Neños y neñes d’Avilés animen a siguir siendo responsables nes sos salíes a la cai

Neños y neñes d’Avilés animen a siguir siendo responsables nes sos salíes a la cai
06 mayu 12:51 2020 Imprimir

Neños y neñes d’Avilés animen a siguir siendo responsables mientres les sos salíes a la cai. nuna iniciativa del Conseyu d’Infancia y Adolescencia d’Avilés (CIAA).

Al traviés del blogue https://consejoiaaviles.wordpress.com/ Con motivu del permisu de salida al esterior de menores de 14 años dende’l pasáu domingu, los neños y neñes del Conseyu de la Infancia y Adolescencia d’Avilés (CIAA), al traviés del so blogue, animen a siguir siendo responsables nesta nueva situación.

Sicasí, llamen al compromisu colectivu de siguir en casa mientres el tiempu que nun se dexe salir. Pa ello, diseñaron un colax nel que suxeten un dibuxu d’una lletra formando la frase “Eh, yo quedo en casa”.  Al traviés del blogue https://consejoiaaviles.wordpress.com/ tamién diseñaron una serie de midíes que busquen combatir el sedentarismu dende casa y animen a tola familia a participar.

Improvisar un ximnasiu puede ser complicao por falta d’espaciu o falta d’aparatos, pero habilitar una pista de baille nel salón ye bastante cenciello, anque sía necesariu estremar dellos muebles. Tol mundu tien en casa televisión y otros dispositivos d’audiu y vídeu y por eso, como se plantega dende’l Conseyu de la infancia y Adolescencia, nun sería complicáu crear coreografíes de baille colos cantares que más gusten, pueden ser de distintos estilos y dir camudando (pop, rap, flamencu, tangos…). Baillando muévese’l cuerpu y exercítense los músculos, y eso tol mundu sabe que ye salú.

Afayar ya inventar xuegos nuevos y afaer los que yá se conocen pa desenvolvelos en casa ye otra de les propuestes que se faen, según crear ya improvisar escenes teatrales y pidir a la to familia que funcione de públicu, quiciabes, depués, ellos tamién s’animen a actuar. Y falando de teatru, poner en marcha la creatividá y faer teatru de solombres, ye otra de les propuestes. Namá se precisa imaxinación y baxar la lluz de casa. Faciendo figures y movimientos col cuerpu puede ser una forma de faer ximnasia. Y trabayar na cocina tamién implica esfuerzu físicu, porque en principiu hai que tar de pies y d’un llau pa otru. Por eso los mozos proponen esperimentar y ellaborar platos suxerentes y saludables.

Dende’l Conseyu de la Infancia y Adolescencia d’Avilés tamién se ta trabayando nel diseñu de midíes una vegada que se vaiga recurando la normalidá. Nesti sentíu tienen previstu ufiertar talleres na cai en xunto con distintes IES del conceyu. Destinaos a adolescentes y que dexe ser una “degustación” de deportes y actividá física.  Tamién proponer gynkanas pela ciudá que dexen movese, conocer la redolada, rellacionase con otres persones y xugar.

Otra de les midíes que tienen ente manos ye proponer a la Conseyería d’Educación polo xeneral, y a cada centru educativu sobremanera, menos carga de xera escolar pa poder disponer de tiempu llibre cada tarde, nel que poder xugar y movese. Buscar un espaciu de negociación colos centros escolares, onde la propuesta de neños, neñes y adolescentes sía tenida en cuenta.

Entamar actividaes extraescolares nes que pueda ponese en marcha la creatividá, faciendo usu de conteníu de videoxuegos (aprovechando que ye una ferramienta que los neños, neñes y adolescentes remanen y gústa-yos), y faer el cambéu a la vida real”, pasar de la pantalla a l’acción y al cuerpu, porque hai xuegos que son bien enérxicos y tou un esplegue físicu. Tamién plantega convocat quedaes pa estudiar, nes que los mesmos neños y neñes puedan autogestionarse, afitando un horariu d’estudiu con paraes pal xuegu.

  Categories: