Namái’l 7% de directores de filmes más taquilleros en EE UU fueron muyeres

Namái’l 7% de directores de filmes más taquilleros en EE UU fueron muyeres
18 xineru 08:41 2017 Imprimir

Les directores representaron tan solo el 7 % del total de realizadores de les 250 películes más taquilleres de 2016 n’Estaos Xuníos (ensin cuntar les cintes estranxeres), un datu que supon una cayida de dos puntos respecto al añu anterior.

La conclusión forma parte del informe publicáu pel Centru pal Estudiu de les Muyeres en Televisión y Cine de San Diego (EE UU) alrodiu de la presencia llaboral de muyeres nel cine detrás de les cámares (directores, montadores, productores, productores executives, guionistes y directores de fotografía).

Nes 250 películes estadounidenses con más ingresos dientro del país en 2016, les muyeres fueron el 24 % de los y les productores (dos puntos menos qu’en 2015), el 17 % de montadores (cinco puntos menos que l’añu anterior) y el 17 % de productores executivos o executives (tres punto smenos qu’en 2015). Amás, les muyeres representaron el 13 % de los y les guionistes (dos puntos más que l’añu anterior), el 7 % de los y les directores (dos puntos menos qu’en 2015) y el 5 % de  directores de fotografía (un puntu menos que l’añu anterior).

En total, les muyeres representaron el 17 % de tolos y toles directores, guionistes, productores, productores executivos o executives, montadores y directores de fotografía de les 250 películes más esitoses en 2016 (dos puntos menos respectu al datu de 2015).

  Categories: