Nando Agüeros sumase a un cartelu de luxu nel conciertu de Marisa Valle Roso nel Teatru Palacio Valdés

Nando Agüeros sumase a un cartelu de luxu nel conciertu de Marisa Valle Roso nel Teatru Palacio Valdés
27 xineru 10:02 2020 Imprimir

Nando Agüeros sumase a un cartelu de luxu nel conciertu de Marisa Valle Roso nel Teatru Palacio Valdés, col que remata la so xira “Consciente” n’Avilés el sábadu 15 de febreru a les 20 hores. Tamién van acompañar a la cantante llangreana Rodrigo Cuevas, Eva Texedor, Fernando Abargane Roso, Pandereteres d’Escontra’l Raigañu, Pandereteres de Fitoria y el Coru Mineru de Turón.

Queda menos d’un mes por que Marisa Valle Roso remate nel Teatru Palacio Valdés dos años de xira por toa España col so discu “Consciente”, y el cartelu d’acompañantes de luxu cerróse cola incorporación de Nando Agüeros, que se suma al so hermanu, Fernando Abargane Roso, a Rodrigo Cueves y a Eva Texedor & -yos Pandereteres, ente otros.

Una fiesta de la música asturiana, col uvieín Rodrigo Cuevas, l’avilesina Eva Texedor, y el cántabru Nando Agüeros, unu de los más significativos intérpretes de tonada del momentu, que va tener llugar el sábadu 15 de febreru, a les 20 hores, y pa la que queden bien poques entraes disponibles.

Tamién van acompañar a Marisa Valle Roso, el so hermanu Fernando, unu de los sos compañeros habituales, y el Coru Mineru de Turón y Les Pandereteres de Fitoria, que formen parte de la so banda sonora nestos últimos años, y colos que yá collaboró n’otres ocasiones. A ellos suman tamién les avilesines Pandereteres d’Escontra’l Raigañu.

El conciertu promete ser un fin de fiesta per tolo alto y forma parte del programa del primer centenariu del Teatru Palacio Valdés que con mimu prepara la conceyalía de Cultura d’Avilés. La premisa de la programación ye averar a Avilés espectáculos capaces d’atraer a los públicos más diversos y esixentes, en propuestes nunca antes vistas na ciudá.

Marisa ye cantante comprometida, col corazón nel raigañu de la so tierra, nel cantar asturianu, una mano na tradición iberoamericana, y l’alma nel presente, n’abrir nueves puertes que la llevaron con ésitu por tola xeografía española. Marisa Valle Roso escoyó rematar la so xira nuna cortil única, un Teatru Palacio Valdés centenariu.

  Categories: