¡Mola ser PEQUE nel Concursu Hípicu de Xixón!

El Concursu Hípicu de Xixón amuesa un importante componente social y familiar: en cada edición, nes graes déxense ver families enteres d’aficionaos a les que’l Patronatu Deportivu Municipal (PDM) de Xixón, organizador del CSIO 2018, ufierta gratuitamente servicios d’entretenimientu pa tolos neños y neñes asistentes al Concursu Hípicu Internacional xixonés.

Estes visites en familia a Les Mestes son, con toa seguridá, la razón de que neños y neñes tengan un papel cada añu más destacáu en Les Mestes. Los numberosos puntos d’entretenimientu, que siempres reciben a numberosu públicu familiar, destaquen pol so coloríu y animación, n’un área atopadiza, cómoda y segura, na que los peques tán siempres a la vista de los sos padres.

El serviciu empréstase diariamente nel Complexu Deportivu de Les Mestes, mientres la celebración de los Concursos Hípicos Internacionales 2018, hasta’l 2 de setiembre n’horariu de 16:30 a 20:30 hores. Esti serviciu va empobináu a neñes/os con edaes ente los 3 y los 12 años.

Ufiértense dos árees de xuegos y en caúna d’elles hai instalada xuna zona de ludoteca pa neños/as d’hasta 5 años y otra zona de xuegos enchibles, la mayoría rellacionaos col deporte, pa neñes/vos a partir de 6 años. Los xuegos tán atendíos en tou momentu por un equipu de monitores.

El serviciu de Poni Park entámase tamién diariamente, como complementu  a la parte d’ociu infantil y al envís de averar a los más pequenos el deporte hípicu, facilitándo-yos un primer contactu col mundu del caballu, col so manexu y cuidu, d’una forma amena, didáctica y ensin riesgos. El serviciu empréstase tolos díes de Concursu, n’horariu de 17:00 a 20:30 –con un periodu de descansu de 30 minutos– incluyíos sábadu y domingu, nel Complexu Deportivu de Les Mestes.