Portada Política N’Ast critica la perda 145.000 € al nun ser l’asturianu llingua oficial

N’Ast critica la perda 145.000 € al nun ser l’asturianu llingua oficial

by asturnet

Nun comunicáu fechu públicu esti día, l’asociación N’AST llamenta “la ocasión perdía de consiguir financiamientu estatal pa l’Academia de la Llingua Asturiana (ALLA)”. Nos caberos díes el Congresu los Diputaos acoyó la votación de delles enmiendes presentaes polos estremaos grupos parllamentarios a los Presupuestos Xenerales del Estáu pal añu 2014 y una d’elles, presentada por Enrique Álvarez Sostres, diputáu de Foro Asturias, pidía apurrir 145.000 € a la institución asturiana, que nun tien fondos públicos estatales al nun ser l’asturianu llingua oficial. La enmienda foi refugada colos votos de PP, UPyD y ERC, polo que l’ALLA va siguir ensin recibir nin un céntimu d’un presupuestu al que contribuyimos tolos asturianos.

En N’AST llama-yos especialmente l’atención “el votu a la escontra d’Esquerra Republicana de Catalunya, formación que supuestamente ye sensible al fechu diferencial asturianu (nel pasáu incluso foi socia de la organización política Andecha Astur na coalición Europa de los Pueblos), pero ye bona preba de que, a la hora la verdá, ca ún mira namás que polo suyo”.

Yá nun-yos sorpriende tanto la postura de los diputaos asturianos, “especialmente de Gaspar Llamazares, que s’abstuvo na votación, ello ye, nun votó a favor de la midida. Izquierda Xunida, igual que pasare apocayá col casu de les multes de Mieres, tornó a quitar la mázcara cola que s’antroxa de defensora de la llingua asturiana pa dexar bien nidio qu’una cosa ye lo que dicen defeder y otra lo que realmente defenden”.

En resume, pa N’AST nun sólo l’ALLA vieno acabante de perder 145.000 €, “ye Asturies la que los pierde, y esti fechu vuelve a poner bien a les clares la situación d’anormalidá democrática que tamos viviendo n’Asturies, derivada de la falta d’oficialidá de la llingua asturiana, y la necesidá de la mesma –la oficialidᖠqu’ampare los drechos llingüísticos del pueblu asturianu y que, en casos como esti, favorezca la llegada de perres de los Prespuestos Xenerales del Estáu a Asturies, que nunca nun tan de más”.

Tamién te podria gustar