Nel mio nome, non

09 xineru 11:06 2009 Imprimir

Na primera selmana del mes de Payares, les executives de IX y el PSOE (FSA), lleguen a un alcuerdu de gobiernu pol que IX-BA-LV entra a formar parte del Gobiernu d’Asturies.

Nes caberes elleiciones llocales, el que robla esti escritu, Xandru Martino Ruz, apaecía nes llistes de IXBA-LV nel conceyu de Ribeseya como númberu cinco. Tengo de dicir que me costó muncho dar el pasu d’apaecer nes llistes citaes, pero dempués de valorar dellos puntos decidí dar el pasu alantre y entrar nes llistes y audar a l’agrupación de Ribeseya no que me pidieran. Los puntos que sirvieron de sofitu a esta decisión fueron los que vienen darréu:

1. La necesidá urxente de sacar al antiguu alcalde de Ribeseya del cargu. Nes anteriores elleiciones al IX faltáran-y 15 votos pa que’l PP perdiera la mayoría, y barruntaba que la mio presencia nes llistes, a parte dotres circunstancies, podía apurrir esos 15 votos.

2. El frañimientu dafechu de los partíos d’izquierda nacionalista a los que venía votando y, de xemes en cuando, audando.

3. El compromisu personal y lamistá con mucha de la xente que milita en IX Ribeseya, colos que en dengún momentu hebo problemes, a los qu’alrniro pol so trabayu y pola so defensa de la oficialidá del asturianu.

4. Supuestu pasu alantre d’IX na defensa de la oficialidá; defendiendo na campaña el non entrar nel Gobiernu d’Asturies si la oficialidá nun se consiguía, anque na otra llexislatura yá pautara col PSOE. Una vegada que IX entra a formar parte d’un gobiernu que nun respeta los drechos humanos de los asturiano-falantes, arriendes de munches otres lleis y trataos que cinquen a los drechos llingüísticos, entiendo que tengo que dexar de tar vinculáu dafechu a dicha organización.

El señor Iglesias, cabezaleru de la formación, intenta dar a entender qu’entren nel gobiernu porque, según les pallabres de so: «Si nun hai reforma del estatutu, nun hai problema». Paez ser que’l cabezaleru de la formación escaez qu’anguañu existe un estatutu que nun reconoz la oficialidá de la llingua asturiana y que’l Gobiernu del que van a formar parte ye’l principal culpable del desaniciu del asturianu y la so futura desapaición. Poro, ellos sedrán tamién responsables. Nun val tapar les ñarres y dicir que’l calabre nun güel. Lúnicu camín pal asturianu ye la oficialidá Quiero sopelexar per aciu d’esti escritu a los señores d’IX que si entren nel Gobiernu dAsturies: Nun sedrá nel mio nome. Nun tendrá más el mío votu.

  Categories:
Loading Facebook Comments ...