N’ast y la Sociedá Cultural Xixonesa dediquen unes xornaes al federalismu n’Asturies

11 mayu 10:24 2012 Imprimir

La Sociedá Cultural Xixonesa y l’Asociación Cultural N’Ast organicen unes xornaes como cctividá conxunta a partir del llunes que vien, 14 de mayu. Les charres van xirar al rodiu del Partíu Democráticu Republicanu Federal, una fuercia política de calter anticaciquil que tuvo una importante presencia na sociedá asturiana ente los años 1868 y 1936. Esti sector destacó na so dómina pola so reivindicación del exerciciu de la soberanía pa la ciudadanía asturiana, llegando inclusive a plantegar en 1883 una propuesta de Constitución pa un futuru Estáu Asturianu. Na primer xornada l’hestoriador Faustino Zapico va dar llectura a la conferencia “El pensamientu federalista de Pi i Margall”, sedrá de magar les ocho la tarde.

El miércoles 16 sedrá’l turnu del “Republicanismu na Asturies de la I Restauración”, de la mano de José Girón, profesor d’Hestoria Contemporánea de la Universidá d’Uviéu, a la mesma hora y ne mesmu llugar, la sede de la Sociedá Cultural Xixonesa, asitiada na cai Balmonte Miranda, 4, entlu. Dcha, de Xixón.

Les siguientes dos charres van tener llugar el llunes 21 de mayu, de la mano del ensayista ya investigador Javier Cubero, con “La dimensión asturianista del Partíu Democráticu Republicanu Federal”, y dos díes más tarde, el miércoles 23 de mayu, cola charra “Pin de Pria, un escritor federal na lliteratura asturiana” pol escritor ya investigador, Inaciu Galán.

  Categories:
Loading Facebook Comments ...