Portada Música Misiva presenta’l curtiumetraxe “L’Últimu Aliendu”

Misiva presenta’l curtiumetraxe “L’Últimu Aliendu”

by redacción asturnews

Yá ta disponible ‘L’Últimu Aliendu’, el curtiumetraxe musical fechu colos trés nuevos cantares del grupu punk-rock Misiva Los moscones celebren el so décimu aniversariu con un EP y una obra audiovisual de temática post-apocalíptica realizada por Titi Muñoz.

Esti 2020 Misiva cumplíen 10 años faciendo punk-rock y pa celebralo embarcáronse nel so proyectu más ambiciosu: poner música a un curtiumetraxe. El vienres 24 d’abril estrenaron na so canal de YouTube ‘L’Últimu Aliendu’, obra de calter “post-apocalíptica” qu’entemez el bon facer de Titi Muñoz -reputáu realizador asturianu ganador d’un premiu AMAS en 2019 na estaya de meyor videuclip- y el d’esta banda moscona -con cuatro discos al so llombu y que tocó en prestixosos festivales como’l Resurrection Fest y el Tsunami Xixón-.

‘L’Últimu Aliendu’ ta formáu por trés nuevos cantares -”Esclavos del Momentu”, “Héroes Ensin Nome” y “Qu’Arda’l Sol”-, toos ellos cantaos n’asturianu dafechu y con un mensaxe de denuncia social y optimista a la par; mui afayadizos pa estos tiempos que tamos viviendo. Musicalmente reflexen la madurez de Misiva, con un soníu más rockeru, pero ensin perder de referencia el punk-rock d’influyencia anglosaxona que los caracteriza. Grabaos nos OVNI Estudios de Pablo Martínez (Desakato) y masterizaos n’Estaos Xuníos por Brad Boatright, estos temes asoleyáronse tamién en forma d’EP el sábadu 25 en toles plataformes dixitales.

Con esti estrenu, Misiva entamen a celebrar el so décimu aniversariu. La banda programara una proyección d’esta “roadmovie” nel Teatru Filarmónica d’Uviéu, pero a cuenta de la crisis del COVID-19 tuvieron que cancelala. YouTube foi la plataforma na qu’estrenaron el videu pa compartilu con tola xente que ta sufriendo’l confinamientu. Dempués llegará’l conciertu especial de celebración, programáu pal 4 de setiembre na sala Tribeca d’Uviéu y nel que van actuar xunto a Amplify.

Tamién te podria gustar