Muséu de la selmana: Centru d’Interpretación Armando Palacio Valdés

04 xunetu 03:41 2007 Imprimir

Redacción.

Entamamos esta sección del ‘Museu de la selmana’ visitando’l Centru d’Interpretación Armando Palacio Valdes, instaláu na casa natal del escritor. El Centru ufierta una visión del paisaxe al travies de la lliteratura del escritor, sobremanera de la obra cume del so pueblu natal ‘L’aldea perdida’. Les impresiones plasmaes nesta novela dan conteníu al espaciu espositivu asitiáu n’Entrialgu, nel conceyu de Llaviana.

El Centru, que cuenta güei en día con una biblioteca perbien surtida de les noveles que l’escritor dexó en vida, tien amás cinco sales espositives permanentes. La primera esclusiva pal escritor, con manuscritos orixinales, semeyes del autor y la so familia, mobiliariu de los sos descendientes, etc. La sala dedicada a la so obra lliteraria ye la más interactiva de toes, yá qu’al travies d’un sistema de botones, se pue escuchar les sos noveles y hasta la so propia voz, lleendo un cachu de ‘L’Aldea perdida’.

La sala dedicada al mundiu rural, llamada Nolo y Demetria, fai un repás pel trabayu campesín tal y como l’escritor lo describió, sirviendose de testos o cites de les sos noveles, asina como de semeyes que plasmen estos trabayos rurales. La sala dedicada a la minería, Plutón y Xoyana, ofrez la visión xeneral de la minería de Coto Musel, característica del conceyu de Llaviana, que reflexó l’autor igualmente na so novela. Por último, la sala dedicada al territoriu, ufierta la visión de la evolución de La Pola dende 1870 a anguaño al travies de distintos planos y semeyes.

L’horariu del Centru d’Interpretación Armando Palacio Valdes ye de 11 a 14 y de 16,30 a 19,30 hores de martes a sábadu y de 10 a 14 hores los domingos y festivos. Los llunes el centru ta peslláu. Los grupos de más de 15 persones pueden concertar cites llamando al telefonu 985 611 377.
Páxina oficial del Centru d’Interpretación

  Categories:
Loading Facebook Comments ...