Portada Muséu de la selmana Muséu de la selmana: Muséu del Real Sitiu de Cuadonga

Muséu de la selmana: Muséu del Real Sitiu de Cuadonga

by asturnet

Como cada selmana Asturnews apurre a los sos llectores información sobre ún de los munchos museos que se pueden visitar a lo llargo y ancho d’Asturies. Y güei la cita col ‘Muséu de la selmana’ va llevanos hasta Cuadonga, nel conceyu de Cangues d’Onís, onde ta asitiáu’l Muséu del Real Sitiu de Cuadonga, que xunto coles espectáculares y simbóliques vistes del llugar faen de la visita daqué bien prestoso.

El Muséu del Real Sitiu de Cuadonga ñació dempués de la gran esposición Cuadonga: iconografía d’una imaxe’, que dio a conocer la hestoria del santuariu y les manifestaciones artístiques y relixoses qu’orixinó a lo llargo los años. La esposición enmarcóse dientro de les actividaes organizaes pol Patronatu Real de la Gruta y Sitiu de Cuadonga pal añu marianu 2001, nel que la diócesis asturiana conmemoró’l primer centenariu de la basílica de Cuadonga.

Con esa esposición como orixe ñació l’amuesa permanente que güei pue vese y qu’axunta más de 400 pieces referíes a estremaes representaciones de La Santina dende’l sieglu XVII, axuntando hestoria, relixón, cultura y arte.

El muséu alluga’l ‘Tesoru de la Santina’, con corones de gran valor artísticu, cálices del sieglu XVI, un crucifixu de marfil que perteneció a San Xicu de Borjal, grabaos en seda, llenzos de los reis asturianos y otres munches pieces ente les que destaca la talla orixinal de la Virxe de Cillaperlata, en Burgos, que yera idéntica a la talla de la Santina enantes de la so destrucción nel incendiu qu’arrasó la santa cueva nel añu 1777. La entrada cuesta alredor de dos euros pa los adultos y unu pa los neños. L’horariu de visita ye d’11 a 14 y de 16 a 18 hores.

Tamién te podria gustar