Morfeo Teatru trai al Xovellanos “Los cuernos de Don Friolera”

Esti xueves a les 20,30 hores, Morfeo Teatru representa nel Xovellanos ‘Los cuernos de Don Friolera’ l’esperpentu de Valle Inclán que tan bien retrata la España de principios del sieglu XX na que l’autor critica los prexuicios morales de la perda del honor polos cuernos, burllándose de los sos personaxes y de los sos comportamientos de folletín saineteru.

La hestoria narra como’l teniente Astete -don Friolera-, recibe un anónimu avisándolu de que la so muyer engañalu. Vueltu llocu polos celu que siente de la so frívola muyer, doña Loreta, tentada por un chulapo de medies tintes y vecín, el barberu Pachequín, y socatráu por un malintencionáu vecinderu, entama tomar vengación. La fía de dambos, Manolita, entra n’escena xusto cuando’l supuestu “cornudu” va matar a los inocentes amigos, amansando les roxures del so padre. Sicasí, la presión de los sos colegues militares -y ofusca no más fondo del so arguyu, y recurriendo a un ancestral códigu del honor, y pistola en mano, encamentar a cometer el crime, al berru de “¡Nel cuerpu de carabineros nun hai cabronos!”

Fai Valle tamién una repasada del ambiente del hampa y clases populares, de la connivencia de los contrabandistes y oficiales del exércitu, a última hora, una semeya despiadada de la deteriorada consistencia moral de la sociedá española y del ambiente de frustración tres la perda de les Colonies. Reniega tamién Valle del conservadorismu intelectual y políticu de la so dómina, de la mojigatería relixosa, y de la conservadora y altiva tradición lliteraria española dende Calderón a los sos díes. En palabres sos: “Na lliteratura apaecemos como unos bárbaros sanguinarios. Depués trátasenos, y vese que somos unos borregos.”…

Pero sobremanera esi pesimismu descarga so más poderosa arma de seducción, la risa. Una risa diabólica que resona sobro les nueses cabeces, que nun podemos contener dende’l principiu a la fin del esbarriáu “esperpento”, que nos sana de cualquier afección, xuna risa eterna y anárquica cola qu’él mesmu da exemplu: “Tou’l nuesu arte naz de saber qu’un día vamos pasar. Esi saber iguala a los homes muncho más que la Revolución Francesa. Soi como aquel probe, que al preguntar el cacique qué deseyaba ser, contestó: Yo, difuntu”; la cósmica risa del Esperpento.

Comediantes:
Francisco Negro
Mayte Bona
Felipe Santiago
Adolfo Pastor
Santiago Nogués
Mamen Godoy
Dramaturgia y Dirección: Francisco Negro

Xueves 31 d’ochobre, 20.30h –

TEATRU XOVELLANOS
Duración aprox.: 100 min.