Muséu de la Selmana: Muséu Xurásicu d’Asturies

Redacción.

Una selmana más Asturnews.com encamienta a los sos llectores la visita a ún de los munchos museos del país. Y esta selmana tóca-y el turnu al Museu Xurásicu d’Asturies (MUXA) que ta asitiáu na llamada Rasa de San Telmo, nel conceyu de Colunga, a pocos quilómetros de Llastres y la la capital del conceyu, nun accesu que sal de l’AS-257.

La so singular arquitectura en forma de buelga tridáctila da-y al edificiu una forma especial y llamativa pa la zona. Dientro atopamos espacios diáfanos onde cada zona percorre una epoca de la prehistoria. El museu inclúi hasta venti repliques de dinosaurios, ente les que ta la escena central representada: una pareya de tiranosaurios copulando de más de 12 metros d’altor.

El tiempu ye’l gran filu conductor del MUXA: Una secuencia temporal qu’abarca los tres periodos mayores del Mesozoicu: Triásicu (250-205 millones d’años enantes de la nuesa era), Xurásicu (205-140 millones d’años) y Cretácicu (140-65 millones d’años).
La colección fundacional del MUXA ta compuesta por unos 8.000 exemplares de fósiles procedentes esclusivamente del Xurásicu asturianu.

El museu abre n’horariu ordinariu tolos díes a les 10.30, zarrando los llunes a les 14.30 h. y abriendo de miercoles a domingu tamien pela tarde, de 16.00 a 19.00 hores. Los martes ta peslláu. Del 22 de xunu al 16 de setiembre abre tolos díes de 10.30 a 14.30 y de 16.00 a 20.00 hores

Páxina del muséu