Nacen los festivales de música non presenciales: la ‘Cuarentena Fest’ y ‘Yo quedo en casa’

Nacen los festivales de música non presenciales: la ‘Cuarentena Fest’ y ‘Yo quedo en casa’
17 marzu 15:46 2020 Imprimir

Una trentena de músicos independientes de tol estáu español impulsaron la Cuarentena Fest, un festival musical en streaming p’apangar “la cascada imparable” de cancelaciones de conciertos y eventos provocáu poles midíes preventives ante’l Covid-19. L’eventu, non presencial, ta celebrándose del 16 al 27 de marzu, y el públicu’ va poder siguir les actuaciones gratuites al traviés de les canales de YouTub y de los artistes y de la páxina web cuarentenafest.tumblr.com.

Tamién nació Yo quedo en casa, un nuevu festival musical íntegramente dixital que tuvo llugar del 13 al 15 de marzu. ”Acompañar nestos tiempos convulsos, entretener al públicu y concenciar de la importancia de caltenese en casa” son los oxetivos polos que naz esti certame.

”Los mesmos músicos tán sufriendo la crisis global nes sos propies carnes, cuidao que munchos tuvieron qu’atayar los sos conciertos nes próximes feches, asina que quixeron aprovechar la situación pa, de forma altruista, ufiertar la so música como antídotu contra l’aburrición y el mal rollu”, espliquen el organizadores de Yo quedo en casa nun comunicáu.

“Que la música nun pare, non”, arrinca, pela so parte, el manifiestu fundacional de la Cuarentena Fest, que dica agora yá tien confirmaos a artistes como Pavvla , Kids from Mars, Lois, Evripidis his Tragedies, Bárbara, Betacam o Estrella fugaz. “Les sales y los músicos tán sufriendo les consecuencies nun yá de por sí sector precariu”, llamenten.

El funcionamientu ye bien cenciellu. Cada artista va realizar un directu dende’l so propiu perfil de Instagram a una hora establecida (señalada nel cartelu oficial del eventu) y va tener media hora pa tocar unes temes y compartir colos usuarios lo que quiera. El públicu va poder dir saltando de perfil en perfil de los artistes pa dir conociendo les propuestes que tengan preparaes.

 

  Categories: