Portada Sociedá Morrió Martín Sevilla indoeuropeísta y estudiosu de la toponimia asturiana

Morrió Martín Sevilla indoeuropeísta y estudiosu de la toponimia asturiana

by asturnet

El pasáu 16 de mayu morría en Xixón a los 64 años y tres una llarga enfermedá, Martín Sevilla Rodríguez, profesor de llingüística indoeuropea na Universidá d’Uviéu. Sevilla yera Doctor en Filosofía y Lletres na Sección de Filoloxía Clásica y dedicó gran parte de los sos estudios a la toponimia asturiana. Doctoróse en 1980 cola tesis “Toponimia indoeuropea prelatina de Asturias”, cola qu’algamó un sobresaliente cum laude por unanimidá. Dende entós vieno participando nel estudiu de la toponimia asturiana publicando llibros y participando n’actividaes de l’Academia de la Llingua Asturiana.

Ente les sos aportaciones a la toponimia asturiana destaquen el llibru “Toponimia de origen indoeuropeo prelatino en Asturias”, asoleyáu en 1984 o la so participación nel llibru “Conceyos y parroquies d´Asturies” base de trabayu inicial de la Xunta de Toponimia.

Publicó les sos investigaciones usando l’asturianu en munches ocasiones, como les asoleyaes en Lletres Asturianes, boletín de l’ALLA, “La toponimia asturiana d’orixen prerromanu”, “Sol hidrónimu Navia” o “Los topónimos asturianos Tamoca/Caloca”, amás de na Revista de Filoloxía Asturiana.

Col artículu “Asturiano bangu, abangu y los topónimos Bango, L’Abangu, La Banga” participó en 2010 del Homenaxe al Profesor Xosé Lluis García Arias, siendo habitual tamién de les Xornaes Internacionales d’Estudiu, onde en payares de 2012 tuvo per última vegada lleendo la comunicación “Toponimia de monesterios medievales escaecíos”.

Tamién te podria gustar