Portada Cine Nixeria critica la descalificación del so filme na carrera polos Oscar

Nixeria critica la descalificación del so filme na carrera polos Oscar

by redacción asturnews
Foto: Daniel Matsuoka (https://www.flickr.com/photos/danielmatsuoka/)

La descalificación de la película escoyida per Nixeria pa competir na 92 edición de los Oscar de Hollywood provocó la selmana pasada crítiques nel país africanu, see de la segunda industria cinematográfico más grande del mundu.

L’Academia de Hollywood refugó la película Lionheart, primer film que Nixeria presentaba a los Oscars y que diba competir na categoría de Meyor Película Internacional, por ser rodada mayormente n’inglés. La cinta contién un barganal de dolce minutos nel idioma igbo, faláu nel sudeste de Nixeria por unos 27 millones de persones, pero’l restu trescurre n’inglés, daqué qu’incumple la normativa d’esa categoría destinada a producciones que los sos diálogos son “mayoritariamente n’otra llingua non inglesa”.

La directora del filme, Genevieve Nnaji, que tamién actúa en Lionheart, señaló que la so obra estrenada nel Festival Internacional de Cine de Toronto de 2018- “representa la forma na que falamos los nixerianos”. Y “esto inclúi l’inglés, qu’actúa como ponte ente les más de 500 llingües que se falen nel nuesu país”, sorrayó Nnaji na so cuenta de la rede social Twitter, nun mensaxe empobináu a l’Academia de Hollywood.

“Eso nun difier de cómo’l francés conecta comunidaes nes antigües colonies franceses. Nós nun escoyemos quién nos colonizó. Como siempres, esti filme, y munchos como él, ye orgullosamente nixerianu”, amestó la cineasta, que la so producción adquirió la plataforma Netflix pa la so distribución nel mundu.

La directora Ava DuVernay, qu’en 2018 convirtiérase na primer muyer afroamericana en llograr una nominación a meyor película nos Oscar, reprochó tamién la decisión de l’Academia. “Pero l’inglés ye l’idioma oficial de Nixeria. ¿Tán prohibiendo qu’esti país compita por un Oscar nel so idioma oficial?”, preguntóse DuVernay.

Na mesma llínea, la periodista nixeriana Ivie Ani llamentó que “xuna película nixeriana n’inglés nun puede ganar el Oscar na categoría estranxera porque nun ye abondo estranxera”. “A los colonizadores encánta-yos castigar a los colonizaos por ser colonizaos”, añedió Ani.

Tamién te podria gustar