Comunicación Jean Daniel, Régis Debray y Mario Soares participen nun debate organizáu pola Fundación Príncipe d’Asturies by asturnet 7 de payares, 2005 El fundador del diariu Le Nouvel Observateur Jean Daniel va participar xunto al filósofu francés Règis Debray y l’ex presidente portugués Mario Soares nun debate organizáu pola FPA en conmemoranza del so XXV aniversariu. L’actu va celebrase esti xueves 10 nel Teatru Palacio Valdés d’Avilés y nel van participar tamién Luc Montagnier y Jerónimo López. Los participantes nel debate d’Avilés tienen en común amás de la so proyección internacional l’haber sío premiaos pola Fundación Príncipe d’Asturies con dalgún de los sos galardones. L’ex ministru d’Educación Gustavo Suárez Pertierra va ser l’encargáu de moderar l’alderique, el primeru d’un ciclu organizáu pola fundación asturiana pa xuntar de nuevu nel Principáu a dellos de los premiaos polos galardones que concede añalmente la institución. 7 de payares, 2005 0 FacebookTwitterPinterestEmail
Comunicación El cursu d’asturianu pa periodistes de la Conseyería inda nun cubrió toles sos places by asturnet 4 de payares, 2005 El cursu de llingua asturiana pa profesionales de los medios d’información qu’organiza la Conseyería de Cultura inda nun cubrió les trenta y cinco places que s’ufiertaben pa participar nél. El modulu formativu va empobináu a la capacitación llingüística de periodistes y la so matriculación ye gratuíta. La Oficina de Política Llingüística del Principáu y el Seminariu de Filoloxía Asturiana de la Universidá d’Uviéu son los organizadores d’esti cursu coordináu pol profesor Xulio Viejo y empobináu a profesionales de la información, ya seyan llicenciaos en Periodismu o que desenvuelvan el so llabor en medios de comunicación. El prósimu 10 de payares ye la fecha final pa matriculase nesti cursu que se va impartir ente’l 11 de payares y el 17 d’avientu, con una duración de 30 hores distribuíes en xornaes de viernes y sábadu. 4 de payares, 2005 0 FacebookTwitterPinterestEmail
Comunicación Andecha Astur denuncia a la TVG poles sos emisiones n’Asturies by asturnet 3 de payares, 2005 Andecha Astur denunció énte’l Ministeriu d’Industria a la Televisión de Galicia (TVG)poles sos emisiones en territoriu asturianu que la formación nacionalista entiende que pueden ser illegales. La organización pide-y retiren a la Xunta de Galicia la concesión del ente de comunicación de nun terminar estes tresmisiones fuera les sos llendes administratives. Según informa Andecha na so web oficial la denuncia énte Industria vien motivada en que la sintonización de la señal de TVG n’Asturies podía tar vulnerando la llei que regula la concesión de les canales autonómiques. Esta normativa, recueye que les emisiones «han ceñise, de forma esclusiva, al so ámbitu territorial, nun pudiendo, por tanto, estendese fuera de les sos fronteres». Andecha Astur considera que la emisión de la TVG débese «única y esclusivamente a una campaña de galleguización del Occidente d’Asturies» y cita les pallabres del d’aquella presidente de la Xunta de Galicia ,Manuel Fraga, afirmando na nauguración d’un repetidor en Ribadeo qu’esta infraestructura «permitirá culturizar la reserva india del Occidente d’Asturies, vamos tresmiti-yos los fondos raígaños de la nuestra cultura». 3 de payares, 2005 0 FacebookTwitterPinterestEmail
Comunicación Andecha de Noreña acusa a los grupos municipales de paralizar la radio del conceyu by asturnet 26 d'ochobre, 2005 L’agrupación local de Noreña d’Andecha Astur acusa a los grupos políticos de la corporación del conceyu de paralizar “por desidia” la puesta en marcha d’una radio municipal demandada de cuantayá por vecinos y colectivos sociales.La formación nacionalista pide que’l tema se lleve a plenu y s’aprebe l’empiezu de la emisora. Andecha afirma que después de la campaña popular llevada a cabu por diversos colectivos del conceyu, ente ellos grupos políticos presentes na corporación, l’entamu de Radio Noreña sigue pendiente de la iniciativa del Ayuntamientu. Los nacionalistes critiquen a los grupos municipales por escaecer una promesa qu’incluyeron nos sos programes electorales y pídi-yos qu’actúen “en consecuencia” y d’alcuerdu colos compromisos adquiríos, como’l de poner en funcionamientu la emisora municipal. 26 d'ochobre, 2005 0 FacebookTwitterPinterestEmail
Comunicación Radio Llangréu difunde les sos emisiones n’Internet by asturnet 20 d'ochobre, 2005 La emisora Radio Llangréu de la Productora de Programes del Principáu escomienza una nueva etapa cola so difusión al través d’Internet.La programación diaria de la radio pública va poder siguise d’agora pa en delantre dende cualquier llugar del mundu. Nesta nueva etapa los usuarios de la Rede van poder escuchar en tiempu real los conteníos de la programación y sumase a los oyentes que ya sintonicen davezu les emisiones de frecuencia modulada nel 94.9 (comarca del Nalón) y 101.8 (comarca del Caudal). Radio Llangréu emite una programación diaria, de llunes a viernes, de cinco hores de duración, dende les 900h. hasta les 1400h. La ufierta de la emisora inclúi informativos, entrevistes, música y entretenimiento.A esta programación diaria hai d’añadir la emisión de los sábados: dende les 1200h hasta les 1400h. Nesti casu trátase d’una programación na que’l deporte ye protragonista. Radio Llangréu 20 d'ochobre, 2005 0 FacebookTwitterPinterestEmail
Comunicación Los Premios Príncipe d’Asturies convierten Uviéu en centru d’atención mundial by asturnet 20 d'ochobre, 2005 L’ausencia de Letizia Ortiz por mor del so avanzáu estáu de xestación y la presencia del pilotu Fernando Alonso pa recibir el Premiu Príncipe d’Asturies de los Deportes marquen l’interés informativu n’Uviéu de la ceremonia d’entrega de los galardones que lleven el títulu del heriede de la corona y que va asitiar el Teatru Campoamor esta tarde en centru d’atención mundial. Un importante despliegue policial y de seguridá va acompañar esti viernes 21 la celebración del actu d’entrega de los Premios de la Fundación Príncipe d’Asturies. A l’avezada presencia de numberosu públicu nos alrededores del Hotel Reconquista y el Campoamor pa ver de cerca a les personalidaes galardonaes y a los miembros de la familia real española, va sumase esti añu l’interés suscitáu pola figura del pilotu Fernando Alonso, verdaderu ídolu de mases en toa Asturies y sobremanera na so ciudá natal. La ceremonia va retresmitise en directu por Televisión Española y pola canal informativa que tien colgao la Fundación Príncipe d’Asturies n’Internet. Per primer vez, amás del español y l’inglés, la tresmisión va dase n’otros idiomes: francés, italianu, alemán y portugués. 20 d'ochobre, 2005 0 FacebookTwitterPinterestEmail
Comunicación La canal n’Internet de la Fundación Príncipe d’Asturies recibe más de doce mil visites by asturnet 19 d'ochobre, 2005 La Fundación Príncipe d’Asturies punxo en marcha el pasáu 15 d’ochobre y por tercer añu consecutivu una nueva canal web informativa pal siguimientu de tolos actos que se desarrollen nos díes previos a la celebración de la ceremonia d’ entrega de los Premios Príncipe d’Asturies nel so XXV Aniversario. Hasta la fecha contabilizáronse, tres los primeros cuatro díes de funcionamientu de la canal, más de 12.000 visites. Los conteníos d’esta canal informativa adicional actualícense constantemente y ofrecen al usuariu diferentes artículos, vídeos y cróniques. Amás, nel portal inclúise una amplia galería d’imáxenes de caún de los galadonaos, asina como de los distintos actos que se desarrollen alrodiu los Premios. www.canalfpa.com / www.fpachannel.com 19 d'ochobre, 2005 0 FacebookTwitterPinterestEmail
Comunicación La escritora Nélida Piñón y el neurólogu Antonio Damasio abren el ciclu de conferencies de la FPA by asturnet 17 d'ochobre, 2005 La escritora brasileira Nélida Piñón y el neurólogu portugués Antonio Damasio abren esti miércoles 17 el ciclu de conferencies qu’entama la Fundación Príncipe d’Asturies coincidiendo colos actos d’entrega de los premios que lleven el so nome. L’autora galardonada col Príncipe d’Asturies de les Lletres va intervenir a les 19.00 hores nel Aula Magna de la Universidá d’Uviéu y a la mesma hora, el tamién premiáu, nesti casu col galardón correspondiente a la Investigación Científica y Técnica, va falar nel Salón d’Actos de Caxastur. Los actos de la Fundación tienen esti miércoles 19 en Xixón a les 20.00 hores na Colexata de San Xuan Bautista otru de los sos escenarios col conciertu que va ufiertar el trompetista Vladimir Kafelnikof xunto la Orquesta de Cámara de la Escuela Internacional de Música de la FPA, un conceirtu que s’inxerta nel marcu de la XIV Semana de Música de Caxastur. 17 d'ochobre, 2005 0 FacebookTwitterPinterestEmail
Comunicación Areces valora positivamente l’alcuerdu ente ALSA y la británica NX by asturnet 12 d'ochobre, 2005 El presidente del gobiernu asturianu Vicente Álvarez Areces valoró de manera positiva l’alcuerdu comercial robláu ente’l grupu ALSA y la empresa británica NX. Pal responsable del executivu autonómicu los compromisos de la firma de la familia Cosmen cola nuetra comunidá siguen vixentes y tamién l’asturianidá de la marca. Preguntáu polos informadores alrodiu de la opinión del gobiernu del Principáu pol alcuerdu ente ALSA y NX, Areces afirmó que Alsa sigue como tal marca n’Asturies, colos xestores actuales, colos sos responsables y, sobremanera, cola so vocación d’asturianía no que cinca al compromisu que la familia Cosmen tuvo siempre, históricamente, con Asturies”. Álvarez Areces valoró’l fechu de que la empresa asturiana de tresporte “va caltener los empleos va ampliar l’ámbitu de negociu a otros países, por tanto a priori, esa operación d’integración significa un despliegue internacional de la empresa con una vocación de desarrollar actividades en tol mundu”.Pal presidente del executivu autonómicu l’alcuerdu algamáu ye bonu y “a priori, parez una operación positiva pa la nuestra Comunidá, nel sen de que la empresa, y les persones qu’hasta agora la taben xestionando y los propios accionistes van siguir nel negociu del tresporte y lóxicamente tratando de desarrollar actividaes non namás nel tresporte per carretera, sinón n’ otros ámbitos. 12 d'ochobre, 2005 0 FacebookTwitterPinterestEmail
Comunicación Preséntase la Oficina d’Infomación de la Comunidá Europea al Ciudadanu by asturnet 9 d'ochobre, 2005 Esta mañana inauguróse n’Uviéu la Oficina d’Información de la Comunidá Europea al Ciudadanu, un serviciu col que se tenta acercar les instituciones de la Unión a los usuarios de les redes locales de busca de documentación.El cibercentru de La Lila ye la sé de la nueva oficina. L’actu d’apertura de la Europa Direct Asturias cuntó cola presencia d’Hugo A. Morán, Presidente de la Federación Asturiana de Conceyos (FACC), del conceyal uvieín Agustín Iglesias Caunedo y de Teresa Frontman, Encargada del Serviciu de Representación de la Comisión Europea n’España. La oficina inaugurada d’Europa Direct ye una estructura de información europea que permite a los estudiantes, profesoráu, administraciones locales, colectivos y asociaciones, trabayadores n’activo y desempleaos, y a ciudadanos en xeneral, obtener asesoramientu, ayuda y respuesta a toes les cuestiones ya intereses sobre la Unión Europea y los países que la formen. 9 d'ochobre, 2005 0 FacebookTwitterPinterestEmail