Netflix sigue creciendo metanes la pandemia

La empresa de vídeos de streaming de pagu más popular del mundu, Netflix, sigue siendo una de les beneficiaes económicamente poles midíes de confinamientu productu de la pandemia del coronavirus.

Tal que fizo público esta selmana la compañía norteamericana, el númberu netu de nuevos suscriptores d’abril a xunu foi de 10,1 millones, nuna continuación de la gran espansión qu’esperimentó la plataforma cola pandemia de la COVID-19. Mientres el trimestre anterior, qu’entiende los meses de xineru a marzu, Netflix algamó’l récord históricu de 15,8 millones de nuevos suscriptores en tol mundu. Estos númberos signifiquen qu’anguaño, en namá seis meses, Netflix sumó casi 26 millones de suscriptores nuevos, frente a los casi 28 millones de too 2019.

Gracies a esti impulsu, la plataforma rexistra anguaño cerca de 193 millones d’usuarios, un 27% más que l’añu pasáu por estes feches. Amás, la so resultancia operativa netu (o beneficiu) nel segundu trimestre del 2020 foi de 720 millones de dólares, frente a los 271 millones del mesmu períodu del añu pasáu.

Fuente: https://es.statista.com