Ñaz el Coleutivu d’Internatutes pol Asturianu (CODIPA) con alredor de 10.000 sofitos por un Tuenti n’asturianu

15 avientu 11:19 2009 Imprimir

Los internautes asturianos acaben d’asociase nun colectivu col finxu de “defender la llingua asturiana na rede”. La so primer acción ta siendo atropar a miles de persones na petición de que la rede social Tuenti tenga tamién la so versión n’asturianu. Y ye qu’esta rede social, una de les más usaes pola mocedá asturiano, ta acabante d’asoleyar les sos versiones en gallegu, catalán y vascu. En pocos díes cuasi 10.000 usuarios d’esta rede social “esixeron” la versión na llingua d’Asturies y otros 6.000 simpaticen cola idea.

El Coleutivu d’Internautes pol Asturianu (CODIPA) ye un organización formada por usuarios d’internet que nagüen por navegar pela rede usando la llingua asturiana. Pa ello, el colectivu va trabayar con campañes que sofiten la presencia del asturianu n’internet (redes sociales, páxines institucionales y d’empreses, etc.) el respetu a la Toponímia Asturiana nes páxines en cualesquier llingua, y l’algame d’un dominiu .ast.

Amás, esti colectivu d’internautes asturianos va collaborar con otres persones, empreses, instituciones… pa facer posible estos avances nel usu del asturianu nel campu tecnolóxicu, incluyendo la collaboración con proyectos de software llibre, que dende va un tiempu espoxiguen en llingua asturiana perdayuri.

CODIPA sigue atropando sofitos a la campaña pol Tuenti n’Asturianu y según comenten nuna nota de prensa yá se punxeron en contautu con responsables de la rede social “pa desplica-yos la vindicación de miles d’usuarios y ufiertase pa trabayar la torna a la nuesa llingua”. Una comunicación que según cuenten dende’l CODIPA recibió una respuesta positiva y añaden “los responsables de Tuenti amosaron la so disposición a tener una versión n’asturianu”.

Dende’l COPDIPA ven estos primeros contactos con Tuenti como positivos y esperen que los siguientes “sigan siéndolo y puxar asina por que l’asturianu tenga presencia nuna rede social utilizada por miles d’asturianos qu’asina podríen facer usu de la so llingua”.

CODIPA inauguró estos díes un blogue del coleutivu onde va dir asoleyando información de les sos actividaes.

Páxina del CODIPA

  Categories:
Loading Facebook Comments ...