’esti miércoles 7 cola recepción oficial na Xunta Xeneral de los galardonaos coles Medalles d’Asturies. A les 18,00 hores principia la sesión estraordinaria del parlamentu autonómicu cola intervención de los voceros de los tres grupos presentes na cámara y la presencia en plenu del Conseyu de Gobiernu. L’actu central va escomenzar a les 19,00 hores nel Auditoriu d’Uviéu cola entrega de medalles y el discursu institucional del presidente, Vicente Álvarez Areces. 7 de setiembre, 2005 0 FacebookTwitterPinterestEmail
ConvocatoriesFiestes La reforma l’estatutu, la oficialidá y el futuru d’Asturies centren el 8 Setiembre by asturnet 7 de setiembre, 2005 Les organizaciones polítiques d’ámbitu asturianu celebren esti xueves 8 el Día de la Nación Asturiana con cuatro convocatories distintes y estremaos actos cívicos. La reivindicación del autogobiernu y la oficialidá énte la prósima reforma l’Estatutu, la memoria hestórica del país y el futuru d’Asturies centren los mensaxes de los partíos nacionalistes. Uviéu ye’l llugar escoyíu pal actu común de PAS con URAS na Plaza la Catedral y tamién por Andecha Astur pa la so manifestación en demanda d’un futuru p’Asturies, n’Asturies. En Xixón coinciden les estremaes convocatories de Izquierda Asturiana (IAS) y l’actu unitariu d’Izquierda Xunida, Bloque por Asturies y Lliberación. El Partíu Asturianista de Xuan Xosé Sánchez Vicente y la Unión Renovadora Asturiana de Sergio Marqués van celebrar el “Día del País Asturiano” con una ufierta floral énte les estátues de los reis na Plaza la Catedral d’Uviéu y una xinta d’hermandá en Xixón. Andecha Astur, pel so llau, entama una manifestación con salida nel Paséu los Álamos d’Uviéu a les 13,00 hores embaxo la llienda “Futuru p’Asturies, Futuru n’Asturies”. La convocatoria d’A.A. nun ta autorizada por Delegación de Gobiernu por presentar la documentación n’asturianu y nel momentu de redactar esta información la prohibición de la marcha calteníase. Después de la manifestación la organización moza Darréu tien convocada una espicha popular. L’actu unitariu d’Izquierda Xunida, Bloque por Asturies y Lliberación va consistir nun mitin siguíu d’una espicha popular nel Parque los Pericones de Xixón. Nel mitin van intervenir los másimos cabezaleros de les organizaciones convocantes: Jesús Iglesias (Izquierda Xunida), Rafa Palacios (Bloque por Asturies) y Cheni Uria (Lliberación) y darréu va haber actuaciones musicales, ente elles la de la cantaora Mari Luz Cristobal Caunedo. La cuarta convocatoria del 8 Setiembre va entamala IAS con una ufierta de lloréu na Plaza del Parchís nel edificiu que fuera la sé del Conseyu Soberanu d’Asturies siguida d’una intervención del líder d’esta organización, Faustino Zapico. Los militantes y simpatizantes d’Izquierda Asturiana van xuntase darréu del actu políticu nuna fartura de fraternidá. 7 de setiembre, 2005 0 FacebookTwitterPinterestEmail
ConvocatoriesFiestes Art Nalón aumenta nun 50 por cientu na participación de concursantes by asturnet 6 de setiembre, 2005 El certamen Art Nalón recibió na edición d’esti añu el númberu más grande de participaciones nes modalidaes de teatru y cortometraxes. Un total de venticinco compañíes unviaron les sos propuestes al concursu escénicu y ciento venticinco trabayos fueron los que se presentaron na modalidá de realizaciones cinematográfiques. La conceyal de Mocedá del Ayuntamientu de Llangréu -convocante del certame-, Laura Rodríguez espresó esta mañana el so contentu pola cifra alta de participantes nesti concursu empobináu a los creadores xóvenes. Pa la responsable de la estaya moza municipal esti aumentu de la participación que cifró nun cincuenta por cientu respective a la edición del añu pasáu, supón “un verdaderu ésitu del certame y la so consolidación”. De les venticinco compañíes non profesionales presentaes al apartáu teatral, el xuráu d’Art Nalón seleccionó a diez pa que representen los sos montaxes dende’l prósimu domingu 11 de setiembre nel Nuevu Teatru de La Felguera. Nel apartáu cinemátograficu escoyéronse venticinco de los ciento cincuenta y cinco cortometraxes mandaos a concursu. Los cortometraxes van poder vese a lo llargo del mes de setiembre nel Nuevu Teatru de La Felguera. Les dotaciones d’entrambes modalidaes del certame Art Nalón son de 1.500, 1.125 y 750 euros, a los qu’hai d’añadir la beca de 600 euros pa les compañíes de fuera d’Asturies, los 300 pa les asturianes y, nel casu de los cortometraxes, 600 euros. 6 de setiembre, 2005 0 FacebookTwitterPinterestEmail
ConvocatoriesFiestes La Fundación Muñiz Zapico entama la segunda edición del so Concursu de Microrrelatos by asturnet 5 de setiembre, 2005 La Fundación Juan Muñiz Zapico acaba de convocar por segundu añu el so Concursu de Microrrelatos “Manuel Nevado Madrid”. El certame busca premiar narraciones perbreves escrites n’asturianu o en castellanu y relacionaes temáticamente cola minería. La brevedá ye xunto a la orixinalidá el requisitu fundamental del premiu convocáu pola fundación cultural de Comisiones Obreres d’Asturies. Asina nengún cuentu presentáu va poder pasar de les cuarenta llinies. El primer premiu del concursu ta dotáu con 1.000 euros y hai diversos accesit: asturianu, de tema hestóricu y mozu. Les obres tienen d’unviase a la Fundación Juan Muñiz Zapico (II Concursu de Rellatos Mineros Curtios “Manuel Nevado Madrid”) c/ Santa Teresa 15, CP 33005 Uviéu enantes del prósimu 21 d’ochobre. El fallu va dase a conocer el 4 d’avientu, na celebración de Santa Bárbara, la Fiesta de la Minería. Bases del concursu de microrrelatos “Manuel Nevado Madrid” 5 de setiembre, 2005 0 FacebookTwitterPinterestEmail
Fiestes L’escritor Hans Christian Andersen protagoniza la Fiesta de Seronda del Botánicu de Xixón by asturnet 3 de setiembre, 2005 L’escritor Hans Christian Andersen va protagonizar la Fiesta del Equinociu de Seronda que va celebrase nel Xardín Botánicu de Xixón el prósimu 18 de setiembre. La remembranza del bicentenariu del cuentista danés va facese con representaciones teatrales d’obres suyes, un conciertu de la Orquesta Ensambla y una nueche máxica con personaxes mitolóxicos asturianos. Les entraes pa la Fiesta de la Seronda ya tan puestes a la venta a un preciu de 5 euros pa los adultos y 3,5 euros pa los rapacinos. Los asistentes van recibir cola entrada un exemplar de “El coriín feu” pa los neños y “El xardineru y los señores” pa los adultos. 3 de setiembre, 2005 0 FacebookTwitterPinterestEmail
Fiestes Xixón y Uviéu concentren los actos políticos del Día de la Nación Asturiana by asturnet 31 d'agostu, 2005 Uviéu y Xixón son los llugares escoyíos poles distintes organizaciones polítiques asturianes pa entamar los sos actos del Día de la Nación Asturiana. El Bloque por Asturies xunto a Izquierda Xunida, Andecha Astur, PAS xunto a URAS ya IAS pel so llau organicen les sos convocatories pa un 8 de setiembre con calter reivindicativu. Xixón ye’l llugar onde’l Bloque ya IX van celebrar el so actu conxuntu con un mitin nel Parque de los Pericones, nel que van intervenir Rafael Palacios y Jesús Iglesias, siguíu d’una espicha popular. Na mesma ciudá los militantes d’Izquierda Asturiana van xuntase al meudía pa facer una ufierta floral al vieyu Conseyu Soberanu d’Asturies y Lleón onde tuvo la so sé mientres la guerra civil, na Plaza del Parchís. Andecha, pel so llau, convoca una manifestación nel Paséu de los Álamos d’Uviéu a les 13.00 embaxo’l lema: “Futuru p’Asturies, futuru n’Asturies” y acabante la marcha la organización moza Darréu va celebrar una espicha popular. Los coaligaos PAS y URAS van celebrar el so 8 de setiembre tamién n’Uviéu con una ufierta floral al meudía énte les estatues de los reis asturianos na Plaza la Catedral y pela tarde los militantes d’entrambos partíos van celebrar una xinta nun llagar de los alredores de Xixón. Los actos insitutucionales del Día d’Asturies van celebrase énte Uviéu y Pravia, el llugar elexíu esti añu pa la xornada de calter festivu del gobiernu asturianu. 31 d'agostu, 2005 0 FacebookTwitterPinterestEmail
Fiestes Los escanciaores, protagonistes de la XIV edición de la Fiesta la Sidra by asturnet 26 d'agostu, 2005 La XIV edición de la Fiesta la Sidra, que va celebrase en Xixón a lo llargo de tol fin de selmana, entama güei con una xornada dedicada al ‘escanciaor’, na que destaca’l concursu que se fai na Plaza Mayor a partir de les cinco la tarde, y l’escanciáu multitudinariu amenizáu pola banda de gaites ‘Villa de Xixón’, nel que se va batir el record mundial. Nos Xardinos de la Reina de Xixón va tener llugar un mercadillu de la sidra y la manzana na que se van poder mercar diferentes postres, artesanía y creaciones gastronómiques que tienen que ver con estos productos. Esti mercáu va tar abiertu les 24 hores del día. A les siete de la tarde los participantes nel record mundial d’escanciáu simultáneu van empezar situase nel arenal de la playa Poniente, pa qu’a les ocho comience’l multitudinariu escanciáu. Mañana sábadu, l’Orfeón Xixones va facer amuesa del so repertoriu de cantares típicos de chigre a partir de les nueve la nueche. Mentes que’l domingu, a les doce la mañana, y mentes dure la degustación nos puestos, fairáse entrega del ‘Tonel d’oru’. L’’Eloxu d’oru’ a la meyor sidra será a les seis y media la tarde, enantes de qu’entame l’actuación de la banda de gaites ‘Villa de Xixón’, que zarrará’l certame interpretando l’’Asturies, patria querida’. 26 d'agostu, 2005 0 FacebookTwitterPinterestEmail