Nolwenn Leroy nun defraudó en Lorient con un espectáculu bien producíu

Nolwenn Leroy nun defraudó en Lorient con un espectáculu bien producíu
06 agostu 19:19 2019 Imprimir

L’Espace Marine de Lorient  enllenose na nueche del domingu pal conciertu de Nolwenn Leroy que tenía colgáu’l cartelu de “nun hai billetes” dende munchos díes enantes y que nun defraudó a los sos seguidores, magar siga siendo un espectáculu dafechamente comercial, onde la recuperación del folc bretón ye más un recursu qu’una propuesta.

La sorpresa del conciertu foi la cantante marroquina Clarisse Lalanant, que fixo de telonera con una actuación curtia pero fondamente apreciada pol públicu. En dellos cantares, fízonos afayar una parte de los sos repertorios: Youenn Gwernig, con “It was you”, con una música de Dan ar Bras, “Da Feiz hon Tadou Koz”, incluyida nel so álbum “Kantikoù”. “Breizh”, “Glenmor “y “Le Métèque “de Georges Moustaki en bretón. Al igual que Yann Tiersen más apocayá, siguió un llargu entrenamientu en bretón en 2014 pa componer y comunicase nesti idioma y notose enrriba del escenariu. Pal so recordatoriu, interpretó “J’avais cinq enfants”, un cantar qu’escribió pa la reunificación de Bretaña.

Nolwenn Leroy presentó un espectáculu sobro la música folc de los años 70. En 2017, en llanzando’l so álbum “Gemme” apenes esperó un añu pa presentar “Folk”, que foi l’espectáculu presentáu nesti Festival de Lorient.. Con delles balaes pop como referente d’autor, l’espectáculu conviértese llueu nun poutporri nel que s’enxareyen cantares míticos de Alan Stivell y referentes del movimientu cultural bretón con dellos clásicos reels irlandeses bien conocíos y queríos en Bretaña. Magar cuntó con una gran producción, dalgunos de los sos cantares sonaron más convincentes qu’otros, y dalgunos de les más efectistas fueron ensin dulda “Je ne serai jamais ta Parisienne” o “So far away from LA“, ensin escaecer el momentu culminante del conciertu, cuando fizo sonar la “Suite Sudarmoricana” de Stivel.

A la fin, el de Lorient foi un conciertu con particular resonancia desque la cantante de Finisterre despidiérase del públicu bretón apocayá, polo que’l públicu sabía que va tardar tiempu en volver vela sobre un escenariu. Nun deseyando abandonar la escena demasiao rápido, la ganadora de Star Académy 2 francesa (nel añu 2002) despidióse dempués de la medianueche con una escasa hora y media de conciertu.

La esposa del tenista Arnaud Clement prometió tornar al escenariu “nunos años”. Mientres dos años, Nolwenn Leroy sintió que dio enforma. Amás de dar a lluz a un ñácaru en xunetu de 2017, la madre de Marin fixo munchos conciertos de manera atayada, encadenando dos álbumes siguíos.

Loading Facebook Comments ...