Portada Música Movistar compensa con 25 euros a los usuarios que nun pudieron entrar al conciertu de McCartney

Movistar compensa con 25 euros a los usuarios que nun pudieron entrar al conciertu de McCartney

by asturnet

Los usuarios de telefonía móvil que nun pudieron entrar al conciertu de Paul McCartney en Xixón pesie a tener entraes reservaes al traviés de Movistar recibirán a partir de güei 25 euros de compensación polos perxuicios causaos. La multinacional telefónica activa un númberu de teléfonu gratuitu pa que los usuarios afectaos puean reclamar el pagu compensatoriu nos prósimos 30 díes.

Pa solicitar los 25 euros, los usuarios habrán llamar al númberu 900321322 dende’l mesmu teléfonu móvil col qu’unviaron na viéspora’l conciertu el mensaxe SMS que Movistar pedía pa reservar dos entraes por cliente. Magar de la promoción de la compañía telefónica, que nes hores previes al recital fizo un unvíu masivu de mensaxes de testu ufriendo llocalidaes a cambiu namás de responder a esi mensaxe -lo que tenía un preciu de 0,9 euros más IVA-, miles de persones nun pudieron entrar al estadiu d’El Molinón porque nun se-yos entregaron les entraes prometíes.

La mayoría d’usuarios afectaos son clientes de Movistar, qu’al facer la reclamación recibirán una recarga de 25 euros, nel casu de los usuarios de tarxetes prepagu, y un descuentu pola mesma cantidá nel pagu mensual nel casu de los usuarios de contratu. A los clientes d’otres compañíes, Telefónica Movistar va entrega-yos una tarxeta con un saldu de 25 euros válida pa esa compañía.

La compensación, frutu d’un pactu ente la operadora telefónica y la Unión de Consumidores, pieslla dos selmanes de tensión, depués qu’abondos ciudadanos que quedaron ensin entrada a les puertes del conciertu de McCartney, cellebráu en Xixón el pasáu 25 de mayu, denunciaren a Movistar y l’organismu de defensa’l consumidor anunciara una querella collectiva contra la multinacional.

Tamién te podria gustar