Música, cuentacuentos, marionetes y teatru averen la llingua n’Avilés a neños y neñes

Música, cuentacuentos, marionetes y teatru averen la llingua n’Avilés a neños y neñes
05 febreru 13:01 2019 Imprimir
La nueva temporada del ciclu La Reciella de la Factoría, organizáu pola Estaya de la Llingua del Conceyu d’Avilés, vieno acabante entamar esti vienres pasáu con música, cuentacuentos, marionetes y teatru qu’averen la llingua asturiana a neños y neñes d’una manera prestosa n’Avilés.

La primer sesión, el vienres 1 de febreru, ufiertó un conciertu d’Alicia Álvarez y David Varela, alredor de los cantares de los discos de Bestiariu. Toles actividaes van facese nel espaciu escénicu de la Factoría Cultural a les 19 hores, con entrada llibre y de baldre hasta completar aforu.

La Reciella de la Factoría, actividá qu’organiza la conceyalía de Cultura d’Avilés per aciu de la Estaya de la Llingua pa poder averar y normalizar l’usu de la llingua asturiana d’una manera prestosa a neños y neñes y el públicu familiar, yá tien la so programación preparada pa la primer parte del 2019. Son cuatro propuestes, con un protagonismu especial pa la música, y qu’incluyen teatru, marionetes y cuentacuentos, nel Espaciu Escénicu de la Factoría Cultural, n’avenida de Portugal, 13, una al mes, dende febreru hasta marzu.

  • La primer actividá foi esti  vienres 1 de febreru, con “Bestiariu (esbilla acústica)”, sobre la riestra discos n’asturianu pa neños, neñes y mayores, “Bestiariu”. Dos músicos asturianos bien conocíos, Alicia Álvarez, que puxa por esti proyeutu, cantante y guitarrista de Pauline en la Playa, y David Varela, músicu de La Bandina o o El Koku la Manzana, interpreten dalgunos de les temes más representativos d’estos álbumes producíos po La Fabriquina.
  • La siguiente cita sedrá’l vienres día 15 de marzu, con “Nun quiero ser princesa”. L’actriz Ana Morán va contando histories de neñes que nun quieren ser princeses, nin vistise de rosa, porque hai munches más coses que-yos presten más, y van descubiles xuntes.
  • El vienres 5 d’abril, axúntense la narración d’Olga Cuervo, fiel a la so cita cola Reciella, la música en direutu de David Varela, y les marionetes, pa que podamos ver “El viaxe d’Irina”, un cuentauentos musical basáu na obra de Dominique Vernay. Ye la historia d’una muñeca rusa, la matrioska Irina, que sal del bandullu de les sos compañeres pa entamar el viaxe.
  • Pa terminar, el cumal alagamámoslu’l vienres 24 de mayu un clásicu de la llitertura universal, “Hansel y Gretel”, de los hermanos Grimn, cola versión d’una de les compañíes más representatives de la escena asturiana, Higiénico Papel Teatro. Un espectáculu pa tola familia, nel qu’unos primos, rebuscando nel desván de la casa los güelos , atopen unos cuentos vieyos que lleíen de pequeños. el que más-yos prestaba yera “Hansel y Gretel”.

Toles actividaes van ser nel Espaciu Escénicu de la Factoría Cultural, con entrada llibre y de baldre hasta completar aforu. Pa neñes y neños d’énte 3 y 10 años, siempre diendo con una persona adulta y a les 19:00 hores.

La Reciella de la Factoría ye una actividá organizada pola conceyalía de Cultura d’Avilés per aciu de la Estaya de la Llingua  y la Factoría Cultural. Nesti 2019 cumple 6 años dende qu’entamó, col envís de normalizar l’usu de la llingua asturiana na reciella. Prográmase con dos ciclos, esti primeru dende febreru a mayu, y el segundu, dende setiembre a avientu.

Más información

 

  Categories: