Musicasturiana.com entama’l camín pa modernizar y esportar la música asturiano

Musicasturiana.com entama’l camín pa modernizar y esportar la música asturiano
29 13:32 2017 Imprimir

Esta selmana vieno acabante d’entamar la so andadura musicasturiana.com, la primer tienda online y distribuidora dixital dedicada a la música asturiana, una iniciativa que xurde con un ampliu catálogu de tolos estilos y col oxetivu de visibilizar, modernizar y esportar la música asturiano.

“Pa que siempre la lleves contigo”. Esi ye l’eslogan de musicasturiana.com, un proyectu que naz con trés pegoyos: tienda online pa que puedan mercase referencies discográfiques asturianes en formatu físicu dende cualesquier parte del mundu; distribuidora dixital pa que la música d’Asturies tea disponible nes plataformes dixitales (Spotify, iTunes, Youtube, Google Music…); y con un papel d’espardir l’actualidá de la escena asturiana al traviés de les redes sociales.

Esta iniciativa pionera ye una respuesta a la crisis que sufre anguaño la industria musical y qu’afecta especialmente a la música asturiana. Anguaño yá nun queden casi tiendes de discos, la baxada de ventes en formatu físicu ye considerable y cada vez tien más pesu’l consumu de música al traviés de les plataformes dixitales llegales. Por eso musicasturiana.com surde col triple oxetivu de visibilizar, modernizar y esportar.

Pa desendolcar el papel de visibilización, esti proyectu busca convertise nel mayor escaparate online de los artistes y discográfiques d’equí; de fechu, la tienda yá tien a la venta más de 100 referencies de tolos estilos y va dir ampliando’l so catálogu. La función de modernización busca adaptar la escena a les nueves formes de consumu musical; pa ello, amás de distribuyir dixitalmente conteníos, musicasturiana.com tien un papel activu en Spotify y Youtube onde creó playlists especializaes y una canal propia.

Englobando tol proyectu ta la esportación de los soníos asturianos gracies a la venta online nos cinco continentes y al calter internacional de la distribución dixital. Esti ye otru de los finxos polos que’l xoven xixonés emigráu llaboralmente a Madrid Xicu Ariza –ex guitarrista de Fala Non Caduca y responsable d’otres iniciatives yá finaes como’l fanzine Fechu n’Asturies o la web musical Fnast.net- , decidiera impulsar musicasturiana.com.

  Categories:
Loading Facebook Comments ...