Cine Los años eléctricos repasa los últimos trenta años nel panorama musical asturianu by asturnet 30 de mayu, 2006 Jose Braña y Chus Neira son los autores d’un documental que se presenta esta tarde, a partir de les ocho y cuartu, nel Teatru Filarmónica d’Uvieu baxo’l títulu de ‘Los años electricos’. Producíu pola productora de programes del Principáu pa la Televisión Autonómica, va estrenase dientro del ciclu Intersecciones, onde habrá música en directu de la mano d’Igor Paskual y Marcos Montoto, Natalia Quintanal y Carlos Redondo, Arma X, Lego my Ego y Cactus Jack. El documental recueye dende ensayos del grupu Astur, pioneru na renovación del fock n’Asturies, a escenes memorbles de Tino Casal, pasando pel rock de Los Stukas y Jorge Martínez, vocalista de Los Ilegales, hasta les nueves tendencies nel hip hop asturianu. Dos hores de grabación qu’axunten entrevistes colos llíderes de les bandes más conocíes d’Asturies, como ye’l casu de la charra ente Nacho Vegas y Igor Paskual nun tren nel qu’entrambos músicos analicen los diferentes puntos de vista de la música nes ciudaes d’Uvieu y Xixón. Xunto a ellos, entrevistes a personaxes que lleven tola vida alredol del panorama musical asturiana. 30 de mayu, 2006 0 FacebookTwitterPinterestEmail
Cine Eurosferas estrena un ciclu de cine pa remembrar los 20 años d’Asturies n’Europa by asturnet 29 de mayu, 2006 El xueves 1 de xunu escomenzará nel centru cultural Caxastur d’Uvieu’l ciclu de cine europeu Eurosferas organizáu pola Cámara de Comerciu d’Uvieu, la Dirección Xeneral d’Asuntos Esteriores y Caxastur. Esta iniciativa, que proyectará obres de directores como Emir Kusturica, Costa-Gavras y Hans Weingartner, ta enmarcada dientro de la campaña “Asturies n’Europa”, que remembra los 20 años del ingresu d’España y Asturies na Unión Europea. L’amuesa, que va arrancar cola proyección de la comedia “Las muñecas Rusas” (Les poupees russes) del director frances Cedric Klapisch, va ser inaugurada pol Conseyeru de Xusticia, Seguridá Pública y Rellaciones Esteriores, Francisco Javier García Valledor, y del Presidente de la Cámara de Comerciu d’Uvieu, Severino García Vigón. Con un total de 8 obres actuales de diferentes directores europeos, el ciclu quier amosa-y al ciudadanu una visión del marcu cultural y social europeu y fomentar la reflexón sobre lo que supunxo p’Asturies y pal conxuntu del país la entrada al marcu europeu xusto cuando se cumplen 20 años d’esta incorporación. Nel curtiu repasu que quier facer el ciclu Eurosferas sobre l’actualidá del cine d’autor europeu tendrán sitiu autores tan estremaos como’l finlandes Aki Kurismaki del que se proyectará la so comedia “Un hombre sin pasado”, el polemicu director serbiu Emir Kusturica con “La vida es un Milagro”, el cineasta naturalista frances Constantin Costa-Gavras col so trabayu “Arcadia”, l’italianu Vincenzo Marra cola gallardonada “Viento de Tierra” o’l austríacu Hans Weingartner, col so segundu llargometraxe “Los Edukadores”. L’aportación española al ciclu Eurosferas llegá con “El Cielo gira”, un documental de la directora soriana Mercedes Álvarez sobre la vida n’Aldealseñor, un pequeñu pueblu de Soria nel que depues de mil años d’hestoria interrumpida sólo queden 14 habitantes. La cinta llogró’l premiu a la meyor película y el de la Fipresci nel Festival de Cine Independiente de Buenos Aires y los de meyor película nel Festival de Rótterdam y el Festival de París Cinema du Reel. El 27 de xunu a les 20 hores va pesllase’l ciclu cola proyección del film “Struggle”, ópera prima de l’austriaca Ruth Mader, un drama sobre la situación llaboral n’Europa. 29 de mayu, 2006 0 FacebookTwitterPinterestEmail
Cine Teresa Marcos ganal II Festival de Cine Asturianu by asturnet 11 d'abril, 2006 La obra “Por estar contigo” de la realizadora asturiana Teresa Marcos foi la ganadora del II Festival de Cine Asturianu que tuvo llugar ayeri nun actu nel teatru Filarmónica, d’Uvieu, nel que se-y rindió homenaxe Mary Paz Pondal. Javier Vidal, conceyal de Rellaciones Institucionales y Hermanamientos del Ayuntamientu d’Uvieu y másimu representante n’Asturies de la SGAE, foi l’encargáu d’entrega-y a la veterana actriz uvieína una reproducción de la escultura “Pensadora”. Na gala que tuvo llugar ayeri a les seis y media la tarde, nel teatru Filarmónica d’Uvieu, el curtiometraxe de Teresa Marcos, “Por estar contigo”, foi’l ganador del premiu al Meyor Curtiu Asturianu n’otra llingua, que foi entregáu por Marisa Vallejo, amás de llograr el premiu a la Meyor dirección. La distinción consistía nún modernu fruteru de cristal, n’homenaxe a “El robo de la fruta”, el primer documental asturianu de ficción que l’añu pasáu cumplía cien años. Per otra parte, l’apartáu de Meyor Documental premió la obra “Lluvina”, mentes que’l Meyor Guíón foi pa “Entaína”. Ánxel Nava fixo un monólogu sobre los problemes de facer cine n’Asturies, pa depues dar pasu a la categoría de Meyor Actor que correspondió a Carlos Chamarro. La galardonada como Meyor Actriz foi Montse Mostaza. Finalmente, “Hestoria d’un vezu” llogró’l premiu al Meyor Curtiumetraxe n’Asturianu. 11 d'abril, 2006 0 FacebookTwitterPinterestEmail
Cine Luis San Narciso lleva’l II Trasgu d’Oru del Valle de Cuna y Cenera by asturnet 6 d'abril, 2006 El profesional del cine y la televisión Luis San Narciso va recibir el premiu que concede la Hostelería del Valle de Cuna y Cenera a aquelles persones que pola so trayectoria exemplar, dedicación o imaxe pública, ayudaren a promocionar el valle, la Comarca’l Caudal o Asturies. La cena d’entrega d’esti reconocimientu a San Narciso y la presentación de les VIII Xornaes Gastronómiques de Primavera ta prevista pal prósimu 24 d’abril. El xuráu del premiu, compuestu por Isabel Sánchez (conceyala de Turismu), Ismael González Arias (director de la Casa Cultura de Mieres), Fermín Rodríguez (director del C-Codet), Celso Fernández (cadena COPE), Carlos Cuesta (TVE Asturies) y Laudelino Vázquez (Club de Prensa La Nueva España), dicidió da-y por unanimidá’l Trasgu d’Oru 2006 a Luis San Narciso (Mieres, 1958) pola so impresionante trayectoria nel mundu de la escena y como director de casting en series de televisión y películes, tando agora d’actualidá polos sos últimos trabayos, “Volver” de Pedro Almodóvar y “El Capitán Alatriste” d’Agustín Díaz Llanes. 6 d'abril, 2006 0 FacebookTwitterPinterestEmail
Cine Presentación del II Festival de cine asturianu by asturnet 6 d'abril, 2006 El II Festival de cine asturianu, que tien a l’actriz Mary Paz Pondal como premiu honoríficu al reconocimientu de tola so carrera na gran pantalla y nos escenarios de teatru, va presentase nel Club de Prensa de La Nueva España a les siete la tarde de la mano del so director, Xavi Vilareyo, que va tar acompañáu polos productores Llucía Herrera, Jorge Rivero, Iraida Lombardía, Roberto Bernabeu, Alberto Arce y Rodrigo Lueje, que van presentar les sos obres. Les obres que cuenten con mayor númberu de nominaciones son “Nada personal” y “Lo que el ojo no ve”, con cinco nominaciones a los premios, siguida por “Entaína”, “La muria d’Adriano”, “Por estar contigo” y “Tierra de guerrilleros” con cuatro nominaciones. Con tres nominaciones ta la obra titulada “…Y del hijo”, con dos “Gritar” y “Corpus trovata”, y con una nominación “El pozu”, “Una historia cualquiera” y “Hestoria d’un vezu”. Los trabayos nominaos al Premiu al Meyor Documental son: “Lluvina”, “Bon Voyeur”, “Nenyure”, “Sáhara”, “Mitoloxía del llechi” y “Nablús la ciudad fantasma”. 6 d'abril, 2006 0 FacebookTwitterPinterestEmail
Cine Arranca’l V Certame de Cortos Villa d’Avilés by asturnet 2 d'abril, 2006 El conceyal de Mocedá del Ayuntamientu d’Aviles, Luis Ramón Fernández Huerga, presentó’l pasáu vienres día 31 de marzu, el V Certame de Cortos Villa d’Aviles que se va cellebrar ente los díes 5 y 8 d’abril na Casa Cultura de la ciudá. Huerga repasó xunto al director del festival, Jorge Iván Arguiz, les numberoses proyecciones que van centrar esta nueva edición del certame, asina como los profesionales que van tar presentes na ciudá, amás del circuitu d’actividaes paraleles que completen un programa que per primer vez estrena la obra ganadora del II Concursu de Proyectos de Cortometraxes -RSU: “Recuerdos sórdidos urbanos”, de Jose Manuel Carrasco Capilla. El festival arranca cola proyección de dalgunos de los meyores cortos d’animación fechos nel nuestru país, qu’abarca dende vieyes ayalgues hasta trabayos que tán acabantes de salir de la mesa de montaxe. Otres de les secciones del festival son la yá clásica de “Documentales”, la “Nueche de Cultu” de Jesús Palacios, la “Videosesión Lloca” conducida por Borja Crespo, “Un vistazu atrás”, sección na que se percuerren los cortos premiaos n’ediciones anteriores y la llamada “Los Otros”, onde se presenten dalgunos trabayos valoraos pol so especial interes pero que nun llograron llegar a la final. Too ello xunto coles proyecciones de los trabayos finalistes al “Meyor Cortu Asturianu”. Programa del Festival 2 d'abril, 2006 0 FacebookTwitterPinterestEmail
Cine Estrénase na rede “The Meatrix 2” by asturnet 30 de marzu, 2006 Esti día ta acabante de ser estrenada una de les pelis d’animación alternatives más nomaes del sieglu XXI: The Meatrix II, Revolting!, la segunda parte de la famosa parodia de la película The Matrix que trata de facer una denuncia sobro la esplotación de les granxes de vacuno y de la que se da anuncia en dellos blogs hispanos. La primer versión d’esta parodia que ta protagonizada por Leo, Chickity y Moopheus (en llugar de Neo, Trinity y Morpheo), foi vista por 10 millones de persones en tol mundu, lo que pue dar una idega de la so emportancia nel universu alternativu de la rede. Na web hai tamién un tour virtual onde se puen ver con detalle toles referencies que denuncien en The Meatrix. Web oficial de “The Meatrix II, Revolting!” 30 de marzu, 2006 0 FacebookTwitterPinterestEmail
Cine ARDA edita dos DVD colos meyores cortos de directores asturianos n’español by asturnet 24 de marzu, 2006 L’Asociación de Realizadores d’Asturies (ARDA) presentó esti xueves 23 n’Uviéu los dos nuevos volúmenes de la colección de DVD entamada apocayá con una esbilla de los meyores cortos en llingua asturiana. Agora ye la ocasión de les obres feches por directores asturianos en castellano y inclúi títulos como “Nenyure” de Jorge Rivero, “El beso de la tierra” de Lucinda Torre o “Lo que el ojo no ve” de José Braña. L’oxetivu de l’asociación qu’axunta a los realizadores asturianos ye difundir la obra que tan desarrollando los creadores de les nueves xeneraciones y que non siempre tienen la difusión que merecen. Los dos nuevos volúmenes publicaos recueyen cortometraxes de los directores Lucinda Torre, Alberto Pardo, Nacho Carballo, Gonzalo Tapia Suárez, Alfonso S. Suárez, Elena Tamés, Carlos Navarro, Tomás Fernández, José Antonio R. Maniega, Iñaki Ibisate, Sergio Sánchez, Jorge Rivero, Amanda Castro, Roxana Popelka, Teresa Marcos, Javier Martín, José Braña, Fernández Prada y Antonio de Benito. 24 de marzu, 2006 0 FacebookTwitterPinterestEmail
Cine Javier Maqua presenta el DVD de “Apuntarse a un bombardeo” by asturnet 19 de marzu, 2006 El realizador Javier Maqua presenta esti llunes 20 n’Uviéu la edición en DVD del so documental “Apuntarse a un bombardeo”. La productora uvieína Blaster Televisión y l’Axencia de Cooperación del Principáu promueven esta versión doméstica d’una película protagonizada polos brigadistes asturianos que s’opunxeron en Bagdag a la invasión d’Irak. El documental, producíu pol actor Guillermo Toledo y Geno Cuesta, narra el realcuentru de los brigadistes na casa qu’una d’elles, Teresa Tuñón, tien nel conceyu de Quirós: ende remembren los díes pasaos en Bagdag embaxo los bombardeos del exércitu americanu y británicu al través de la llectura de los sos diarios personales. La edición en DVD recueye dellos de los testos escritos por dos de los activistes: Teresa y Mino, asina como otros del propiu director Javier Maqua y del responsable de Cooperación del Principáu, Rafa Palacios. El DVD “Apuntarse a un bombardeo” preséntase esti llunes 20 a les 18.30 nun actu na Biblioteca del Fontán n’Uviéu, con presencia del autor del documental y de los sos principales protagonistes. 19 de marzu, 2006 0 FacebookTwitterPinterestEmail
Cine Un miniciclu de Caxastur recupera’l melodrama americanu en seis títulos clásicos by asturnet 14 de marzu, 2006 La Obra Social y Cultural de Caxastur escomienza esti martes 14 un miniciclu de cine dedicáu al melodrama. El programa, coordináu pol director del Festival de Cine de Xixón, José Luis Cienfuegos, presentóse esti llunes n’Uviéu y inclúi títulos como “Esplendor en la hierba” d’Elia Kazan o “Dos en la carretera” de Stanley Donen. Los primeros títulos en proyectase son el citáu de Donen: “Dos en la carretera”, que podrá vese esta tarde a les 20.15 nel centru cultural de Caxastur n’Uviéu y “Siempre hay un mañana” de Douglas Sirk, proyectáu nel Monte de Piedá de Xixón a la mesma hora. El ciclu va desarrollase nos centros culturales de la Obra Social de Caxastur de Xixón, Uviéu, Mieres y Sama hasta’l prósimu 29 de marzu cola proyección de “Quiero vivir” de Robert Wise, “Tu y yo” de Leo MacCarey y “Esplendor en la hierba” d’Elia Kazan. La programación entera y los horarios pueden consultase nel portal de la Obra Social y Cultural de Caxastur , na sección de ciclos . 14 de marzu, 2006 0 FacebookTwitterPinterestEmail