Música y Vanguardia de la man del LiveCoding nel Antiguu Institutu de Xixón

Música y Vanguardia de la man del LiveCoding nel Antiguu Institutu de Xixón
20 marzu 11:22 2019 Imprimir

El Centru de Cultura Antiguu Institutu, acueye nel salón d’actos esti martes 19 de marzu a les 20 hores de LiveCoding, una de les nueves técniques espresives na creación sonora contemporanea.

La tecnoloxía musical actual, basada nel emplegu de la electrónica y los ordenadores, revolucionó en poques décades el panorama de la creación sonora. Un universu de controladores, aplicaciones y protocolos impulsó l’apaición d’unes práctiques creatives bien innovadores onde la capacidá de xeneración tímbrica, les posibilidaes de estructuración del material sonoro, l’abanicu de posibilidaes espresives y la facilidá d’integración ente dispositivos, algamen cotes difícilmente imaxinables fai tan solo unos años. Dientro d’ese estimulante panorama, hai xuna práctica que remaneció con fuerza pola íntimu venceyu qu’establez ente ordenador ya intérprete y pola singularidá de la so relación col espectador.

El LiveCoding ye una técnica creativa que se basa na programación interactiva y en tiempu real d’un ordenador, per mediu d’un llinguaxe xeneralmente testual, pa encarar la creación sonora de forma improvisada énte l’audiencia. Los LiveCoders (programadores en vivu) creyen soníos y tamién imaxes de forma progresiva, proyectando en tou momentu los códigos que los xeneren pa dar llugar a un completu espectáculu audiovisual. Nesta charra introducirán los fundamentos nos que se basa esta técnica, los nuevos usos espresivos y sociales qu’introdució nel ámbitu de la creación sonora y el papel que puede xugar esta práctica n’otros contestos, como’l de la formación musical. Pa rematar, va realizase xuna sesión de LiveCoding construyida en tiempu real por aciu el llinguaxe Sonic Pi (http://sonic-pi.net) a partir d’una serie de rexistros sonoros.

Centru de Cultura Antiguu Institutu. Salón d’actos. Martes 19 de marzu a les 20.00 hores
Charra-conciertu inaugural. Javier Suárez Quirós

Más información

  Categories: