Muerre Manuel Fdez. Arias en Bretaña a los 91 años

16 febreru 11:24 2011 Imprimir

Manuel Fernández Arias finó’l día 14 de febreru de 2011, a los 91 años d’edá, en Bretaña (Francia), onde moraba. Yera Caballero de la Lexón d’Honor de la República Francesa. Taba en posesión de la Croix de Guerre, la Medaya de Plata del Principáu d’Asturies, la Medaya del Conceyu de París y de delles medayes, condecoraciones y nomamientos más, tantu de Francia como d’España. Yera Presidente d’Honor de l’Asociación Históricu-Cultural C. El Nueve y el centru escolar del so pueblu natal, Marentes nel conceyu de Ibias, lleva’l so nome.

Apurrió la so primer adolescencia a la llucha por unos ideales de llibertá, igualdá y fraternidá, que lu acompañaron hasta’l final de los sos díes. Depués, con apenes venti años, penó per un país afaráu, cumpliendo condena de trabayos forzaos, cola rémora de l’alcordanza del padre asesináu en prisión y, malpenes tuvo la oportunidá, fuxó a Francia, a la gueta de la supervivencia y la llibertá perdíes.

Ellí atoparía la disyuntiva del regresu obligáu y el castigu o la so incorporación a les files de la Lexón Estranxera. Destináu al norte d’África, xuntu con munchos compatriotes, el desembarco aliáu y la cayida de la Francia de Vichy favoreció que, tres duros combates, viera que la poderosa maquinaria bélica que conoció na so tierra, podía ser vencida si se cuntaba colos medios necesarios.

La creación de la 2ª División Blindada de la Francia Llibre, al mandu del xeneral Leclerc, supunxo, pa dellos cientos d’españoles exiliados, la oportunidá de siguir una llucha empecipiada años antes. Manuel, agora conocíu como “caporal Belmonte”, formó nes sos files, nel tercer batallón del Regiment de Cole du Tchad (“L’Español”). Con elli entrenóse en Marruecos ya Inglaterra y , llegáu’l momentu, desembarcó en Normandía. Nos duros combates camín de París, Manuel resultó gravemente mancáu unos díes primero que “El Nueve”, la unidá mayoritariamente española de la división, al mandu del capitán Dronne, llegara a les puertes del conceyu parisín.

La llarga convalecencia y la gravedá de les feríes recibíes torgaron que Manuel volviera al frente. Una vegada rematada la guerra, les sos esperances, como les d’otros munchos miles de compatriotes, de lliberar España, esmorecer pol cambéu del orde mundial establecíu. Una nueva y llarga campaña empecipió nesi momentu pa Manuel, que na so nueva tierra d’acoyida tuvo que reemprender la so vida. Afincáu en Francia, aprendió un oficiu y conoció a la que foi la so esposa, Paulette. Tornó, tres una autentica aventura diplomática, a la so Asturies natal a mediaos de los años cincuenta. Y yá nunca dexo de volver cada vez que pudo.

Elli y los sos compañeros recibieron la reconocencia oficial de la so xesta bien sero, yá nel añu 2004, anque los collacios franceses nunca escaecieron a aquellos curtidos veteranos españoles que-yos daben sabios conseyos en plenu campu de batalla. Manuel convirtióse darréu nel combatiente español más entrevistáu de la hestoria. Llibros, documentales, reportaxes de televisiones, actos oficiales n’España y en Francia. Pero él, cola so simpatía personal y la so saber faer y tar, pudo con tou.

  Categories:
Loading Facebook Comments ...